1, 2. (a) O ā nofoaga mo le tapuaʻiga na faaaogā e auauna a Ieova i aso ua mavae? (e) O ā faalogona o Iesu e faatatau i le malumalu o le Atua i Ierusalema? (i) O le ā le fuafuaga o lenei mataupu?

NA AMATA mai i aso ua mavae ona faavaeina e auauna a le Atua nofoaga mo le tapuaʻiga mamā. Atonu na faaaogā e Apelu se fata faitaulaga e ofo ai ana taulaga i le Atua. (Kene. 4:3, 4) Sa fausia foʻi e Noa, Aperaamo, Isaako, Iakopo ma Mose fata faitaulaga. (Kene. 8:20; 12:7; 26:25; 35:1; Eso. 17:15) Na fausia e Isaraelu le faleʻie paia e ala i le taʻitaʻiga a Ieova. (Eso. 25:8) Mulimuli ane, na latou fausia le malumalu mo le tapuaʻiga iā Ieova. (1 Tu. 8:27, 29) Ina ua toe foʻi mai i le faaaunuua i Papelonia, na potopoto e lē aunoa tagata Iutaia i sunako. (Mare 6:2; Ioa. 18:20; Galu. 15:21) Na feiloaʻi uluaʻi Kerisiano i fale o aiga o le faapotopotoga. (Galu. 12:12; 1 Kori. 16:19) I aso nei, ua feiloaʻi tagata o Ieova mo aʻoaʻoga ma le tapuaʻiga i le faitau sefulu afe o Maota mo Sauniga i le lalolagi aoao.

² Sa matuā faatāua ma talisapaia e Iesu le malumalu o Ieova i Ierusalema, lea na faatatau ai e se tusitala o Evagelia lenei valoaga iā te ia: “Ua ʻaina lava aʻu i le maelega i lou fale.”  (Sala. 69:9; Ioa. 2:17) E leai se Maota mo Sauniga e mafai ona taʻua o “le fale o Ieova,” auā o lenā taʻu sa na o le malumalu i Ierusalema e faatatau atu i ai. (2 No. 5:13; 33:4) E ui i lea, ua maua i le Tusi Paia mataupu silisili e tatou te iloa ai le auala e tatau ona tatou faaaogā ma faatāua ai maota mo le tapuaʻiga i aso nei. O le fuafuaga o lenei mataupu o le toe autaluina lea o na mataupu silisili ma iloilo le auala e tatau ona tatou vaai ai i Maota mo Sauniga, faapea le auala e faatupe ma tausia lelei ai. *

3-5. O le ā le fuafuaga o Maota mo Sauniga, ma e faapefea ona aafia ai la tatou vaaiga i sauniga?

³ O le Maota mo Sauniga o le taulaʻiga lea o le tapuaʻiga mamā i se vaipanoa. O se tasi o sauniuniga a Ieova mo le fafagaina faaleagaga o i tatou, o sauniga e faia i le Maota mo Sauniga i vaiaso taʻitasi. O i inā e tatou te maua ai taumafa faaleagaga e faafouina ai, ma le taʻitaʻiga e ala mai i lana faalapotopotoga. Ua valaaulia e Ieova ma lona Alo i tatou ia auai i sauniga. E ui lava ua iai sa tatou valaaulia tumau e aai i “le laoai a Ieova,” ae e lē tatau ona tatou manatu māmā i lenā valaaulia.—1 Kori. 10:21.

⁴ E tāua tele i le silafaga a Ieova na avanoa mo le tapuaʻiga ma faalaeiauga, o lea na ia faagaeeina ai le aposetolo o Paulo e faalaeiauina i tatou ia aua neʻi tuulafoaʻiina le faapotopoto faatasi. (Faitau le Eperu 10:24, 25.) Po o so tatou faaaloalo iā Ieova le misia o sauniga faa-Kerisiano ona o ni māfuaaga lē talafeagai? E mafai ona faaalia lo tatou matuā talisapaia o Ieova ma ana sauniuniga, e ala i le sauniuni ma le lotoatoa e faia se sao i nei sauniga.—Sala. 22:22.

