1, 2. O le ā ua uunaʻia i tatou e vaaiga e faatatau i le faalapotopotoga a Ieova e fai?

E MATAʻINA le avea o i tatou ma vaega o se faalapotopotoga i le aoao o mea. I le vaaiga o loo i le Esekielu mataupu 1, faapea le Tanielu mataupu e 7, o loo faamatala ai le auala ua faataunuu ai e Ieova lona finagalo. O loo taʻitaʻia e Iesu le vaega faalelalolagi o le faalapotopotoga a Ieova. Ua ia faaaogā lenā vaega e taʻitaʻia le talaʻiga, faatonutonu ma faalaeiau le ʻautalaʻi, ma fesoasoani i isi e avea ma tagata tapuaʻi o Ieova. O nei vala ua uunaʻia ai i tatou e faatuatuaina le faalapotopotoga a Ieova.​—Mata. 24:45.

² Po o e piiama i le faalapotopotoga a Ieova e ala i le maelega i le auaunaga i le Atua? Ae faapefea pe a faasolo ina mou atu lou maelega? Na tupu lenā mea i Kerisiano i le uluaʻi senituri, ma na faamanatu ai e Paulo iā i latou le faaaʻoaʻoga maelega a Iesu. Na iloa e Paulo e aogā lenā manatu ina ia aua neʻi o latou “lē lavavā ma faavaivai ai.” (Epe. 12:3) Na iloiloina i le mataupu ua mavae galuega mataʻina o loo faia e le faalapotopotoga a Ieova. Na fesoasoani le faaaʻoaʻoga a Keriso i Kerisiano i le uluaʻi senituri. Ua faapena ona fesoasoani le faalapotopotoga a Ieova iā i tatou, ina ia tumau ma maelega ai i le auaunaga.

3. (i) O le ā e tatau ona fai ina ia ʻalofia ai le faavaivai? (ii) O le ā o le a iloiloina i lenei mataupu?

³ Ina ia ʻalofia le faavaivai po o le mou atu o le maelega, e lē lava le tau ina manatunatu i le faalapotopotoga a Ieova. Peitaʻi, e tatau ona faaauau ona tatou “faia le mea lelei.” (Kala. 6:9) O lea, seʻi o tatou iloilo ni vala se lima e fesoasoani iā i  tatou e piiama ai i le faalapotopotoga a Ieova. A māeʻa, ona iloilo lea po o ā ni vala e manaʻomia ona tatou galulue i ai.

4. Aiseā o se vala tāua ai o le tapuaʻiga moni le auai i sauniga?

⁴ E tāua i auauna a Ieova ona faapotopoto faatasi. E faapotopoto Ieova ma agelu i le lagi. (1 Tu. 22:19; Iopu 1:6; 2:1; Tani. 7:10) Na faapotopoto e lē aunoa le nuu o Isaraelu “ina ia latou faalogo ma latou aʻoaʻo ai.” (Teu. 31:10-12) Na faapotopoto foʻi e lē aunoa tagata Iutaia i le uluaʻi senituri i sunako ina ia faitau Tusitusiga Paia. (Luka 4:16; Galu. 15:21) Na tāua le faapotopoto faatasi ina ua faavaeina le faapotopotoga Kerisiano. E faapena foʻi aso nei, o sauniga o se vaega tāua o la tatou tapuaʻiga. O le faia faapea e ʻmanatunatu ai le tasi i le isi ina ia faatupu ai le alofa ma galuega lelei.’ E tāua tele ona ʻfaalaeiau’ le tasi i le isi, ona ua tatou ola i aso e gata ai.​—Epe. 10:24, 25.

5. E faapefea ona tatou faalaeiauina isi i sauniga?

⁵ O le faia o se sao i le sauniga, o se tasi lea o auala e tatou te faalaeiau ai isi i sauniga. E mafai ona tatou tali i le palakalafa, faaopoopo i se mau, pe faamatala foʻi se mea na tupu e faamaonia ai le aogā o le Tusi Paia. (Sala. 22:22; 40:9) Po o le ā le umi talu ona tatou iai i le upu moni, e faalaeiauina lava i tatou i tali a tamaiti faapea tagata matutua.

