Le Manatu o le Tusi Paia

Pe e Mafai i le Faatigāina o Lou Tino Ona E Faalatalata Atu ai i le Atua?

E TOʻATELE tagata e faateʻia i le manatu e uiga i le faatigāina e tagata o o latou lava tino. A o tagata tapuaʻi ua faatigāina o latou tino i faiga, e pei o le sasa tigāina o o latou tino ona o talitonuga faalotu, anapogi mo ni taimi uumi, ma oofu i ofu talatala e faatigā ai o latou paʻu, ua lauiloa o ni faaaʻoaʻoga o le matataʻu i le Atua. O na faiga, e lē na o ni mea mai anamua. I lipoti mai i tala fou talu ai nei, e oo lava i taʻitaʻi lotu lauiloa i aso nei, o loo faatigāina foʻi o latou tino.

O le ā ua uunaʻia ai tagata e tapuaʻi i se auala faapena? Ua taʻua e se sui o se faalapotopotoga ua faapea mai o Kerisiano, “o le lotomalie e faatigāina o tatou lava tino, o se auala lea e aufaatasi ai ma Iesu Keriso i mafatiaga na lotomalie e oo iā te ia, e laveaʻi ai i tatou mai i le agasala.” E ui i manatu o taʻitaʻi lotu, ae o ā fa a le Tusi Paia i lenei mataupu?

Ia Faapelepele i Lou Tino

E lē o fautuaina pe manatu māmā le Tusi Paia i le faatigāina o lou lava tino pe a tapuaʻi atu i le Atua. Ae o loo faalaeiau pea e le Tusi Paia tagata e matataʻu i le Atua, ia tausi lelei o latou tino. Seʻi manatu i le auala o loo faamatala ai i le Tusi Paia le alofa i le va o le tane ma le avā. I le faasino atu i le auala e masani ona tausia ai e se tane lona lava tino, ua apoapoaʻi mai le Tusi Paia: “E tatau i tane ona alolofa atu i a latou avā e pei o o latou lava tino . . . E leai se tane e ita i lona lava tino; ae e na te fafaga ma faapelepele i ai, e pei foʻi ona faia e Keriso i le faapotopotoga.”​—Efeso 5:28, 29.

Pe e talafeagai le faatonuga ia alofa le tane i lana avā e pei o lona lava tino, pe afai ua faatalitalia tagata tapuaʻi e faatigāina o latou tino i le taimi o le tapuaʻiga? E manino mai, o ē e naunau i taʻiala a le Tusi Paia, ua faatalitalia e faapelepele ma alolofa i o latou lava tino, ma o lenei alofa e tatau ona aofia ai ma lana paaga.

O loo iai i le Tusi Paia le tele o mataupu silisili, e fesoasoani i le ʻaufaitau e faapelepele ai i o latou tino. O se faaaʻoaʻoga, o loo taʻua i le Tusi Paia, e aogā le faamalositino. (1 Timoteo 4:8) O loo taʻua i le Tusi Paia le aogā i le tino o nisi o meaʻai, ma aafiaga pe a lē lelei meaʻai.  (Faataoto 23:20, 21; 1 Timoteo 5:23) O loo faalaeiau i le Tusi Paia tagata ia tausia pea le soifua mālōlōina lelei, auā e tumau ai ona malolosi. (Failauga 9:4) Pe afai e faatalitalia ē e faitau i le Tusi Paia, e puipuia o latou soifua mālōlōina i auala nei, e faapefea la ona faatalitalia foʻi i latou e faatigāina o latou tino?​—2 Korinito 7:1.

Pe e Tatau i Kerisiano Ona Toe Faaāta Mai Mafatiaga o Iesu?

O loo iai pea nisi o faalapotopotoga i aso nei, o loo iai le vaaiga sesē i mafatiaga na onosaia e Iesu ma ona uluaʻi soo, ina ia lagolagoina ai le faatigāina e tagata o o latou lava tino. A o mafatiaga o loo faamatalaina e auauna a le Atua i le Tusi Paia, e leʻi faapea na faatigāina e le tagata lona lava tino. Ina ua taʻua e tusitala o le Tusi Paia mafatiaga o Keriso, na latou faia faapea ina ia faalaeiau ai Kerisiano e onosaia sauāga, ae lē ina ia sauāina ai i latou lava. O lea la, o ē o loo faatigāina o latou lava tino, e lē o faaaʻoaʻo iā Iesu Keriso.

