1-3. O ā luʻi ua feagai ma ulugalii faaipoipo? (Tagaʻi i le ata i luga aʻe o le matua.)

UA FAAPEA mai se tane ua 38 tausaga o fiafia lana faaipoipoga: “E mafai ona oulua olioli i faamanuiaga a Ieova, pe afai e lua te faia ni taumafaiga faamaoni, ma faailoa atu lua te mananaʻo e taulau manuia la oulua faaipoipoga.” Ioe, e mafai e tane ma avā ona maua le olioli, aemaise le lagolagosua o le tasi i le isi i taimi faigatā.​—Faata. 18:22.

² Peitaʻi e masani lava ona ʻoo puapuaga i tino’ o ulugalii faaipoipo. (1 Kori. 7:28) Aiseā? O faafitauli i aso faisoo, e mafai ona faapopoleina ai ulugalii faaipoipo. O le lē pulea lelei o faamatalaga, e māfua ai faalogona tigā, le lē femalamalamaaʻi, leai o ni fesootaʻiga lelei, ma e mafai ona avea o se luʻi i faaipoipoga. (Iako. 3:2, 5, 8) O le toʻatele o ulugalii ua feagai ma faafitauli i galuega a o tausia foʻi le fanau. O le popole ma le vaivai ua faafaigatā ai mo nisi ulugalii ona maua se taimi e faamalosia ai la laʻua faaipoipoga. E mafai ona faavaivaia lo laʻua alofa ma le faaaloalo o le tasi i le isi, ona o faafitauli tautupe, soifua mālōlōina ma isi faigatā. E lē gata i lea, e mafai  ona faaleagaina le faavae lea na foliga mai o se faaipoipoga malosi, ona o “galuega a le tino” e pei o le faitaaga, amio matagā, o le feitagaʻi, femisaaʻi, o le lotoleaga, lotoa, ma le finauvale.​—Kala. 5:19-21.

³ Ua atili ona faateteleina faafitauli ona ua tatou ola i “aso e gata ai,” lea ua faaleagaina ai faaipoipoga ona o le manatu faapito ma amioga e lē faale-Atua. (2 Timo. 3:1-4) E lē gata i lea, o loo matuā vilivilitaʻi Satani e faaleaga le fusi o le faaipoipoga. Ua lapataʻi mai Peteru: “O loo fealuaʻi lo outou fili, o le Tiapolo lea, e pei o se leona o loo tagi leotele, e saʻili se tasi e na te ʻaina.”​—1 Pete. 5:8; Faaa. 12:12.

4. E mafai faapefea ona maua se faaipoipoga e malosi ma fiafia?

⁴ Ua taʻutino mai se tane mai i Iapani: “Na ou matuā popole lava i tulaga tautupe. Talu ai e leʻi lelei ona ou fesootaʻi i laʻu avā, na matuā faapopoleina ai foʻi o ia. E lē gata i lea, ua oo ina aafia o ia i se gasegase tugā. O nisi taimi, o le popole na māfua ai ona ma tauaʻimisa.” E iai luʻi i le faaipoipoga, ae e mafai lava ona foʻia. O le fesoasoani a Ieova, e mafai ai ona olioli ulugalii i se faatasiga fiafia ma malosi. (Faitau le Salamo 127:1.) Seʻi o tatou talanoaina ni auala se lima e mafai ona atiaʻe ai se faaipoipoga malosi ma tumau. Ona tatou iloiloina lea o le auala e mafai ai e le alofa, ona faamautūina ai se faaipoipoga.

5, 6. O le ā e mafai ona faia e ulugalii ina ia faaaofia ai Ieova i a latou faaipoipoga?

⁵ O le faavae o se faaipoipoga malosi, o le faamaoni ma le gauaʻi i Lē na faavaeina faaipoipoga. (Faitau le Failauga 4:12.) E mafai e tane ma avā, ona faaaofia Ieova i a latou faaipoipoga e ala i le mulimuli i ana taʻiala alofa. Ua faapea mai le Tusi Paia e faatatau i tagata anamua o le Atua: “Pe afai tou te ō ese mai i le ala saʻo ma afe ane i le itu taumatau pe afe ane i le itu tauagavale, o le a faalogo o outou taliga i le upu mai i o outou tua o loo faapea mai: ʻO le ala lenei. Ia outou savavali ai.’” (Isa. 30:20, 21) I aso nei, ua “faalogo” ulugalii i fetalaiga a Ieova e ala i le faitauina faatasi o le Tusi Paia. (Sala. 1:1-3) E atili faamalosia le faaipoipoga e ala i le Tapuaʻiga a le Aiga, lea e olioli ma faafouina ai faaleagaga. E tāua foʻi le tatalo faatasi e lē aunoa e atiaʻe ai se faaipoipoga, e ui i osofaʻiga a le lalolagi a Satani.

