Le Manatu o le Tusi Paia

ʻE Tuusaʻoloto Outou e le Upu Moni’​—E Faapefea?

E FAITAU miliona tagata e manatu o loo saʻoloto, ae o le mea moni e leai. Mo se faataʻitaʻiga, e toʻatele ua faapologaina i faiga faanuupō. O isi e fefefe i ē ua feoti, ma ua taumafai e faamalie i latou i meaalofa taugatā. Ae o isi ua lē mautonu po o le ā le mea e tupu i le tagata pe a oti, ma e matuā fefefe lava i le oti. Pe e mafai ona tuusaʻoloto na tagata mai i nei manatu, faalogona, faapea ma faigatā tau tamaoaiga? Ioe! E pei o fetalaiga a Iesu o loo taʻua i luga, e pau lava le mea e maua ai le saʻolotoga o le upu moni. Ae o le ā le upu moni? O le upu moni e pei ona masani ai po o se ituaiga upu moni patino?

Na manino lava le tali a Iesu. Na fetalai o ia: “Pe a outou tumau i aʻu upu, ma e iloa e outou le upu moni, e tuusaʻoloto foʻi outou e le upu moni.” (Ioane 8:31, 32) O “upu” a Iesu, o ana aʻoaʻoga o loo maua i le Tusi Paia.

Ina ua faapea mai Iesu “e tuusaʻoloto foʻi outou e le upu moni,” sa ia faasino faapitoa atu i le faasaʻolotoina mai le agasala ma le oti. Peitaʻi, o le iloaina o le upu moni e uiga i le Afioga a le Atua, e mafai foʻi ona tuusaʻoloto ai i tatou mai i mea e pei o faiga faanuupō, le fefefe i tagata ua feoti, ma le fefe i le oti. E faapefea?

1. Tuusaʻoloto mai i faiga faanuupō. E talitonu le toʻatele e iai ni mea po o ni fuainumera faapitoa o le a aumaia ai ni āuga leaga. O isi e mumusu e faia ni faaiʻuga tāua, seʻi vaganā ua vaai muamua i tapui pe faafesootaʻi o latou fetu pe saʻili i agaga leaga.

Le auala e tuusaʻoloto ai e le upu moni o le Tusi Paia: I taimi o le Tusi Paia, o nisi o tagata o le Atua na avea ma ē e talitonu i faiga faanuupō, ma na oo lava ina tapuaʻi i le “atua o le Laki” ma le “atua o Iʻuga Tuupōina”! O le ā le silafaga a Ieova i nei faiga? Na ia fetalai mai: “Ua outou faia pea mea e leaga i laʻu vaai.” (Isaia 65:11, 12) O le faalogona lava lenā e tasi o le Atua e faatatau i tagata o loo saʻili atu i agaga mo le taʻitaʻiga i le olaga: “O se tasi e alu atu i sē e saʻili i agaga . . . e inosia e Ieova.”—Teuteronome 18:11, 12.

O faiga faataulāitu ma faaagaga e iai lamatiaga auā o “togafiti a le Tiapolo,” o lē na taʻua e Iesu o le “tamā o le pepelo.” (Efeso 6:11; Ioane 8:44) Pe a manaʻomia se taʻitaʻiga i se mataupu tāua, pe o le a e faafesootaʻia se tagata pepelo? O le mea moni e leai! O le mea lea, o se faiga atamai lou ʻalofia o so o se mea e fesootaʻi atu i le “tamā o le pepelo.”

O le auala sili i le faia o ni faaiʻuga lelei i le olaga, o le atamai e faavae mai i le poto saʻo e uiga i mataupu silisili o le Tusi Paia, ma le finagalo o le Atua mo le fanau a tagata. Ua taʻua i le Faataoto e 2:6: “O Ieova e na te foaʻi mai le atamai; e mai i lona fofoga foʻi le poto ma le faautaga loloto.”

2. Tuusaʻoloto mai i le fefe i tagata ua feoti. E toʻatele tagata e talitonu o “agaga” o tuaa ua maliliu, e mafai ona iai ni taaʻiga i ē o loo ola. E manatu i latou e tatau ona faamalie nei “agaga” e ala i taulaga eseese, ina ia aua ai neʻi o latou feita. O le iʻuga, o nisi ua faia ni aitalafu tetele e totogi ai taulaga ma sauniga faalotu.

