Pe Māfua Ona Malepe Faaipoipoga Ona o Molimau a Ieova?

“PE AFAI e suia le lotu a se tane po o se avā, o le a malepe le la faaipoipoga.” O le manatu lenā o le toʻatele o tagata. I nisi taimi, ua faamatala atu foʻi e nisi lenā manatu i se tasi ua faaipoipo, ua filifili e avea ma Molimau a Ieova. Ae pe e moni ea lenei tuuaʻiga?

E mafai ona faateʻia se tasi ua faaipoipo pe a amata ona fiafia lana paaga i se isi lotu, pe suia foʻi ona talitonuga ua leva ona iai. Atonu e oso aʻe ai le popole, o le lē fiafia, ma le ita ona o lenā tulaga.

E masani lava o le avā e muamua ona manaʻo e sui lana lotu. Afai o loo suʻesuʻe lau avā ma Molimau a Ieova i le Tusi Paia, o le ā se aafiaga o lenā mea i le lua faaipoipoga? Afai o oe o se avā o loo suʻesuʻeina le Tusi Paia ma Molimau a Ieova, o le ā e te ono faia ina ia faaitiitia ai le popole o lau tane?

Le Manatu a se Tane

O Mareko, o lē e nofo i Ausetalia, ua 12 tausaga talu ona faaipoipo ae amata loa ona suʻesuʻe e lana avā le Tusi Paia ma Molimau a Ieova. Na faapea mai Mareko, “Sa ou fiafia ina ua ou faaipoipo, ma sa ou maua se galuega faamalieina. Sa manaia lava le olaga. Peitaʻi, ina ua filifili laʻu avā e suʻesuʻe le Tusi Paia ma Molimau a Ieova, na vave lava ona ou manatu o le a suia le olaga o loo oʻu iai. I le taimi muamua, sa ou lē mautonu i le talitonuga fou a laʻu avā e uiga i le Tusi Paia, ae ina ua fai mai o ia e manaʻo e papatiso e avea o se Molimau a Ieova, sa ou matuā popole lava.”

Ua amata nei ona taumānatu Mareko po o le a malepe le la faaipoipoga, ona o le talitonuga fou a lana avā. Sa ia manatu e taofi le suʻesuʻega faale-Tusi Paia a lana avā, ma faasā o ia mai le talanoa i Molimau a Ieova. Peitaʻi, nai lo le faia o se gaoioiga vave, sa tuu e Mareko se taimi e vaavaai ai pea. O le ā na tupu i le la faaipoipoga?

Na taʻua e Mareko: “Maʻeu le fiafia o le ma faaipoipoga, ma ua atili ona malosi i le taimi nei nai lo le taimi muamua. O loo faaauau pea ona faaleleia le ma faaipoipoga talu ona papatiso laʻu avā, e avea o se Molimau a Ieova i le 15 tausaga talu ai.” O le ā na fesoasoani i le faaipoipoga ia taulau manuia? Na faapea mai Mareko, “Pe a ou toe manatu i le taimi lenā, sa tele ina taulau manuia ona sa faatatauina e laʻu avā  fautuaga aogā o loo i le Tusi Paia. E masani lava ona ia taumafai e feutagaʻi ma aʻu i se auala faaaloalo.”

Fautuaga Mai Avā ua Taulau Manuia

Afai o oe o se avā o loo suʻesuʻeina le Tusi Paia ma Molimau a Ieova, o le ā e mafai ona e fai ina ia faaitiitia ai le popole o lau tane? Seʻi manatu i faamatalaga nei a nisi o fafine mai vaega eseese o le lalolagi.

O le faamatalaga lenei a Sakiko, o se fafine mai Iapani: “Ua 31 nei tausaga talu ona ou faaipoipo ma ua toʻatolu la ma fanau. Ua 22 nei tausaga talu ona avea aʻu ma Molimau a Ieova. O se luʻi i nisi o taimi le nonofo faatasi ma se tane e lē auai i oʻu talitonuga. Peitaʻi, ou te taumafai e faatatau le fautuaga a le Tusi Paia ia ‘faalogologo lelei, ae aua le vave ona tautala, ma aua foʻi le vave ona ita.’ (Iakopo 1:19) Ou te taumafai e agalelei i laʻu tane, ma lolo atu i mea e manaʻo i ai pe a lē feteenaʻi ma mataupu silisili o le Tusi Paia. Sa fesoasoani lenei tulaga e taulau manuia ai le ma faaipoipoga.”

