Ia Aʻoaʻo Lau Fanau

Na Filifili Iosia e Faia le Mea Saʻo

O LE ā sou manatu, pe faigatā ona fai le mea saʻo? *— Afai o lau tali o le ioe, e toʻatele tagata e ioe i lau tali. E faigatā foʻi i tagata matutua ona fai le mea e latou te iloa e saʻo. Seʻi o tatou iloiloina pe aiseā sa matuā faigatā ai iā Iosia ona faia ni filifiliga saʻo. Pe e te iloa o ai lenei tagata?—

O Iosia, o le atalii o Amone, le tupu o Iuta, o lē e na o le 16 ona tausaga ina ua fanau mai Iosia. O Amone o se tagata e matuā leaga tele, e pei lava foʻi o lona tamā o Manase. Sa avea Manase ma tupu e sili ona leaga i le tele o tausaga. Peitaʻi, sa puʻea o ia ma ave faapagota i se mea mamao i Papelonia. A o iai i le falepuipui, sa augani atu Manase iā Ieova e faamagalo o ia, ma na faia faapea e Ieova.

Ina ua faasaʻolotoina Manase mai le falepuipui, na toe foʻi atu o ia i Ierusalema ma toe amata ai lana pulega o se tupu. Na vave lava ona ia gaoioi e faaleleia mea leaga na ia faia ma fesoasoani i tagata ina ia auauna iā Ieova. Pagā lona faanoanoa i le vaai atu i lona atalii o Amone e lē o mulimuli i lana faaaʻoaʻoga lelei. Atonu o le vaitaimi lenā na fanau ai Iosia. E lē o taʻua i le Tusi Paia po o le ā le tele na fesootaʻi ai Manase ma Iosia le atalii o lona atalii. Ae pe e te ono manatu sa taumafai Manase e fesoasoani iā te ia ina ia auauna iā Ieova?—

Sa maliu Manase ae faatoʻā ono tausaga o Iosia, ma avea ai loa le tamā o Iosia, o Amone ma tupu. E na o le lua tausaga na nofotupu ai Amone ae fasiotia loa o ia e ana auauna. Ona fai loa lea o Iosia ma tupu o Iuta i le valu o ona tausaga. (2 Nofoaiga a Tupu, mataupu e 33) Pe e te iloa o le ā le mea na tupu i le taimi lenā? Pe sa filifili Iosia e mulimuli i le faaaʻoaʻoga leaga a lona tamā o Amone, po o le faaaʻoaʻoga a le tamā o lona tamā na toe salamō o Manase?—

E ui sa laʻitiiti lava Iosia, ae na ia iloa sa ia manaʻo e auauna iā Ieova. O lea sa ia faalogo ai iā i latou e alolofa iā Ieova, nai lo le faalogo i uō a lona tamā.  E na o le valu tausaga le matua o Iosia, ae na ia iloa lelei o se mea saʻo le faalogo i tagata e alolofa iā Ieova. (2 Nofoaiga a Tupu 34:1, 2) Pe e te fia iloa i latou na fesoasoani iā Iosia ma avea ma faaaʻoaʻoga lelei iā te ia?—

O se tasi o i latou na fesoasoani iā Iosia, o le perofeta o Sefanaia. O ia o se tauaiga o Iosia, atonu o ia o se tagata na tupuga mai le tamā o Manase, o Esekia, le tupu lelei. I le vaitaimi amata o le pule a Iosia o se tupu, na tusia ai e Sefanaia le tusi o le Tusi Paia lea e faaigoa i lona igoa. Sa lapataʻi atu Sefanaia e faatatau i mea leaga e ono oo iā i latou e lē filifili e fai le mea saʻo, ma e mautinoa na faalogo Iosia i na lapataʻiga.

O le isi foʻi tagata na fesoasoani iā Iosia, o Ieremia, o se tasi atonu na e faalogo muamua iai. E felataʻi lava mea na ola faatasi aʻe ai Ieremia ma Iosia o ni tama talavou seʻia oo ina matutua. Na faagaeeina e Ieova Ieremia e tusia le tusi o le Tusi Paia lea e faaigoa iā Ieremia. Ina ua maliu Iosia i le taua, na tusia e Ieremia se pese aualofa e faaali atu ai lona faanoanoa tele. (2 Nofoaiga a Tupu 35:25) Seʻi faaāta i o tatou mafaufau le matuā faalaeiauina o le tasi o le isi ina ia tumau i le faamaoni iā Ieova!

O le ā se mea ua e aʻoaʻoina mai iā Iosia?— I le pei o Iosia, pe afai e lē tapuaʻi lou tamā iā Ieova, pe e iai se isi tagata e mafai ona fesoasoani iā te oe ina ia e iloa mea e faatatau i le Atua? Atonu o lenā tagata o lou tinā, o mātua o ou mātua, po o sou tauaiga foʻi. Pe atonu foʻi o se tasi e auauna iā Ieova, o se tasi o le a faataga e lou tinā e te lua suʻesuʻeina le Tusi Paia.

Po o le ā lava le tulaga, e ui ua na o se tamaitiiti Iosia, ae ua lava lona matua e iloa lelei ai, e na o tagata e auauna iā Ieova e tatau ona ia faauō i ai. Seʻi tau ina ia e faia foʻi faapea ma filifili e fai le mea saʻo!

[Faaopoopoga i lalo]

Fesili:

○ O ai le tamā ma le tamā o le tamā o Iosia, ma o ā ituaiga tagata e iai i laʻua?

○ O ā suiga na faia e le tamā o le tamā o Iosia i lona olaga?

○ O ai igoa o perofeta e toʻalua ia sa ono fai ma faaaʻoaʻoga lelei iā Iosia, ma aiseā e tāua ai le iai o ni uō faapena?

[Ata i le itulau 25]

Sa faapefea ona fesoasoani Sefanaia ma Ieremia iā Iosia ina ia faia le mea saʻo?