1. Na faapefea ona faailoa mai e Aperaamo lona mautinoa i le faamasinotonu o Ieova? (Tagaʻi i le ata i luga aʻe o le matua.)

“PE E lē faia ea e le Faamasino o le lalolagi uma le mea ua tonu?” (Kene. 18:25) Sa faailoa mai e Aperaamo i lenei fesili lona mautinoa e faia e Ieova le faamasinogatonu atoatoa e tusa ai o Sotoma ma Komoro. Sa mautinoa e Aperaamo e lē mafai ona faia e Ieova se gaoioiga lē tonu, e ala i le ʻfaaumatia o tagata amiotonu faatasi ma ē e amioleaga.’ Sa mamao mai i le mafaufau o Aperaamo lenā mea. Pe tusa ma le 400 tausaga mulimuli ane, na fetalai ai Ieova e faatatau iā te ia lava: “O le Papa, e atoatoa ona lelei ana gaoioiga, auā e tonu ona ala uma. O le Atua faamaoni, e lē o iā te ia se faiga lē tonu; e amiotonu ma amio saʻo o ia.”​—Teu. 31:19; 32:4.

2. Aiseā e faapea atu ai e lē mafai ona faia e Ieova se faamasinoga lē tonu?

² Aiseā na mautinoa ai e Aperaamo e faia e Ieova le faamasinogatonu i taimi uma? Talu ai o Ieova o le faaaʻoaʻoga silisili o le faamasinotonu ma le amiotonu. O upu Eperu ua faaliliuina i le “faamasinogatonu” ma le “amiotonu,” e masani lava ona taʻua faatasi i Tusitusiga Paia Eperu. E leai se eseesega o le mea e tonu  ma le mea e saʻo. O lea, talu ai e tonu i taimi uma tapulaa a Ieova, e tonu foʻi la ana faamasinoga i taimi uma. Ua taʻua i lana Afioga tusia, “e fiafia o ia i le amiotonu ma le faamasinogatonu.”​—Sala. 33:5.

3. Faamatala mai se faaaʻoaʻoga o faiga lē tonu i le lalolagi i aso nei.

³ E faamāfanafanaina ē lotofaamaoni i le iloaina e fai mea tonu Ieova i taimi uma. Peitaʻi, ua tumu lenei lalolagi i faiga lē tonu. O le iʻuga, ua aafia fua isi i solitulafono matuiā a isi. O se faaaʻoaʻoga, o nisi tagata ua faasala ma faafalepuipui ma le lē tonu. Ae ona o faamaoniga ua maua mai i suʻesuʻega faaonapōnei i le DNA, ua toe faasaʻoloto ai i latou ina ua mavae le faitau sefulu tausaga o faafalepuipui i ni solitulafono e latou te leʻi faia. O nei faiga lē tonu e lagona ai le lē fiafia ma oo ai lava i le ita. Peitaʻi, e iai se isi faiga lē tonu atonu e sili atu ona faigatā ona onosaia e Kerisiano.

4. E ono tofotofoina faapefea le faatuatua o se Kerisiano?

⁴ E faatalitalia e Kerisiano ni faiga lē tonu mai i tagata i fafo atu o le faapotopotoga Kerisiano. Peitaʻi, e ono tofotofoina lo tatou faatuatua pe a mātauina pe feagai ma se tulaga e foliga mai e lē tonu i totonu o le faapotopotoga. O le a faapefea ona e tali atu pe afai e te manatu o loo e fesagaʻia ni faiga lē saʻo i le faapotopotoga, po o le auala o loo feutagaʻi mai ai se isi Kerisiano iā te oe? Po o le a avea na tulaga ma pogai e te tausuai ai?

5. Aiseā e lē tatau ai ona faateʻia se Kerisiano pe a ia mātauina pe feagai foʻi ma se faiga lē tonu i le faapotopotoga?

⁵ O i tatou uma lava e lē lelei atoatoa ma ua agasala. O lea ua tatou iloa ai, e iai taimi e tatou te ono feagai ai ma ni faiga lē tonu, pe tatou te ono faia foʻi se mea e lē tonu i se tasi i le faapotopotoga. (1 Ioa. 1:8) E ui lava e seāseā ona tutupu ni tulaga faapea, ae e lē faateʻia pe tausuai ai Kerisiano faamaoni pe a tulaʻi mai ni faiga lē tonu. Ua saunia mai e Ieova fautuaga aogā i lana Afioga ina ia tatou tumau ai pea i le faamaoni, e tusa lava pe fai mai e o tatou uso talitonu ni faiga lē tonu.​—Sala. 55:12-14.

6, 7. (a) O le ā se faiga lē tonu na feagai ma se uso i le faapotopotoga? (e) O ā uiga na fesoasoani iā te ia e taulima ai i se auala saʻo le mataupu?