O le faamatalaga lenei a Nadezhda, o se fafine mai Rusia: “Ua 28 nei tausaga talu ona ou faaipoipo ma ua 16 nei tausaga talu ona avea aʻu ma Molimau a Ieova. A o leʻi suʻesuʻeina le Tusi Paia, ou te leʻi manatu i laʻu tane o ia o le ulu o le aiga. Sa ou manaʻo e fai aʻu lava faaiʻuga. Peitaʻi, na oo ina ou iloa o le faatatauina o mataupu silisili a le Tusi Paia, e maua ai e lo ma aiga le filemu ma le fiafia. (1 Korinito 11:3) Sa faasolosolo mālie ona oo ina faigofie ona ou gauaʻi, ma ua mātauina e laʻu tane nei suiga iā te aʻu.”

O le faamatalaga lenei a Marli, o se fafine mai Pasili: “E toʻalua laʻu fanau ma ua 21 nei tausaga talu ona ou faaipoipo. Ua sefuluono nei tausaga talu ona avea aʻu ma Molimau ua papatiso. Ua ou iloa e finagalo le Atua ia nonofo faatasi pea ulugalii faaipoipo, ae lē o le teteʻa. O lea la, na ou taumafai ai ia avea aʻu ma avā lelei, e ala i le tautala ma gaoioi i le auala e faafiafia ai Ieova faapea ma laʻu tane.”

O le faamatalaga lenei a Larisa, o se fafine mai Rusia: “Ina ua avea aʻu ma Molimau a Ieova i le pe ā ma le 19 tausaga ua mavae, na ou iloaina o le mea tāua mo aʻu, o le suia lea o loʻu olaga. Ua mātauina e laʻu tane le auala ua fesoasoani ai le Tusi Paia iā te aʻu ina ia avea ma avā lelei, ma atili ai ona ou talisapaia laʻu tane. E iai taimi ma te feeseeseaʻi ai i le auala e tausi aʻe ai le ma fanau, ae ua mafai ona ma foʻia na feeseeseaʻiga. O loo faataga e laʻu tane tamaiti e matou te ō i faatasiga faaletapuaʻiga o loo oʻu auai ai, ona e talitonu o ia e aogā i le ma fanau mea o loo aʻoaʻoina i na faatasiga.”

O le faamatalaga lenei a Valquíria, o se fafine mai Pasili: “E na o le toʻatasi si aʻu tama ma ua 19 nei tausaga talu ona ou faaipoipo. I le sefulutolu tausaga ua teʻa, na avea ai aʻu ma Molimau a Ieova. I le taimi muamua, sa leʻi manaʻo laʻu tane ou te alu i le galuega talaʻi. Peitaʻi, na ou aʻoaʻoina e ao ona ou tali atu iā te ia i se auala agamalu, ma fesoasoani iā te ia ina ia iloa ua iai se aafiaga lelei o le Tusi Paia i oʻu uiga. Na oo ina iloa e laʻu tane le tāua tele iā te aʻu o le auai i le galuega talaʻi. I le taimi nei, ua ia lagolagosua atoatoa i aʻu galuega faaleagaga. Pe a faia aʻu lesona faale-Tusi Paia i nuu maotua, e na te momoli aʻu i lana taavale ma onosaʻi pea e faatali atu iā te aʻu seʻi iloga e uma le lesona.”

O se Fesoasoani Aogā

Pe afai o loo suʻesuʻe e lau paaga le Tusi Paia ma Molimau a Ieova, aua e te popole faapea o le a malepe le lua faaipoipoga ona o lenā tulaga. E toʻatele tane ma avā ua latou ioeina, o le Tusi Paia o se fesoasoani aogā mo le faaipoipoga.

