“O le Mea Tonu Lava Lenei na Matou Manaʻomia!”

O le auala lenā na faaleo mai ai lagona o se tinā i Italia ina ua ia maua le tusi Faalogo i le Faiaʻoga Sili. Na ia faapea mai: “Sa matuā faagaeetia aʻu ma na maligi oʻu loimata.” Na ia faaopoopo atili mai e faatatau i lana tama teine laʻitiiti e faapea: “E leʻi iloa e laʻu tama faitau, ae ou te faafetai ona o le fesoasoani a ata, lea ua ia manatua ai manatu autū. E uaʻi mai o ia i taimi uma auā o loo tusia faamatalaga i se auala e faatalanoa ona fai ma le tagata faitau, ma e tele lava ina fai ma talanoa mai. O se meaalofa aupito i sili lenei ua ma maua.”

Na faamatala mai e se tamā mai Italia e faapea, ua leva ona la tau mafaufau ma lana avā i se auala e la te talanoa atu ai i le la atalii laʻitiiti i le mataupu e faatatau i feusuaʻiga. Na la faapea mai: “Ina ua tatala aloaʻia mai lenei tusi, na ma manatu sa silafia mai e Ieova o ma popolega. Ina ua uma ona iloiloina faamatalaga i le tusi, sa amata loa ona ma fesoasoani i le tele e mafai ai e lenei tusi, ona faalaeiau i lo ma atalii ina ia mafaufau loloto ma le faaeteete ma fefulifulisaʻi.”

Na tusi faafetai mai se teine talavou mai Iapani, o lē na faaleagaina faaleituaiga a o laʻitiiti, mo le tusi ma faapea mai: “Sa ou matuā tagi lava ma ou faafetai ma saga faafetai iā Ieova. O loo manino ma faigofie ona faamatalaina e lenei tusi mea e ono fesagaʻia e tamaiti i lenei tupulaga amioleaga. O fesili o loo faalaeiauina ai ma le agalelei tamaiti e faailoa mai mea o loo i o latou loto. E ese le talafeagai o le mataupu e 32 mo le puipuia o tamaiti mai i tagata matutua amioleaga! E ono lē oo loʻu olaga i le mea ua iai pe ana ou maua lenei tusi i le 20 tausaga talu ai, o loo iai aʻoaʻoga tuusaʻo ma le faigofie.”

E mafai ona e talosagaina se kopi o lenei tusi e 256 ona itulau, ma ata mananaia, lea e pei o le mekasini lenei lona telē. E mafai ona maua sau tusi e ala i le faatumu mai o le kuponi o loo i le pito i lalo, ona lafo lea i se tuatusi talafeagai e pei ona lisi atu i le itulau e 5 o le mekasini lenei.

□ Faamolemole lafo mai saʻu kopi o le tusi e pei ona taʻua i inei.

□ Faamolemole faafesootaʻi mai aʻu mo se suʻesuʻega e aunoa ma se totogi.