⁶ Seʻi fai ma faataʻitaʻiga le mea na tupu i le uso o Willi Diehl. Na amata i le 1931 ona ia auauna ma le faamaoni i le Peteli i Bern, i Suisilani. I le 1946, na auai ai o ia i le vasega lona valu o le Aʻoga o Kiliata, i Niu Ioka i Amerika. Ina ua uma le faauuga, na mulimuli ane tofia o ia o se ovasia o le matagaluega i Suisilani. Na taʻua e le uso o Willi i le talaaga o lona soifuaga: “Iā Me 1949, sa ou faailoa atu ai i le ofisa ulu o le lālā i Bern faapea ua ou fuafua e faaipoipo.” O le ā le tali mai a le ofisa i Bern? “E leai ni faaeaga seʻi vaganā le auauna o ni paeonia sauatoa.” Na faamatala atili e le uso o Willi: “Sa lē faatagaina aʻu e avatua ni lauga . . . E toatele lava latou te leʻi toe faafeiloaia i maʻua, ua faia i maʻua e pei o ni tagata faateʻaina.”

⁷ Na faapefea ona taulima e le uso o Willi lenā tulaga? Na faapea mai o ia: “Ae peitai, sa ma iloa faapea, o le faaipoipo o se mea faale-Tusi Paia, o lea sa ma saili ai so ma malu i le tatalo ma tuu atu lo ma faatuatua ia Ieova.” Mulimuli ane, na toe faasaʻo le vaaiga sesē na iai e faatatau i le faaipoipo lea na māfua ai lea faiga lē tonu, ma toe maua ai faaeaga o le uso o Willi i le auaunaga. Sa tauia lona faamaoni iā Ieova. * O se mea lelei le fesili ifo iā i tatou lava: ʻPo o le a ou faaalia foʻi lea vaaiga faaleagaga pe a  ou feagai ma se tulaga lē tonu? Po o le a ou onosaʻi ma faatalitali iā Ieova, po o le a ou taumafai e taulima le mataupu i laʻu lava auala?’—Faata. 11:2; faitau le Mika 7:7.

8. Aiseā e ono sesē ai lou manatu e faapea e iai se faiga lē tonu o loo feagai ma oe po o se isi tagata?

⁸ I le isi itu, e ono sesē lou manatu e faapea e iai se faiga lē tonu o loo feagai ma oe po o se isi sui o le faapotopotoga. Aiseā? Atonu ona o la tatou vaaiga lē lelei atoatoa, pe e tatou te lē o malamalama foʻi i faamatalaga uma e faatatau i se mea o loo tupu. E tusa lava po o saʻo pe sesē o tatou manatu e faatatau i le mea o loo tupu, ae o le faalagolago iā Ieova i le tatalo faatasi ai ma le faamaoni, o le a taofia ai i tatou mai i le ʻmatuā ita o o tatou loto iā Ieova.’​—Faitau le Faataoto 19:3.

9. O ā faaaʻoaʻoga o le a tatou talanoaina i le mataupu lenei ma le mataupu o loo sosoo mai?

⁹ Seʻi o tatou iloiloina faaaʻoaʻoga e tolu o faiga lē tonu na tutupu i auauna a Ieova i taimi o le Tusi Paia. O le a tatou talanoaina i lenei mataupu faiga lē tonu na feagai ma Iosefa, o le atalii o le atalii o le atalii o Aperaamo, mai i ona uso. O le a tatou talanoaina i le mataupu o loo sosoo mai auala na feutagaʻi ai Ieova ma Aapo le tupu o Isaraelu, faapea le mea na tupu i le aposetolo o Peteru i Suria Anetioka. A o tatou iloiloina nei faaaʻoaʻoga, ia mātau po o ā ni lesona o le a fesoasoani iā te oe ina ia taulaʻi atu pea iā Ieova ma faatumauina la oulua faiā, aemaise lava pe afai e te manatu o loo e feagai ma se faiga lē tonu.

10, 11. (a) O ā faiga lē tonu na feagai ma Iosefa? (e) O le ā le avanoa na maua e Iosefa a o iai i le falepuipui?

¹⁰ Sa feagai Iosefa le auauna faamaoni a Ieova, ma faiga lē tonu mai i tagata ese, ae sili ai ona tigā, o faiga lē tonu mai i ona lava uso. Ina ua 17 tausaga o Iosefa, na puʻe faamalosi o ia e ona uso ma faatau ese atu e fai ma pologa. Sa ave faamalosi o ia i Aikupito. (Kene. 37:23-28; 42:21) Mulimuli ane a o iai i lenā atunuu ese, sa tuuaʻia sesē o ia i le taumafai e faamalosi se fafine, ma faafalepuipui ai e aunoa ma le faia o se faamasinoga. (Kene. 39:17-20) Pe tusa ma le 13 tausaga na avea ai o ia ma pologa ma pagota. O ā lesona e tatou te aʻoaʻoina mai i mea na tutupu iā Iosefa, o le a fesoasoani iā i tatou pe a feagai ma faiga lē tonu mai i o tatou uso talitonu?

