1. O le ā e tatau ona tatou faia e faamautinoa ai o loo malosi pea lo tatou faatuatua?

O LE toʻatele o tagata e na o mea e vāai i ai e talitonu i ai. Peitaʻi ua faapea mai le Tusi Paia, “e leai lava se tasi ua vaai i le Atua.” (Ioa. 1:18) O lea, ona e lē vaaia le Atua, e faapefea ona tatou fesoasoani i tagata e lē talitonu i le Atua ina ia faatuatua iā te ia? O le ā e tatau ona tatou faia ina ia faamalosia ai pea lo tatou faatuatua i le “Atua e lē vaaia”? (Kolo. 1:15) Muamua, e tatau ona tatou iloa po o ā aʻoaʻoga ua natia ai le upu moni e faatatau i le Atua. O le vala e sosoo ai, o le faaaogāina lelei o le Tusi Paia e faamaonia ai o na aʻoaʻoga “e tetee i le poto i le Atua.”​—2 Kori. 10:4, 5.

2, 3. O ā aʻoaʻoga ua faatauasoina ai tagata i upu moni e faatatau i le Atua?

² O le evolusione, o se tasi o aʻoaʻoga sesē ua faatauasoina ai tagata ma natia ai upu moni e faatatau i le Atua. E feteenaʻi lenā aʻoaʻoga ma le Tusi Paia, ma ua aveesea ai le faamoemoe matagofie mo tagata i le lumanaʻi. E aʻoaʻoina e le evolusione le manatu na teʻi lava ua iai mea uma. Afai e moni lenā manatu, o lona uiga e leai se fuafuaga aogā mo le olaga o tagata.

³ Ua aʻoaʻoina e nisi lotu ua faapea mai o Kerisiano, ua pe ā ma le sefulu afe tausaga talu ona foafoaina e le Atua le vateatea, e aofia ai le lalolagi paneta ma meafaiola, i le na o le ono aso o le vaiaso. E taʻua lenā aʻoaʻoga o le creationism. O tagata e talitonu i lenā aʻoaʻoga sesē, e tetee i faamaoniga faasaienitisi e feteenaʻi ma a latou aʻoaʻoga. Atonu e latou te faaaloalo i le Tusi Paia, peitaʻi o lenei aʻoaʻoga e faafaigatā ai i isi ona faatuatuaina le Tusi Paia. Aiseā? Talu ai o lenā aʻoaʻoga e foliga mai ai e lē saʻo  faamatalaga a le Tusi Paia. E taitutusa i latou e aʻoaʻoina lenā aʻoaʻoga, ma nisi sa iai i le uluaʻi senituri T.A. Sa latou maelega e tapuaʻi i le Atua, “ae e lē tusa ai ma le poto saʻo.” (Roma 10:2) E faapefea ona tatou faaaogā le Tusi Paia e faamaonia ai le sesē o na aʻoaʻoga ua “matuā mautū”? * E faatoʻā mafai ona tatou faia lenā mea, pe a tatou taumafai malosi e maua le poto saʻo o le Tusi Paia.

4. O le ā e tatau ona faavae ai lo tatou faatuatua?

⁴ Ua aʻoaʻoina i tatou e le Tusi Paia ina ia faatāua le poto e pei o se oloa tāua. (Faata. 10:14) E finagalo Ieova ina ia faavae lo tatou faatuatua i faamaoniga ma se mafaufau lelei, ae lē o filosofia faaletagata po o aʻoaʻoga faalotu. (Faitau le Eperu 11:1.) Ina ia faamalosia lo tatou faatuatua i le Atua, e tatau ona tatou talitonu muamua o loo soifua le Atua. (Faitau le Eperu 11:6.) E tatou te talitonu o loo soifua le Atua. E lē faavaea i ni taumatematega, ae e faavae mai i faamaoniga ma le iai o se “mafaufau lelei.”​—Roma 12:1.

5. O le ā se tasi o māfuaaga e tatou te talitonu ai o loo soifua le Atua?

⁵ Na faamatala mai e Paulo le māfuaaga e tatou te talitonu ai o loo soifua le Atua, e ui e tatou te lē vaaia o Ia. Na ia tusi mai: “O ona uiga lē vaaia, ua vaaia lava ia talu ona foafoaina le lalolagi, ona ua mafai ona vaaia i mea na faia, e oo foʻi i lona mana e faavavau ma lona tulaga o le Atua.” (Roma 1:20) E faapefea ona e fesoasoani i se tasi e talitonu i upu a Paulo, pe a ia lē mautinoa o loo soifua le Atua? E mafai ona e faaaogā nisi faaaʻoaʻoga o le foafoaga o loo mulimuli mai, e faamaonia ai le mana ma le atamai o Ieova.

