I aso taʻitasi, e silia ma le 20 i latou sa iai i vaegaau a Amerika e pule i o latou ola. I masina taʻitasi, pe tusa ma le 950 i latou ua loa soifua sa avea ma fitafita o taua, ma o loo tausia e le U.S. Department of Veterans Affairs, e taumafai e pule i o latou ola.

Ua lipotia mai i le China Daily e faapea: ʻE toetoe lava o le ʻafa o le aofaʻi o tamaʻitaʻi e leʻi atoa le taʻi 30 tausaga, o ē e saʻili ni a latou galuega i isi vaipanoa o le atunuu, e iʻu ane ua maʻitaga ae e leʻi faaipoipo. O se faatelega tele lenā i le fuainumera o tamaʻitaʻi ua maʻitaga ae e leʻi faaipoipo, pe a faatusatusa atu i tausaga ua mavae.’ Ua lipotia mai foʻi, ua taliaina i le aganuu a Saina le nonofo faatasi o ni tagata e leʻi faaipoipo.

Ua toe vaaia i Eleni le aliaʻe mai o le faamaʻi o le malaria, lea na manatu sa tafiesea mai i le atunuu i le 1974. O loo tuuaʻia le paʻū maulalo o le tamaoaiga, faapea le taugatā o togafitiga faafomaʻi mo le toe aliaʻe mai o lenei faamaʻi.

Ua faaalia i se tasi o suʻesuʻega, e ui i le tele o suiga i le atunuu, ae o le 74 pasene o tagata e mananaʻo lava e filifili e o latou mātua ni a latou paaga faaipoipo. E lē gata i lea, o le 89 pasene o tagata e filifili e nonofo faatasi ma o latou tauaiga, nai lo o le nonofo na o i latou lava.

“Ua mou atu le malosi o le Lotu [Katoliko] i atunuu mauʻoa o Europa ma Amerika. Ua autausagā a tatou tū masani, ua tetelē naʻuā a tatou falesā, ua gaogao a tatou monaseri ma nofoaga mo faifeʻau ma taupousa, ma e lē lelei le auala e pulea ai, e faalialiavale le auala e faia ai a tatou sauniga faalelotu, faapea ofu talaloa e faaaogā e faifeʻau. . . . O loo faia pea e le Lotu mea o le 200 tausaga ua mavae pe a faatusatusa mai i aso nei.”​—Faatalanoaga ma le katinale Katoliko o Carlo Maria Martini a o leʻi maliu, na lomia i le Corriere della Sera.