Ua Oo Atu le Upu Moni i Vaipanoa Mamao

O LE malo o Tuva, e i le taufaasiʻusiʻuga o Rusia, ae i lona itu i saute ma sisifo, o loo iai Mongolia. E toʻatele tagata i Tuva e nonofo i vaipanoa mamao, ma e faigatā ona oo atu i ai le feʻau o le Malo. Peitaʻi, e leʻi leva talu ai nei ona malaga atu se vaega o tagata mai i vaipanoa mamao o Tuva i lona taulaga o Kyzyl, e auai i se seminā na fai i inā. Na faalogo Maria, o se paeonia i Kyzyl, o lea o le a ō atu, ma na ia manatu o se avanoa lē laumaua lenei e faailoa atu ai le tala lelei iā i latou.

Ua faamatala mai e Maria le mea na tupu: “Sa fai se fuafuaga a le aʻoga lea ou te faiaʻoga ai, e fai se seminā i le auala e foʻia ai le lē pulea o le ava malosi, faaaogā sesē o vai, fualaau ma fualaau faasāina. E tusa ma le 50 tagata mai i vaipanoa mamao o Tuva na auai. Sa aofia ai faiaʻoga, o tagata suʻesuʻe o le mafaufau ma amioga, o ē vaavaaia le aiā tatau a fanau, ma isi.” O se avanoa lelei tele lenei mo Maria e talaʻi ai, ae sa lē faigofie mo ia. Ua ia faapea mai: “O laʻu masani lava ou te matamuli, ma na faigatā ai iā te aʻu ona talaʻi lē fuafuaina. Peitaʻi, na ou tatalo iā Ieova mo le lototele ina ia foʻia ai loʻu fefe, ma faaaogā ai lenei avanoa e molimau atu ai.” Pe na taulau o ia?

Ua faapea atili mai Maria: “Na ou maua se Ala Mai! o loo talanoaina ai le mataupu e uiga i le fefe ma le popolevale. Na ou faapea ifo: ‘Atonu e fiafia se fomaʻi o le mafaufau e faitau i lenei lomiga,’ ona ou alu lea ma ave le mekasini i le aʻoga. O le aso lenā na sau ai i loʻu ofisa se faiaʻoga o loo auai i le seminā, ma na ou ofo i ai le mekasini. Na ia talia ma le fiafia. Na ia fai mai, o ia foʻi e iai se mea e fefe ma popole ai. I le aso na sosoo ai, na ou ave i ai le tusi Fesili ua Fesili Mai ai Talavou—Tali e Aogā, Tusi 1. Na ia talia foʻi ma le fiafia. O lona talia fiafia o lenā tusi na ou faapea ifo ai, atonu foʻi o le a fiafia i ai isi faiaʻoga. Ona ou ave lea i le aʻoga o se pusa o tusi Ua Fesili Mai Talavou ma isi lomiga.” E leʻi umi ae leai ni tusi e totoe i le pusa. Na faamatala e Maria le mea na tupu e faapea: “Na ō mai i loʻu ofisa nisi e galulue faatasi ma le faiaʻoga, lea na ou aveina i ai le tusi Ua Fesili Mai Talavou, ma fesili mai, ‘O fea e maua ai tusi?’” Ua latou ō mai tonu lava i le mea e maua ai!

O le aso mulimuli o le seminā, o le Aso Toonaʻi. O le aso mālōlō lenā o Maria, ma sa ia tuu ai ni lomiga i luga o laulau o lona ofisa. Sa ia tusi se faamatalaga i le laupapa e faapea: “Mo a outou Susuga i Faiaʻoga! E mafai ona ave nei lomiga ma outou ma isi tou te masani ai. O nei lomiga aogā, o le a fesoasoani ina ia outou taulau ai i le galuega ma faamalosia ai o outou aiga.” O le ā le iʻuga? “Sa ou toe foʻi i loʻu ofisa i lenā aso, ma ou iloa ai o le tele o lomiga ua aveese. Na vave ona ou toe aumaia nisi tusi ma mekasini.” E uma ifo le seminā, e 380 mekasini na ofo e Maria, e 173 tusi, ae 34 polosiua. Ina ua toe foʻi ē na auai i le seminā i vaipanoa mamao e nonofo ma faigaluega ai, sa ō ma ave lomiga. Ua fai mai Maria, “Ua ou matuā fiafia lava ona ua oo atu le upu moni i vaipanoa mamao o Tuva!”—Fai. 11:6.

[Faafanua i le itulau 32]

(Tagaʻi i le lomiga mo le ata atoa)

RUSIA

MALO O TUVA