Le auala e tuusaʻoloto ai e le upu moni o le Tusi Paia: Ua taʻu mai e le Tusi Paia iā i tatou le mea moni e faatatau i ē ua feoti. Mo se faaaʻoaʻoga, fai mai Iesu o ē ua maliliu o loo ʻmomoe.’ (Ioane 11:11,14) O le ā na uiga i ai? E maua le tali i le Failauga 9:5: “O ē ua ola ua latou iloa e oti i latou; a o ē ua oti, latou te lē iloa se mea.” Ioe, o lē ua oti ua faatusaina i se tagata  o loo moe gase, ua matuā lē toe iloa se mea. O le mea moni, ua lē o toe iai, ma e lē mafai ona latou toe faia ni mea lelei po o ni mea e tatou te afāina ai.

Peitaʻi o nisi tagata e faapea mai ua latou fesootaʻi atu i ē ua maliliu. E mafai faapefea? Ua toe tali foʻi le Tusi Paia. Ua taʻu mai iā i tatou e faapea i le amataga lava o le talafaasolopito o tagata, sa iai ni agelu na fouvale faasaga i le Atua. (2 Peteru 2:4) O nei agaga leaga ua taʻua o temoni, ua taumafai e faasesē le fanau a tagata. (1 Timoteo 4:1) O se tasi o auala na latou faia ai lenei mea, o le faafoliga mai i tagata ua maliliu, ma faamalosia ai le pepelo e faapea o loo feola pea ē ua maliliu i se isi nofoaga.

3. Tuusaʻoloto mai i le fefe i le oti. E moni o le oti o se fili, e pei lava ona fai mai ai le Tusi Paia. (1 Korinito 15:26) O lea, e talafeagai ona tatou fefefe i le oti ma lē mananaʻo e feoti. Ae e lē tatau ona tatou soona fefefe i le oti.

Le auala e tuusaʻoloto ai e le upu moni o le Tusi Paia: E ese mai i le faailoa mai o le mea moni e faatatau i le tulaga o ē ua feoti, ae o loo faailoa mai foʻi i le Tusi Paia e faapea e finagalo le Atua e toe faafoʻisia le ola o ē ua maliliu e ala i le toetū. Na faapea mai Iesu: “E oo mai le itula e faalogo ai i latou uma o loo i tuugamau i lona leo, ma latou ō mai ai.”—Ioane 5:28, 29; Galuega 24:15.

O le ā le ituaiga o tino o le a latou “ō mai ai”? Na faaalia mai e Iesu le tali ina ua ia toe faatutūina nisi mai le oti. I taimi taʻitasi, na toe foʻi mai le tagata i lona tino ma ona foliga na iai muamua. (Mareko 5:35-42; Luka 7:11-17; Ioane 11:43, 44) E fetaui lelei lenei mea moni ma le upu “toetū,” o lona uiga o le “tū i luga.” Ina ua fetalai atu le Atua i lana auauna matua o Tanielu, na ia faapea atu: “E te mālōlō ae e te tū mai i lou tofi i le iʻuga o aso.” (Tanielu 12:13) Maʻeu le faamāfanafanaina o Tanielu i na upu, na mafai ai e ia ona fesagaʻia ma le lototele ma le mamalu le oti!

O se tasi o māfuaaga na maliu mai ai Iesu i le lalolagi, ina ia “talaʻi [atu] le saʻolotoga i ē ua ave faapagota”—o ē o loo faapologaina i talitonuga sesē. (Luka 4:18) Talu ai o loo maua i le Tusi Paia ana aʻoaʻoga, o le a faaauau ai ona tuusaʻoloto tagata i aso uma. E matou te matuā faamoemoe o le a aumaia iā te oe e upu moni o le Tusi Paia se saʻolotoga tumau.

PO O E TAUMĀNATU EA I NISI TAIMI?

E faapefea ona tuusaʻoloto i tatou e le upu moni o le Tusi Paia mai i

● faiga faanuupō?​—Isaia 8:19, 20; 65:11, 12.

● le fefe i tagata ua feoti?​—Failauga 9:5; Ioane 11:11, 14.

● le fefe i le oti?​—Ioane 5:28, 29; Galuega 24:15.

[Ata i le itulau 27]

E tuusaʻoloto e le upu moni o le Tusi Paia tagata mai i faiga faanuupō, le fefe i tagata ua feoti, ma le matuā fefefe i le oti