⁶ Ua faapea mai Gerhard mai i Siamani: “Pe afai ua tau mou atu lo ma olioli ona o o maʻua lava faafitauli, po o le lē femalamalamaaʻi, e fesoasoani fautuaga a le Tusi Paia iā i maʻua e atiaʻe ai le onosaʻi ma le lotofaamagalo. E tāua tele nei uiga ina ia taulau manuia ai se faaipoipoga.” Pe a galulue malolosi ulugalii e faaaofia le Atua i a latou faaipoipoga e ala i le faia faatasi o mea faaleagaga, e lē gata o le a māfana atu i le Atua, ae faapena foʻi le tasi i le isi ma olioli ai i le autasi.

7. O le ā le auala e tatau ona faatino ai e tane o latou tulaga ulu?

⁷ O le auala e faatino ai e le tane lona tulaga ulu, e mafai ona atiaʻe ai se faaipoipoga e malosi ma fiafia. Ua taʻua i le Tusi Paia: “O le ulu o tane taʻitoʻatasi uma o Keriso; o le ulu o le fafine o le tane.” (1 Kori. 11:3) O fuaiupu o loo siʻomia ai  lenā faamatalaga, ua taʻu atu ai i tane le auala e tatau ona faatino ai o latou tulaga ulu, e pei o le auala na faatino ai e Keriso lana pule i tagata. E leʻi soona inainā pe sauā Iesu, ae sa alofa, agalelei, fetuutuunaʻi, agamalu ma lotomaulalo.—Mata. 11:28-30.

8. E faapefea ona maua e le tane le alofa ma le faaaloalo a lana avā?

⁸ E lē tatau i tane Kerisiano ona faatonu i taimi uma a latou avā ina ia faaaloalo iā i latou. Nai lo o lea e “faaauau ona nonofo faatasi ma i latou e tusa ma le poto [po o le faaalia o le manatu mamafa, ma malamalama iā i latou].” E latou te “āva i fafine e pei o se ipu e sili ona vaivai.” (1 Pete. 3:7) A o faatasi ma isi pe na o i laʻua foʻi, e faaalia e le tane e ala i ana faaupuga faaaloalo ma gaoioiga alofa, e tautele lana avā iā te ia. (Faata. 31:28) O le faatinoina o le tulaga ulu i se auala faapena, e maua ai e le tane le alofa ma le faaaloalo a lana avā, ma e faamanuia ai foʻi le Atua i le faaipoipoga.

9. E faapefea ona gauaʻi ma le lotomaulalo se avā?

⁹ O le alofa e lē manatu faapito mo Ieova, lea e faavae i ana mataupu silisili, o le a fesoasoani iā i tatou uma e faamaulalo ai i lalo o lona aao malosi. (1 Pete. 5:6) O se tasi o auala tāua e faaalia ai e se avā gauaʻi le faaaloalo mo le pule a Ieova, o le lagolagosua lea i lana tane. Ua taʻua i le Tusi Paia: “O outou avā, ia gauaʻi i a outou tane, auā o le mea lea e tatau i le Alii.” (Kolo. 3:18) O le mea moni, e lē o faaiʻuga uma a le tane o le a fiafia i ai le avā. Ae afai e lē feteenaʻi ana faaiʻuga ma tulafono a le Atua, o se avā e gauaʻi e lotomalie e lolo atu.​—1 Pete. 3:1.

10. Aiseā e tāua ai ona gauaʻi?

¹⁰ E iai le matafaioi tāua a se avā i le avea ai ma “paaga” a lana tane. (Mala. 2:14) Pe a faia ni filifiliga a le aiga, e faailoa atu ma le faaaloalo e le avā ona manatu ma faalogona, peitaʻi e tumau pea lona gauaʻi. O se tane e atamai, e faalogologo  lelei i lana avā. (Faata. 31:10-31) O le gauaʻi e maua ai le olioli, filemu, ma le fealofani. E maua ai e tane ma avā le faamalieina i le iloa, o loo latou faafiafiaina le finagalo o le Atua.​—Efe. 5:22.

