1-2. O ā mea e aofia ai i “galuega lelei”?

 PE AFAI ua umi se taimi o avea oe o se auauna o le faiva, atonu la ua toeitiiti e agavaa e avea o se toeaina. Pe e mafai ona e aapa atu mo lenā “galuega lelei”?—1 Timo. 3:1.

² O ā mea e aofia ai i galuega a se toeaina? E taʻimua o ia i le galuega talaʻi, galue mamafa i le faia o asiasiga faaleoleo mamoe ma le aʻoaʻo atu, ma atiaʻe le faapotopotoga e ala i ana upu ma faaaʻoaʻoga lelei. E lētioa la taʻua i le Tusi Paia nei toeaina galulue mamafa, o ni “meaalofa i tagata.”—Efe. 4:8.

3. E faapefea ona agavaa se uso e auauna o se toeaina? (1 Timoteo 3:​1-7; Tito 1:​5-9)

³ E faapefea ona e agavaa e avea o se toeaina? E lē tutusa agavaa e avea ai se tasi ma toeaina, ma agavaa o se galuega totogi. O le tulaga masani lava, e pau lava le mea e te faia ina ia maua ai sau galuega, o le iai lea iā te oe o tomai o loo manaʻo i ai le pule o le galuega. I se faaeseesega, pe afai e te manaʻo e avea oe ma toeaina, e lē lava le tau ina iai o ou tomai e talaʻi ma aʻoaʻo atu. E manaʻomia ona e ausia agavaa faale-Tusi Paia mo toeaina o loo i le 1 Timoteo 3:​1-7 ma le Tito 1:​5-9. (Faitau.) O le a talanoaina i lenei mataupu ni vala autū se tolu e manaʻomia ona iai i se toeaina: e iai se talaaga lelei i totonu ma fafo o le faapotopotoga, o se faaaʻoaʻoga lelei mo se ulu o se aiga, ma e lotomalie e auauna atu i le faapotopotoga.

 IA IAI SE TALAAGA LELEI

4. O le ā e uiga atu i ai le “lē taʻuleagaina”?

⁴ Ina ia agavaa o se toeaina, e tatau ona avea oe o sē e “lē taʻuleagaina,” po o lona uiga ia iai sou talaaga lelei i le faapotopotoga ona o au amioga lelei. E lē gata i lea, e tatau ona “taʻuleleia [oe] e tagata o i tua.” E ui e ono faitioina oe e tagata lē talitonu ona o ou talitonuga faa-Kerisiano, ae e lē tatau ona iai se māfuaaga e latou te tuuaʻia ai oe i se amioga lē tatau pe lē faamaoni. (Tani. 6:​4, 5) Ia fesili ifo: ʻPe e iai soʻu talaaga lelei i totonu ma fafo o le faapotopotoga?’

5. E faapefea ona iloa e te “fiafia i amioga lelei”?

⁵ Pe afai e te “fiafia i amioga lelei,” e te vaai la i le itu lelei o isi ma faamālō atu mo o latou uiga lelei. E te fiafia foʻi e fai mea lelei mo isi, e oo lava i mea e lē o faatalitalia oe e fai. (1 Tesa. 2:8) Aiseā e tāua ai ona iai i se toeaina lenei uiga? Ona e tele le taimi e alu i le leoleoina o le faapotopotoga ma le faatinoina o o latou faaeaga. (1 Pete. 5:​1-3) E ui lava i lea, e tele atu le olioli e maua mai i le auauna atu i isi, nai lo o ni faataulaga e latou te faia.—Galu. 20:35.

6. E faapefea ona “faaalia le agaga talimālō”? (Eperu 13:​2, 16; tagaʻi foʻi i le ata.)

⁶ E te “faaalia le agaga talimālō” pe afai e te faia mea lelei i isi, e oo lava i ē e lē masani ona outou faifaimea faatasi. (1 Pete. 4:9) Ua taʻua i se lomifefiloi: “O se tagata e talimālō, e agalelei o ia e oo lava i tagata e lē masani ai, ma e fiafia e valaaulia i latou i lona fale.” Ia fesili ifo: ʻPe e iloa aʻu o se tagata e agalelei i ē e asiasi mai i laʻu faapotopotoga?’ (Faitau le Eperu 13:​2, 16.) O se tagata e talimālō, e agalelei o ia i so o se tagata e aofia ai ē e lē tagolima, faapea auauna galulue mamafa e pei o ovasia matagaluega ma failauga asiasi.—Kene. 18:​2-8; Faata. 3:27; Luka 14:​13, 14; Galu. 16:15; Roma 12:13.

