UA LEVA ona manatu tagata o loka faanifo o se kia o se taavale po o se masini, o ni mea e na o le atamai faaletagata e mafai ona faia. Peitaʻi ua faamaonia le sesē o lenā manatu. Ua iloa nei e iai foʻi mea e pei o ni loka faanifo i vae o le iniseti e taʻua o le Issus leafhopper, a o lāiti. O nei iniseti e maua i togālaau i Europa. *

E pei o le emo o le mata le vave tele o le oso a le leafhopper. E 3.9 mita le saosaoa e mafai ona oso ai i totonu o le sekone e tasi, ma e toetoe 200 taimi e aafia ai lona tino i le malosiaga o le kalave nai lo o le tulaga masani. Ina ia lelei le puna a le leafhopper, e manaʻomia i vae e lua e pito i tua o lenei iniseti, ona tutusa lelei le taimi e oso ai ma ia tutusa le malolosi. E faapefea ona tupu lenei mea?

Ia Mātau: Ua iloa e saienitisi, o loo iai i le pito i luga o vae pito i tua o le leafhopper, ni mea se lua e pei o ni loka faanifo o se kia. Pe a oso lenei iniseti, e faamautinoa e nei loka faanifo ua gatusa lelei ona vae e lua. Auā a leai, o le a lē sagatonu la le oso a le leafhopper.

Pe a oso se meaola lapoʻa, e faalagolago o ia i neula o lona tino ina ia faamautinoa ai ua gatusa ona vae. Peitaʻi, e faaaogā e le leafhopper ia loka faanifo o loo i ona vae, ona e vave atu nai lo o le faalagolago i neula o lona tino. Ua taʻua e se tusitala ma o se tagata suʻesuʻe e igoa iā Gregory Sutton: “E masani ona tatou manatu e na o masini e faia e tagata e maua ai loka faanifo i kia.” Na ia taʻua atili, ua māfua ona tatou manatu faapea ona ʻe tatou te leʻi matuā faia ni saʻiliʻiliga i isi mea.’

O le ā sou manatu? Pe na teʻi lava ua iai loka faanifo i vae o le Issus leafhopper? Pe na foafoaina?