Se Fale na Tatala mo se Fuafuaga

“O Ā MEA o latou fai i inā?” O le fesili lenā a le toʻatele o tagata e ui ane i le mea lea o loo iai se fale telē lava o Molimau a Ieova, i le aai o Mogale (Krugersdorp), e lata i Johannesburg, i Aferika i Saute. O lea, sa filifili ai loa Molimau a Ieova e tatalaina fale i ofisa o le lālā e maimoa ai tagata iā Oketopa 12 ma le 13, 2007. O lenei fale na tatalaina mo ni fuafuaga se lua—e lē gata e aveesea ai tala sesē na faia i ai, ae ia iloa ai foʻi e tagata mea o loo faia e le ofisa o le lālā e lagolagoina ai le galuega na faatonuina e Iesu Keriso e ao ona fai.—Mataio 28:19, 20.

Na tuuina e ē o loo galulue i le ofisa o le lālā ni faailoilo tetelē i luma o le fale ina ia valaaulia ai tagata, ma na latou tufatufa atu valaaulia faapitoa i o latou tuaoi. Sa valaaulia foʻi aumea faapisinisi ma o latou aiga. O le iʻuga, e sili atu i le 500 tagata e lē o ni Molimau na asiasi atu e maimoa i lenei fale.

Sa maofa i latou i le masini lomitusi e taʻu o le MAN Roland Lithoman, lea na te lolomia le 90,000 mekasini i le itula e tasi. Na maofa foʻi tagata asiasi i le telē o le fale mo felaʻuaʻiga, lea e faopusa ma felaʻuaʻi ai lomiga e silia i le 14 tone le mamafa i aso taʻitasi, ma e faapena foʻi ma le auala o loo tuufaatasia ai tusi. Na sauniunia foʻi e Molimau i Matagaluega eseese le tele o mea mananaia e maimoa i ai tagata asiasi, e aofia ai se otootoga o le talaaga o masini lomitusi mai le ituaiga e taʻua o le Gutenberg, seʻia oo mai i le ituaiga masini lomitusi faaonapōnei e taʻua o le Lithoman. O se tasi o mea na faamatilatila o le auala o loo tausia lelei ai e le lālā le siʻosiʻomaga. Mo se faaaʻoaʻoga, e iai se vaega faapitoa na te aveesea le kasa oona ma ni manogi mai masini lomitusi, ma faamamāina le pefu o faaputuga pepa mo le lafoaʻia.

Na tusia e se tasi o nusipepa a le atunuu se mataupu na taʻua ai le toʻa 700 o tagata tauofo o loo nonofo i lea fale, “o ni faifeʻau tofia ua tuuina atu i latou iā Ieova.” O loo taʻua ai foʻi le “maualuga o le tulaga mamā ma le auala e faagaoioia ai mea uma i le taimi,” i totonu o le fale lomitusi. O se tamāloa sa tetee i Molimau a Ieova, na alu atu e maimoa i lea fale. Na ia tusia se tusi mulimuli ane e faapea: “Faamālō lava. Ou te leʻi mafaufauina o le maualuga lea o le tulaga lelei o loo iai lenei fale.”

O le toʻatele o tagata na asiasi atu, na faaalia lo latou agaga faafetai mo le maimoaga i fale o le lālā, ma na latou maofa ina ua latou iloa o loo maua i le lālā lomiga faale-Tusi Paia i gagana e 151, ma e latou te lomiaina lomiga mo atunuu e 18 i le itu i saute ma Aferika tutotonu. O loo tatala pea le avanoa e asiasi atu ai i lālā o Molimau a Ieova o loo i so o se vaipanoa o le lalolagi i taimi faigaluega. Aiseā e te lē talosaga atu ai mo se taimi avanoa e asiasi atu ai e ala i lou faafesootaʻia o le lālā o loo i lou vaipanoa?

[Ata i le itulau 14]

Valaaulia

[Ata i le itulau 14]

Ua taunuu mai tagata asiasi i fale o le lālā

 [Ata i le itulau 15]

Fale o le lālā i Aferika i Saute i le Aai o Mogale

[Ata i le itulau 15]

Le masini lomitusi e taʻua o le MAN Roland Lithoman

[Ata i le itulau 15]

Le auala o loo tuufaatasia ai tusi

[Ata i le itulau 15]

Vaega e gafa ma le felaʻuaʻiga o lomiga