E foliga mai e matuā lē iloa e lau tama e ono tausaga faaalia le amio pulea. Pe a manaʻo i se mea, e manaʻo loa e avatu i le taimi lava lenā. O nisi taimi e ee mai pe a ita. Ua e taumānatu: ʻPe e pau lava o uiga o tamaiti? Po o le a teʻa ia uiga pe a matua o ia, po ua tatau ona ou aʻoaʻo o ia e faaalia le amio pulea?’

Ua manatu māmā tagata i le faaalia o le amio pulea ona o tū ma aganuu i aso nei. Na tusi Dr. David Walsh: “I a tatou aganuu soona tuufau, e masani ona faalogo tagata matutua ma tamaiti i manatu e faapea, ia fai so o se mea e tatou te mananaʻo i ai. E masani ona tatou faalogo o faapea mai ē e fia fesoasoani moni i isi, ma i latou e aumaia fautuaga lē lelei ina ia suʻe ai a latou tupe, e tatau ona tatou lolo atu e fai mea e tatou te mananaʻo i ai.” *

E tāua le aʻoaʻo ia amio pulea mai lava a o lāiti. I se suʻesuʻega sa faia mo se taimi umi, na tuu atu ai e ni tagata suʻesuʻe i ni tamaiti e taʻi fā tausaga, se meaʻai e taʻu o le marshmallow. Na faailoa atu i tamaiti e pule i latou pe ʻai loa i le taimi lenā, pe faatali mo sina taimi ona maua atu lea o se isi marshmallow e taui ai lo latou onosaʻi. Ina ua matutua nei tamaiti, na iloa ai, o i latou na faaalia le amio pulea po o le onosaʻi, sa sili atu ona taulau manuia i le aʻoga, i le itu tau faalogona, ma le auala e feagai ai ma isi.

Iʻuga leaga o le lē aʻoaʻoina o tamaiti ia faaalia le amio pulea. E talitonu tagata suʻesuʻe, o mea e tutupu i le olaga o se tamaitiiti e mafai ona aafia ai le auala e gaoioi ai lona faiʻai. O le ā le uiga o lea manatu? Ua taʻua e Dr. Dan Kindlon, “afai e faamatanana a tatou fanau, lē aʻoaʻoina ia iloa faatali, ia ʻalofia le manaʻo e fai atu loa le mea o loo loto i ai, ma ia teena faaosoosoga, atonu la o le a lē iā te ia uiga ia e iloa ai sē e maufaatuatuaina ma faamaoni.” *

Ia faataatia se faaaʻoaʻoga. Po o e faaalia le amio pulea? Po o mātauina e lau tama e te maitaita pe a poloka le auala tele ma tuai ona e oo i luma o le laina i se faleoloa, pe e te faasalavei atu foʻi a o talanoa isi? Na tusi Dr. Dan Kindlon: “O le auala e sili ona lelei e fesoasoani ai i a tatou fanau ia faaalia le amio pulea, o lo tatou faaalia lea o lenā uiga.”​—Mataupu silisili o le Tusi Paia: Roma 12:9.

Ia faailoa i lou alo āuga e oo i ai. E fua i le matua o lou alo, ia fesoasoani iā te ia e iloa e iai aogā o lona lē faia o mea e manaʻo i ai, ma āuga leaga e oo i ai pe a ia faia mea o loo manaʻo i ai. O se faataʻitaʻiga, pe a ita lou alo ona ua faatigā i ai se tasi, fesoasoani iā te ia e nofo ma fesili ifo: ʻPe e lelei pe a ou toe tauimasui atu, po o le a ou tigā ai? Pe e iai se isi auala e sili atu ona lelei ou te fesagaʻia ai le faafitauli? Pe e lē sili atu ona lelei pe a ou savali ese?’​—Mataupu silisili o le Tusi Paia: Kalatia 6:7.

Ia faalaeiau lou alo. Ia faamālō atu i lou alo pe a ia faaalia le amio pulea. Ia faailoa atu i ai, e ui atonu e lē faigofie i taimi uma le lē faia o mea o loo manaʻo i ai, ae o i inā e iloa ai lona toa. Ua faapea mai le Faataoto 25:28: “O le tagata e lē pulea o ia lava ua pei o se aai ua osofaʻia ma ua solofa le pā.” Peitaʻi ua taʻua i le Faataoto 16:32, “e sili o lē e faagesegese lona ita nai lo o le toa.”

Ia faataʻitaʻi. Ia faataʻitaʻi se tala faatino e faaulutalaina “O le ā e Tatau Ona Fai?” po o le “Filifiliga Saʻo ma Filifiliga Sesē,” po o se isi lava ulutala. Ia iloilo ni mea e ono tutupu ma faataʻitaʻi le auala e ono tali atu ai, ona vaai lea po o lē fea auala e “lelei” ma le auala e “sesē.” Ia mataalia i auala eseese e aʻoaʻo ai fanau, e pei o le tusia o ni ata. Ia fai ni mea e aogā ma fiafia i ai tamaiti. O le mea tāua, ia fesoasoani i lou alo ia iloa, e sili atu le faaalia o le amio pulea nai lo o le vave gaoioi ae lē mafaufau muamua.​—Mataupu silisili o le Tusi Paia: Faataoto 29:11.

Ia onosaʻi. Ua taʻua i le Tusi Paia “ua fusifusia le loto o le tama i le valea.” (Faataoto 22:15) O lea, ia aua neʻi faatalitalia e vave ona atiaʻe e lou alo le amio pulea. Ua taʻua i le tusi Teach Your Children Well: “O lenei toleniga e umi se taimi e alu ai, e faifai lemū ona iai suiga, e iai taimi e lē taulau ai, ma e iai nisi suiga e lelei atu.” Peitaʻi, o le a aogā au taumafaiga uma. Ua taʻua atili i le tusi: ʻO se tamaitiiti e faaalia le amio pulea, o le a telē le avanoa e na te faaalia ai le amio pulea, pe a faaosoosoina e faaaogā fualaau faasāina i le sefulu lua o ona tausaga, pe faia feusuaʻiga i le sefulu fā o ona tausaga.’