7. E faapefea ona faaalia e se toeaina, e lē o ia “o sē e manaʻo tele i tupe”?

⁷ “E lē o sē e manaʻo tele i tupe.” O lona uiga, e te lē uaʻi atu i le saʻilia o meafaitino. E tusa pe e te tamaoaiga pe e lē tagolima, ae e te faamuamua manaʻoga o le Malo i so  o se vala o lou olaga. (Mata. 6:33) E te faaaogā lou taimi, malosi ma au meafaitino, ina ia lagolagoina ai le tapuaʻiga iā Ieova, tausia ai lou aiga, ma auauna atu i le faapotopotoga. (Mata. 6:24; 1 Ioa. 2:​15-17) Ia fesili ifo: ʻO le ā laʻu vaaiga i tupe? Po o faamalieina aʻu i mea o loo oʻu manaʻomia moni? Po o le mea o loo ou naunau ia tele ni aʻu tupe ma meafaitino?’—1 Timo. 6:​6, 17-19.

8. E faapefea ona iloa e te faaalia le “amio pulea”?

⁸ O le faaupuga “amio pulea,” e faasino atu i lou faaalia o le paleni i vala uma o lou olaga. O se faataʻitaʻiga, e lē tatau ona avea oe o sē e ʻai tele pe inu tele, ia onomea ou laʻei ma teuga, ma ia filifili lelei au faafiafiaga. E te lē mulimuli foʻi i aʻega ma sikaili lē talafeagai a le lalolagi. (Luka 21:34; Iako. 4:4) O le amio pulea foʻi e te faaalia ai le toʻa e tusa pe e agaleaga mai se isi iā te oe. E lē o oe “o sē e onā” pe e iai sou talaaga o sē e inu tele. Ia fesili ifo, ʻPe e faaalia i le auala ou te ola ai, o aʻu o sē e amio pulea?’

9. O le ā e aofia ai i le “mafaufau lelei” ma le “fai mea maopoopo”?

⁹ O le “mafaufau lelei,” e uiga atu i lou iloilo ma le faaeteete o tulaga eseese e fua i mataupu silisili o le Tusi Paia. Pe a e manatunatu loloto i na mataupu silisili, o le a e maua ai le tofā mamao ma malamalama atoatoa ai i se mataupu. E lē vave ona e faia se faaiʻuga, ae e te faamautinoa o loo e maua uma faamatalaga saʻo. (Faata. 18:13) O le iʻuga, o le a e faia filifiliga lelei, lea e atagia mai ai le silafaga a Ieova. O le “fai mea maopoopo,” o lona uiga e lelei le auala e te faatulaga ma fai ai mea, ma e te tausi taimi. E iloa foʻi oe o sē e faamoemoeina ma e te mulimuli i faatonuga. O nei uiga e saosaolaumea i le mauaina o se talaaga lelei. Seʻi o tatou talanoa nei i agavaa faale-Tusi Paia e ao ona iai i se toeaina, ina ia avea ai o se faaaʻoaʻoga lelei o se ulu o le aiga.

FAI SE FAAAʻOAʻOGA LELEI O SE ULU O LE AIGA

10. E faapefea i se tane ona “pule lelei i lona lava aiga”?

¹⁰ Pe afai o oe o se tane ma e te fia aapa atu e avea o se toeaina, e ao la ona avea lou aiga o se faaaʻoaʻoga lelei, auā e faalagolago i ai lou agavaa. O lea, e manaʻomia ona “e pule lelei i [lou] lava aiga.” E tatau ona iloa oe o se ulu o se aiga e alofa, ma e faamoemoeina e faia filifiliga lelei mo lou aiga. E aofia ai foʻi lou taʻimua i vala uma o le tapuaʻiga. Aiseā e tāua ai? Na faapea mai le aposetolo o Paulo: “Afai e lē iloa e se tane ona pule i lona lava aiga, e faapefea la ona ia tausia le faapotopotoga a le Atua?”—1 Timo. 3:5.

