Aiseā e Faaalia ai le Lotofaafetai?

“Peleina Rasela,

Faafetai tele lava mo le avea ma puna o faalaeiauga iā te aʻu. E ui lava atonu e te lē o iloaina lenā tulaga, ae sa fesoasoani tele iā te aʻu ou uiga faalaeiau ma au upu agalelei.”—Tieni.

PE NA e mauaina se tusi e faafetai mai ai, ae e te leʻi faatalitalia? Pe afai sa e mauaina se tusi faapena, e lē taumatea la sa faamāfanafanaina ai lou loto i lenā tusi. Aemaise ai, o se tulaga masani le manaʻo e faatāua ma talisapaia mai e isi.—Mataio 25:19-23.

E masani lava ona aogā faaupuga o le faafetai, e atiaʻe ai se faiā māfana i le va o lē e faia atu na faaupuga ma lē na fai atu i ai. E lē gata i lea, o se tagata e faaalia le lotofaafetai, o loo mulimuli i tulagāaao o Iesu Keriso, o lē sa ia mātauina galuega lelei a isi.—Mareko 14:3-9; Luka 21:1-4.

Ae o le itu e faanoanoa ai, ona e foliga mai ua seāseā faaalia atu e tagata lo latou lotofaafetai i isi, a lē i le talanoa saʻo atu i le tagata po o le tusia foʻi o se faamatalaga. Na lapataʻi mai le Tusi Paia e faapea, a o faagasolo “aso e gata ai,” o le a avea tagata ma ē “lē lotofaafetai.” (2 Timoteo 3:1, 2) Pe afai tatou te lē mataala, e mafai e le leai o se lotofaafetai lea ua taatele i aso nei, ona taofia ai i tatou mai le faaleo atu o so o se faalogona o le lotofaafetai, e ono oso aʻe iā i tatou.

O ā ni laasaga talafeagai e mafai ona fai e mātua, ina ia aʻoaʻo ai a latou fanau i le auala e faaalia ai le lotofaafetai? O ai e tatau ona tatou faaleo atu i ai le lotofaafetai? Ma aiseā e ao ai ona tatou lotofaafetai, e tusa lava pe lē lotofaafetai tagata o loo siʻomia ai i tatou?

I Totonu o le Aiga

E galulue mamafa mātua e tausia manaʻoga o a latou fanau. Peitaʻi, o nisi taimi, e ono lagona ai e mātua e lē o talisapaia a latou taumafaiga. O le ā e latou te fai ina ia faaleleia ai lenei tulaga? E tolu ni auala e mafai ona fai.

(1) Faaaʻoaʻoga. O le faataatia o se faaaʻoaʻoga lelei, o se auala e aogā tele e aʻoaʻo ai fanau. Ua faapea mai le Tusi Paia e faatatau i se tinā galue mamafa i Isaraelu anamua: “E tulaʻi mai lana fanau, ma faafetai iā te ia.” O fea na aʻoaʻo mai ai e nei tamaiti e faailoa atu le lotofaafetai? Ua taʻu mai e le vaega mulimuli o le mau se manatu po o fea na latou aʻoaʻoina mai ai lenei faiga. O loo faapea mai: “O lana tane foʻi ua vivii iā te ia.” (Faataoto 31:28) O mātua e faailoa atu lo latou lotofaafetai o le tasi i le isi, ua faaalia atu ai i a latou fanau, o ni faailoaga faapena e avatu ai le fiafia i lē na fai atu i ai, faaleleia ai faiā i le aiga, ma o se faailoga foʻi lenā o le faatagata matua.

Ua faapea mai se tamā e igoa iā Setefano, “Ou te taumafai e faataatia le faaaʻoaʻoga mo laʻu fanau, e ala i le faafetai atu i laʻu avā mo taumafataga.” O le ā le iʻuga? Ua faapea mai Setefano, “Ua mātauina e laʻu fanau teine e toʻalua lenei faiga, ma ua fesoasoani iā i laʻua e faigofie ai foʻi ona la faaalia atu le lotofaafetai.” Pe afai ua e faaipoipo, po o masani ona e faafetai atu i lau paaga, mo le faia o galuega masani ia e faigofie ona manatu māmā i ai? Po o e faafetai atu i lau fanau, e oo lava foʻi pe a latou faia se mea o loo faatalitalia e latou te faia?

(2) Toleniga. O lagona o le faafetai e pei o ni fugālaau. E manaʻomia ona tausia faalelei ina ia  maua mai ai ni fua lelei. E mafai faapefea ona fesoasoani mātua i a latou fanau ina ia atiaʻe ma faaleo atu le lotofaafetai? Na faamatilatila mai e le tupu poto o Solomona se tasi o vala autū ina ua ia tusi e faapea: “E manatunatu le loto o lē amiotonu, ina ia fai se tali.”—Faataoto 15:28.

