O Lesona Tatou te Aʻoaʻoina Mai iā Iesu

E Uiga i le Faamoemoe mo Ē ua Maliliu

A itiiti mai, e toʻatolu tagata na faatutūina e Iesu, ma ua faaalia mai ai, e iai le faamoemoe mo ē ua maliliu. (Luka 7:11-17; 8:49-56; Ioane 11:1-45) Ina ia malamalama i le faamoemoe mo ē ua maliliu, e ao ona tatou iloa muamua le māfuaaga ma le mea na pogai mai ai le oti.

Aiseā ua Tatou Mamaʻi ai ma Feoti?

Ina ua faamagaloina e Iesu agasala a tagata, ona faamālōlōina lea o i latou. O se faaaʻoaʻoga, ina ua aumaia se tagata e pē lona tino iā Iesu, sa ia fetalai atu: “ʻO lē fea e sili ona faigofie, o le fai atu ea, Ua faamagaloina au agasala, po o le fai atu, Ia tū i luga ma savali? Ae peitaʻi, ina ia outou iloa ua iai i le Atalii o le tagata le pule i le lalolagi e faamagalo ai agasala’ o lea, ua ia fetalai atu ai i le tagata maʻi: ‘Inā tulaʻi ia ma ave lou moega, ma e alu i lou aiga.’” (Mataio 9:2-6) Ioe, ua māfua ona tatou mamaʻi ma feoti ona o le agasala. O lo tatou tulaga agasala, sa amata mai i le uluaʻi tagata, o Atamu.—Luka 3:38; Roma 5:12.

Aiseā na Maliu ai Iesu?

E leʻi agasala Iesu. O lea la, sa leʻi tatau ona maliu o ia. Peitaʻi, sa totogi e Iesu a tatou agasala e ala i le maliu mo i tatou. Na ia fetalai o lona toto o le a “faamaligiina mo tagata e toʻatele e faamagalo ai agasala.”—Mataio 26:28.

Na fetalai foʻi Iesu e faapea: “E leʻi sau le Atalii o le tagata ina ia auauna mai tagata iā te ia, ae ia auauna atu, ma foaʻi atu lona ola e fai ma togiola e sui aʻi tagata e toʻatele.” (Mataio 20:28) Na taʻua e Iesu le tau lea na ia totogia, o le “togiola,” ona sa faasaʻoloto ai tagata mai le oti. Na faapea mai foʻi Iesu: “Ua ou sau ina ia latou maua le ola, ma saga maua atili ai.” (Ioane 10:10) Ina ia malamalama atoatoa i le faamoemoe mo ē ua maliliu, e ao foʻi ona tatou iloa le mea e tupu i le tagata pe a maliu.

 O le ā e Tupu i le Tagata pe a Maliu?

Ina ua maliu le uō a Iesu o Lasalo, sa faamatala atu e Iesu le mea e tupu i le tagata pe a oti. Na ia fetalai atu i ona soo: “O loo mālōlō la tatou uō o Lasalo, ae ou te alu atu [i Petania] e fafagu iā te ia auā o loo moe. . . . Ua manatu i latou ua fetalai o ia, o loo mālōlō o ia e moe. I lenā taimi, ua fetalai saʻo atu Iesu iā i latou: ‘Ua oti Lasalo.’” O lea la, na taʻua manino mai e Iesu o le tagata ua oti, o loo moe o ia ma e lē o toe iloa se mea.—Ioane 11:1-14.

I le taimi na toe faatūina ai e Iesu lana uō o Lasalo, ua fā aso talu ona maliu o ia. Peitaʻi, e leʻi iai se faamatalaga a le Tusi Paia e faapea na taʻua e Lasalo se mea na tupu iā te ia i le taimi na oti ai. Ina ua maliu Lasalo, na te leʻi toe iloa lava se mea.—Failauga 9:5, 10; Ioane 11:17-44.

O le ā le Faamoemoe mo Ē ua Maliliu?

O le a toetutū mai i latou ua maliliu ma le faamoemoe o le a ola e faavavau. Na fetalai Iesu: “E oo mai le itula e faalogo ai i latou uma o loo i tuugamau i [loʻu] leo, ma latou ō mai ai.”—Ioane 5:28, 29.

O lenei faamoemoe, o se faailoaga o le alofa o le Atua. Na fetalai Iesu e faapea: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”—Ioane 3:16; Faaaliga 21:4, 5.

Mo nisi faamatalaga atili, tagaʻi i le mataupu e 6 o le tusi O ā Aʻoaʻoga Moni a le Tusi Paia? *

[Faaopoopoga i lalo]