⁵ E tatau ona tatou faatāuaina Maota mo Sauniga, e lē gata o le fale ae o mea faaleagaga o loo faia ai i totonu. O o tatou lagona e faatatau i Maota mo Sauniga ma sauniga, e atagia atu ai o tatou lagona e faatatau i le suafa o Ieova, lea e masani ona tusia i le faailoilo o le Maota mo Sauniga.—Faatusatusa i le 1 Tupu 8:17.

6. O le ā na taʻua e nisi e faatatau i o tatou Maota mo Sauniga ma i latou o loo auai ai? (Tagaʻi i le ata i luga aʻe o le matua.)

⁶ Ua mātauina e i latou e lē o ni Molimau lo tatou faatāuaina o o tatou maota mo le tapuaʻiga. O se faaaʻoaʻoga, ua faapea mai se tamāloa mai i Take: “Na ou maofa i le mamā ma le maopoopo lelei o mea i le Maota mo Sauniga. E lelei laʻei o tagata, mataʻataʻata ma faafeiloaʻi aʻu ma le māfana. O le mea lea na ou matuā maofa ai.” Na amata ona auai e lē aunoa le tamāloa i sauniga, ma e leʻi umi ae papatiso loa o ia. I se tasi o aai i Indonesia, na valaaulia ai e se faapotopotoga tagata o le malo ma tuaoi e matamata i le Maota mo Sauniga fou a o leʻi faia le tuuina atu. Na auai ai foʻi ma le pulenuu. Na maofa o ia i le lelei o le fausaga o le Maota mo Sauniga, ma lona togālaau matagofie. Ua ia faapea mai: “O le mamā o lenei maota ua faaatagia atu ai lo outou faatuatua.”

7, 8. O ā ni vala tāua e tatau ona manatua e i latou e auai i sauniga faa-Kerisiano?

⁷ O lo tatou faaaloalo i le Atua na valaauliaina i tatou i sauniga faa-Kerisiano, e tatau ona atagia atu i a tatou amioga, o laʻei ma teuga. E tatau ona tatou faaalia ai le paleni. Ua mātauina isi ua ova le faasāsā naʻuā e faatatau i amioga a o auai i sauniga, ae o isi ua manatu māmā i laʻei ma amioga i le Maota mo Sauniga. E finagalo  Ieova ia lelei faalogona o ana auauna ma tagata valaaulia a o iai i Maota mo Sauniga. E lē mananaʻo le aofia e faalavelave i taimi o sauniga e ala i le manatu māmā i o latou laʻei, faia o feʻau tusitusia, talanoa, aai, feinu, pe faia isi mea a o faagasolo sauniga. E tatau i mātua ona toleni a latou fanau ia malamalama lelei o le Maota mo Sauniga e lē o se fale e tamomoʻe solo ma taaalo ai.—Fai. 3:1.

⁸ O le toʻatamaʻi o Iesu na ia tutuliese ai mai le malumalu o le Atua ē na faia faiga faapisinisi i inā. (Ioa. 2:13-17) O a tatou Maota mo Sauniga o nofoaga ia e faia ai le tapuaʻiga mamā ma aʻoaʻoga faaleagaga. E lē tatau ona taulimaina so o se faiga faapisinisi i Maota mo Sauniga, auā e leai se fesootaʻiga ma mea faaleagaga.—Faatusatusa i le Neemia 13:7, 8.

9, 10. (a) Ua faapefea ona fausia ma faatupeina Maota mo Sauniga, ma o ā iʻuga ua maua mai ai? (e) O le ā le sauniuniga alofa ua fesoasoani i faapotopotoga e lē tagolima?

⁹ E galulue malosi le faalapotopotoga a Ieova e fausia ma faatupeina Maota mo Sauniga. Ua faia e le ʻaugalulue tauofo le galuega o le tusiaina o ata, fausia ma le toe faafouina o Maota mo Sauniga. O le ā le iʻuga? Talu mai Novema 1, 1999, na fausia ai le silia ma le 28,000 maota fou o le tapuaʻiga mo faapotopotoga i le lalolagi aoao. O lona uiga, i se fua faatatau e lima Maota mo Sauniga fou na fausia i aso taʻitasi i le 15 tausaga ua mavae.