Mātua, pe mafai ona e aʻoaʻo lau fanau e mafaufau i le taumafaiga ma le agalelei o loo i tua o so o se meaalofa e latou te mauaina? O lenei ituaiga manatunatu e fesoasoani e faatupu aʻe ai le lotofaafetai. Ua faapea mai Maria, o lē o loo tausia se fanau e toʻatolu: “E manaʻomia ona i ai se taimi e nonofo faatasi ai i lalo ma lau fanau, ma faamatala atu iā i latou mea e aofia ai pe a aumai e se tasi se meaalofa—o lea sa iai se tasi sa mafaufau mai iā te oe, ma sa manaʻo e faaali mai lona manatu mamafa iā te oe. Ae ou te manatu e tāua tele na taumafaiga.” E fesoasoani talanoaga faapena i tamaiti e lē gata, e iloa ai faaupuga e ao ona latou fai atu pe a faaleo atu lo latou lotofaafetai, ae pe aiseā foʻi e ao ai ona latou fai atu lenā faamatalaga.

O mātua atamamai e fesoasoani i a latou fanau e ʻalofia le manatu e faapea, e tatau ona latou mauaina mea lelei uma. * O le fautuaga o loo maua i le Faataoto 29:21 e faatatau i le auala e feutagaʻi ai ma auauna, e faatatau foʻi i le auala e feutagaʻi ai ma fanau: “O lē ua faapelepele i lana auauna e afua mai ina itiiti, mulimuli ane [“e lē loto faafetai,” NW ].”

E mafai faapefea ona fesoasoani i tamaiti laiti e faaalia le lotofaafetai? Ua faapea mai Lina, o se tinā e toʻatolu lana fanau, “Sa ma faalaeiau ma laʻu tane la ma fanau e fai so latou sao i tusi faafetai na matou tusia, e ala i le tusiaina o se ata i totonu o le tusi, ia po o le saini foʻi o latou igoa i le tusi.” Ioe, atonu e faigofie le ata ma faigatā ona faitau le tusitusi, peitaʻi o le lesona e aʻoaʻoina e tamaiti mai lenei gaoioiga e tāua tele.

(3) Ia Filigā. O tatou uma na fananau mai ma se faanaunauga e manatu faapito, ma o lenei faanaunauga e ono taofia ai le faaleo atu o faaupuga o le faafetai. (Kenese 8:21; Mataio 15:19) Peitaʻi, ua uunaʻia e le Tusi Paia auauna a le Atua e faapea: “Ia faafouina le malosi lea e pulea ai o outou mafaufau, ma ia oofu i le tagata fou na faia e tusa ma le finagalo o le Atua.”—Efeso 4:23, 24.

Peitaʻi, ua iloa e mātua agavaa o le fesoasoani i fanau ina ia “oofu i le tagata fou,” e lē o se mea faigofie. Ua faapea mai Setefano lea na taʻua muamua, “Na foliga mai e umi se taimi o aʻoaʻoina la ma fanau teine, ina ia iloa e i laʻua lava fai atu faafetai, nai lo le faamanatu atu iā i laʻua e faia faapea.” Ae e leʻi faavaivai ai Setefano ma lana avā. Ua faaauau mai Setefano, “E ala i a mā taumafaiga filigā, na aʻoaʻoina ai e la ma fanau teine le lesona. Ua ma mitamita nei ona o le auala o loo la faaalia atu ai le lotofaafetai i isi.”

Ae Faapefea Uō ma Tuaoi?

O nisi taimi e tatou te lē taulau ai ona fai atu faafetai, atonu e lē faapea ona e tatou te lē lotofaafetai, ae ona ua galo iā i tatou. Pe e tāua moni iā i tatou ona lē gata e lagona le talisapaia, ae ia faaleo atu foʻi lo tatou lotofaafetai? Ina ia tali lenā fesili, seʻi o tatou iloiloina se mea na tupu sa aofia ai Iesu ma ni tagata lepela.

A o faimalaga atu i Ierusalema, na fetaiaʻi ai Iesu ma ni tagata lepela e toʻasefulu. Ua taʻua i le Tusi Paia: “Ua latou alalaga ma faapea mai: ‘⁠Iesu e, le Faiaʻoga, ia e alofa mai iā i matou!’ Ua ia silafia atu i latou, ona ia fetalai atu lea: ‘⁠Ia outou ō ma faaali atu outou i ositaulaga.’ Ua faamamāina i latou, a o latou ō. Ina ua iloa e se tasi o i latou ua faamālōlōina o ia, ona ia toe foʻi mai lea ma vivii leotele atu i le Atua. Ua faapaʻū faō o ia i vae o Iesu ma faafetai mai iā te ia; ma o ia o se Samaria.”—Luka 17:11-16.

