E Toʻaitiiti o le a Pule Mai, ae e Toʻatele e Manuia Ai

TALU mai aso o le ʻauaposetolo, sa faasolosolo ai ona filifilia e le Atua mai tagata se aofaʻiga toʻaitiiti o Kerisiano faamaoni, ma vaetamaina i latou e avea ma ona atalii. E matuā atoatoa lava le suiga ua oo i nei ataliifai, lea ua faamatalaina ai e le Tusi Paia o le fanaufouina. O le fuafuaga o le fanaufouina ina ia sauniunia ai nei auauna a le Atua ua toe fananau mai e avea ma pule i le lagi. (2 Timoteo 2:12) Ina ia avea ma pule, e faatutūina aʻe i latou mai le oti i le olaga i le lagi. (Roma 6:3-5) I le lagi, e “latou [te] pule mai foʻi o ni tupu i le lalolagi” faatasi ai ma Keriso.—Faaaliga 5:10; 11:15.

Peitaʻi, ua faapea mai foʻi le Afioga a le Atua, e ese mai iā i latou e toe fananau mai, e iai foʻi isi o le a mauaina le faaolataga e faavavau. I le Tusi Paia (Tusitusiga Eperu faapea foʻi ma Tusitusiga Eleni), o loo taʻua ai le mea moni e faatatau i le fuafuaga a le Atua e  faasaoina ni vaega se lua o tagata, o se vaega toʻaitiiti o ē o le a pule mai le lagi, ma se vaega toʻatele o tagata e ola i le lalolagi. O se faaaʻoaʻoga, o le mea na tusia e le aposetolo o Ioane i tagata talitonu ua fanaufouina. Na ia faapea mai e faatatau iā Iesu: “O ia o le taulaga o le leleiga ma le Atua mo a tatou agasala, e lē na o a tatou agasala [le vaega toʻaitiiti], a o le lalolagi atoa foʻi [le vaega toʻatele].”—1 Ioane 2:2.

I se tulaga talitutusa, na tusi le aposetolo o Paulo: “O loo faatalitali ma le matuā naunau atu le foafoaga [le vaega toʻatele] i le faaalia mai o atalii o le Atua [le vaega toʻaitiiti].” (Roma 8:19-21) O le ā lo tatou malamalamaga i upu nei a aposetolo o Ioane ma Paulo? O le uiga lenei: O i latou e toe fananau mai, o le a avea ma vaega o le malo i le lagi. O ā a latou mea o le a faia i inā? Ina ia faaoo mai aogā e faavavau i le faitau miliona o tagata, o tagatānuu o le malo o le Atua lea o le a ola i le lalolagi. O le ala lea na aʻoaʻo ai e Iesu ona soo e tatalo: “Ia oo mai lou malo. Ia faia lou finagalo i le lalolagi, e pei ona faia i le lagi.”—Mataio 6:10.

O lenei mea moni e faatatau i le faaolataga lea ua faasafua atu i vaega e lua o tagata, o loo maua foʻi i Tusitusiga Eperu. O se faataʻitaʻiga, seʻi mātau le fetalaiga a Ieova i le augātamā o Iesu o Aperaamo: “O lau fanau foʻi [le vaega toʻaitiiti] e manuia ai atu nuu uma lava o le lalolagi [le vaega toʻatele]; auā ua e usiusitai i laʻu upu.” (Kenese 22:18) Ioe, e tatau ona maua e atunuu uma faamanuiaga e ala mai i le “fanau” a Aperaamo.

O ai lenā “fanau”? O Iesu Keriso, faatasi ai ma i latou ua fanaufouina, o ataliifai o le Atua. O loo faamalamalama mai e le aposetolo o Paulo e faapea: “Afai ua outou autasi ma Keriso, o outou la o le fanau a Aperaamo.” (Kalatia 3:16, 29) O ā faamanuiaga o le a maua e tagata o nuu uma ona o le “fanau”? O le faaeaga o le maua lea o le finagalo malie o le Atua ma le olioli i le ola e faavavau i se lalolagi parataiso. Sa valoia mai e le faisalamo o Tavita: “E fai lava le nuu mo tagata amiotonu, e nonofo ai pea i latou.”—Salamo 37:29; Isaia 45:18; Faaaliga 21:1-5.

O lea la, ua taofia le pulega i le lagi mo le toʻaitiiti, ae o aogā mai le pulega i le lagi, o le ola e faavavau i le lalolagi faatasi ai ma le tele o isi faamanuiaga, lea e faasafua atu i le toʻatele. Tau ina ia taumafai ma lou aiga ia aofia ai iā i latou o le a maua faamanuiaga e faavavau lea o le a aumaia e le Malo o le Atua.

[Ata i le itulau 12]

E faitau miliona o le a faamanuiaina i le ola e faavavau i le lalolagi. Po o le a e aofia ai iā i latou na?