6. E faapefea ona fesoasoani sauniga i lo tatou itu faaleagaga?

⁶ E fesoasoani sauniga, fonotaga ma tauaofiaga iā i tatou i le tele o auala. E tatou te maua ai le lototele pe a talaʻi i tagata e tetee pe e lē fia faalogo mai. (Galu. 4:23, 31) E faamalosia ai foʻi lo tatou faatuatua i lauga ma isi mataupu faale-Tusi Paia. (Galu. 15:32; Roma 1:11, 12) O le auaufaatasi ma uso ma tuafāfine e maua ai le fiafia ma faamāfanafanaga. (Sala. 94:12, 13) O le Komiti Tauaʻoaʻoga a le Vaega Pule e faatulagaina mataupu o loo talanoaina i nei faatasiga uma. Maʻeu lo tatou lotofaafetai mo taʻiala o loo tatou mauaina i sauniga i vaiaso taʻitasi.

7, 8. (i) O le ā le māfuaaga e sili ona tāua e tatou te auai ai i sauniga? (ii) O le ā le aogā o sauniga iā te oe?

⁷ E ui i aogā e tatou te maua mai le auai i sauniga, peitaʻi, o la tatou tapuaʻiga iā Ieova o le māfuaaga sili lea e tatou te auai ai i sauniga. (Faitau le Salamo 95:6.) E tatou te vivii iā Ieova i pesega i sauniga. (Kolo. 3:16) E tatou te viia foʻi o ia i a tatou tali e faia i sauniga. E alagatatau ona tatou viia Ieova i na vala uma. (Faaa. 4:11) O lea, ua tatou malamalama nei i le tāua o le auai i sauniga.​—Epe. 10:25.

⁸ O sauniga o se sauniuniga a Ieova e tatou te tumau ai i lenei lalolagi leaga a o leʻi faaumatia. Po o lau vaai lenā i sauniga? Afai o lou manatu lenā, e tatau ona fai au taumafaiga e auai ai i sauniga e ui i le tele o meafai i le olaga. (Fili. 1:10) E lē tatau ona tatou misia sauniga, seʻi vaganā ua iai se māfuaaga tāua.

9. E faapefea ona tatou iloa e tāua le galuega talaʻi?

⁹ O Iesu na amataina le galuega talaʻi i le lalolagi. O lea, e tatou te piiama i le faalapotopotoga a Ieova pe a tatou maelega i le galuega talaʻi. (Mata. 28:19, 20) O le galuega talaʻi ma le faia o soo, o se tasi lea o galuega tāua i le faalapotopotoga a Ieova. O le tele o mea tutupu, ua tatou iloa ai le lagolago ma le taʻitaʻia e agelu o i tatou i tagata fiafia. (Galu. 13:48; Faaa. 14:6, 7) O le fuafuaga o le vaega vaaia o le faalapotopotoga a Ieova, ina ia mafai ona faamaopoopo ma lagolagoina le galuega talaʻi. Po o avea lenā galuega ma vala e sili ona tāua i lou olaga?

10. (i) Na faapefea i se tasi uso ona faamalosia lona naunau mo le upu moni? (ii) E faapefea ona faamalosia lou naunau mo le upu moni e ala i lau faiva?