6, 7. Ua faapefea ona faaalia le mana o Ieova i le vanimonimo, ma le malosiaga faamaneta i le manava o le eleele?

⁶ E tatou te faamaonia le mana o le Atua i nisi o vala e lua o le foafoaga o loo puipuia i tatou, o le vanimonimo (atmosphere) ma le malosiaga faamaneta i le manava o le eleele (magnetic field). * O le vanimonimo, e saunia mai le ʻea o loo tatou mānavaina ae e mafai foʻi ona puipuia i tatou. I le ā le itu? O maa tetele i le vateatea (outer space) e mafai ona faaleagaina ai le paneta pe a fetoʻai. Peitaʻi e masani ona lē tupu lenā mea, pe a oo mai na maa tetele i le vanimonimo. E pāpā na maa tetele pe a oo mai i le vanimonimo, ma maua ai vaaiga matagofie i le pō, lea e masani ona tatou faapea ai ua paʻū se fetu i le pō.

⁷ E mafai foʻi e le malosiaga faamaneta i le manava o le eleele ona puipuia i tatou. E faia aʻe nisi vaega o le manava o le eleele i uʻamea o loo liusuavai, e tatafe e pei o se lava ma e aasa ma matuā pupuna i taimi uma. O le pupuna o uʻamea nei pe a liusuavai, e maua mai ai le malosiaga faamaneta, lea e mafai ona oo mai luga o le fogāeleele ma le vateatea. E mafai e lenei malosiaga ona puipuia i tatou mai le lā, ma pe a pā se ave o le lā. O le malosi o se ave o le lā, e mafai ona faatamaʻia ai meafaiola uma i luga o le lalolagi. Peitaʻi e lē mafai ona tupu lenā mea, ona ua puipuia i tatou e le malosiaga faamaneta o le lalolagi. O se faamaoniga o le malosi o lenei malosiaga faamaneta, pe a tatou vaaia ni vaaiga matagofie i le tafatafaʻilagi i le pō i le itu i Mātū, ma le itu i Saute o le lalolagi. E faamaonia i nei vala le ʻmatuā tele o le mana’ o Ieova.​—Faitau le Isaia 40:26.

8, 9. Ua faapefea ona faaalia le atamai o Ieova i le faataamilosaga ua maua ai pea e meafaiola le ola?

⁸ E tatou te vaaia foʻi le atamai o Ieova i le auala ua ia faatumau ai le ola i luga o le lalolagi. Seʻi mafaufau i se aai e nonofo ai le faitau miliona o tagata ma e siʻomia e se pā. O lenei aai, e leai se auala e mafai ona sao mai ai i totonu se vai mamā, pe aveesea ai foʻi otaota. O se aai faapena, e faigofie ona palapalā ma faigatā ona ola ai. E tai pei lo tatou lalolagi o lenā aai. E itiiti le vai mamā e maua ai, ma e faigatā ona aveesea mea e lē manaʻomia. Peitaʻi e mafai lava e le lalolagi ona saunia mea uma, ina ia mafai ai e meafaiola uma ona maua le ola. Aiseā ua mafai ai ona tupu lenā mea? Talu ai o faataamilosaga o le lalolagi, ua mafai ai ona maua pea mea e manaʻomia mo le ola.

⁹ O lea seʻi o tatou iloilo le auala e maua ai e meafaiola le okesene. O le faitau piliona o tagata ma manu, e mānavaina le okesene ae aumai i fafo le kasa o le kaponi (carbon dioxide). Peitaʻi e tatou te maua pea le ʻea o le okesene. E faapefea ona tupu lenā mea? E faaaogā e laau le kasa o le kaponi, le vai, le malamalama o le lā ma isi minerale, e gaosia ai le okesene ma isi minerale e aogā mo meafaiola. E taʻua lenā faataamilosaga o le photosynthesis. O lea, e faaauau pea lenei faataamilosaga, pe a tatou mānavaina le okesene ae aumai i fafo le kasa o le kaponi mo laau. Ua faaaogā e Ieova laau e aumaia ai i “tagata uma le ola ma le mānava.” (Galu. 17:25) Maʻeu le atamai o Ieova!

10, 11. E faapefea ona tatou iloa le atamai o Ieova i nisi o ana foafoaga?

