O SE fiafiaga le vaaia o le faatupulaʻia o talavou ua faafaigofie o latou olaga, ina ia faalautele ai la latou faiva. (Mata. 6:22) O ā suiga na o latou faia? O ā ni luʻi na latou fesagaʻia? Ina ia maua le tali, seʻi o tatou talanoaina faamatalaga e faatatau i nisi o loo auauna i Mekisikō i le taimi lenei.

Na faaipoipo Dustin ma Jassa iā Ianuari i le 2007. E leʻi umi ae taunuu le mea sa la moomoo i ai, o le faatau lea o se vaa faila ma nonofo ai i le tausaga atoa. Na taula le vaa i Astoria i Oregon i le Iunaite Setete, o se taulaga matagofie e siʻomia e mauga, ma e latalata i le Vasa Pasefika. Na faapea mai Dustin: “E matagofie le vaaiga i lea nofoaga.” Na la manatu o loo faafaigofie o laʻua olaga ma faalagolago iā Ieova. Sa la nonofo i se vaa e 26 futu (7.9 m) le lautele, faigaluega faavaitaimi, auauna i se faapotopotoga e ese le gagana e tautatala ai, ma paeonia lagolago mai lea taimi i lea taimi. Peitaʻi, na iloa mulimuli ane le sesē o la manatu. Nai lo o le fesoasoani i le faapotopotoga, sa alu le tele o lo laʻua taimi i le faaleleia o le  vaa. Na faapea mai Dustin: “Pe afai e ma te naunau e faamuamua Ieova i o maʻua olaga, ua tatau nei loa ona fai se suiga.”

Na faapea mai Jassa: “A o oʻu leʻi faaipoipo, sa ou nofo i Mekisikō, ma auai i se faapotopotoga e tautatala i le gagana Peretania. Sa ou fiafia i inā, ma naunau lava e toe foʻi i ai.” Ina ia faamalosia lo laʻua faanaunauga e faalautele le auaunaga, e faitau e Dustin ma Jassa i le tapuaʻiga a le aiga talaaga o uso ma tuafāfine, na auauna i vaipanoa e fua tele mai. (Ioa. 4:35) Na faapea mai Dustin: “Sa o maʻua fia tofo i lea olioli.” Ina ua la logotala ua iai se vaega fou i Mekisikō, sa tuua loa a la galuega ma faatau atu le vaa, ae siitia atu i Mekisikō.

Na faamautū Dustin ma Jassa i Tecomán, o se aai e latalata foʻi i le Vasa Pasefika, peitaʻi e 2,700 maila (4,345 km) le mamao i le itu i saute mai Astoria. Na taʻua e Dustin, na suia le nonofo i se vaipanoa e mālū le savili, i se nofoaga e vevela tele ma e tele ai tipolo. Sa leai ni a la galuega. E faalua i le aso ona ʻai le araisa ma le pi mo se taimi umi. Peitaʻi, e iai taimi e foaʻi atu ai e tagata na latou suʻesuʻe mago, faʻi, tipolo ma esi. Na maua ni a la galuega i luga o le Initaneti. O le tupe na maua mai ai na mafai ona tausia ai i laʻua.

Na la faapea mai: “O le ma siitia i se isi nofoaga o se gaoioiga sili lea na ma faia.” Ua faamalosia ai le la faiā ma Ieova, faapea le la faiā o se ulugalii. E la te faifaimea faatasi i le tele o taimi. E talaʻi faatasi, saʻili ni auala e fesoasoani ai i tagata suʻesuʻe, faapea foʻi le sauniuni mo sauniga. E lē gata i lea, ua saʻoloto o la mafaufau. Na la faapea atili mai: “Na ma talitonu i le moni o le folafolaga o loo i le Salamo 34:8, ʻinā outou tofotofo ia ma iloa ai e lelei Ieova.’”

E silia ma le 2,900 uso ma tuafāfine nofofua po ua faaipoipo foʻi, o loo auauna i vaipanoa o Mekisikō, o loo manaʻomia ai le ʻautalaʻi. O le toʻatele o i latou e i lalo ifo o le 40 tausaga. Aiseā na latou filifilia ai lenei auaunaga? E tolu ni māfuaaga na latou faailoa mai.

