Vala Tāua 1: Faatāua Mea e Ao Ona Faamuamua

“Ia outou faamautinoa o mea e sili ona tāua.”—Filipi 1:10.

Le Uiga. I faaipoipoga manuia, e faamuamua e paaga manaʻoga o le isi i lo o ona manaʻoga, po o meafaitino, galuega, uō, ma aiga. E tele le taimi o mātua e faaalu mo i laʻua ma le la fanau. E fiafia e faamuamua mea e lelei ai lo la aiga.—Filipi 2:4.

Le Tāua. I le Tusi Paia, e tāua tele aiga. O le mea moni, na tusi le aposetolo o Paulo o sē e lē tausia lona aiga “e sili lona leaga i lo le tagata e lē faatuatua.” (1 Timoteo 5:8) Peitaʻi, a o faagasolo le taimi, e suia mea e faatāua e tagata. O se faataʻitaʻiga na taʻua e se faufautua mo aiga, o le toʻatele o ē na auai i lana fonotaga, e foliga mai e sili ona faatāua galuega i lo o aiga. Na ia faapea mai, na latou fia iloa ni auala vave e foʻia ai faafitauli tau i aiga, ina ia vave ona toe uaʻi atu i galuega. O le ā se lesona mai lea mea? E faigofie le faapea mai e faamuamua le aiga ae e lē faigofie le faatinoga.

Faataʻitaʻi mea nei. Tali fesili o loo i lalo ina ia iloa ai po o le ā le tāua o lou aiga iā te oe.

▪ Pe a fia talanoa loʻu toʻalua po o laʻu tama, po ou te uaʻi vave atu i ai?

▪ Pe a ou talanoa i isi e faatatau i aʻu mea e fai, pe masani ona ou talanoa i mea e fai a lo matou aiga?

▪ Pe e faaitiitia oʻu tiute tauave (i le galuega ma isi mea) pe a manaʻomia aʻu e loʻu aiga?

Pe afai e te tali ioe i nei fesili, atonu e te manatu e saʻo mea o loo e faamuamua. Ae o le ā se manatu o lou toʻalua ma lau fanau? E lē na o ō tatou manatu e fua i ai po o fetaui mea o tatou faamuamua. Ma o le taʻiala lava lenā e tasi e fua i ai isi vala tāua e taulau ai aiga, o le a talanoaina i mataupu o sosoo mai.

Fai Sau Faaiʻuga Mautū. Mafaufau i ni auala e faaalia ai lou faamuamua o lou aiga. (O se faaaʻoaʻoga: Ia mafaufau e faaaogā tatau lou taimi mo lou toʻalua ma lau fanau, i lo o isi mea e lē tutusa le tāua.)

E manaia ae talanoa ma lou aiga i au faaiʻuga. Afai e lotomalie se tasi e faia se suiga, o le a faapena foʻi ona faia e isi.

[Ata i le itulau 3]

E faamuamua e se matua e taulau, lona toʻalua ma lana fanau