Ia Mafuta Atu i le Atua

Le Faamaoniga Sili o le Alofa o le Atua

Kenese 22:1-18

NA ALOFA Aperaamo i le Atua. Na pele foʻi i lenei tamā faatuatua lona atalii o Isaako o lē na fanau mai ina ua toeaina o ia. Pe tusa o le 25 o tausaga o Isaako na tofotofoina ai Aperaamo i se mea e lē fetaui ma faalogona o se tamā, ina ua faatonuina o ia e le Atua e avatu lona atalii e fai ai le taulaga. Peitaʻi ane, e leʻi oti ai Isaako. Ona i le taimi tonu lava na sauni ai Aperaamo e fai le taulaga i lona atalii, na taofia ai o ia e le agelu a le Atua. O lenei tala faavaloaga mai le Kenese 22:1-18, ua faaātaina ai le alofa tele o le Atua iā i tatou.

Ua faapea mai le fuaiupu 1, “Ona tofotofo lea o le Atua iā Aperaamo.” O Aperaamo o se tagata faatuatua, ae faatoʻā oo lea o se tofotofoga faapea iā te ia. Na fetalai atu le Atua: “Ia e ave lou atalii, o lou atalii e toʻatasi, o lē ua pele iā te oe, o Isaako . . . ma avatu iā te ia e fai ma taulaga mū i lea mea i le tasi mauga ou te taʻuina atu ai iā te oe.” (Fuaiupu e 2) Ma ia manatua foʻi, e lē tuuina e le Atua i ana auauna se tofotofoga e sili i lo le mea e latou te mafaia. O lea la, ua faaalia mai lenei tofotofoga le faatuatuaina e le Atua o Aperaamo.—1 Korinito 10:13.

Na usitai loa Aperaamo ma faia. Ua faapea mai le mau: “Ona ala tulaʻi lea o Aperaamo i le taeao, ma faanofoa lana asini, ua ave foʻi e ia ni ona tauleleʻa e toʻalua, ma Isaako lona atalii; ma na taisi fafie e fai aʻi le taulaga mū, ona tulaʻi lea o ia ma alu.” (Fuaiupu e 3) E foliga mai e leʻi taʻuina e Aperaamo i se isi le taulaga o le a ia faia.

Na maua se taimi e mafaufau ai i le mea o le a tupu auā e tolu aso o le malaga. Ae e leʻi toe solomuli Aperaamo i lana filifiliga. Ma na faaalia i ana upu le malosi o lona faatuatua, ona ina ua ia iloa atu le mauga na agaʻi i ai, na faapea atu o ia i ana auauna: “Tali atu ia i inei . . . , a o aʻu ma le tama ma te ō i o e tapuaʻi ai, i lo ma toe foʻi mai iā te oulua.” Na fia iloa e Isaako po o fea le tamaʻi mamoe e fai ai le taulaga, ae na tali Aperaamo: ‘Loʻu atalii e, e au mai e le Atua se tamaʻi mamoe e fai aʻi le taulaga mū.’ (Fuaiupu e 5, 8) O le manatu o Aperaamo, e la te toe foʻi faatasi mai ma lona atalii. O le ā le māfuaaga o lona manatu faapea? Ona “na manatu o ia e mafai e le Atua ona toe faatūina o ia mai le oti.”—Eperu 11:19.

A o iai i le mauga, ina ua aapa atu Aperaamo i le naifi “o le a fasioti lona atalii,” na taofia o ia e le agelu. Ona foaʻi mai lea e le Atua o se mamoe poʻa o loo lavelavea i le laau fili, e faaaogā e Aperaamo “e sui aʻi lona atalii.” (Fuaiupu e 10-13) I le Atua, e peiseaʻī o lea ua avea Isaako ma taulaga. (Eperu 11:17) Ma ua faamanino mai e se alii poto e faapea, “I le Atua, e tusa lava ua faatino e Aperaamo le taulaga i lona atalii, ona o lona lotomalie e fai le taulaga iā te ia.”

Na faamaonia le faatuatuaina e Ieova o Aperaamo. Ae na tauia le faatuatua o Aperaamo ona na toe faamanino atu e Ieova lana feagaiga ma ia, ma o le a faasalafa atu i tagata o nuu uma ina ia faamanuiaina ai i latou.—Fuaiupu e 15-18.

Na taofia e le Atua Aperaamo ia lē faia le taulaga i lona atalii, ae sa Ia faataunuuina e ala i lona Alo. Ua avea le lotomalie o Aperaamo e avatu lona atalii o Isaako e fai ai le taulaga, ma ata o le foaʻiina mai e le Atua o lona Alo e toʻatasi o Iesu, mo a tatou agasala. (Ioane 3:16) O le faataulagaina o Keriso ua avea ma faamaoniga sili o le alofa o le Atua. Ona o le telē o le faataulagaina ua faia e le Atua mo i tatou, e ao la ona tatou fesili ifo e faapea, ‘O ā mea ua ou malie e tuu ina ia faamuamua ai mea e fiafia ai le Atua?’