11-12. E faapefea i amioga a le fanau a se uso ona aafia ai ona agavaa? (Tagaʻi foʻi i le ata.)

¹¹ Pe afai o oe o se tamā, e tatau ona e aʻoaʻo lau fanau lāiti pe ā o le 18 tausaga agaʻi i lalo, ina ia ʻgauaʻi ma faaaloalo.’ E tatau ona e aʻoaʻoina ma faatonu i latou i se auala alofa. E ui lava o le masani a tamaiti e fiafia e taaalo ma taliē, ae e ao ona e aʻoaʻoina i latou ia usiusitaʻi, faaaloalo, ma amio pulea. E lē gata i lea, ia fesoasoani malosi i lau fanau e atiaʻe se faiā lelei ma Ieova, ola e tusa ai ma mataupu silisili o le Tusi Paia, ia agaʻigaʻi i luma ma papatisoina.

¹² “E talitonu lana fanau ma e lē tuuaʻia foʻi i latou i amioga valea po o le fouvale.” E faapefea ona aafia agavaa o se tamā, pe a faia e sona alo talitonu o loo latou nonofo faatasi  se agasala matuiā? Pe afai e faatalalē le tamā i le aʻoaʻoina ma le faatonuina o lona alo, atonu la e lē agavaa e avea o se toeaina.—Tagaʻi i Le Olomatamata Oketopa 15, 1996, itu. 21, pala. 6-7.

IA TAUSIA LE FAAPOTOPOTOGA

13. E faapefea ona e faaalia le “magafagafa,” ma le “lē lotomaaa”?

¹³ E tautele i le faapotopotoga uso e faaalia uiga faa-Kerisiano. O se uso “e magafagafa” e na te tausia le filemu. Pe afai e te manaʻo e iloa oe o se tagata magafagafa, ia faalogo atu i isi ma taumafai e malamalama i o latou manatu. Pe a faapea e avea oe o se toeaina, ma o loo faia sa outou fono, pe e te lotomalie e lolo atu i se faaiʻuga ua ioe uma i ai le toʻatele, pe afai e lē o solia ai se tulafono po o se mataupu silisili o le Tusi Paia? O le “lē lotomaaa” e uiga atu i lou lē maumauaʻi e fai mea i lau lava auala, ae e te faatāuaina manatu o isi. (Kene. 13:​8, 9; Faata. 15:22) E te “lē faamisa” pe “maitaita.” Nai lo o le lē faaaloalo pe finau ma isi, e te faaalia le agalelei ma le faautauta. E te taumafai malosi e tausia le filemu e oo lava i tulaga faigatā. (Iako. 3:​17, 18) O au upu agalelei e mafai ona suia ai manatu o isi, e oo lava i ē e tetee.—Faama. 8:​1-3; Faata. 20:3; 25:15; Mata. 5:​23, 24.

14. O le ā e uiga atu i ai le “lē . . . faatoʻā liliu” ma le “faamaoni”?

¹⁴ O se uso e agavaa e avea ma toeaina, “e lē o se tane faatoʻā liliu mai i le faatuatua.” E lē faapea e tatau ona umi se taimi talu ona e papatiso, ae e uiga atu i le lava o le taimi e avea ai oe o se Kerisiano taʻumatuaina. A o leʻi tofia oe e avea ma toeaina, e ao ona e faaaʻoaʻo iā Iesu i le faaalia o le lotomaulalo, ma lotomalie e faatalitali iā Ieova e tofia oe i se faaeaga. (Mata. 20:23; Fili. 2:​5-8) E te faaalia lou “faamaoni” e ala i le piiama atu pea iā Ieova ma ana tapulaa amiotonu, ma mulimuli i taʻiala mai i lana faalapotopotoga.—1 Timo. 4:15.