¹⁰ E tatou te vaaia foʻi le atamai o Ieova i le auala na ia foafoaina ai le tele o isi meafaiola i luga o le lalolagi. Ua faapea mai le ʻausuʻesuʻe, e pe ā ma le 2 i le 100 miliona meafaiola eseese i luga o le lalolagi. (Faitau le Salamo 104:24.) O lea seʻi o tatou iloiloina le atamai o Ieova i nisi o ana foafoaga.

¹¹ O se faaaʻoaʻoga, o se tasi ituaiga o pepe e taʻua o le monarch butterfly. O lenei ituaiga o pepe e laʻitiiti lona faiʻai, ma e talitutusa le telē ma le pito maʻai o le mata o se peni. E ui i le laʻitiiti o lona faiʻai, ae e mafai ona lele i le pe ā ma le 1,800 maila (e toetoe 3,000 km) mai Kanata agaʻi i Mekisikō. E latou te faaaogāina le lā pe a felelei. Ae faapefea ona latou felelei pe a taamilo le lā? Na foafoaina e Ieova le faiʻai o lenei ituaiga o pepe, ina ia mafai ai ona lele pea i le itulagi saʻo e tusa pe taamilo le lā. Seʻi mafaufau i le isi meaola laʻitiiti lenei e taʻua o le dragonfly. E lua ona mata, ae i mata taʻitasi e pe ā ma le 30,000 vaega ninii o loo iai e taʻua o lenses, e mafai ona manino lelei ai lana vaai. E ui i le laʻitiiti o le faiʻai o le dragonfly, ae e mafai e le malosiaga o ona mata ona iloa so o se mea e tutupu e oo lava i mea lāiti.

12, 13. Aiseā e ofoofogia ai le auala na foafoaina ai e Ieova o tatou sela?

¹² E mataʻina le auala na foafoaina ai e  Ieova sela o loo i meafaiola uma. O se faataʻitaʻiga, e pe ā ma le 100 tiliona sela o loo i totonu o le tino o le tagata. I totonu o nei sela ninii taʻitasi o loo iai le DNA. O le DNA, e maua uma ai le tele o faamatalaga manaʻomia mo le fausia aʻe o le tino o le tagata.

¹³ O le ā le tele o faamatalaga e mafai ona maua i le DNA? O le CD e tasi, e mafai ona ofi uma ai faamatalaga o loo i se lomifefiloi (dictonary). Ae o le 1 kalama o le DNA, e mafai ona maua ai faamatalaga e ofi i totonu o le 1 tiliona CD, po o le 1 tiliona lomifefiloi. Pe i nisi upu, e tasi le sipunitī o le DNA, e mafai ona maua ai faamatalaga e fausia ai le pe ā ma le 2.5 tiliona tagata.

14. O ā o tatou faalogona e faatatau iā Ieova ona o suʻesuʻega a saienitisi?

¹⁴ Na faapea mai Tavita, sa pei na tusia e Ieova i se tusi faamatalaga uma e manaʻomia mo le foafoaina o tagata. Na ia faapea mai: “Na silasila mai lava ou fofoga ina o afuafua aʻu. Na tusia foʻi i lau tusi ona vaega uma e faatatau i aso na faia ai, a o leai ni vaega o loʻu tino.” (Sala. 139:16) Sa uunaʻia Tavita e vivii iā Ieova ina ua ia mafaufau i le auala na foafoaina ai o ia. Ua faatoʻā maua e saienitisi le tele o isi faamatalaga e faatatau i le tino o le tagata, lea e tatou te maofa ai. O na faamatalaga e tatou te ioe ai i faalogona o le faisalamo e faatatau iā Ieova. Na ia faapea mai: “Ou te faaneenee atu iā te oe, auā ua e faia aʻu i se auala mataʻutia ma ofoofogia. E ofoofogia au galuega, ua ou matuā iloa lelei lava.” (Sala. 139:14) O foafoaga o loo siʻomia ai i tatou, e faamaonia ai o loo soifua le Atua.

15, 16. (a) Ua faapefea ona fesoasoani a tatou lomiga i tagata ina ia malamalama ai i foafoaga a Ieova? (e) O le ā se mataupu o mataupu “Pe Na Teʻi Lava Ua Iai?” na e fiafia i ai?

