Talafaatusa i le Tusi Paia—Po o E Malamalama Ai?

E TASI se ata ae afe upu e faamatala ai, ae o nisi taimi, e tasi pe lua ni upu ae malamalama ai se ata o loo faamatala mai. O talafaatusa, po o faamatalaga e mafai ona faaata ai i le mafaufau o le tagata faitau, o loo tele ina maua i le Tusi Paia. * O se faaaʻoaʻoga, e sili atu i le 50 talafaatusa na faaaogā e Iesu i se tasi o ana lauga, o le Lauga i le Mauga.

Aiseā e tatau ai ona e naunau i talafaatusa? E mautinoa lava, o lou malamalama i na tulaga, o le a ola ai lau faitauga Tusi Paia, ma faateleina ai lou talisapaia mo le Afioga a le Atua. E lē gata i lea, pe a e mātauina ma malamalama i talafaatusa, o le a sili atu ai lou iloa o le feʻau o loo i le Tusi Paia. O le mea moni, o lou lē malamalama i talafaatusa o loo i le Tusi Paia, e lē gata o le a e lē malamalama ai, ae sesē ai foʻi se faaiʻuga e te faia.

Malamalama i Talafaatusa

E faatusatusa e se talafaatusa ni mea se lua. O le mea o loo faatusatusa e taʻua o le manatu autū, a o le mea o loo faatusatusa i ai, o le ata. O le faatusatusaga o nei mea e lua e taʻua o le tulaga po o le vala e tutusa ai. O lea la, o lou talisapaia o le uiga moni o se talafaatusa e faalagolago i lou malamalama i nei vala e tolu.

I nisi taimi, e faigofie lava ona e iloa le manatu autū ma le ata o loo faaupu mai. Ae atonu e lē tasi se vala e tutusa ai. O le ā o le a fesoasoani iā te oe ina ia e iloa lelei le tulaga e tutusa ai? E masani ona maua le tali i le manatu atoa o le mataupu, po o le faamatalaga o loo siʻomia ai. *

O se faaaʻoaʻoga, sa fetalai atu Iesu i le faapotopotoga i Saratisa: ‘O le mea moni, afai e te lē ala i luga, ou te alu atu e pei o se gaoi.’ Ua faatusa e Iesu i inei lona afio mai (le manatu autū) i lona sau e pei o se gaoi (le ata). Ae o le ā le tulaga e tutusa ai? E fesoasoani mai le manatu atoa iā i tatou. Na toe fetalai atili Iesu: “E te matuā lē iloa foʻi po o lē fea itula ou te oo mai ai iā te oe.” (Faaaliga 3:3) E lē o faasino atu le faatusatusaga i le autū na ia afio mai ai. E leʻi uiga faapea o le a ia  afio mai e gaoia se mea. Nai lo lea, o le manatu autū o le faatusatusaga o loo faatatau i le faafuaseʻia, po o le lē iloa lea o le taimi e afio mai ai.

O isi taimi, o se talafaatusa mai se isi vaega o le Tusi Paia, e ono fesoasoani iā te oe e te malamalama ai i se talafaatusa i se isi vaega o le Tusi Paia. O se faataʻitaʻiga, e tutusa le talafaatusa na faaaogā e le aposetolo o Paulo ma Iesu, i lona tusi e faapea: “Ua outou iloa lelei, e oo mai lava le aso o Ieova e pei o se gaoi i le pō.” (1 Tesalonia 5:2) E lē o maʻoti mai upu a Paulo le tulaga e tutusa ai. Peitaʻi, o le faatusatusa o lenei talafaatusa i le talafaatusa na faaaogā e Iesu i le Faaaliga 3:3, o le a fesoasoani iā te oe e malamalama ai i le tulaga e tutusa ai. E tāua tele le faamanatuga mai lenei talafaatusa mo Kerisiano moni uma, e tatau ona tutumau i le mataala faaleagaga!

