Po o E Mulimuli Atoatoa i le Keriso?

“O loo outou savavali faapena, . . . ia saga savavali ai pea i lenā auala.”—1 TESA. 4:1.

1, 2. (a) O ā ni mea mataʻina na vāai i ai le toʻatele o tagata i aso o Iesu? (e) Aiseā e mataʻina ai foʻi o tatou taimi?

PE NA e mafaufau faapea, maʻeu le manaia o le ola i le taimi na iai Iesu i le lalolagi? E te ono manatu i le faamālōlōina o oe e Iesu, ma ʻalofia ai le pagatia i nisi o faafitauli o le tino. Po o le manatu foʻi i le fiafia o le vaai ma faalogo atu iā Iesu, ina ia mafai ona aʻoaʻoina mea mai iā te ia, po o le vaai atu o ia faia ni vavega. (Mare. 4:1, 2; Luka 5:3-9; 9:11) Maʻeu se faaeaga o le iai a o faia e Iesu na galuega! (Luka 19:37) E leai se tupulaga talu mai na taimi na vāai i ni mea faapena, ma mea na faataunuuina e Iesu i le lalolagi “e ala i le faataulagaina o ia lava,” lea o le a lē toe tupu lava.—Epe. 9:26; Ioa. 14:19.

² E mataʻina foʻi o tatou taimi. Aiseā? Ua tatou ola i le taimi na valoia e le Tusi Paia o “le taimi o le iʻuga” ma “aso e gata ai.” (Tani. 12:1-4, 9; 2 Timo. 3:1) O lenā taimi na lafo ese ai Satani mai i le lagi. Ua lē o toe umi ae saisaia loa ma lafo i “le tō.” (Faaa. 12:7-9, 12; 20:1-3) I lenei lava foʻi taimi ua iai se faaeaga tele iā i tatou, o le folafolaina o le “tala lelei o le malo” i le lalolagi aoao, ma taʻu atu i tagata le faamoemoe o le Parataiso o loo fotuaʻi mai—o se galuega o le a lē toe faia lava.—Mata. 24:14.

3. A o leʻi afio aʻe Iesu i le lagi, o le ā na ia taʻu atu i ona soo e fai, ma o le ā e aofia ai?

³ A o leʻi afio aʻe Iesu i le lagi, na ia fetalai i ona soo: ‘E fai outou ma molimau iā te aʻu i Ierusalema, i Iutaia uma ma Samaria, ma tuluʻiga  uma o le lalolagi.’ (Galu. 1:8) E aofia ai i lenā galuega se polokalame tau aʻoaʻoga i le lalolagi aoao. O le ā le sini? O le faia o nisi soo o Keriso a o leʻi oo mai le iʻuga. (Mata. 28:19, 20) O le ā e ao ona tatou fai pe a mananaʻo e taulau manuia i le faataunuuga o le tofiga mai iā Keriso?

4. (a) O le ā le manaʻoga ua faamamafa mai i faamatalaga a Peteru o loo i le 2 Peteru 3:11, 12? (e) O le ā e manaʻomia ona leoleo mai ai i tatou?

⁴ Mātau le faamatalaga lenei a le aposetolo o Peteru: “Ia outou manatunatu pe e faapeʻī la outou amio e tatau ona iai, e tusa ai ma amioga paia ma galuega o le faamaoni i le Atua, a o faatalitali ma tāmau i mafaufau le oo mai o le aso o Ieova!” (2 Pete. 3:11, 12) Na faamamafa i upu a Peteru le manaʻoga ia mataala i nei aso e gata ai, ina ia faamautinoa o loo taulaʻi atu pea o tatou olaga i galuega faamaoni i le Atua. O na galuega e aofia ai le talaʻia o le tala lelei. Maʻeu lo tatou olioli i le vaai atu i le maelega o o tatou uso i le lalolagi aoao, i le faataunuuina o le galuega talaʻi lea ua tofia ai i tatou e Keriso! I le taimi e tasi, ua tatou iloa e manaʻomia ona tatou faaeteete ina neʻi faaitiitia lo tatou maelega i le auaunaga i le Atua, ona o omiga mai i le lalolagi a Satani ma tuʻinanauga o le tino lē lelei atoatoa. O lea la, seʻi o tatou mafaufau i le auala e mautinoa ai o loo tatou mulimuli atu pea i le Keriso.