Ia faaalia le alofa mo Ieova ma isi tagata. Sa papatiso Leticia i le 18 o ona tausaga. Na ia  faapea mai: “Ina ua ou tuuina atu iā Ieova, sa ou malamalama e tatau ona ou auauna iā te ia ma le lotoatoa. Ina ia faaalia loʻu alofa iā te ia, e tatau ona faaalu loʻu taimi ma le malosi i lana auaunaga.” (Mare. 12:30) A o talavou Hermilo, na ia siitia e auauna i se vaipanoa e manaʻomia ai le ʻautalaʻi. Ua faaipoipo nei o ia iā Leticia. Na ia faapea mai: “O le fesoasoani i tagata i le itu faaleagaga, o le auala sili lea e faaalia ai le alofa i tuaoi.” (Mare. 12:31) Na ia tuua le aai telē o Monterrey lea na ia faigaluega ai i se faletupe, ae siitia atu i se aai laʻitiiti.

E maua ai le fiafia moni. E leʻi leva talu ona papatiso Leticia, ae malaga loa e galulue ma se tuafafine paeonia i se tasi o aai maotua mo se masina. Na faapea mai Leticia: “Na ou maofa i le auala na tali mai ai tagata i le feʻau o le Malo, ma na ou maua ai le fiafia. Ina ua māeʻa le masina, na ou faapea ifo, ʻO le mea lenei ou te manaʻo e fai i loʻu olaga.’” O lenā fiafia na tosina ai foʻi Essly e fai lenā galuega, ma ua silia nei ma le 20 ona tausaga. A o ia aʻoga, na ia feiloaʻi ai i le toʻatele o paeonia maelega o loo auauna i vaipanoa o loo telē ai le manaʻoga. Na ia faapea mai: “O le vaaia o le laufofoga fiafia o uso ma tuafāfine, na ou moomoo ai i lea ituaiga olaga.” E toʻatele tuafāfine e tutusa o latou faalogona ma Essly. E silia ma le 680 tuafāfine nofofua o loo auauna i vaipanoa o loo telē ai le manaʻoga i Mekisikō. Maʻeu se faaaʻoaʻoga lelei mo i tatou.

E maua ai se olaga aogā ma faamalieina. Na maua se sikolasipi a Essly ina ua māeʻa lana aʻoga. Na uunaʻia o ia e ana uō e tuliloa lenā sini, ma maua ai se olaga sologa lelei. E leʻi mulimuli Essly i a latou fautuaga. Na ia faapea mai: “O le toʻatele o talavou na tuliloaina na sini, e lē o toe faamuamua i o latou olaga sini faaleagaga. Na ou vaaia le apoia o i latou i faafitauli, ona o le aafia tele i mea o le lalolagi. Ou te manaʻo e faaaogā loʻu olaga o se talavou e auauna ai iā Ieova.”

Na ave nisi mataupu faaopoopo a Essly i le aʻoga, ina ia maua ai sana galuega e lagolago ai lana paeonia, ma siitia atu i se nofoaga o loo telē ai le manaʻoga. O se luʻi le aʻoaʻoina o le gagana e tautatala ai tagata Otomi, ma tagata  Tlapaneco. Ina ua mavae le tolu tausaga talu ona ia galue i lea vaipanoa, na ia faapea mai: ʻO le galue i se vaipanoa o loo telē ai le manaʻoga, e maua ai le faamalieina ma atili māfana ai laʻu faiā ma Ieova.’ E ioe foʻi i lenā manatu Phillip ma Racquel, o se ulugalii mai le Iunaite Setete ua silia ma le taʻi 30 o la tausaga. “O loo vave ona suia le tulaga o le lalolagi, ma e lagona ai e le toʻatele le lē mautonu. Peitaʻi, o le galulue e saʻili i latou e talia le feʻau o le Tusi Paia, e maua ai se olaga fiafia. E maua ai le faamalieina.”