Ua Tatou Iloa le Atua Ona o Upu Faafaatusa

E leai ma se tagata e mafai ona ia malamalama atoatoa i uiga ma le mana o Lē ona le malosi uma. I aso anamua, na tusi le tupu o Tavita, “e lē mafai ona suʻesuʻeina le silisili ese” o Ieova. (Salamo 145:3) I le māeʻa o lona mātauina o nisi o foafoaga a le Atua, na faapea mai Iopu: “Faauta, o mea aupito mai ia a ona ala, a e matuā itiiti se mea ua tatou lagona iā te ia; a o le faititili o lona malosi, o ai sē lagona lea?”—Iopu 26:14.

E ui i lea, e faaaogā i le Tusi Paia talafaatusa e fesoasoani ina ia tau iai sina malamalama iā i tatou, e faatatau i uiga mataʻina o lo tatou Atua o i le lagi. Ua faaata mai Ieova o se Tupu, Faitulafono, ma o se Toa, o lē e tatau ona e faaaloalo i ai. O loo faaata mai foʻi o ia o se Leoleo mamoe, Faufautua, Aʻoaʻo, Tamā, o Lē faamālōlōina, ma le Faaola, o se tasi e te alofa i ai. (Salamo 16:7; 23:1; 32:8; 71:17; 89:26; 103:3; 106:21; Isaia 33:22; 42:13; Ioane 6:45) O nei faamatalaga uma, e mapuna aʻe ai ni vaaiga faagaeeloto ona o vala e tutusa ai. O nei talafaatusa e vave ona malamalama ai i manatu autū nai lo le tele o upu e tau faamatala ai.

E faatusa foʻi e le Tusi Paia ia Ieova i mea e leai ni ola. Ua faamatalaina o ia o le “Papa o Isaraelu,” o se “papa,” ma o se “ʻolo.” (2 Samuelu 23:3; Salamo 18:2; Teuteronome 32:4) O le ā le tulaga e tutusa ai? E pei ona mautū le faavae o se maa telē, e lē maluelue, e faapena foʻi Ieova le Atua, e mafai ona avea o ia ma Puna e te saogalemu ai.

E tele talafaatusa i le Salamo, lea e faamatala ai vala eseese o uiga o Ieova. O se faaaʻoaʻoga, i le Salamo 84:11 o loo taʻua ai Ieova o le ‘lā ma le talita,’ auā o ia o le Puna o le malamalama, ola, malosi, ma puipuiga. E lē gata i lea, o loo faapea mai le Salamo 121:5, “O Ieova, o lou paolo lea i lou itu taumatau.” E pei ona puipuia oe i le paolo mai le aasa o le lā, e mafai e Ieova ona puipuia i latou e auauna iā te ia mai le ogaoga o mafatiaga, ma ua pei ai o loo faamalumalu i latou i lalo o lona ‘aao’ po o lalo foʻi o ona “apaʻau.”—Isaia 51:16; Salamo 17:8; 36:7.

Faamatalaga Faafaatusa e Faamatala ai Iesu

E faasino soo le Tusi Paia iā Iesu o le “Alo o le Atua.” (Ioane 1:34; 3:16-18) E faigatā ona malamalama nisi e lē o ni Kerisiano i lenā  manatu, ona e leai se faletua o le Atua ma e leai sona itu tagata. O lea la, e leʻi faia e le Atua se atalii i le auala e maua ai tagata. Ma o lenei faamatalaga o se talafaatusa. Ua fuafuaina e fesoasoani ina ia malamalama le tagata faitau i le faiā a Iesu ma le Atua, ua pei o le faiā a se atalii ma lona tamā. O loo faamatilatila mai foʻi e lenei talafaatusa na maua le ola o Iesu mai iā Ieova, auā na faia o ia e Ieova. I se tulaga tutusa, o le uluaʻi tamāloa, o Atamu, o loo taʻua foʻi o le “atalii o le Atua.”—Luka 3:38.

Na faaaogā e Iesu talafaatusa e faamatala ai matafaioi eseese e na te faatinoina i le faataunuuga o fuafuaga a le Atua. O se faataʻitaʻiga, na ia fetalai: “O aʻu o le vine moni, a o loʻu Tamā o lē e galue vine ia.” Ona faatusa lea e Iesu o ona soo i lālā o le vine. (Ioane 15:1, 4) O ā manatu autū e faaata mai e lenei talafaatusa? Ina ia ola ma fua mai pea, e tatau ona pipii pea lālā o le vine i le vine. I se tulaga tutusa, e tatau i soo o Keriso ona auaufaatasi ma ia. Sa fetalai Iesu, “E lē mafai ona outou faia se mea e tasi pe a ou lē iai.” (Ioane 15:5) E pei ona faatalitalia e se tagata selesele le vine e fua mai, e faatalitalia foʻi e Ieova i latou o loo auaufaatasi ma Keriso ina ia fua mai faaleagaga.—Ioane 15:8.

