Na taʻua e se Matagaluega mo le Saogalemu o le Atunuu a Amerika, i le sefulu tausaga ua mavae, pe tusa ma le 50 miliona mea e lē faatagaina ona ave i luga o vaalele, na aveesea e tagata e faigaluega mo le saogalemu i le malaevaalele. I le 2011, e silia i le 1,200 fana na taofia e nei tagata faigaluega. O le toʻatele o ē e ana na fana na faapea mai, sa galo iā i latou o loo latou tauaveina na fana.

Ua faapipii e faauluuluga o aʻoga ni tamaʻi masini (electronic chips) i ofu aʻoga o tamaiti, ina ia ʻalofia ai le lē aʻoʻoga o tamaiti e aunoa ma se faatagaga. E maua e le matua se feʻau tusitusia pe a iloa mai i le masini ua taunuu lona alo i le aʻoga, ma pe afai foʻi ua 20 minute ua tuai ai i le aʻoga.

Ua lē o toe avea nei le Lotu Luteru ma lotu aloaʻia i le malo o Nouē. O le taimi muamua lenei ua palota ai le Palemene o Nouē e toe teuteu la latou tulafono faavae, ma aveesea sootaga a le lotu ma le malo.

I se suʻesuʻega na faia, o le lua vaetolu o tagata faigaluega o Czech e manatu e tatau ona tali atu i valaau, imeli ma feʻau tusitusia e fesootaʻi i le galuega, e tusa lava pe e lē o faigaluega. E sili atu i le tasi vaetolu e manatu o se lē faaaloalo pe a lē vave tali atu.

E ui e toetoe 50 pasene ua faatupulaʻia ai taumafa i Initia talu mai le 20 tausaga ua mavae, ma e 71 miliona tone o le araisa ma le saito o loo faaputu, ae o loo fia aai pea ona tagata. E na o le 40 pasene o meaʻai o loo faaputu, ua mafai ona oo atu i aiga i Initia. O nisi o māfuaaga o lenei faafitauli ona o faiga piʻopiʻo ma le faamaʻimau o meaʻai.