LE TULAGA MONI I ASO NEI

I le lalolagi aoao, ua taatele ai le uiga lē faapalepale, ma ua faateteleina ona o faiga faailogalanu, faaituʻau, lotonuu, loto ituaiga, ma faiga faalotu maelega valea.

LE MANATU O LE TUSI PAIA

A o faia le talaʻiga a Iesu i le lalolagi, sa siʻomia o ia i tagata e lē faapalepale. Sa matuā feitagaʻi le va o tagata Iutaia ma Samaria. (Ioane 4:9) Sa manatu tagata e sili atu tamāloloa nai lo o fafine, ma na manatu faatauvaa taʻitaʻi lotu i tagata lautele. (Ioane 7:49) Peitaʻi na tū ese mai ai Iesu. Na faapea mai ona fili: “Ua talia e lenei tagata o ē e agasala, ma aai faatasi ma i latou.” (Luka 15:2) Sa agalelei, onosaʻi ma faapalepale Iesu, auā e leʻi sau o ia e faamasino tagata, ae ina ia faamālōlō i latou i le itu faaleagaga. O lona alofa na uunaʻia ai o ia e gaoioi faapea.—Ioane 3:17; 13:34.

O le alofa, o le auala sili lea e avea ai se tasi ma sē e faapalepale ma agalelei atu i isi, e ui lava i o latou tulaga lē lelei atoatoa ma vaivaiga faaletagata. Ua faapea mai le Kolose 3:13: “Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi.”

“Ae e sili i nei mea uma, ia tele le alofa o le tasi i le isi, auā o le alofa e ufiufi ai le anoanoaʻi o agasala.”​—1 Peteru 4:8.

LE TULAGA MONI

O le tele o atunuu ma vaipanoa e iai a latou tulafono ina ia mafai ai ona sologa lelei ma filemu le tulaga o mea. O le faia faapea, e masani ona pulea ai amioga a tagata.

LE MANATU O LE TUSI PAIA

ʻE lē amio valea le alofa.’ (1 Korinito 13:5) E ui o Iesu o se faaaʻoaʻoga lelei i le faaalia o le faapalepale, ae e leʻi manatu māmā ai o ia i amioga matagā, le faafiaamiotonu ma isi mea leaga. Na ia taʻusalaina ma le lototele na mea. (Mataio 23:13) Na fetalai o ia i le Ioane 3:20: “E ʻinoʻino i le malamalama [o le upu moni] lē ua faia mea e sili ona leaga.”

Na tusi le aposetolo o Paulo: “Ia ʻinoʻino i le leaga, ae pipii i le lelei.” (Roma 12:9) Sa ola Paulo e tusa ma ana upu. O se faataʻitaʻiga, o Paulo o se Iutaia, ma ina ua vavaeese nisi Kerisiano Iutaia mai i Kerisiano e lē o ni Iutaia, sa faasaʻo ma le maumauaʻi e Paulo na Kerisiano Iutaia, ae i se auala agalelei. (Kalatia 2:11-14) Sa iloa lelei e Paulo “e lē faailogaina tagata” e le Atua, ma e lē finagalo ia iai ni faiga faailogalanu i Ona tagata.​—Galuega 10:34.

I le avea ai ma Kerisiano, e saʻili atu Molimau a Ieova i le Tusi Paia mo taʻiala e faatatau i amioga. (Isaia 33:22) E latou te lē faapalepale pe manatu māmā i amioga leaga, auā e tatau ona mamā le faapotopotoga Kerisiano, ma ia lē faaleagaina i tagata e lē amanaʻia tapulaa a le Atua. O le pogai lea e usitaʻia ai e Molimau le faatonuga manino mai i le Tusi Paia: “Ia faateʻaeseina lenā tagata leaga mai iā te outou.”​—1 Korinito 5:11-13.

“O outou o ē e alolofa iā Ieova, ia outou ʻinoʻino i le leaga.”​—Salamo 97:10.

TALITONUGA TAATELE

O le a faaauau pea ona iai le leaga iā i tatou ona na fananau mai lava ma i tatou.

LE MANATU O LE TUSI PAIA

Na tatalo le perofeta o Sapakuka i le Atua: ʻAiseā ea ua e silasila mai ai pea i puapuaga? Aiseā ua faoa ai mea ma faia faiga sauā i oʻu luma, aiseā foʻi ua faia ai fefinauaʻiga ma tulaʻi mai ai misa?’ (Sapakuka 1:3) E leʻi tuua e le Atua lana perofeta ina ia faaauau ona popole, ae sa Ia faamautinoa atu iā Sapakuka o le a Ia faasalaina tagata amioleaga. Na fetalai le Atua “e oo mai lava” lenā folafolaga, ma “e lē faatuai mai.”​—Sapakuka 2:3.

I le taimi e tasi, o loo iai i tagata amioleaga le avanoa e liliuese ai mai i o latou ala leaga. Ua taʻua i le Esekielu 18:23: “ʻPo ou te fiafia ea i le oti o le tagata amioleaga,’ ua fetalai mai ai le Alii Pule Silisili Ese o Ieova, ʻae po ou te lē fiafia ea pe a liliuese o ia mai i ona ala ma ola ai pea o ia?’” O ē e lafoaʻi o latou ala leaga ae saʻili atu iā Ieova, e mafai ona mautinoa i le mauaina o se lumanaʻi matagofie. Ua faapea mai le Faataoto 1:33: “O lē e faalogo mai iā te aʻu, o le a saogalemu ma lē fefe i so o se puapuaga.”

“Ua toeitiiti lava ona lē toe iai lea o le tagata amioleaga . . . A o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”​—Salamo 37:10, 11.