Ia Iloa Lelei le Manatu Autū o le Faatusatusaga

E tatou te ono lē maua le manatu saʻo pe afai e na o le faitau o le talafaatusa, e aunoa ma le iloa lelei o le tulaga e tutusa ai. O se faaaʻoaʻoga, o upu o loo i le Roma 12:20: “Afai e fia ʻai lou fili, ia fafaga iā te ia; afai e fia inu o ia, ia avatu i ai se meainu; auā a e faia lenei mea, e faaputu ai pea malala ola i luga o lona ulu.” Po o le faaputu o malala ola i luga o le ulu o se tagata o le faailoga lea o le tauimasui? E lē o le tulaga lenā, pe a tatou malamalama i le tulaga e tutusa ai faatusatusaga. Na maua mai lenei talafaatusa mai aso anamua pe a faamamā le uʻamea i le afi. Sa tunuina le uʻamea i luga o se faaputuga malala, ae sa faaputu foʻi malala i luga o le uʻamea. Sa liu suāvai le uʻamea i lenei faiga, ma na tuueseeseina ai le uʻamea mai isi mea lē aogā. I se tulaga tutusa, o le faaalia o le agalelei e ono suia ai uiga o le tagata, ma iloa atu ai ona uiga lelei.

O le malamalamaga saʻo o le talafaatusa, e lē gata e aʻoaʻoina ai i tatou, ae pāʻia ai loto. E tatou te lagona le matuiā o le agasala pe a faatusa i se aitalafu. (Luka 11:4) Ae a faamagalo e Ieova i tatou ma ia faalēaogāina le aitalafu lea e ono tuuaʻia ai i tatou, maʻeu se mapusaga o le a iai! Pe afai ua “ufitia” ma “soloiesea” o tatou agasala, ua pei ua lē o toe iai, ua faamautinoa mai iā i tatou, o le a ia lē toe tauia mai a tatou agasala ua mavae i se taimi o i luma. (Salamo 32:1, 2; Galuega 3:19) O se manatu e faamāfanafanaina ai le iloa e mafai e Ieova ona liua a tatou agasala e mūmū pe ʻulaʻula, ae suia i le paʻepaʻe e pei o le kiona!—Isaia 1:18.

O se vaega itiiti lea o le faitau selau o talafaatusa o loo iai i le Afioga a le Atua, le Tusi Paia. Pe a faitau lau Tusi Paia, ia uaʻi faapitoa i talafaatusa. Ia faaalu se taimi e iloilo ai tulaga e tutusa ai ma mafaufau loloto i na mea. O lou faia faapea, o le a faateleina ai lou malamalamaga ma le talisapaia o le Tusi Paia.

[Faaopoopoga i lalo]

[Pusa i le itulau 13]

Le Auala e Aogā ai Talafaatusa

E tele auala e aogā ai talafaatusa iā i tatou. O se manatu e faigatā e ono faatusaina i se mea e faigofie ona malamalama i ai. Atonu e lē na o le tasi se talafaatusa e faaaogā e faamalamalama ai vala eseese o se mataupu patino. E ono faamamafaina manatu tāua e ala i le faia o talafaatusa, po o le faia ina ia tosina atu i ai.

[Pusa i le itulau 14]

Ia Iloilo Vaega Eseese

TALAFAATUSA: “O outou o le masima o le lalolagi.” (Mataio 5:13)

MANATU AUTŪ: O outou (Soo o Iesu)

ATA: Masima

TULAGA E TUTUSA AI: E umi ona faasaoina ai se mea

LESONA: Sa i le ʻauaposetolo le feʻau e mafai ona faasaoina ai le ola o le toʻatele

[Faamatalaga faaopoopo i le itulau 15]

“O Ieova, o loʻu leoleo mamoe o ia; e leai se mea ou te mativa ai.”—SALAMO 23:1