O se tasi o fesoasoani, o faamāfanafanaga mai tauaiga, uō, ma uso Kerisiano.

E tai pei faaupuga agalelei o se vailaau aogā e togafitia ma faafouina ai i tatou. (Faata. 16:24; 18:24; 25:11) E naunau Kerisiano moni e ʻfaamāfanafana atu i ē ua oo i ai so o se puapuaga, i le faamāfanafanaga ua faamāfanafanaina ai i latou e le Atua.’ (2 Kori. 1:4; Luka 6:31) O le tulaga lenā na oo iā Antonio, o se ovasia itumalo i Mekisikō.

Sa aafia Antonio i le kanesa o le toto. E ui i lea, na ia taumafai malosi pea e pulea ona lagona mafatia. Na ia taumafai e manatua ma usuina pese o sauniga, ma manatunatu loloto i ai. Sa avea le faitauina o le Tusi Paia, faapea le talanoa iā Ieova i le tatalo ma puna o faamāfanafanaga.

Ua iloa e Antonio le telē o le fesoasoani na ia maua mai uso Kerisiano. E la te talosagaina se tasi o o la tauaiga o se toeaina, ina ia faia se tatalo mo i laʻua i le fale, pe a lofitūina i laʻua i faalogona o le lotovaivai. Na faamāfanafanaina i laʻua ma lana avā ma maua ai le toʻafilemu o le loto. Na ia faafetaia foʻi le lagolagosua a o la aiga faapea uso Kerisiano, ona ua mafai ai ona laʻua manumalo mai i nei faalogona.

O se isi fesoasoani o le agaga paia. I le Galuega 2:38 na taʻua ai e Peteru, o le agaga paia o le Atua o se “meaalofa foaʻifua,” ma na patino atu i le ʻaufaauuina. Na faamaonia lenā manatu ina ua faauuina i le agaga paia le toʻatele i le Penetekoso 33 T.A. Peitaʻi, e mafai foʻi ona tatou maua lenā meaalofa foaʻifua. Pe e lē tatau ea ona tatou talosaga atu pea mo le agaga paia?​—Isa. 40:28-31.

E ui i faigatā ma lamatiaga sa oo iā Paulo i le tele o taimi, ae e leʻi atuatuvale ai. (2 Kori. 1:8-10) Sa faamāfanafanaina o ia i le iloa sa lagolagoina o ia e Ieova. Na ia faapea mai i le 2 Korinito 1:3, 4: “Ia viia le Atua o le Tamā o lo tatou Alii o Iesu Keriso, le Tamā o le alofa mutimutivale, ma le Atua o faamāfanafanaga uma, o lē na te faamāfanafanaina i tatou i o tatou puapuaga uma.” E leʻi avea faigatā na fesagaʻia e Paulo ma itu na manatu ai e leai sona aogā. Nai lo lea, na fesoasoani iā te ia e atiaʻe ai le tigā alofa, ina ia mafai ai foʻi ona faamāfanafana atu i isi.

Sa toe galulue Antonio ma lana avā i le galuega femalagaaʻi, ina ua toe faafoʻisia lona malosi. E manatu mamafa Antonio i ona uso Kerisiano. Peitaʻi, na atili uunaʻia o ia ma lana avā e asiasi ma faalaeiau i ē mamaʻi, ona o le tulaga sa ia fesagaʻia. O se faataʻitaʻiga, na la asia se uso e leʻi toe auai i sauniga, ona o aafiaga o se maʻi faigatā na aafia ai. Na faamatala e Antonio, o le tigāina tele o le uso i lona maʻi na ia manatu ai ua leai sona aogā, e ui o loo tumau pea lona alofa mo Ieova faapea ona uso.

O se tasi o vala na faalaeiauina ai le uso, ina ua talosagaina e Antonio o ia ina ia tatalo i se tasi o faatasiga. Na faapea mai Antonio: “E ese le matagofie o upu o lana tatalo. Ina ua māeʻa, sa ia lagona le faafouina ma suia ai ona manatu.”

Po o ā lava o tatou tulaga, e tatou te feagai uma lava ma mafatiaga. Ae e pei ona taʻua e Paulo, e fesoasoani lenā e lava tapena ai i tatou e avatu faamāfanafanaga i isi. O lea, ia uaʻi atu i o tatou uso o loo feagai ma mafatiaga, ma faaaʻoaʻo iā Ieova i le faamāfanafana atu i isi.