¹⁰ Ua faia taumafaiga e lagolagoina ai le fausia o Maota mo Sauniga i so o se mea o manaʻomia ai. O loo faavae lenei sauniuniga alofa i le mataupu silisili o le Tusi Paia, e fesoasoani le mauʻoa o isi i le lē tagolima o isi, ina ia “tutusa ai avega a tagata uma.” (Faitau le 2 Korinito 8:13-15.) O le iʻuga, ua fausia ai maota fou matagofie e faia ai le tapuaʻiga mamā mo faapotopotoga e lē tagolima.

11. O ā ni faamatalaga a nisi o uso e faatatau i o latou Maota mo Sauniga fou, ma o ā ni ou lagona e faatatau i ai?

¹¹ Na tusi se faapotopotoga i Costa Rica na aogā i ai lenei sauniuniga: “Pe a matou tutū i luma o le Maota mo Sauniga, e matou te lagona e pei o loo fai sa matou miti! E matou te lē talitonu i lea mea. E na o le valu aso na fausia ai lo matou Maota matagofie! Na mafai lenei mea ona o le faamanuia a Ieova, le fesoasoani a lana faalapotopotoga ma le lagolagosua a o matou uso peleina. O lenei maota mo le tapuaʻiga o se meaalofa tautele, o se maota matagofie na aumaia e Ieova mo i matou. Ua matou matuā lagona le olioli.” Pe e lē faamāfanafanaina ai oe e faalogo i na faamatalaga o le talisapaia o Maota mo  Sauniga fou, ma iloa o le olioli foʻi lenā o loo maua e o tatou uso i le faitau afe o vaipanoa i le lalolagi aoao? O le galuega lenei a Ieova, o le taimi lava e māeʻa ai ni Maota mo Sauniga fou, e masani lava ona tumu i tagata lotofaamaoni o ē fia iloa atili Lē na Foafoaina mea.—Sala. 127:1.

12. E faapefea ona faia sau vaega i le fausiaina o Maota mo Sauniga?

¹² Ua olioli le toʻatele o uso ma tuafāfine ona ua mafai ona auai i le fausia o se Maota mo Sauniga. E tusa lava pe mafai ona tatou fesoasoani i le fausiaina o se maota pe leai, ae ua tatou maua le faaeaga e lagolagoina ai na faugāfale e ala i a tatou meaalofa tauofo. O le maelega mo le tapuaʻiga na faia ai e auauna i taimi o le Tusi Paia foaʻi e fausia ai maota mo le tapuaʻiga. E faapena foʻi aso nei ma e faamamaluina ai Ieova.—Eso. 25:2; 2 Kori. 9:7.

13, 14. O ā mataupu silisili faale-Tusi Paia e faatatau i le tausia lelei ma le mamā o o tatou Maota mo Sauniga?

¹³ Pe afai e fausia se Maota mo Sauniga, e manaʻomia ona tausia lelei ma ia mamā ina ia atagia atu ai uiga o lo tatou Atua, o lē e fai mea maopoopo. (Faitau le 1 Korinito 14:33, 40.) E faafesootaʻi e le Tusi Paia le paia ma le mamā faaleagaga i le mamā faaletino. (Faaa. 19:8) O lea, afai e faanaunau tagata ina ia taliaina i latou e Ieova, e tatau ona latou tumamā.

¹⁴ Ina ia talafeagai ma nei mataupu silisili, e tatou te fiafia e valaaulia tagata lotofaamaoni i a tatou sauniga, ma le mautinoa o loo lelei le tulaga o le maota e atagia atu ai le tala lelei o loo tatou talaʻia. O le a latou iloa o loo tatou tapuaʻi i le Atua e  paia ma e lē o toe umi ae ia faia le lalolagi e avea ma parataiso matagofie.—Isa. 6:1-3; Faaa. 11:18.

15, 16. (a) Aiseā o se luʻi ai le tausia o le mamā o le Maota mo Sauniga, ae aiseā e tāua ai? (e) O ā faatulagaga a le faapotopotoga lava ia mo le faamamāina o le maota, ma o le ā le faaeaga ua iai iā i tatou taʻitoʻatasi?

