E FAAAOGĀ e laau le faagasologa lavelave e taʻua o le photosynthesis, ina ia maua ai le malosiaga mai i le malamalama o le lā e saunia ai ana meaʻai. Ua iloa mai i suʻesuʻega na faia i nisi o laau, e iai foʻi se isi gaoioiga mataʻina e faia e laau. E fetaui lelei le fuaina e laau o le faasoasoaina o a latou meaʻai a o faagasolo le pō.

Ia mātau: A o faagasolo le aso, e liua e laau le kasa o le kaponi taiokesaita ma le vai, e avea ma masoā ma suka. Pe a oo i le pō, ona ʻai lea e le tele o laau masoā ia sa faaputu a o faagasolo le aso, ina ia aua ai neʻi fia ʻai ma ia faaauau ona malosi ma tuputupu aʻe le laau. E lē gata i lea, e fetaui lelei le fuaina o le taimi e faaaogā ai masoā ia sa faaputu, e lē vave pe tuai tele foʻi, ina ia malama aʻe le taeao e amata ai ona toe faaputu isi masoā, ua uma ona faaaogā le tusa ma le 95 pasene o le masoā.

O nei faamatalaga e faavae mai i suʻesuʻega na faia i se ituaiga o le laau o le sinapi, e taʻua o le Arabidopsis thaliana. Ua iloa e tagata suʻesuʻe, e fuafua lelei e lenei laau le faaaogāina o ana meaʻai o loo totoe e fua i le umi o le pō, e tusa pe toe 8, 12 pe 16 itula o loo totoe ona ao lea. E manino mai, e vaevae e le laau le aofaʻi o le masoā o loo iai e fua i le umi o le taimi o loo totoe seʻia oo ina ao, ina ia fetaui lelei ai le faasoasoaina o ana meaʻai.

E faapefea ona iloa e laau le tele o le masoā e latou te teuina? E faapefea ona latou fuaina le taimi? O le ā le auala ua mafai ai ona latou faia le faamatematika? Atonu e maua tali o nei fesili pe a faia nisi suʻesuʻega atili.

O le ā sou manatu? Pe na teʻi lava ua iai le tomai faamatematika o laau? Pe na foafoaina?