¹¹ A o faafalepuipui Iosefa, sa ia maua le avanoa e faamatala atu ai i le isi pagota le mea na tupu iā te ia. O lenā pagota o sē na avea ma pule o le ʻautautū uaina a le tupu. I se tasi pō, sa fai se miti a le tautū uaina ma na faamatala e Iosefa le uiga. Na faamatala e Iosefa o le a toe faafoʻi le tautū uaina i lona tulaga na iai muamua i le maota o Farao. Ina ua faamatala atu e Iosefa nei faamatalaga mai i le agaga o Ieova, sa ia faaaogā lenā avanoa e faamatala atu ai ma le mea na tupu iā te ia. E mafai ona tatou aʻoaʻoina ni lesona aogā e lē gata mai i faamatalaga na taʻu atu e Iosefa, ae faapea foʻi faamatalaga e na te leʻi faailoaina atu.​—Kene. 40:5-13.

12, 13. (a) E faapefea ona tatou iloa e leʻi tau ina talia e Iosefa faiga lē tonu na ia fesagaʻia? (e) O ā faamatalaga e leʻi taʻuina atu e Iosefa i le tautū uaina?

¹² Faitau le Kenese 40:14, 15. Ia mātau, na taʻu atu e Iosefa na “puʻe faamalosi” o ia. O le upu o loo faaaogā i inei e le Tusi Paia e mafai foʻi ona uiga atu i le “puʻe faagaoi.” E manino mai la, sa feagai o ia ma se faiga lē tonu. Na taʻu atu foʻi e Iosefa e na te leʻi faia le solitulafono lea na faafalepuipui ai. O le pogai lenā na talosaga ai i le tautū uaina ia taʻu atu o ia iā  Farao. Aiseā? Na ia faapea atu: “Ia e faasaʻolotoina aʻu mai i lenei fale.”

¹³ Po o lona uiga sa tau ina talia e Iosefa le tulaga ua oo iā te ia e aunoa ma le faia i ai o se gaoioiga? E mautinoa e leai. Sa ia iloa lelei le tele o faiga lē tonu na oo iā te ia. Sa ia faamatala atu ma le manino i le tautū uaina mea moni na tutupu, o lē atonu na mafai ona fesoasoani atu iā te ia. Ae ia mātau, e lē o taʻua i le Tusi Paia na faailoa atu e Iosefa i se tasi, e oo lava iā Farao, e faapea o ona uso sa puʻeina faamalosi o ia. Ina ua ō mai ona uso i Aikupito ma toe faalelei ma ia, sa talileleia i latou e Farao ma valaaulia e nonofo i Aikupito, ma fai mo i latou “mea lelei uma lava o le laueleele o Aikupito.”​—Kene. 45:16-20.

14. O le ā o le a puipuia ai i tatou mai i le faia o ni faamatalaga lē lelei, pe a tatou feagai ma se faiga lē tonu i le faapotopotoga?

¹⁴ Pe a manatu se Kerisiano o loo ia fesagaʻia se faiga lē tonu, e tatau ona ia faaeteete mai i le faia o ni tala taufaaleaga. Pe afai ua faia e se tasi o le faapotopotoga se mea sesē matuiā, e tatau ona tatou saʻili se fesoasoani mai i toeaina ma faailoa atu iā i latou. (Levi. 5:1) Peitaʻi, i le tele o tulaga e lē o aofia ai ni sesē matuiā, atonu e mafai ona foʻia e aunoa ma le faaaafia ai o isi, e oo lava i le ʻautoeaina. (Faitau le Mataio 5:23, 24; 18:15.) Tau ina ia tatou faamaoni ma faatatau mataupu silisili o le Tusi Paia i nei tulaga. I nisi tulaga, atonu e tatou te iloa ane o loo tatou faauiga sesē le mea o loo tupu, ma e tatou te lē o aafia i se faiga lē tonu. Maʻeu la lo tatou fiafia pe a uma ane e tatou te leʻi faia se mea e atili ai ona telē le mataupu, e ala i le faia o ni tala taufaaleaga e faatatau i se isi Kerisiano! Ia manatua, pe e tatou te saʻo pe sesē, ae o le faia o ni faamatalaga lē lelei e lē taitai ona faaleleia ai se tulaga ua tupu. O le faamaoni iā Ieova ma o tatou uso o le a puipuia ai i tatou mai le faia o lenā gaoioiga sesē. Ina ua talanoa e  faatatau i le “tagata e savali ma le lē taʻuleagaina,” na taʻua e le faisalamo o ia lenā “e leʻi tautala lona laulaufaiva i upu taufaaleaga. E na te leʻi faia se mea leaga i lana uō, e leʻi faia foʻi e ia se mea e faalumaina ai lana uō mamae.”​—Sala. 15:2, 3; Iako. 3:5.