¹⁵ I le tele o tausaga, na fesoasoani lomiga a Molimau a Ieova i le faitau miliona o tagata e aʻoaʻoina manatu e faatatau i le Atua, e ala i mea na ia foafoaina. O se faataʻitaʻiga, o le fuafuaga o nisi lomiga ina ia fesoasoani i tagata e talitonu i aʻoaʻoga o le evolusione, ma isi aʻoaʻoga sesē faalotu. Na tusi se tuafafine i le lālā i le Iunaite Setete e faatatau i nei lomiga e faapea: “Na taulau manuia la matou tauiviga o le tufaina o lenei lomiga faapitoa. Na talosaga mai se tasi fafine mo kopi e 20. O ia o se faiaʻoga o le mataupu o le paiolo, ma e manaʻo e tofu le tamaitiiti o lana vasega ma se kopi.” Na tusi mai se isi uso: ʻNa amata ona ou talaʻi i se vaimea o le 1947-1949 ma ua toeitiiti 75 oʻu tausaga, ae ua ou matuā olioli i le talaʻiga i lenei taimi, ona o loo faia soʻu sao i le masina lenei i le tufaina atu o lenei lomiga faapitoa.’

¹⁶ I tausaga talu ai nei, sa iai i lomiga o le Ala Mai! le mataupu, “Pe Na Teʻi Lava Ua Iai?” O na mataupu pupuu o loo faamatilatila ai le ofoofogia o mea o le foafoaga. E lē gata i lea, o le taumafai o tagata e fausia nisi oloa, e ala i le faataʻitaʻi i le auala na foafoaina ai e Ieova nisi o mea o le foafoaga. Sa tatou mauaina foʻi i le 2010 le polosiua Was Life Created? E mafai ona tatou faaaogā lenā polosiua i le talaʻiga. E matagofie ata o lenā polosiua, ma na fuafuaina e fesoasoani iā i tatou e talisapaia ai Ieova ona o ana foafoaga. O fesili i faaiʻuga o mataupu o lenā polosiua, e fesoasoani e toe mafaufau ai i manatu sa faitauina.

17, 18. (a) O le ā le tiute tauave ua iai i mātua? (e) E faapefea ona e faaaogāina nisi o polosiua ma lomiga, e faatatau i le foafoaga i le tapuaʻiga a le aiga?

¹⁷ Mātua, pe e masani ona outou faitau faatasi ma le fanau lenei polosiua i le tapuaʻiga a le aiga? O le faia faapea, e mafai ai ona e fesoasoani e atiaʻe lo latou faatuatua iā Ieova. Atonu ua auai lau fanau i aʻoga maualuluga. Ua taumafai i latou e aʻoaʻoina le aʻoaʻoga o le evolusione e faatalitonu lau fanau, e leai Sē na foafoaina mea. Ua taumafai nisi faiaʻoga, saienitisi, o polokalame e faatatau i le natura ma ata tifaga, e faamaonia lenā aʻoaʻoga. E mafai ona e fesoasoani  i lau fanau talavou e puipuia o latou talitonuga, e ala i le faaaogā o le polosiua The Origin of Life—Five Questions Worth Asking, lea na lomia i le 2010. E taitutusa lenā polosiua ma le polosiua Was Life Created?, e mafai ona fesoasoani i talavou ina ia iai se “mafaufau lelei.” (Faata. 2:10, 11) E lē maua nei polosiua i le faa-Samoa. Ae e lelei ona taumafai pea e faamasani i nei polosiua, ina ia mafai ona e fesoasoani i lau fanau e teena aʻoaʻoga sesē o le evolusione. O nei polosiua o le a mafai ai ona latou iloa po o moni mea o loo latou aʻoaʻoina i le aʻoga. *

¹⁸ E iai nisi taimi e lipotia mai ai i tala fou ua maua e saienitisi ni toega o meaola mamate, e faamaonia ai le aʻoaʻoga o le evolusione. Po o ni lipoti foʻi e faapea, ua faamaonia e saienitisi mai a latou suʻesuʻega na teʻi lava ua iai le ola. Ua tusia le polosiua The Origin of Life, i se auala e mafai ai ona tatou iloa pe e moni na lipoti. Mātua, ia faaaogā na polosiua e fesoasoani ai i fanau e faamatala atu ma le mautinoa o latou talitonuga, e faatatau i Lē na foafoaina mea.​—Faitau le 1 Peteru 3:15.

19. O le ā le faaeaga ua tatou mauaina?

¹⁹ E tele mea ua tatou aʻoaʻoina e faatatau i uiga matagofie o Ieova, pe a tatou faitau i mataupu o le foafoaga i lomiga o loo maua mai i lana faalapotopotoga. O nei faamaoniga uma, e uunaʻia ai i tatou e vivii atu iā Ieova mai i o tatou loto. (Sala. 19:1, 2) O se faaeaga mo i tatou le avatu iā Ieova o Lē na foafoaina mea uma, le mamalu ma le viiga e alagatatau ona avatu iā te ia.​—1 Timo. 1:17.