Talia Fiafia Tiute Tauave Mai i le Atua

5, 6. (a) O le ā le mea na faamālō atu ai Paulo i ona uso talitonu i Ierusalema, ma o le ā na ia lapataʻia ai i latou? (e) Aiseā e lē tatau ai ona tatou manatu māmā i o tatou tiute tauave mai i le Atua?

⁵ I le tusi a le aposetolo o Paulo i Kerisiano i Ierusalema, na ia faamālō atu ai i ona uso talitonu i lo latou talaaga o le tutumau ma le faamaoni i sauāga. Na ia taʻua e faapea: “Ia outou manatua pea aso ua mavae ina ua outou maua le malamalama, na outou tumau ai i tauiviga i le tele o mafatiaga.” Ioe, o loo manatua pea e Ieova lo latou faamaoni. (Epe. 6:10; 10:32-34) E lē taumatea o upu faamālō a Paulo na matuā faalaeiauina ai Kerisiano Eperu. Ae peitaʻi, i le tusi lava lea e tasi, na lapataʻi ai Paulo e faatatau i faanaunauga faaletagata a lē pulea, e faaitiitia ai le maelega i le auaunaga i le Atua. Na ia taʻua e faapea e ao i Kerisiano ona faaeteete i le faia o faamolemolega, ma lē mulimuli ai i poloaʻiga a le Atua.—Epe. 12:25.

⁶ O loo faatatau foʻi i Kerisiano i aso nei le lapataʻiga, o le faia o faamolemolega e ʻalofia ai tiute tauave mai i le Atua. E tatou te iloa e manaʻomia ona tatou maumauaʻi ia lē manatu māmā i o tatou tiute tauave faa-Kerisiano, pe e faaitiitia lo tatou maelega i le auaunaga i le Atua. (Epe. 10:39) O le mea moni, o le tuuina atu o le auaunaga paia e faalagolago i ai le ola ma le oti.—1 Timo. 4:16.

7, 8. (a) O le ā e fesoasoani iā i tatou e faatumau ai lo tatou maelega i le auaunaga i le Atua? (e) Pe afai ua mou atu lo tatou maelega na iai muamua, o le ā e ao ona tatou manatua e faatatau iā Ieova ma Iesu?

⁷ O le ā e fesoasoani iā i tatou e puipuia ai mai i le faia o faamolemolega i le faataunuuina o a tatou tiutefai i le Atua? O se tasi o auala tāua e teena ai lenā faanaunauga, o le manatunatu e lē aunoa i le uiga o la tatou taʻutinoga ina ua tuuina atu i tatou i le Atua. O le mea sili ona tāua, ua tatou tautō iā Ieova e tatou te faamuamua le faia o lona finagalo i o tatou olaga, ma e tatou te mananaʻo e tausia lenā tautoga. (Faitau le Mataio 16:24.) O lea la, e iai taimi e manaʻomia ona tatou fesili ifo iā i tatou lava: ‘⁠Po o tumau pea loʻu maumauaʻi e ola e tusa ai ma loʻu tuuina atu i le Atua, e pei o le taimi na ou papatiso ai? Po ua mou atu loʻu maelega na iai talu mai na tausaga?’

⁸ Pe afai ua faamaonia i lo tatou iloiloina ma le faamaoni o i tatou lava ua amata ona tatou faapalapala, e lelei ona tatou  manatunatu i upu faamalosiau a le perofeta o Sefanaia. Na ia taʻua e faapea: “Tau ina ia lē paʻuʻū i lalo ou lima. Ua faatasi Ieova lou Atua ma oe. E faaolaina e ia auā o ia o Lē e malosi. O le a olioli o ia ma fiafia iā te oe.” (Sefa. 3:16, 17) O nei upu faamāfanafana na faatatauina muamua i tagata Isaraelu anamua, o ē na toe foʻi i Ierusalema mai i le faaaunuua i Papelonia. Ae peitaʻi, o lenei faamautinoaga o loo faatatauina foʻi i tagata o le Atua i aso nei. Ona o le galuega a Ieova lea o loo tatou faia, e ao ona teu i o tatou mafaufau o loo lagolagoina ma faamalosia i tatou e Ieova ma lona Alo, ina ia faataunuuina atoatoa a tatou tiute tauave mai i le Atua. (Mata. 28:20; Fili. 4:13) Pe a faaauau ona tatou taumafai e fai le galuega a le Atua ma le maelega, o le a ia faamanuia ma fesoasoani iā i tatou e agaʻigaʻi pea i luma faaleagaga.

