NA SOIFUA Cesar ma lana avā o Rocio i se olaga sologa lelei i Kalifonia i nai tausaga ua mavae. Sa faigaluega faataimi atoa Cesar i le faiga o masini e sologa lelei ai le faataamilosaga o le ʻea i fale, faapea le ʻea mālūlū ma le ʻea vevela, ae sa faigaluega faavaitaimi Rocio i le ofisa o se fomaʻi. Sa iai so laʻua lava fale ma e leai sa laʻua fanau. Peitaʻi, na iai se mea na tupu na suia ai o laʻua olaga. O le ā lenā mea?

Iā Oketopa i le 2009, na auina atu ai se tusi i faapotopotoga uma i le Iunaite Setete, e valaaulia ai tagata tauofo e iai ni o latou tomai e fia galulue lē tumau i Peteli, ina ia fesoasoani i le faatelēina o le lālā i Wallkill, i Niu Ioka. Sa valaaulia foʻi ma i latou ua matutua e talosaga mo le auaunaga i le Peteli. Na faapea mai Cesar ma Rocio: “Talu ai ona o o ma tausaga, na ma iloa ai e pau lenei o le avanoa ua ma maua e auauna ai i le Peteli. E ma te lē fia misia lea avanoa!” Na vave lava ona tuuina atu la laʻua talosaga.

E silia ma le tausaga, ae e leʻi valaaulia lava Cesar ma Rocio i le Peteli. O lea, sa faafaigofie ai o laʻua olaga ina ia ausia ai lo laʻua sini. Ua faapea mai Cesar: “Na suia lo ma fale taavale e avea ma se tamaʻi potu, ina ia mafai ona mautotogi ai se isi i lo ma fale. Ona ma ō ese lea mai i lo ma fale manaia e 2,200 futu faatafafā (200 mita faatafafā) lea na fausia i nai tausaga ua mavae, ae ma nonofo i lo ma tamaʻi potu e 270 futu faatafafā (25 mita faatafafā). O le faia o nei suiga, na faafaigofie ai ona faia a maʻua fuafuaga pe a taliaina la maʻua talosaga i le Peteli.” O le ā na sosoo ai? Ua faapea mai Rocio: “Ina ua mavae le masina talu ona ma nonofo i le tamaʻi potu, ae valaaulia loa i maʻua e galulue lē tumau i le Peteli i Wallkill. Na ma mautinoa, o le faafaigofie o o ma olaga, ua faamanuia ai i maʻua e Ieova.”

E pei o Cesar ma Rocio, e faitau selau uso ma tuafāfine na faia ni faataulaga ina ia faia se sao i  faugāfale o loo faia i le setete o Niu Ioka. O loo lagolagoina e nisi le toe faatelēina o le Peteli i Wallkill, ae o le toʻatele ua maua le faaeaga e fesoasoani ai i le fausia o le ofisa ulu i Warwick. * E toʻatele ulugalii na tuua o latou fale mananaia, o galuega lelei, e oo lava i a latou fagafao, ina ia faalautele atu ai la latou auaunaga iā Ieova. E mautinoa sa faamanuia Ieova i na faataulaga!

O se faaaʻoaʻoga, i Kansas, na faatau atu e Way, o ia o se faieletise ma Debra, ua toeitiiti atoa o la taʻi 60 tausaga, lo la fale ma le tele o a laʻua mea, ae siitia atu i Wallkill ina ia galulue tausāvali i le Peteli. * E ui lava e manaʻomia ai ni fetuunaʻiga i o la olaga, ae na la manatu o loo aogā le faataulaga ua la faia. Ua faapea mai Debra e tusa ai ma lona tofiga i le Peteli: “I nisi taimi, ou te lagona ai ua pei ua ou iai i faugāfale i le Parataiso e pei ona faaata mai i a tatou lomiga!”

I South Carolina, na faatau atu e Melvin ma Sharon lo la fale ma mea uma ina ia ō atu e fesoasoani i le galuega i Warwick. E ui e lē faigofie ona faia nei faataulaga, ae na manatu le ulugalii o se faaeaga le galulue i lenā galuega e sili ona tāua. Ua la faapea mai: “O le olioli lea e maua mai i le faataunuuina o se mea e aogā i le faalapotopotoga i le lalolagi aoao, o se faalogona e sili ona matagofie.”