11. Aiseā e tāua ai le fefaamagaloaʻi?

¹¹ O se tasi o vala tāua mo se faaipoipoga tumau, o le fefaamagaloaʻi. E atili faamalosia le faiā a tane ma avā, pe afai e “faaauau ona onosaʻi le tasi i le isi, ma ia fefaamagaloaʻi ma le lotoatoa.” (Kolo. 3:13) Peitaʻi e mafai ona faavaivaia le fusi o le faaipoipoga, pe afai e mumusu le ulugalii e faagalo mea sesē ua teʻa, ae faaaogā pea e faatigā ai i le isi. E pei ona faasolo ina faaleagaina se fale ona ua taʻei piliki, e faapena foʻi ona faigatā i se ulugalii ona fefaamagaloaʻi, ona o le teuloto o faalogona tigā ma le ita. Peitaʻi, e faamalosia le fusi o le faaipoipoga pe afai e fefaamagaloaʻi le tane ma le avā, e pei ona faamagaloina i laʻua e Ieova.​—Mika 7:18, 19.

12. E faapefea ona ufiufi e le alofa le “anoanoaʻi o agasala”?

¹² O le alofa moni “e lē faitauina mea leaga e fai atu iā te ia,” ae e “ufiufi ai le anoanoaʻi o agasala.” (1 Kori. 13:4, 5; faitau le 1 Peteru 4:8.) O lea la, pe afai e tatou te alolofa i isi, e lē faatapulaa ona tatou faamagaloina i latou. Ina ua fesili le aposetolo o Peteru pe faafia ona faamagalo atu i se tasi, na tali Iesu: “E faafitu sefulu fitu.” (Mata. 18:21, 22) Ua faaalia mai ai e lē faatapulaa ona faamagaloina e Kerisiano isi tagata.​—Faata. 10:12. *

13. E faapefea ona foʻia le uiga o le lē lotofaamagalo?

¹³ Ua faapea mai Annette: “Pe afai e lē mananaʻo se ulugalii e fefaamagaloaʻi, e mafai ona tuputupu pea le ita ma le lē maufaatuatuaina, ma e faaleagaina ai se faaipoipoga. O le lotofaamagalo e faamalosia ai le fusi o le faaipoipoga ma atili ai ona māfana.” Ina ia foʻia le uiga o le leai o se lotofaamagalo, ia atiaʻe le lotofaafetai. Ia fai ma masani le faamālō atu ma le faamaoni i lau paaga. (Kolo. 3:15) O le lotofaamagalo e maua ai le filemu o le mafaufau, le autasi ma faamanuiaga mai i le Atua.​—Roma 14:19.

14, 15. O le ā le Tulafono Faaauro, ma e faapefea ona aogā i faaipoipoga?

¹⁴ E lē taumatea e te manaʻo e āva ma faaaloalo atu tagata iā te oe. E te matuā talisapaia pe afai e amanaʻia e tagata ou manatu ma faalogona. Ae pe ua e faalogo o faapea mai se tasi: “O le a ou faia i ai le mea na ia faia iā te aʻu.” Atonu o le tali masani lenā a nisi, ae ua faapea mai le Tusi Paia: “Aua e te faapea ane: ʻE pei ona ia faia iā te aʻu, e faapea lava ona ou faia iā te ia.’” (Faata. 24:29) Na faailoa mai e Iesu le auala sili e taulima ai tulaga faigatā. Ua lauiloa lenei tulafono tau amio, lea ua taʻua o le Tulafono Faaauro: “E pei ona outou mananaʻo e faia mai e tagata iā te outou, ia faapea lava ona outou faia iā i latou.” (Luka 6:31) O le uiga o le fetalaiga a Iesu, ia tatou feutagaʻi ma tagata i le auala e tatou te mananaʻo e latou te feutagaʻi ai ma i tatou, ma aua neʻi taui atu le leaga i le leaga. O lona uiga, e tatau ona tatou faia le mea sili e faatumauina ai a tatou faaipoipoga.

 ¹⁵ E faamalosia e ulugalii faaipoipo a latou faaipoipoga pe afai e malamalama i faalogona o a latou paaga. Ua faapea mai se tane mai i Aferika i Saute: “Na ma taumafai e faatatauina le Tulafono Faaauro. E moni e iai taimi e ma te feita ai, ae e ma te galulue mamafa foʻi e feutagaʻi i le āva ma le faaaloalo.”

