Sa Tausisi i Ona Talitonuga
I le 11 o tausaga o Song Hee, na mātauina ai e lona tinā se piʻo e lē masani ai i le papatua o Song Hee. Na siaki e se fomaʻi ma iloa ai ua aafia o ia i le scoliosis, o se piʻo i le tuasivi e foliga e pei o se mataʻitusi “C” po o le “S.” Na matuā leaga le tulaga o Song Hee, ma na manaʻomia ona faia se taotoga. Peitaʻi, e lē talia e Song Hee se tuigātoto. Sa fesiligia o ia e le Ala Mai! e faatatau i le mea na tupu.
Ina ua e aafia, pe na mafai e fomaʻi ona fesoasoani iā te oe?
E pe ā ma le tolu tausaga o siaki pea aʻu e ni fomaʻi se toʻalua, peitaʻi na faateteleina le piʻo i loʻu tuasivi. Sa matuā leaga loʻu tulaga ma iʻu ai ina tau pipii atu loʻu tuasivi i loʻu fatu ma oʻu māmā, ma faigatā ai ona ou mānava. O lea sa manaʻomia loa ona faia soʻu taotoga.
Pe sa e ioe e fai sou taotoga?
Ioe. Peitaʻi, na fai mai fomaʻi o le a faigatā loʻu taotoga. O le taimi lea ua 116 tikeri le piʻo o loʻu tuasivi, ma o se tulaga e matuā tugā. Peitaʻi, na tulaʻi mai foʻi se luʻi mo aʻu lava ia pe a fai loʻu taotoga. Ou te lē talia se tuigātoto ona o oʻu talitonuga faaletapuaʻiga e faavae mai i le Tusi Paia. *
Pe na maua se fomaʻi na lotomalie e faia lou taotoga?
Na ma maua ma loʻu tinā se fomaʻi faapitoa i Florida i Amerika, i le vaipanoa lea ou te nofo ai. Ae ina ua taʻu atu i le fomaʻi ou te lē talia se tuigātoto, na faapea mai o ia e leai se fomaʻi e mafai ona faia se taotoga lavelave faapea e aunoa ma se tuigātoto. Na faapea mai foʻi ailoga a aulia le 20 o oʻu tausaga pe a lē faia soʻu taotoga. O le taimi lea faatoʻā 14 oʻu tausaga.
Pe na e faamatala i le fomaʻi le māfuaaga o ou talitonuga?
Ioe! Na ou faamatala i ai o oʻu talitonuga e faavae mai i le Tusi Paia, ma faamamafa i ai e paia i le Atua le toto, e tusa po o le toto o tagata po o manu. * E oo lava foʻi i le ʻaina e se tagata Isaraelu o le toto, na faasalaina ai e le Atua i le oti. * Na ou faasino foʻi i ai le Galuega 15:19, 20, lea e faatonu ai Kerisiano ʻia taumamao mai i le toto.’ O lona uiga, e lē tatau ona ʻaina le toto pe tui atu i totonu o le tino.
Na faapefea ona tali mai le fomaʻi?
Na tauanau pea aʻu e le fomaʻi e tui loʻu toto, ma na faateʻia aʻu ina ua faapea mai le falemaʻi, afai ou te taliaina se tuigātoto o le a leai se totogi o loʻu taotoga.
Matuā telē lenā ofo. O le ā la le mea na lua faia ma lou tinā?
E ui sa foliga mai ua leai se fomaʻi e lotomalie e faia loʻu taotoga e aunoa ma se tuigātoto, ae na ma filifili e tausisi pea i o ma talitonuga. Na atili ona faigatā le tulaga o mea ona pe a fua i le tulafono, ou te laʻitiiti ma ou te i lalo foʻi i le tausiga a oʻu mātua. O lea na iʻu ai ina tuu atu le matou mataupu i le faamasinoga. O le mea na ou faafetai ai, na tuu mai e le ofisa o le lōia sili a le setete o Florida, aso e 30 e suʻe ai se fomaʻi e faia loʻu taotoga e aunoa ma le tuiina o le toto.
Pe na maua la se fomaʻi?
Ioe na maua! Na faafesootaʻi e le Komiti o Mataupu Tau Falemaʻi a Molimau a Ieova i lo matou vaipanoa, se fomaʻi faapitoa mo le scoliosis i Niu Ioka, o sē e manatu e mafai ona ia faia le taotoga, ma na malie e matou te feiloaʻi. O lea, na maua le fomaʻi a o leʻi atoa aso e 30 lea na tuu mai e le faamasinoga. *
Na ā mai la lou taotoga?
Na taunuu ma le manuia! Na tuu e le fomaʻi o Dr. Robert M. Bernstein i loʻu papatua ni uʻamea e mafai ona fetuutuunaʻi, ina ia faasaʻo ai loʻu tuasivi. E lua vaega o le taotoga, ma e lua vaiaso na va ai le vaega muamua ma le vaega lona lua.
Aiseā ua lua ai vaega o lou taotoga?
Talu ai afai e uma ane le vaega muamua ae e telē se toto e alu ese, o le a lava la le taimi e faatupu ai e loʻu tino sela mumū o le toto, a o leʻi faia le vaega lona lua o le taotoga. Peitaʻi sa sologa lelei mea uma, ma na itiiti se toto na alu ese mai i vaega uma e lua. Ou te faafetaia le fomaʻi ma lana vaega sa faia loʻu taotoga, ona o o latou tomai, le fuafua lelei, ma le galulue ma le faaeteete. Na vave ona ou toe malosi, ma ou te leʻi aafia i se isi tulaga e pei ona aafia ai isi ona o tuigātoto. *
O ā ni faalogona o le fomaʻi i iʻuga o lou taotoga?
E tatau i se fomaʻi ona amanaʻia ana maʻi, e aofia ai o latou talitonuga ma mea e latou te faatāuaina
Sa matuā fiafia o ia! Na faapea mai, “o togafitiga faafomaʻi e lē na o le faia o taotoga.” E manatu o ia e tatau i se fomaʻi ona amanaʻia ana maʻi, e aofia ai o latou talitonuga ma mea e latou te faatāuaina. E toʻatele isi tagata e ese mai i Molimau a Ieova, e latou te matuā lagolagoina lenei manatu.
^ pala. 7 O le tinā o Song Hee o se Molimau a Ieova. Na auai foʻi Song Hee i le tapuaʻiga a lona tinā, ma na papatiso Song Hee i le 2012 i le 16 o ona tausaga.
^ pala. 17 O le Komiti o Mataupu Tau Falemaʻi, e fesoasoani i Molimau a Ieova e mamaʻi, ina ia suʻe ni fomaʻi e saunia ni togafitiga lelei e aunoa ma ni tuigātoto.
^ pala. 21 I se mataupu e faatatau i lamatiaga o tuigātoto, na taʻua e le Clinical Excellence Commission a le Matagaluega o le Soifua Mālōlōina a New South Wales (Ausetalia): “O le tuigātoto o le toe suia lea o se totoga ola o le tino. O lea, o so o se taimi lava e sui atu ai se totoga fou i le tino o le tagata, e masani ona taumafai le tino e teena mai. O se matuā lamatiaga le faia o se tuigātoto.”