Ia Maelega e “Saʻili Muamua le Malo”

9, 10. O le ā le manatu o loo i le talafaatusa a Iesu i se taumafataga tele i le afiafi, ma o le ā le lesona tatou te aʻoaʻoina mai ai?

⁹ A o taumafa i le fale o se pule o le ʻau Faresaio, na faamatala ai e Iesu se talafaatusa i se taumafataga tele i le afiafi. I lenā talafaatusa, na ia faamatalaina ai le avanoa ua faasafua atu i tagata eseese e ulu atu ai i le Malo o le lagi. Na ia faataʻitaʻia ai foʻi le uiga o le faia o “faamolemolega.” (Faitau le Luka 14:16-21.) I le talafaatusa a Iesu, na faia e mālō na valaaulia ni faamolemolega ina ia lē auai i le taumafataga. Na faapea mai le tasi, e manaʻomia ona alu e vaai le fanua lea faatoʻā uma ona ia faatauina. Na faapea mai le isi, na ia faatauina ni povi ma e tatau ona alu e siaki. Ae na faapea mai le isi: ‘⁠E lē mafai ona ou alu atu. Faatoʻā uma ona ou faaipoipo.’ O ni faamolemolega e lē talafeagai. O lē na faatauina se fanua po o ni lafumanu e tatau ona alu muamua e vaai, e leai la se māfuaaga o le a toe faanatinati ai fua e vaai. Aiseā o le a lē taliaina ai e se tasi se valaaulia tāua ona e faapea o lea ua faatoʻā faaipoipo? E lētioa a toʻatamaʻi lē e ana le taumafataga i le talafaatusa!

¹⁰ E mafai e tagata uma o le Atua ona aʻoaʻoina se lesona mai i le talafaatusa a Iesu. O le ā se lesona? E lē tatau ona avea mataupu e fitoitonu i le tagata lava ia e pei ona taʻua i le talafaatusa a Iesu, e avea ma mea e sili ona tāua iā i tatou ua faalēano ai i la tatou auaunaga i le Atua. Pe a lē saʻo ona faatulaga e se Kerisiano mataupu e fitoitonu iā te ia, o le a faasolo ina mou atu lona maelega i le faiva. (Faitau le Luka 8:14.) Ina ia ʻalofia le tupu o lenā mea, e tatou te ola e tusa ai ma timaʻiga a Iesu: “Ia faaauau pea ona outou saʻili muamua le malo ma le amiotonu a le Atua.” (Mata. 6:33) Maʻeu le faalaeiauina i le vaai atu i auauna a le Atua o ē laiti ma matutua, o loo faatatauina lenā fautuaga tāua! O le mea moni, e toʻatele ua faafaigofie o latou olaga ina ia tele se taimi e auai ai i le faiva. Ua latou tofo totino i le fiafia moni ma le faamalieina, ona o le maelega e saʻili muamua le Malo.

11. O le ā le tala o loo i le Tusi Paia e faataʻitaʻia ai le tāua o le maelega ma lotoatoa i le auaunaga i le Atua?

¹¹ Ina ia faataʻitaʻia le tāua o le maelega i le auaunaga a le Atua, ia mātau se mea na tupu i le olaga o le tupu Isaraelu o Ioasa. Ona o le manatu mamafa i le ono mafai ona faatoʻilaloina e Suria o Isaraelu, na tagi ane ai Ioasa iā Elisaia. Na faatonu o ia e le perofeta ia fana atu se aū mai le faamalama agaʻi i Suria, e iloa ai le manumalo i lenā nuu e ala mai iā Ieova. E mautinoa na tatau ona lototele ai le tupu. Ona faapea atu lea o Elisaia iā Ioasa e ave ana aū, ma sasa ai le eleele. E na o le faatolu ona sasa e Ioasa le eleele. Na matuā ita Elisaia ona o lenei mea, auā ana fai e faalima pe faaono ona ia sasaina le eleele, e faailoa ai o le a “faaumatia aʻiaʻi Suria.” Ae e na o le tolu ni manumalo o le a maua e Ioasa. Ona na gaoioi Ioasa e aunoa ma se maelega, o lea e leʻi manumalo atoatoa ai. (2 Tupu 13:14- 19) O le ā se lesona tatou te aʻoaʻoina mai i le mea na tupu? O le a matuā faamanuia i tatou e Ieova, pe afai e tatou te faia lana galuega ma le lotoatoa ma le maelega.

