O le ā Sou Silafia e Uiga i Molimau a Ieova?

Na tusi mai se tagata faasalalau i Tenemaka e faapea: “E tele ina ou faitau i le Initaneti e uiga i Molimau a Ieova, na ou faalogo foʻi i nisi o tala feaveaʻi taufaaleaga e uiga iā i latou, ma iʻu ai ina sesē laʻu vaai i Molimau a Ieova.”

NA FAATALANOA e lenā tagata faasalalau se aiga e Molimau a Ieova. O le ā le iʻuga? Na tusi mai o ia: “Na matuā suia oʻu manatu ina ua ou ulufale i lo latou fale! Atonu o le lē malamalama o tagata, ma ua vave ai ona faia se faaiʻuga sesē e uiga i Molimau a Ieova. O le manatu foʻi lenā sa iā te aʻu. Ae na ou iloa ane, o aʻu e sesē.”—Cecilie Feyling, o Jydske Vestkysten.

E faavae i ana feutagaʻiga ma Molimau a Ieova i galuega, na iloa ai e se tagata faufautua o se faleoloa telē i Europa, o i latou o ni tagata faigaluega faamaoni. O lea, na manaʻo ai o ia e faafaigaluega tagata Molimau a Ieova.

E lauiloa Molimau a Ieova i la latou galuega talaʻi. Ua latou iloa, e iai ē e lē fia talanoa i le Tusi Paia, a o isi e fiafia. O le mea moni, e sili atu i le fitu miliona tagata i le tele o atunuu, o loo suʻesuʻe e lē aunoa le Tusi Paia ma Molimau a Ieova, ma mulimuli ane e avea nisi o i latou ma Molimau. O se faaaʻoaʻoga, na taʻua i le lipoti a le Fono a Ekalesia Tuufaatasi i Amerika e faapea, mai i lotu tetele e 25 i le atunuu, e na o le 4 tapuaʻiga e iai se faatelega, e aofia ai ma Molimau a Ieova.

Aiseā ua suʻesuʻe ai e le faitau miliona o tagata le Tusi Paia ma Molimau a Ieova? E faapefea ona faia nei suʻesuʻega? Po o faatalitalia e avea foʻi tagata suʻesuʻe ma Molimau a Ieova? E tāua lou iloa o tali o na fesili. O lea, aua e te faalogo i tala feaveaʻi taufaaleaga a tagata, ae ia saʻili i mea moni. Ua taʻua i le Faataoto 14:15: “E faatuatua le tagata ua leai se poto masani i upu uma, a o le tagata e iai le utaga mamao, e na te iloilo lelei ona laasaga.”

Tau ina ia fesoasoani lenei mataupu o le Ala Mai! e te malamalama lelei ai ma saʻo lau vaai i Molimau a Ieova. O lou faitauina o lenei mekasini, e iloa ai o oe o sē e fetālaʻi. A o e faitau i mataupu e fā e sosoo mai ma pusa o loo iai, suʻe i lau Tusi Paia mau o loo sii mai ai. * O lou faia faapea, e lē gata e atamai, ae e iloa ai oe o sē ‘e sili ona naunau e suʻesuʻe.’—Galuega 17:11.

[Faaopoopoga i lalo]