O se faataʻitaʻiga: Seʻi faapea ua e vaai atu i sau uō mamae, ua fasi ma faileagaina e ni tagata feita. Ua e mātauina, o loo onosaʻi pea ma toʻafilemu lau uō, ae e lē o toe taui atu pe fai atu ni upu leaga. Afai e te fia faataʻitaʻi i lau uō, po o le a e fasi ma fai upu leaga iā te oe lava? E leai! O lenā ua e faataʻitaʻi i faiga a tagata faatupu vevesi. Afai e osofaʻia faapena oe, e na ona e taumafai lava e aua neʻi toe taui atu.

E manino la, e lē faatalitalia soo o Keriso e faatigāina i latou lava, e peiseaʻī ina ia faataʻitaʻi ai i tagata feita, na faapuapuagatia ma saʻili e fasioti Iesu. (Ioane 5:18; 7:1, 25; 8:40; 11:53) Nai lo o lea, pe a feagai ma sauāga, e tatau ona latou faaaʻoaʻo i le auala toʻafilemu na onosaia ai e Iesu tulaga faigatā.​—Ioane 15:20.

O se Tū e lē Faale-Tusi Paia

A o lumanaʻi le faa-Kerisiano, na pulea olaga ma le tapuaʻiga a tagata Iutaia i taʻiala faale-Tusi Paia, ma na taofia ai i latou mai le faia o se mea e faaleaga ai o latou tino. O se faaaʻoaʻoga, na faasā i le Tulafono tagata Iutaia mai i le seleiina o o latou tino, o se faiga e mautinoa sa taatele i nuu anamua e lē o ni Iutaia. (Levitiko 19:28; Teuteronome 14:1) Pe afai e leʻi finagalo le Atua e selei le tino, e lē finagalo foʻi la e faamāʻilaʻila le tino e ala i le sasa tigāina. E manino le taʻiala a le Tusi Paia​—e inosia e le Atua le faamanuʻalia ma le loto i ai e se tasi o lona lava tino.

E pei lava ona manaʻo se tusiata e faatāua lana ata, e finagalo foʻi Ieova le Atua, o Lē na faia mea, ia faatāua lana foafoaga, o le tino o le tagata. (Salamo 139:14-16) O le faatigāina e se tasi o lona lava tino, e lē mafai ona faamalosia ai le la faiā ma le Atua. Ae e faavaivaia ma faasesēina ai aʻoaʻoga a Evagelia.

Na faagaeeina Paulo e tusi e uiga i nei aʻoaʻoga lē alofa a tagata: “O le mea moni, o mea lava na ua faaalia e se tagata e tapuaʻi e tusa ma ona lava manatu, ma le faatagā lotomaulalo, ua faaleaga ai le tino ma e foliga mai o ni gaoioiga atamai ia, ae e lē aogā na mea i le taofiofia o tuʻinanauga o le tino.” (Kolose 2:20-23) E mautinoa e matuā leai se aogā o le faatigāina e se tasi o lona tino, ina ia faalatalata atu ai i le Atua. Nai lo o lea, e faafouina, e avegofie ma māmā mea e manaʻomia mai i le tapuaʻiga moni i le Atua.​—Mataio 11:28-30.

PO O E TAUMĀNATU EA I NISI TAIMI?

● O le ā le silasila a le Atua i le tino o le tagata?​—Salamo 139:13-16.

● Pe e mafai i le faatigāina o lou lava tino, ona taofiofia ai ou tuʻinanauga leaga?​—Kolose 2:20-23.

● Po o se avega mamafa ma faigatā le tapuaʻiga moni?​—Mataio 11:28-30.

[Ata i le itulau 27]

E manino le taʻiala a le Tusi Paia​—e inosia e le Atua le faamanuʻalia ma le loto i ai e se tasi o lona lava tino

[Ata i le itulau 26]

O se tagata faimalaga o loo tolotolo i ona tuli e alu i le lotu

[Ē Ana le Ata]

© 2010 photolibrary.com