Na siitia ese mai i Kalifonia ia Kenneth, o se tagata faufale ua litaea, ma Maureen, ua silia ma le taʻi 50 o la tausaga, ina ia galulue i Warwick. Ina ia siitia atu, sa la faia ni fuafuaga ma se tuafafine i le faapotopotoga e na te vaaia lo laʻua fale, ma talanoa atu i o laʻua aiga ina ia fesoasoani i le tausiga o le tamā matua o Ken. Pe na la salamō i faataulaga sa laʻua faia ina ia auauna ai i le Peteli? E leai. Ua faapea mai Ken: “Ua tele ni aogā ua ma maua. Pe sa iai ni luʻi? E mautinoa e tele luʻi, ae ua tauia o maʻua olaga. E ma te faalaeiauina ma le lotoatoa isi mo lenei galuega.”

Na foʻia e le toʻatele na faaavanoa atu i latou lava ni toʻatugā. O se faaaʻoaʻoga, o William ma Sandra, o ē ua silia ma le taʻi 60 o la tausaga, sa nonofo ma le olioli i Pennsylvania. Sa taulau manuia la laʻua kamupani e faia ni vaega o masini, lea sa faafaigaluega ai tagata e toʻa 17. E tasi lava le faapotopotoga sa la auauna ai, ma o le toʻatele o o la aiga e nonofo i lea vaipanoa. O lea ina ua maua le avanoa e galulue tausāvali ai i le Peteli i  Wallkill, sa la iloa o le a la tuua i latou uma ma mea uma e masani ai. Ua faapea mai William: “O le luʻi tele mo i maʻua o le tuua lea o se olaga sologa lelei.” Peitaʻi, ina ua uma ona faia ni tatalo, sa filifili loa le ulugalii e siitia atu, ma o se filifiliga e la te leʻi salamō ai. Ua faapea mai William: “E lē mafaatusalia le olioli lea e maua mai i le auauna faatasi ma le aiga Peteli. Ua sili atu lo ma fiafia ma Sandra i le taimi lenei!”

Sa valaaulia Ricky, o se tagata e na te vaaia faugāfale i Hawaii, e galue tausavali i le Peteli ina ia fesoasoani i le galuega i Warwick. Na manaʻo lana avā o Kendra e talia le valaaulia. Peitaʻi, sa matuā popole i laʻua i le olaga o la laʻua tama tama o Jacob e 11 tausaga. Na la taumānatu po o se filifiliga atamai le siitia atu o lo latou aiga i le setete o Niu Ioka, ma pe faamata e mafai e la laʻua tama ona faamasani i se siʻomaga fou.

Ua faapea mai Ricky: “O se tasi o mea muamua e tatau ona fai, o le saʻilia lea o se faapotopotoga e iai ni talavou o loo lelei lo latou tulaga faaleagaga. E ma te mananaʻo ia toʻatele ni aumea lelei a Jacob.” O le mea na tupu, o le faapotopotoga lea sa latou ō i ai, e toʻa lāiti talavou ae toʻatele le ʻau Peteli. Ua faapea mai Ricky: “O la matou sauniga muamua i inā, na ou fesili ai iā Jacob i sona manatu e uiga i le faapotopotoga fou, aemaise e leai nisi o lana tupulaga. Na ia faapea mai, ʻAua e te popole tamā. O ʻau uō o uso talavou Peteli.’”

E mautinoa sa faamasani atu talavou Peteli iā Jacob. O ā ni aafiaga? Ua faapea mai Ricky: “Na ou pasia le potu o loʻu atalii i se tasi o pō, ma na ou vaaia o loo ola pea lana molī. Na ou faatalitalia e maua atu o ia o fai sana taaloga vitiō, peitaʻi o loo faitau lana Tusi Paia. Ina ua ou fesili atu i ai po o le ā lana mea o fai, na tali mai Jacob, ʻUa avea aʻu o se talavou Peteli, ma o le a ou faitauina le Tusi Paia i le tausaga atoa.’” Na faafiafiaina Ricky ma Kendra ona e lē gata ua faia se sao o Ricky i le faugāfale i Warwick, ae ua saosaolaumea foʻi i le tulaga faaleagaga o la laʻua tama.​—Faata. 22:6.