E tele luʻi i le galue i se nofoaga o loo tele ai le manaʻoga. O se tasi luʻi, o le tausiga lea i le itu faaletino. O lea, e tāua ai le taumafai e faamasani i le tulaga o le vaipanoa o loo e galue ai. Na faapea mai se tuafafine ua leva ona paeonia e igoa iā Verónica: “Ou te faatauina atu ni meaʻai taugofie i se tasi nofoaga. Ae i se isi nofoaga, ou te faatauina ofu ma faafuga ao o tagata. O loo oʻu teufale i le taimi nei ma faia aʻoaʻoga mo mātua i le auala e feagai ai ma a latou fanau.”

O se isi luʻi, o le faamasani lea i tū ma aga i se vaipanoa maotua. O le tulaga lenā na oo iā Phillip ma Racquel ina ua galulue i le vaipanoa e tautatala i le gagana Nahuatl. Na faapea mai Phillip, “e matuā ese lava tū ma aga i lea vaipanoa.” Na fesoasoani iā i laʻua le uaʻi i vala lelei e faatatau i tagata Nahuatl. E māfana faiā faaleaiga, e lelei le auala e feutagaʻi ai ma isi, aemaise o latou uiga agalelei. Na faapea mai Racquel: “E tele ni lesona na ma aʻoaʻoina mai le galulue faatasi ma uso i lenā vaipanoa.”

O le ā e fesoasoani iā te oe pe afai o loo e naunau e siitia i se nofoaga o loo telē ai le manaʻoga? E tusa ma faamatalaga a uso ma tuafāfine ua loa ona iai i lea galuega, o le taumafai muamua lea e faafaigofie le olaga a o leʻi siitia atu. (Fili. 4:11, 12) O ā nisi mea e mafai ona fai? Na faapea mai Leticia: “Na ou ʻalofia se ituaiga galuega e manaʻomia ona ou faamautū ai i se vaipanoa, auā na ou manaʻo e siitia i so o se taimi e manaʻomia ai le fesoasoani.” Peitaʻi, na aʻoaʻoina e Hermilo le auala e gasese ai taumafa, faia tagamea faapea le faia o le auli. Ae na faapea mai Verónica: “A o oʻu nofo i loʻu aiga, sa ou fesoasoani i le faia o kuka manogi ae taugofie. Sa ou iloa foʻi le auala e sefe ai le tupe.”

Na iloa e Levi ma Amelia, o se ulugalii mai le Iunaite Setete ua faaipoipo mo le valu tausaga, le tāua o le faia o ni tatalo patino a o sauni e galulue i Mekisikō. Na faapea mai Levi: “Na ma fuafuaina le tupe manaʻomia mo le tausaga atoa. Ina ua māeʻa, ona ma tatalo lea iā Ieova mo le fesoasoani.” A o faagasolo masina, na la mauaina lenā tino i tupe ma siitia loa e aunoa ma le faatuai. Na taʻua e Levi, na talia e Ieova le la talosaga, ma ua tatau ona fai le la pito laau. Na faapea mai Amelia: “Na ma siitia mai e auauna mo le tausaga. Peitaʻi ua fitu tausaga o ma auauna i inei, ma e lē o iai se fuafuaga e toe ō ese. Ua ma tofo i le tausiga a Ieova, ma faamaonia ai lona agalelei.”

E talitonu foʻi Adam ma Jennifer o se ulugalii mai le Iunaite Setete i le tāua o le tatalo. O loo la auauna i se faapotopotoga faa-Peretania i Mekisikō. Na la faapea mai: “E lē tatau ona faatali seʻia lelei atoatoa le tulaga o mea. Ia faaaofia i au tatalo lou faanaunauga e auauna i se isi vaipanoa, ma ia gaoioi e ōgatusa ma au tatalo. Ia faafaigofie le olaga. Ia tusi atu i le lālā i le atunuu o loo e fia galue ai. Pe a māeʻa ona fuafua lelei, ia gaoioi loa.” * O le faia faapea, o le a e tofo ai i se olaga faaleagaga e faamalieina ai.