Pe sa leʻi amanaʻia e Iesu le lē taulau o isi e faailoa mai lo latou lotofaafetai? Ua faaauau mai le tala: “Ua tali atu Iesu: ‘⁠Na faamamāina le toʻasefulu, a ea? A o fea la o iai le isi toʻaiva? Pe e leai ea se isi o i latou ua toe foʻi mai e vivii i le Atua, ae ua na o lenei tagata mai nuu ese?’ ”—Luka 17:17, 18.

O isi tagata lepela e toʻaiva e lē o ni tagata amioleaga. E leʻi leva atu ona latou faailoa atu lo latou faatuatua iā Iesu ma le lotomalilie e usiusitai i ana faatonuga, lea e aofia ai le malaga atu i Ierusalema e faaali atu i latou i ositaulaga. Peitaʻi, e  ui atonu e lē taumatea sa latou lagona le matuā lotofaafetai mo le galuega agalelei a Iesu, ae sa lē taulau ona latou faaleo atu lenā lotofaafetai iā te ia. Sa lē fiafia le finagalo o Keriso i la latou amio. Ae faapefea i tatou? Pe a agalelei mai se tasi iā i tatou, pe e vave ona tatou faafetai atu, ma pe afai foʻi e talafeagai, ia faaalia atu le lotofaafetai e ala i le lafo atu i ai o se tusi?

Ua faapea mai le Tusi Paia o le “alofa e lē amio matagā pe manatu faapito.” (1 Korinito 13:5, Today’s English Version) O lea la, o faaupuga faamaoni o le lotofaafetai e lē gata o se faailoga o uiga lelei, ae o se faailoga foʻi o le alofa. E pei ona aʻoaʻo mai iā i tatou i le mea na tupu na aofia ai tagata lepela, o i latou e mananaʻo e faafiafia Keriso, ua talafeagai ona faaalia i ai lenā alofa ma le talisapaia, e ui e eseese o latou lanu, atunuu, po o tapuaʻiga.

Ia fesili ifo iā te oe lava, ‘⁠O fea le taimi mulimuli na ou faafetai atu ai i se tuaoi, se tasi ma te faigaluega faatasi, se tasi ma te aʻoʻoga, se tagata e faigaluega i le falemaʻi, se faatauoloa, po o se isi tagata na fesoasoani mai iā te aʻu?’ Aiseā e lē fai ai se faamaumauga o se aso se tasi pe lua, e ala i le tusi i lalo pe faafia ona e faapea atu faafetai, pe tusi atu foʻi se tusi faafetai? E ono fesoasoani iā te oe lenā faamaumauga, e iloa ai le vala e mafai ona e faaleleia i le faailoaina atu o le lotofaafetai.

O le mea moni, o lē e sili e ao ona tatou faafetai atu i ai, o Ieova le Atua. O ia o Lē Foaʻi mai “meaalofa lelei uma ma mea uma e atoatoa ona lelei.” (Iakopo 1:17) O fea le taimi mulimuli na e faailoa atu ai ma le faamaoni i le Atua, lou lotofaafetai mo ni mea patino ua ia faia mo oe?—1 Tesalonia 5:17, 18.

Aiseā e Faaalia ai le Lotofaafetai e ui Lava e Lē o Faaalia e Isi?

E ono lē faaalia mai e isi lo latou lotofaafetai pe a tatou faaalia atu i ai le lotofaafetai. Ae aiseā la e ao ai ona tatou faaleo atu le lotofaafetai, e tusa lava pe lē faaalia mai e isi lo latou lotofaafetai? Seʻi manatu i se māfuaaga se tasi.

E ala i le faia o mea lelei iā i latou e lē o faaalia mai le lotofaafetai, o le a tatou faaaʻoaʻo ai i Lē na faia i tatou e alofa fua, o Ieova le Atua. E lē o avea le mea moni e faapea o le toʻatele o tagata e lē o faaalia le talisapaia o le alofa o loo faaalia mai e Ieova, ma itu e taofia ai o ia mai le faia o mea lelei iā i latou. (Roma 5:8; 1 Ioane 4:9, 10) E na te “faaoso lona lā i ē amioleaga ma ē amiolelei, ma faatotō mai le timu i ē amiotonu ma ē amiolētonu.” Pe afai tatou te taumafai e faaalia atu le lotofaafetai e tusa lava po o tatou ola i se lalolagi ua aunoa ma le lotofaafetai, o le a tatou faamaonia atu ai ua avea i tatou ma “atalii o lo [tatou] Tamā o i le lagi.”—Mataio 5:45.

[Faaopoopoga i lalo]

[Faamatalaga faaopoopo i le itulau 15]

Fai se faamaumauga o se aso se tasi pe lua, e ala i le tusi i lalo pe faafia ona e faapea atu faafetai

[Ata i le itulau 15]

Ia faataatia se faaaʻoaʻoga mo lau fanau e ala i le faaleo atu o le lotofaafetai

[Ata i le itulau 15]

E oo lava foʻi i le fanau iti e mafai ona toleni e faaleo atu le lotofaafetai