15. Na faapefea ona faamanuiaina Iosefa ona o le la faiā ma Ieova?

¹⁵ E tatou te maua se lesona e sili ona tāua mai i le faiā a Iosefa ma Ieova. I le 13 tausaga na feagai ai Iosefa ma faiga lē tonu, sa ia faaalia na iā te ia le silafaga a Ieova e faatatau i nei faiga. (Kene. 45:5-8) E na te leʻi tuuaʻia Ieova i nei faiga. E ui lava e leʻi galo iā te ia nei faiga lē tonu, peitaʻi e na te leʻi teulotoina ni faalogona ita. A o le vala e sili ona tāua, e leʻi avea vaivaiga ma mea sesē na faia e isi, ma pogai e fulitua ai iā Ieova. O le faamaoni o Iosefa na ia vaai ai i le auala na faasaʻo ai e Ieova faiga lē tonu, ma faamanuia iā te ia ma lona aiga.

16. Aiseā e tatau ai ona tatou mafuta vavalalata atu pea iā Ieova, pe a tatou feagai ma se faiga lē tonu i le faapotopotoga?

¹⁶ I se tulaga talitutusa, e tatau ona tatou faapelepele ma puipui i la tatou faiā ma Ieova. E lē tatau ona avea vaivaiga o o tatou uso ma pogai e tatou te fulitua ai i le Atua o loo tatou alolofa ma tapuaʻi i ai. (Roma 8:38, 39) Nai lo o lea, pe a tatou feagai ma se faiga lē tonu i le faapotopotoga, seʻi o tatou pei o Iosefa ma mafuta vavalalata atu pea iā Ieova, ma taumafai ia maua lana silafaga e faatatau i le mea o loo tupu. Pe a uma ona tatou uia auala uma faale-Tusi Paia e foʻia ai le faafitauli, e ao ona tuu atu le mataupu i aao o Ieova. Ia tatou mautinoa o le a ia faasaʻoina lenā mataupu i lana taimi ma lana auala.

17. E faapefea ona faaalia o loo tatou maufaatuatuaina le “Faamasino o le lalolagi uma”?

¹⁷ A o tatou ola ma soifua ai i lenei faiga o mea, e tatou te faatalitalia o le a tatou feagai ma ni faiga lē tonu. E ui lava e seāseā tupu, ae o nisi taimi e iai se faiga e foliga mai e lē tonu i le faapotopotoga, e ono mātauina pe feagai foʻi ma oe po o se isi e te iloaina. Ia aua neʻi avea lenā faiga ma pogai e te tautevateva ai. (Sala. 119:165) Nai lo o lea, i le avea ai ma auauna faamaoni a le Atua, ia faamaoni ma faalagolago iā te ia i le tatalo. Ia amanaʻia ma le lotomaulalo atonu e tatou te lē o malamalama i faamatalaga uma e faatatau i se mea. Ia tatou iloa foʻi e ono sesē o tatou manatu ona o la tatou vaaiga lē lelei atoatoa. E pei ona aʻoaʻoina mai i le faaaʻoaʻoga a Iosefa, e tatou te mananaʻo ia ʻalofia le faia o ni faamatalaga lē lelei, auā o le a atili ai ona telē le mataupu. Nai lo o le taumafai e taulima le mataupu i la tatou lava auala, seʻi o tatou maumauaʻi e faamaoni ma faatalitali atu ma le onosaʻi iā Ieova e na te faasaʻoina lenā mataupu. O le faia faapea e mautinoa o le a tatou maua ai le finagalo malie ma le faamanuia a Ieova, e pei foʻi ona ia faia iā Iosefa. Ioe, e tatou te mautinoa e faia e Ieova, o le “Faamasino o le lalolagi uma,” le mea tonu i taimi uma “auā e tonu ona ala uma.”​—Kene. 18:25; Teu. 32:4.

18. O le ā o le a tatou talanoaina i le mataupu o loo sosoo mai?

¹⁸ O le a tatou talanoaina i le mataupu o loo sosoo mai, isi faaaʻoaʻoga e lua o ni faiga lē tonu na feagai ma tagata o Ieova i taimi o le Tusi Paia. O le a fesoasoani nei faaaʻoaʻoga e tatou te iloa ai pe faapefea i le lotomaulalo ma le lotofaamagalo, ona fesootaʻi atu i le silafaga a Ieova e faatatau i le faia o le mea e tonu.