¹⁰ E faamalosia lo tatou naunau i le upu moni, pe a tatou maelega i le galuega talaʻi. Na faapea mai Mitchel o se toeaina ma o se paeonia sauatoa: “Ou te fiafia e faailoa i isi le upu moni. Ou te mafaufau i le atamai ma le paleni lelei o faamatalaga, pe a ou faitau i se lomiga fou o Le Olomatamata ma le Ala Mai! Ou te mātauina le auala e tali mai ai tagata, ina ia iloa ai le auala ou te faaosofia ai lo latou naunau.” Na taʻua atili  e Mitchel, o lana faiva na fesoasoani iā te ia e faamuamua ai pea mea e sili ona tāua i lona olaga. E tatou te tumau foʻi i nei aso e gata ai, pe a tatou maelega i le auaunaga.​—Faitau le 1 Korinito 15:58.

11. Aiseā e tatau ai ona tatou faitauina lomiga ma manatunatu loloto i ai?

¹¹ O lomiga faale-Tusi Paia o se tasi lea o auala ua aumaia ai e Ieova iā i tatou le malosi. Atonu e te manatua se taimi na e faitau ai i se lomiga ma e mafaufau: ʻE fetaui lelei le mataupu lenei iā te aʻu, ma e peiseaʻī ua aumaia e Ieova lenei mataupu mo aʻu.’ E oo iā i tatou na lagona, auā na saunia e Ieova lomiga e aʻoaʻo ma taʻitaʻia ai i tatou. Na fetalai Ieova i le Salamo 32:8: “Ou te foaʻi atu iā te oe le tofā mamao, ma faatonu oe i le ala e ao ona e savali ai.” Pe e te taumafai e faitau lomiga uma ma manatunatu loloto i ai? O le faia faapea, e fesoasoani iā i tatou e maelega ai i le auaunaga e ui i nei aso faigatā.​—Faitau le Salamo 1:1-3; 35:28; 119:97.

12. O le ā e fesoasoani iā i tatou e faatāua ai a tatou lomiga?

¹² E tatou te faatāuaina a tatou lomiga, pe a mafaufau i le tele o galuega na faaalu ai. E alu se taimi e faia ai saʻiliʻiliga, tusia, toe iloilo, tusia ata, faaliliu, ma le tuuina o lomiga i luga o le upega tafailagi. O na galuega uma e vaavaaia e le Komiti o Tusitusiga a le Vaega Pule. O lālā e lomiaina nei lomiga e latou te lafoina atu foʻi lomiga i faapotopotoga i a latou oganuu. E faia nei galuega uma ina ia faamautinoa, ua fafagaina faaleagaga tagata o Ieova. (Isa. 65:13) O lea, ia tatou maua aogā mai lomiga ua saunia e le faalapotopotoga a Ieova.​—Sala. 119:27.

13, 14. (i) O ai i latou i le lagi o loo lagolagoina le faalapotopotoga a Ieova? (ii) E faapefea ona tatou faataʻitaʻi iā i latou?

¹³ Na iloa e Ioane i se vaaiga, o loo tiʻetiʻe Iesu i se solofanua paʻepaʻe e faaumatia i latou e tetee iā Ieova. (Faaa. 19:11-15) Na ia vaaia foʻi le ʻaufaauuina ua toetutū i le lagi ma agelu, o loo tiʻetiʻe foʻi i solofanua ma mulimuli atu iā Iesu. E faaalia ai lo latou lagolagoina o lo latou Taʻitaʻi o Iesu. (Faaa. 2:26, 27) O la latou faaaʻoaʻoga e uunaʻia ai i tatou e lagolago i ē taʻimua i le faalapotopotoga a Ieova.

¹⁴ O loo lagolagoina foʻi e le motu o tagata e toʻatele le galuega a le vaega totoe i le lalolagi. (Faitau le Sakaria 8:23.) O se tasi o auala e tatou te lagolagoina ai le faalapotopotoga a Ieova, o le gauaʻi lea i ē taʻimua. (Epe. 13:7, 17) Po o uunaʻia e a tatou faamatalaga isi uso e faaaloalo i toeaina? Po o aʻoaʻoina a tatou fanau e faaaloalo i nei tane ma talia a latou fautuaga? E iai se isi auala e tatou te lagolagoina ai le faalapotopotoga. Po o tatou faia o se aiga ni foaʻi e lagolago ai le galuega i le lalolagi aoao? (Faata. 3:9; 1 Kori. 16:2; 2 Kori. 8:12) Po o tatou fesoasoani i le faamamāina ma le faaleleia o Maota mo Sauniga? E foaʻi mai e Ieova lona agaga paia pe a ia silasila mai o loo tatou faia na vala uma. O le agaga lenā e tatou te maua ai le malosi e tumau ai i nei aso faigatā.​—Isa. 40:29-31.