16. O le ā e lē tatau ona faia e ulugalii faaipoipo?

¹⁶ Aua e te faailoaina atu i isi vaivaiga o lau paaga po o ona uiga e te lē fiafia i ai, e oo lava i taimi o tausuaga. Ia manatua, o le faaipoipoga e lē o se tauvaga e suʻe ai po o ai e malosi, o ai e sili ona ee leotele, ma po o ai e sili ona tigā ana faamatalaga. E moni e tofu uma lava i tatou ma vaivaiga, ma e iai taimi e tatou te faatigā ai i isi. Peitaʻi, e leai se māfuaaga e taumafai ai le tane po o le avā e faia ni faamatalaga faalumaluma ma faatigā, po o le tulei atu o le isi po o le tauaʻifusu foʻi.​—Faitau le Faataoto 17:27; 31:26.

17. E faapefea ona mulimuli tane i le Tulafono Faaauro?

¹⁷ O nisi aganuu e manatu o se toa se tane e fia malosi ma sauā i lana avā, ae ua faapea mai le Tusi Paia: “E sili o lē e faagesegese lona ita nai lo o le toa, e sili foʻi o lē e na te pulea lona loto, nai lo o lē na te faatoʻilaloina se aai.” (Faata. 16:32) E manaʻomia e se tasi ona maua le malosi e pulea ai o ia lava e pei o Iesu Keriso, o le tagata silisili o ē na soifua mai. O se tane e fia malosi ma sauā i lana avā, o le a faaleagaina lana faiā ma Ieova, ma e lē o ia foʻi o se toa. Ua faapea mai le faisalamo o Tavita, o ia o se tane malosi ma lototele: “Pe a outou atuatuvale, aua neʻi agasala ai. Ia outou fai ifo i o outou loto i luga o o outou moega, ma ia fifilemu.”​—Sala. 4:4.

18. Aiseā e tāua ai ona atiaʻe le alofa?

¹⁸ Faitau le 1 Korinito 13:4-7. O le alofa o le uiga lea e sili ona tāua i se faaipoipoga. “Ia oofu outou i le alofa mutimutivale, le agalelei, lotomaulalo, agamalu ma le faapalepale. Peitaʻi, e iai foʻi se isi mea e manaʻomia, ia oofu outou i le alofa, auā o le fusi lea e atoatoa ona autasi ai.” (Kolo. 3:12, 14) E manaʻomia e tane ma avā ona faaalia le alofa lē manatu faapito ma faaaʻoaʻo iā Keriso, o lē na lotomalie e faataulaga o ia mo isi. Pe afai e faavae se faaipoipoga i lenā alofa, o le a tumau malosi e ui i uiga faatigā, gasegase tugā, o faafitauli tautupe ma faigatā i le feagai ai ma tauaiga o le paaga.

19, 20. (a) E faapefea ona atiaʻe e ulugalii se faaipoipoga malosi ma fiafia? (e) O le ā o le a talanoaina i le mataupu o sosoo mai?

¹⁹ E manaʻomia le alofa, faamaoni, ma taumafaiga malolosi ina ia taulau manuia ai se faaipoipoga. Pe a tulaʻi mai faigatā, e lē tatau ona lafoaʻia e paaga a latou faaipoipoga. E tatau ona maumauaʻi ia māfana la laʻua faiā ae lē tau lava o le nonofo. O le alofa mo le Atua ma le alofa o le tasi i le isi, e uunaʻia ai ulugalii Kerisiano e foʻia o latou faafitauli, auā “e lē uma le alofa.”​—1 Kori. 13:8; Mata. 19:5, 6; Epe. 13:4.

²⁰ O se luʻi le atiaʻe o se faaipoipoga malosi ma fiafia i nei “aso e sili ona faigatā” o loo tatou ola ai. (2 Timo. 3:1) Peitaʻi o le fesoasoani a Ieova o le a taulau manuia ai. E manaʻomia foʻi e ulugalii ona tauivi i amioga lē mamā o loo taatele i le lalolagi. O le a iloiloina i le mataupu o sosoo mai, le auala e puipuia ai e tane ma avā a latou faaipoipoga mai i amioga lē mamā.