E masani ona lua finau ma lau tama e fā tausaga po o ai e fai le mea e manaʻo i ai, ma e mālō lava lau tama i le tele o taimi.

• Pe a e faatonu o ia e fai se mea ae e lē manaʻo e fai, e na te lē amanaʻia oe.

• Pe a e faatonu o ia e aua le faia se mea o loo manaʻo e fai, e faalii o ia.

E te ono mafaufau: ʻE pau lava o uiga o tamaiti, ma atonu e lē toe iai na uiga pe a matua.’

E mafai ona e aʻoaʻo lau fanau ia usiusitaʻi. A o leʻi talanoaina le auala e faia ai faapea, seʻi iloilo se māfuaaga atonu e lē usiusitaʻi ai fanau.

Ina ua faatoʻā fanau lau tama, o lau tiute tauave autū o le tausia lea o ia. E te nofosauni e faia so o se mea e manaʻo ai. E amata loa ona tagitagi mai, e te faatopetope atu e fai le mea e manaʻo i ai. O le mea moni, e tatau ma talafeagai lou faia faapea, auā e manaʻomia e le pepe le tausiga a mātua i taimi uma.

Peitaʻi, i le mavae ai o masina o lenā tausiga, o le a mafaufau le tamaitiiti o ia e sili i lona aiga, ma e auauna ona mātua e fai mea e manaʻo i ai. E lua ane tausaga o le tamaitiiti, ua ia iloa le mea moni e faapea, ua uma le taimi na fai ai so o se mea na manaʻo i ai. O le a lē toe faia e ona mātua mea e manaʻo i ai o ia, ae ua faatalitalia o ia e mulimuli i faatonuga a ona mātua. O lenei tulaga e ono faateʻia ai le tamaitiiti, ma o nisi e tali atu i le faalii, pe tofotofo i o latou mātua e ala i le lē usiusitaʻi.

I lenā taimi faigatā, e ao i le matua ona faatino se isi tiute tauave fou, o le tū lea i lona tulaga pule ma avatu faatonuga i le mea e tatau ona fai e le tamaitiiti. Ae faapefea pe a lē amanaʻia pe teena e le tamaitiiti na faatonuga, e pei ona faaalia i le ata?

Ia tausolomua. E lē talia e lau tama lau pule o se matua, seʻi vaganā ua vaai mai o e tausolomua e faatino  lenā pule. O lea, e tatau ona faailoa atu lau pule i se auala paleni. I nai tausaga ua mavae, na taʻua e nisi o ē e faapea mai e atamamai, e lē talafeagai ona faaaogā le upu “pule.” Na faapea mai le tasi e “sesē” ma e “lē talafeagai” le pule faamātua. I le isi itu, o le tuufau, e lagona ai e le tamaitiiti le lē mautonu ma fai ai le mea e loto i ai. O le faia faapea e lē fesoasoani i tamaiti e avea ai o ni tagata matutua maufaatuatuaina.​—Mataupu silisili o le Tusi Paia: Faataoto 29:15.

Avatu aʻoaʻiga. Ua taʻua i se lomifefiloi, o le aʻoaʻi o lona uiga o le “toleniga e usiusitaʻi ma pulea totino ai, e ala i le faia o ni tulafono ma faasalaga pe a solia na tulafono.” E moni, e lē tatau ona avatu aʻoaʻiga i se auala sauā ma lē magafagafa. Ae i le isi itu, e lē tatau ona avea o se mea e tau ina fai pe leai foʻi ni faasalaga, ma lē uunaʻia ai le tamaitiiti e fai ni suiga.​—Mataupu silisili o le Tusi Paia: Faataoto 23:13.

Ia faamanino atu. O nisi mātua e tau ina talosaga atu i le tamaitiiti ia usitaʻi. (“E mafai ona tapena lou potu, faamolemole?”) Atonu e manatu mātua o le auala lea e faaali atu ai uiga lelei. Peitaʻi, o lenā auala, e mafai ona lolo atu ai mātua i le fanau. O le a iloilo e le fanau itu lelei ma itu lē lelei o le talosaga, ona filifili lea pe e usiusitaʻi pe e leai. Nai lo le lafoaʻi o lou tulaga pule, ia avatu ni faatonuga manino.​—Mataupu silisili o le Tusi Paia: 1 Korinito 14:9.

Ia maumauaʻi. Pe a e fai atu e leai, ia tausisi i ai ma ia tutusa a oulua tala ma lau paaga. Pe a fai sa oulua faaiʻuga i se faasalaga e tuuina atu ona o le lē usiusitaʻi, ia faamautinoa e faataunuu. Aua le toe suia pe faamatala umi atu le māfuaaga o le lua faaiʻuga. O le a faigofie mo oe ma lau tama pe afai e ʻavea lau upu o le Ioe, ia Ioe, ma le Leai, ia Leai.’​—Iakopo 5:12.

Ia alofa. O le aiga e lē o se pulega e faatemokalasi pe tautalatasi. Nai lo lea, o se faatulagaga mai le Atua e taʻitaʻia ai ma le alofa le fanau ia avea ma tagata matutua maufaatuatuaina. O se tasi o vala o lenā faatulagaga, o le aʻoaʻi lea o lau tama ia usitaʻi, ma fesoasoani iā te ia e lagona le saogalemu i lou alofa.