15. Aiseā e tatau ai ona tatou tauivi e faia le mea saʻo?

¹⁵ Ina ia tumau ma piiama i le faalapotopotoga a Ieova, e tatau ona tatou ola i se auala e faafiafiaina ai o ia. (Efe. 5:10, 11) O lenei lalolagi amioleaga, faapea taumafaiga a Satani, ma lo tatou tulaga lē lelei atoatoa, ua faafaigatā ai ona tatou faia le mea saʻo. O loo tauivi malosi nisi o o tatou uso peleina i aso taʻitasi e faatumau la latou faauōga ma Ieova. E alofagia e Ieova i latou ona o a latou taumafaiga. O lea, aua neʻi o tatou faavaivai. E tatou te maua se olaga fiafia ma faamalieina, faapea le finagalo malie o Ieova, pe a tatou ola e ōgatusa ma ana tapulaa.​—1 Kori. 9:24-27.

16, 17. (i) O le ā e tatau ona fai pe a faia se agasala matuiā? (ii) O le ā e tatou te aʻoaʻoina mai le faaaʻoaʻoga a Anne?

¹⁶ O le ā e tatau ona fai pe a tatou faia se agasala matuiā? Ia aua le nanāina, ae taumafai e saʻili le fesoasoani i le vave e mafai ai. Ina ua taumafai Tavita e natia lana agasala, na ia faapea mai i le Salamo 32:3, “ona tigā ai lea o oʻu ivi ona o loʻu ōi i le aso atoa.” Pe a tatou taumafai e natia a tatou agasala, e mafai ona mou atu ai lo tatou fiafia ma aafia ai la tatou faauōga ma Ieova. Ae e ʻfaaalia mai le alofa mutimutivale,’ pe a faailoa atu a tatou mea sesē.​—Faata. 28:13.

¹⁷ Seʻi mafaufau i le faaaʻoaʻoga a Anne. * A o ia paeonia sauatoa i le taimi a o talavou, sa amata ona ia faia mea leaga. Na lē lelei lona lotofuatiaifo. Na ia faapea mai: “Ou te leʻi fiafia ma ou aafia ai i faalogona nofosala.” I se tasi o sauniga, na talanoaina ai le Iakopo 5:14, 15. Na iloa ai e Anne, o loo ia manaʻomia le fesoasoani, ma ia talanoa ai loa i toeaina. E leʻi faigofie iā te ia, peitaʻi na ia manatu e pei o loo avatu e Ieova se vaifofō i lona maʻi faaleagaga. Na ia faapea mai: “E leʻi faigofie le inuina o le fualaau, peitaʻi na ou manuia ai.” Ua toe maelega nei Anne i le auaunaga iā Ieova, ma maua se lotofuatiaifo mamā.

18. O le ā e tatau ona tatou maumauaʻi e fai?

¹⁸ Ia manatua, o se faaeaga le avea o i tatou ma vaega o le faalapotopotoga a Ieova i nei aso e gata ai. Seʻi o tatou taumafai e auai e lē aunoa i sauniga, maelega i le talaʻiga, ma maua aogā mai a tatou lomiga. Ia lagolagosua foʻi i ē taʻimua, ma ola i se auala e faafiafiaina ai Ieova. O le faia faapea, o le a tatou mulimuli ai i le taʻitaʻiga a le faalapotopotoga a Ieova, ma lē faavaivai ai.