12. (a) O le ā e fesoasoani e faatumauina lo tatou maelega i le auaunaga i le Atua, a o feagai ma faafitauli o le olaga? (e) Ia faamatala le auala ua aogā ai iā te oe le pisi pea i le faiva.

¹² O faafitauli o le olaga e tofotofoina ai lo tatou maelega ma le tuutoina i le auaunaga i le Atua. E toʻatele uso ma tuafāfine o loo tauivi ma tulaga faigatā tau tupe. Ua lē mautonu isi ona ua faaitiitia mea e latou te mafai i le auaunaga iā Ieova ona o maʻi tugā. Ae e ao pea iā i tatou taʻitoʻatasi ona faamautinoa, o loo tausia pea lo tatou maelega ma faaauau ona mulimuli atoatoa i le Keriso. Ia mātau faamolemole nisi o fautuaga ma mau o loo lisi mai i le pusa, “O le ā e Fesoasoani iā te Oe e Savavali ai Pea ma le Keriso?” Vaai pe e faapefea ona e faatatauina atoatoa. Pe a e faia faapea, o le a e selesele mai ai aogā. O le pisi pea i le faiva e iai sona āuga lelei iā i tatou, e faaleleia ai o tatou olaga, ma tele ai le filemu ma le fiafia. (1 Kori. 15:58) E lē gata i lea, o le faia o la tatou auaunaga i le Atua ma le lotoatoa, e fesoasoani iā i tatou ina ia “tāmau i mafaufau le oo mai o le aso o Ieova.”—2 Pete. 3:12.

Ia Fai se Iloiloga Faamaoni o i Tatou Lava

13. E faapefea ona iloa e le tagata lava ia le uiga o le auauna ma le lotoatoa i le Atua?

¹³ E lelei ona manatua, o le auauna ma le lotoatoa e lē fua i le tele o le taimi e faaalu i le faiva. E eseese tulaga o tagata taʻitoʻatasi. O le tagata e faaalu le na o le tasi pe lua itula i le auaunaga i le fanua i masina taʻitasi, atonu o loo fiafia i ai le finagalo o Ieova pe afai e na o le pau lenā o le mea e mafai ona ia faia, e tusa ai ma lona malosi. (Faatusatusa i le Mareko 12:41-44.) O lea, ina ia iloa e le tagata lava ia le uiga o le auauna ma le lotoatoa i le Atua, e manaʻomia ona fai se iloiloga faamaoni o o tatou tulaga ma mea e mafai ona tatou faia. I le avea ai ma soo o Keriso, e tatou te mananaʻo foʻi e faaōgatusa o tatou mafaufau ma ona manatu. (Faitau le Roma 15:5; 1 Kori. 2:16) O le ā na faamuamua e Iesu i lona olaga? Na ia fetalai atu i tagata mai i Kapanaumi: “E tatau ona ou folafola atu le tala  lelei o le malo o le Atua . . . auā o le mea lea na auina mai ai aʻu.” (Luka 4:43; Ioa. 18:37) A o e manatunatu i le maelega o Iesu i lana faiva, ia iloilo lou tulaga ma vaai pe e mafai ona faalautele lau faiva.—1 Kori. 11:1.

14. O ā auala e mafai ona faalautele atu ai la tatou faiva?

¹⁴ O le iloiloina totoʻa o o tatou tulaga, e ono iʻu ai i le faateleina o lo tatou taimi i le faiva. (Mata. 9:37, 38) O se faaaʻoaʻoga, o le faitau afe o o tatou talavou na faauu mai i aʻoga talu ai nei, ua faalautele la latou faiva, ma ua latou tofo i le olioli i le avea o ni paeonia maelega. Pe e te fia tofo i lenā olioli? O nisi o uso ma tuafāfine ua toe tilotilo i o latou tulaga, ma filifili e ō atu i se vaipanoa i lo latou lava atunuu, po o se isi foʻi atunuu, lea e telē atu le manaʻoga mo ni tagata talaʻi o le Malo. Ae o isi ua latou aʻoaʻoina se isi gagana e fesoasoani ai i tagata o isi gagana. E ui lava o se luʻi le faalautele atu o la tatou faiva, ae e aumai ai faamanuiaga e tele, ma e tatou te ono fesoasoani ai i le toʻatele o isi tagata e “maua le poto saʻo i le upu moni.”—1 Timo. 2:3, 4; 2 Kori. 9:6.

Faaaʻoaʻoga Faale-Tusi Paia e Mulimuli Ai

15, 16. O faaaʻoaʻoga a ai e mafai ona tatou faataʻitaʻi i ai i le avea ma soo maelega o Keriso?