¹⁵ E sili atu ona faatāua e isi galuega faamamā nai lo o isi. E aafia le auala e tatou te faia ai galuega faamamā ona o le siʻomaga na tatou ola aʻe ai, ma isi vala e pei o le palapalā o le vaipanoa, o le pefu, tulaga o auala, o le lē lava o le suāvai, ma vailaau e faaaogā mo le faamamā. Po o ā lava tulaga o o tatou vaipanoa ma manatu o tagata, e tatau ona avea o tatou Maota mo Sauniga o se faaaʻoaʻoga lelei i le auala e tausia ai, auā o loo tauave ai le suafa o Ieova ma faia ai le tapuaʻiga mamā.—Teu. 23:14.

¹⁶ O le faamamāina o le Maota mo Sauniga, e lē o se mea e teʻi lava ua tupu. E faamautinoa e le ʻautoeaina ua faia se faasologa, ua lava mea faamamā ma meafaigaluega mo le tausia o le maota mo le tapuaʻiga i se tulaga e sili ona lelei. O nisi galuega faamamā e manaʻomia le uaʻi atu i ai pe a māeʻa sauniga taʻitasi ae o nisi galuega e mafai ona fai i se isi taimi, e manaʻomia ai la le galulue faatasi ma se taʻitaʻiga lelei ina ia faamautinoa ua māeʻaeʻa lelei ona faamamā mea uma. O tagata uma lava o le faapotopotoga ua iā i latou le faaeaga e felagolagomaʻi ai i nei taumafaiga.

17, 18. (a) O ā faaaʻoaʻoga faale-Tusi Paia o le tausia lelei o maota mo le tapuaʻiga? (e) Aiseā e tatau ai ona tausia Maota mo Sauniga i se tulaga lelei?

¹⁷ E tinoū foʻi auauna a le Atua e faia taumafaiga e faaleleia ai o latou maota mo le tapuaʻiga. Na faatonuina e Ioasa le tupu o Iuta le ʻauositaulaga ina ia faaaogā foaʻi tauofo ia sa faia mo le fale o Ieova, e ʻfaaleleia ai mea uma ua vetevete o le fale, i so o se mea e maua ai se vete.’ (2 Tu. 12:4, 5) E silia ma le 200 tausaga mulimuli ane, na toe faaaogā foʻi e le tupu o Iosia foaʻi tauofo e faaleleia ai le malumalu.—Faitau le 2 Nofoaiga a Tupu 34:9-11.

¹⁸ Ua lipotia mai e ofisa o le lālā, i nisi atunuu o le toʻatele o tagata e latou te lē faatāuaina le faaleleia o maota ma meafaigaluega. Atonu e toʻalaiti i latou i na nofoaga e iai tomai po o meafaitino e fai ai galuega. Pe afai e faatalalē i le tausiaina o Maota mo Sauniga, o le a vave ona faaleagaina, ma o le a lē avea o se molimau lelei i le vaipanoa. Ae i le isi itu, pe a faia e tagata uma o le faapotopotoga le mea sili e latou te mafai e tausia ai Maota mo Sauniga i se tulaga lelei, o le a viia ai Ieova ma o le a faasao ai foaʻi tauofo a uso talitonu.

19. O le ā ua e filifili e fai i maota o loo tatou faaaogāina mo le tapuaʻiga mamā?

¹⁹ O le Maota mo Sauniga ua uma ona tuuina atu iā Ieova. E lē mafai la ona faapea atu o se maota a se tagata se toʻatasi po o se faapotopotoga, e tusa lava po o le ā le igoa faaletulafono o loo lesitala ai. Ua faalaeiauina i tatou e mataupu silisili faa-Kerisiano, ina ia faamautinoa ua talafeagai lelei le tulaga o le maota ma le fuafuaga na fausia ai. E mafai ona saosaolaumea le faapotopotoga atoa e ala i le faatāuaina o maota mo le tapuaʻiga, faia o foaʻi tauofo mo faugāfale fou, tauofo o latou taimi ma le malosi e tausi mamā ai Maota mo Sauniga. O le lagolagoina o nei taumafaiga, e faaalia ai lo tatou maelega mo maota mo le tapuaʻiga a Ieova e pei ona sa faia e Iesu.—Ioa. 2:17.