E te Silafia?

Aiseā e faapea ai tagata “amene” i le iʻuga o se tatalo?

O le upu “amene” i le faa-Peretania ma le faa-Eleni, o se faaliliuga tuusaʻo o le upu Eperu ʼa·menʹ. O lenei faaupuga lea e masani ona taʻua faatasi e i latou o loo faalogologo i se tatalo, tautoga, faamanuiaga, po o se fetuu, e mafai ona faauiga atu “o lea lava,” po o le “e mautinoa.” O le taʻua o lenā upu, o se faailoaga lea o le ioeina o faalogona ma manatu na taʻua i le tatalo. E tusa ai ma se tasi lomifefiloi, “o loo faaali mai e lenā upu le mautinoa, tonu, faamaoni, ma le lē masalosalo.” I vaitaimi o le Tusi Paia, o le taʻua o le upu “amene” i se tautoga po o se feagaiga, e faailoa mai ai ua ioe faaletulafono tagata i iʻuga e oo i ai pe a lē mulimuli i lenā tautoga po o le feagaiga.—Teuteronome 27:15-26.

I lana talaʻiga ma ana aʻoaʻoga, sa amata ai e Iesu nisi o ana fetalaiga i le upu “amene.” I lona faia faapea, na ia faamamafa ai le moni aʻiaʻi o mea na ia fetalai ai. E tusa ai ma lenei tulaga, ua faaliliuina ai le upu Eleni a·menʹ i le “e moni,” po “o lea lava.” (Mataio 5:18; 6:2, 5.) Ina ua ia taʻu faalua le upu e tusa ai ma le Evagelia atoa a Ioane, sa faaliliuina ai fetalaiga a Iesu “E moni, e moni.” (Ioane 1:51) O le faaaogāina e Iesu o le upu amene i le auala lenei, na tutasi ai i tusitusiga paia.

I Tusitusiga Kerisiano Eleni, o le taʻu “Amene” o loo faatatau atu iā Iesu, e taʻu mai ai o lana molimau e ‘faamaoni ma moni.’—Faaaliga 3:14.

O ā nei mea e taʻu o le Urima ma le Tumena?

E foliga mai o le Urima ma le Tumena sa faaaogā i Isaraelu anamua, e iloa ai le finagalo o Ieova i mataupu e faatatau i le nuu ma ona taʻitaʻi. Na tuuina atu nei mea i le faitaulaga sili ma sa teu i totonu o le taga o le “ufifatafata o le faamasinoga.” (Esoto 28:15, 16, 30) E ui lava e lē o taʻu mai e le Tusi Paia foliga o nei mea ma le auala e faaaogā ai, ae tele ina faaalia mai i mau, sa faaaogā e pei sa fai ai se vili ina ia iloa ai le tali mai a le Atua, po o le “ioe” po o le “leai.”

O se tasi o faaaʻoaʻoga o lea tulaga, o le taimi na fai atu ai Tavita iā Aviata e avatu le efota a le faitaulaga sili, lea na iai le Urima ma le Tumena. Na fesili atu Tavita iā Ieova i ni fesili se lua: ‘Po o le a tuliloaina ea aʻu e Saulo?’ ma ‘Pe e tuuina atu ea aʻu e tagata o Kaila i lona lima?’ Sa taliina na fesili e lua i le ioe, lea na fesoasoani ai iā Tavita e faia ai ni filifiliga talafeagai.—1 Samuelu 23:6-12.

E muamua atu i lenā mea, sa faaaogā e le tupu o Saulo le Urima ma le Tumena ia iloa ai mea nei, muamua, e fia iloa po o ai e tuuaʻia, pe tuuaʻia le nuu pe tuuaʻia i laʻua ma Ionatana, ma lona lua, e vaai po o ia po o lona atalii na māfua ai. (1 Samuelu 14:40-42) Mulimuli ane ina ua lē toe maua e Saulo le finagalo malie o le Atua, e leʻi toe taʻitaʻia o ia e le Atua e ala “i se miti, po o le Urima, po o se perofeta.”—1 Samuelu 28:6.

E tusa ai ma le tū faa-Iutaia, na muta le toe faaaogāina o le Urima ma le Tumena ina ua faaumatia le malumalu a Ieova i le 607 T.L.M.

[Ata i le itulau 27]

“Amene,” Faaaliga 3:14. o le manusikulipi Alesania, i le senituri lona 5 T.A.