¹⁵ Na faapefea ona tali atu nisi na avea ma aposetolo, ina ua valaaulia i latou e Iesu e avea ma ona soo? E faapea le faamatalaga e faatatau iā Mataio: “Ona tuua loa lea e ia o mea uma lava, ae alu ma mulimuli atu iā te ia.” (Luka 5:27, 28) E tatou te faitau e faatatau iā Peteru ma Aneterea o ē na faifaiva: “Ona la tuua loa lea o lo la upega, ae mulimuli atu iā te ia.” Ona silasila atu lea o Iesu ma iloa atu Iakopo ma Ioane, o loo fono masaesae o o la upega faatasi ma lo la tamā. O le ā le la tali mai i le valaaulia a Iesu? “Ona la tuua loa lea o le vaa ma lo la tamā, ae mulimuli atu iā te ia.”—Mata. 4:18-22.

¹⁶ O le isi faaaʻoaʻoga lelei o Saulo lea na avea mulimuli ane ma le aposetolo o Paulo. E ui lava sa matuā sauā o ia i soo o Keriso, ae na suia lona olaga, ma avea ma ‘ipu ua filifilia’ e tauaveina le suafa o Keriso. “Ona amata loa lea ona . . . talaʻia [e Paulo] Iesu i le sunako e faapea, o Ia lenei o le Alo o le Atua.” (Galu. 9:3-22) Ma e ui lava sa onosaia e Paulo le tele o faigatā ma sauāga, ae e leʻi mou atu lava lona maelega.—2 Kori. 11:23-29; 12:15.

17. (a) O le ā lou faanaunauga e mulimuli atu ai i le Keriso? (e) O ā faamanuiaga e tatou te olioli ai, ona o le faia o le finagalo o Ieova ma lo tatou lotoatoa ma le malosi atoa?

¹⁷ E mautinoa e tatou te mananaʻo e faaaʻoaʻo i faataʻitaʻiga lelei a na soo, ma tali atu ma le naunautaʻi e aunoa ma le faatalatū. (Epe. 6:11, 12) O ā faamanuiaga e tatou te olioli ai a o faaauau ona maelega e mulimuli atoatoa i le Keriso? E tatou te maua le fiafiaga moni i le faia o le finagalo o le Atua, ma tofo i le lotomalie e maua i le taliaina o isi faaeaga o le auaunaga, ma tiute tauave i le faapotopotoga. (Sala. 40:8; faitau le 1 Tesalonia 4:1.) A o tatou finafinau e mulimuli atu i le Keriso, e tatou te maua ai le tele o faamanuiaga tumau e pei o le filemu o le mafaufau, le lotomalie, le faamaoniga a le Atua, ma le faamoemoe o le ola e faavavau.—1 Timo. 4:10.

Pe E te Manatua?

• O le ā le galuega tāua ua tuuina mai iā i tatou, ma o le ā so tatou manatu i ai?

• O le ā le faanaunauga faaletagata e ao ona tatou teena, ma aiseā?

• O le ā se iloiloga faamaoni e tatau ona tatou faia?

• O le ā e fesoasoani iā i tatou ina ia mulimuli ai pea i le Keriso?

[Fesili mo le Suʻesuʻega]

[Pusa/Ata i le itulau 27]

O le ā e Fesoasoani iā te Oe e Savavali ai Pea ma le Keriso?

▪ Ia faitau le Afioga a le Atua i aso taʻitasi, ma mafaufau loloto i ai.—Sala. 1:1-3; 1 Timo. 4:15.

▪ Ia tatalo e lē aunoa mo le lagolagosua ma le taʻitaʻiga a le agaga o le Atua.—Saka. 4:6; Luka 11:9, 13.

▪ Ia faatasitasi ma i latou e faaalia le maelega mo le faiva.—Faata. 13:20; Epe. 10:24, 25.

▪ Ia iloa le faanatinati o le taimi o loo tatou ola ai.—Efe. 5:15, 16.

▪ Ia iloa le ogaoga o aafiaga o le faia o “faamolemolega.”—Luka 9:59-62.

▪ Ia mafaufau e lē aunoa i lau taʻutinoga ina ua tuuina atu oe i le Atua, ma le tele o faamanuiaga e maua ona o le auauna iā Ieova ma mulimuli i le Keriso ma le lotoatoa.—Sala. 116:12-14; 133:3; Faata. 10:22.