Sa taʻutino mai e se tasi o tane e lē o se Molimau a Ieova e faapea: “Sa ou ita ina ua amata ona fiafia laʻu avā i le talitonuga a Molimau a Ieova, ae ua ou iloa nei, e ui e tigā ae e aogā.” Sa taʻua foʻi e se tasi o tane e faatatau i lana avā e faapea: “O le faatuatua, le maumauaʻi ma le faamaoni o laʻu avā, na ou matuā lotofaafetai ai i Molimau a Ieova. Ua matuā lelei le ma aiga ona o le talitonuga faalotu a laʻu avā. Ua mafai ona fetuutuunaʻi le tasi i le isi, ma ua manatu ai i le ma faaipoipoga o se mafutaga mo le olaga atoa.”

 [Pusa/Ata i le itulau 13]

O le ā le Manatu o Molimau a Ieova i Faaipoipoga?

E manatu Molimau a Ieova o le Tusi Paia, o le Afioga faagaeeina a le Atua. O lea la, e latou te manatu mamafa i mea o loo fai mai ai e faatatau i faaipoipoga. Mātau le faamatalaga a le Tusi Paia a o taliina fesili nei:

▪ Pe faalaeiau e Molimau a Ieova o latou tagata e teteʻa ma a latou paaga faaipoipo pe a lē o ni Molimau? E leai. Na tusi le aposetolo o Paulo e faapea: “Afai e iai se uso e iai sana avā e lē talitonu, ma ua lotomalie lana avā e nonofo pea ma ia, aua neʻi tuua e ia lana avā; afai foʻi e iai se fafine e iai sana tane e lē talitonu, ma ua lotomalie lana tane e nonofo pea ma ia, aua neʻi tuua e ia lana tane.” (1 Korinito 7:12, 13) E usiusitai Molimau a Ieova i lenei faatonuga.

▪ Pe e faalaeiauina le avā ua avea ma Molimau a Ieova e na te lē amanaʻia manaʻoga o lana tane pe a lē tutusa o la talitonuga? E leai. Na tusi le aposetolo o Peteru e faapea: “Outou avā, ia gauaʻi atu i a outou lava tane, ma afai e lē usiusitai nisi i le upu o le afioga a le Atua, e mafai ona maua i latou i le amiolelei a a latou avā e aunoa ma se upu, auā ua latou vāaitino i a outou amioga mamā ma le matuā faaaloalo.”—1 Peteru 3:1, 2.

▪ Pe e aʻoaʻoina e Molimau a Ieova e faapea e pule atoatoa le tane? E leai. Na faapea mai le aposetolo o Paulo: “Ou te manaʻo ina ia outou iloa, o le ulu o tane taʻitoʻatasi uma o Keriso; o le ulu o le fafine o le tane; a o le ulu o Keriso o le Atua.” (1 Korinito 11:3) E ao i se avā Kerisiano ona faaaloalo i lana tane ona o ia o le ulu o le aiga. Peitaʻi, e lē faapea ai ua pule atoatoa se tane. E tali atu o ia i le Atua ma Keriso. O lea la, pe afai e faatonuina e se tane lana avā e fai se gaoioiga e solia ai tulafono a le Atua, e ao i se avā Kerisiano ona “usiusitai i le Atua o le pule, nai lo o tagata.”—Galuega 5:29.

▪ Pe e aʻoaʻoina e Molimau a Ieova e faapea e faasā ona tatala faaipoipoga? E leai. Na fetalai Iesu: “Ou te fai atu iā te outou, ai se tasi e faateʻa i lana avā ae e leʻi faitaaga [feusuaʻiga lē mamā] lana avā, ma toe faaipoipo i se isi fafine, ua mulilua o ia.” (Mataio 19:9) O lea la, e talia e Molimau a Ieova le manatu o Iesu e faapea, e mafai ona tatala le faaipoipoga pe afai ua mulilua se tasi o le paaga. Peitaʻi, e latou te matuā ioe foʻi, e lē tatau ona tatala faaipoipoga ona o ni nai feeseeseaʻiga laiti. E latou te faalaeiauina o latou tagata ina ia usitaia fetalaiga nei a Iesu: ‘E tuua e le tane lona tamā ma lona tinā, ma nonofo faatasi ma lana avā, ona avea ai lea o i laʻua ma tino e tasi. O ē ua faatasia e le Atua, aua neʻi tuueseeseina e se tagata.’—Mataio 19:5, 6.