15. Pe e tatau ona matuā tomai se toeaina i le faia o lauga? Faamatala.

 ¹⁵ O loo faailoa manino mai i le Tusi Paia, e tatau i toeaina ona “agavaa e aʻoaʻo atu.” Po o lona uiga e tatau ona matuā tomai i le auala e fai ai lauga i le lautele? E leai. O le toʻatele o toeaina agavaa e lē o ni failauga lelei, ae e tomai i le aʻoaʻo atu pe a ō i le talaʻiga, ma pe a faia asiasiga faaleoleo mamoe. (Faatusatusa le 1 Korinito 12:​28, 29 ma le Efeso 4:11.) E ui i lea, e manaʻomia ona e galue pea e faaleleia ou tomai o se faiaʻoga. E faapefea ona e faia faapea?

16. E faapefea ona avea oe o se faiaʻoga lelei? (Tagaʻi foʻi i le ata.)

¹⁶ “E taofimau i upu faamaoni.” Ina ia faaleleia ou tomai o se faiaʻoga, e tatau ona faavae lau aʻoaʻo atu ma au fautuaga i le Afioga a le Atua. Ina ia faia faapea, e manaʻomia ona e toʻaga e suʻesuʻe lelei le Tusi Paia ma a tatou lomiga. (Faata. 15:28; 16:23) A o fai au suʻesuʻega, ia mātau le auala saʻo e faatatau ai se mau. A o e aʻoaʻo atu, ia taumafai e pāʻia loto o lau ʻaufaalogologo. Ina ia faaleleia ou tomai o se faiaʻoga, ia talosaga atu i isi toeaina ua iai le poto masani mo se fautuaga, ma ia faatatauina. (1 Timo. 5:17) E manaʻomia e toeaina ona “faalaeiau atu” i uso ma tuafāfine, ae o isi taimi e manaʻomia ona latou avatu se fautuaga po o se ʻaʻoaʻiga.’ E tusa lava po o le ā le tulaga, ae e tatau i toeaina ona faia i se auala agalelei. Pe afai e te alofa ma faavae au aʻoaʻoga i le Afioga a le Atua, o le a avea oe o se faiaʻoga tomai ona o loo e faaaʻoaʻo i le Faiaʻoga Sili o Iesu.—Mata. 11:​28-30; 2 Timo. 2:24.

IA AAPA ATU PEA

17. (a) O le ā e fesoasoani i auauna o le faiva ina ia faaauau ona aapa atu? (e) O le ā e tatau ona manatua e toeaina pe a iloiloina pe agavaa se uso e avea ma toeaina? (Tagaʻi i le pusa “ Ia Faamaulalo ma Fetuutuunaʻi.”)

¹⁷ Pe a uma ona iloilo agavaa o se toeaina, atonu e manatu nisi auauna o le faiva e lē mafai ona latou ausiaina. Ae ia manatua,  e lē faatalitalia oe e Ieova ma lana faalapotopotoga ina ia faaalia atoatoa nei uiga. (1 Pete. 2:21) E lē gata i lea, o le agaga paia o Ieova e fesoasoani iā te oe ina ia ausia ai nei agavaa. (Fili. 2:13) Pe e iai se uiga patino e manaʻomia ona e galue e faaleleia? Ia tatalo iā Ieova e faatatau i lenā mataupu. Ia faia ni au saʻiliʻiliga i lenā uiga, ma talosaga i toeaina mo ni fautuaga ina ia faaleleia ai.

18. O le ā ua faalaeiauina auauna o le faiva uma ina ia faia?

¹⁸ E ao i uso uma e aofia ai ma toeaina, ona atiaʻe pea uiga na talanoaina i lenei mataupu. (Fili. 3:16) Po o oe o se auauna o le faiva? Ia aapa atu! Ia talosaga iā Ieova e toleni oe, ma fesoasoani mai ina ia faaleleia le auala e te auauna atu ai iā te ia ma le faapotopotoga. (Isa. 64:8) Tau ina ia matuā faamanuia Ieova i au taumafaiga ina ia agavaa e avea o se toeaina!