Ua lata ina māeʻa faugāfale i Wallkill ma Warwick, ma ua iloa e i latou uma sa valaaulia e fesoasoani, e lē tumau la latou auaunaga i le Peteli. Po o soona popole nei uso ma tuafāfine po o fea o le a agaʻi i ai ma po o ā foʻi a latou mea o le a fai? E leai! E tutusa faalogona o le toʻatele ma ni ulugalii se toʻalua ua silia i le taʻi 50 tausaga mai i Florida. Ua faapea mai John o se tasi na te  vaaia faugāfale, ma lana avā o Carmen, o loo galulue tauofo i Warwick: “Ua ma iloa le auala e tausia ai e Ieova o maʻua manaʻoga patino. E ma te mautinoa e leʻi aumaia i maʻua e Ieova i nei i le Peteli ina ia lafoaʻia ai.” (Sala. 119:116) O loo galue Luis o sē e tusia ata o masini e tineia ai mū ma lana avā o Quenia i Wallkill. Ua la faapea mai: “Ua ma iloa le aao mafola o Ieova i meafaitino sa ma manaʻomia. E ui e ma te lē iloa le auala o le a tausia ai i maʻua e Ieova, ae ua ma mautinoa o le a faaauau ona Ia tausia i maʻua.”​—Sala. 34:10; 37:25.

Ua iloa e le toʻatele o i latou o loo fesoasoani i le faugāfale i Niu Ioka, e tele māfuaaga na semanū e ono lē mafai ai ona latou galulue tauofo. Ae peitaʻi, ua latou tofotofo iā Ieova e pei ona ia valaaulia i tatou uma e fai: “Faamolemole, ia outou tofotofo mai iā te aʻu i lenei mea, . . . po ou te lē tatalaina ea faitotoʻa o le lagi ma liligi ifo i o outou luga faamanuiaga seʻia oo ina matuā tele lava.”​—Mala. 3:10.

Po ua e tofotofo ea iā Ieova ma e iloa le sosia o ana faamanuiaga? Ia iloilo faatasi ma le tatalo le mea e mafai ona e faia ina ia faia ai sou sao i se galuega tāua, a lē o Niu Ioka po o nisi faugāfale o loo faia, ma iloa ai le auala e tauia ai oe e Ieova.​—Mare. 10:29, 30.

Na matuā faalaeiauina e Dale o se inisinia, ma Cathy mai i Alabama, le aapa atu i lenei auaunaga. Ua la faapea mai e uiga i le galue tauofo i Wallkill: “Afai e te lototele e alu ese mai i lou olaga sa masani ai, o le a e iloa ai le auala e galue ai le agaga o Ieova.” O le ā e manaʻomia ona e faia ina ia e faaavanoa ai oe lava? Ua faapea mai Dale: “Ia matuā faafaigofie o tatou olaga. E lē taitai ona e salamō ai!” O Gary, mai i North Carolina, ua 30 tausaga o galue e vaaia faugāfale. Ua la faapea mai ma lana avā o Maureen, o se tasi o faamanuiaga ua la olioli ai i Warwick, “o le feiloaʻi lea ma galulue faatasi ma le toʻatele o uso ma tuafāfine, ua ofo atu o latou olaga e auauna ai iā Ieova i le Peteli.” Ua faaopoopo mai Gary: “Ina ia e auauna i le Peteli, e manaʻomia ona e ola i se olaga faigofie, o le auala sili lea e ola ai i lenei faiga o mea.” Ua faapea mai Jason, o sē e galue i se konekarate faieletise, ma Jennifer mai i Illinois; o le galue i Wallkill i le Peteli “o se faaataga sili lea o le olaga i le lalolagi fou.” Ua toe faapea mai Jennifer: “E te lagona le faamalieina i lou iloa o loo talisapaia e Ieova ma e tautele i lana silafaga galuega o loo tatou faia. E mautinoa o le a tauia oe e Ieova.”