Saʻili mo se Fautuaga Aogā

PE AFAI o loo e saʻili mo ni fautuaga, e tele fautuaga o loo maua. Ua avea ma pisinisi e sili ona alumia le faia o tusi ma vitiō e fesoasoani ai i faafitauli o le tagata lava ia. I atunuu e eseese ai tū ma aganuu e pei o Peretania, Amerika Latina, Iapani, ma le Iunaite Setete, ua sili ona alumia tusi e fesoasoani ai i tulaga manaʻomia o le tagata. O vitiō, seminā, ma polokalame i le televise lea o loo patino i le auala e fesoasoani ai i tulaga manaʻomia o le tagata lava ia, ua faasolosolo ina taatele. Ua tosina atu tagata i nei tulaga, ona ua faapea, e mafai ai ona e fofō lava e oe ou faafitauli e aunoa ma lou vaaia o se fomaʻi o le mafaufau, o se faufautua mo faaipoipoga, po o se faifeʻau. O ā mataupu e aafia i na taʻiala?

O lou taulau manuia, le iai o se faaipoipoga fiafia, ma le tausia aʻe o le fanau, o mataupu aupito i alumia nei. E taatele foʻi mataupu i le auala e fesagaʻia ai le lē fiafia, faavauvau, ma āuga o tatalaga faaipoipoga. O loo telē se manaʻoga mo ni fautuaga e tuu ai le ʻai tele, ulaula tapaa, ma le inu tele. Pe e aogā na fautuaga? O nisi taimi e aogā, ae o nisi taimi e lē aogā. O lea la, o se tulaga atamai le utagia o le lapataʻiga a le Tusi Paia: “O lē ua faigofie, e talia e ia upu uma; a o lē ua mafaufau, ua faautauta o ia i lona ala.”—Faataoto 14:15.

E telē le eseesega o tusi taʻiala mo le faaleleia o le tulaga o se tasi, ma tusi e mafai ai e le tagata ona aʻoaʻoina le tomai e pei o le puʻe ata, suʻe tusi, po o se gagana. O na tusi o faatonuga e aogā ma e taugofie, ma o se isi na auala tatou te aʻoaʻoina ai se matātā e aunoa ma le faia o ni vasega faapitoa. Ae ua ese ai la tusi e fesoasoani i le tagata lava ia, e tusa pe faatatau i faiga faapisinisi, faaipoipoga, le avea ma mātua, po o faafitauli tau le mafaufau. E masani lava ona fautua mai se auala e ola ai, po o le tuuina mai o se ituaiga filosofia patino. E tāua la ona fesili ifo e faapea: O ai e ana na fautuaga? O fea e maua mai ai na faamatalaga?

E ono lē faavaea mai e tagata atamamai o latou manatu mai faamatalaga ua faamaonia. E ono tuuina mai e nisi fautuaga e fiafia i ai  tagata, auā ua latou iloa, e tele le tupe e mafai ona maua pe afai e taʻu i tagata mea o loo fia faalogo i ai. O le mea moni, i se tasi atunuu, e sili atu i le valu piliona tālā tupe e maua i tausaga taʻitasi e pisinisi e faia tusi ma vitiō e fesoasoani i tulaga manaʻomia o se tagata!

O le ā le Aogā o Nei Taʻiala?

Pe a e faaaogāina tusi e fesoasoani iā te oe lava, e te faatalitalia le mauaina o fautuaga aogā. O nisi taimi, e lē lava aogā ma le loloto o faamatalaga e te maua ai. E masani lava ona faapea mai na tusi: ‘Pe a saʻo lau vaai, o le a e manumalo mai ou faafitauli. Po o le ā lava le mea e te manaʻo i ai, tupe, soifua mālōlōina, po o se faiā e faafiafiaina ai, o le a e mauaina pe a saʻo lau vaaiga.’ Pe e aogā na ituaiga o fautuaga? Po o le a fesoasoani iā te oe e te feagai ai ma le mea moni ma tulaga lē fiafia o le olaga?

O se faataʻitaʻiga, o tusi e faatatau i faigāuō ma faaipoipoga, lea e taatele ma fiafia i ai tagata. Pe e fesoasoani i tagata e maua ai se aiga e mautū ma fiafia? E lē o taimi uma. E tusa ma se tagata e iloiloina nei tusi, o le tusitala o tusi e fesoasoani i se tagata e tusa ai ma le alofa, na vave ona alumia i Amerika Latina, ma e “aʻoaʻoina ai tagata faitau i le auala e maua ai se mafutaga lelei ma le mautinoa iā te oe lava.” O loo faapea mai le tusitala i lenā tusi, e tusa ua e faavaleaina oe lava pe afai e faaauau ona e iai i se faaipoipoga e tele faafitauli. O le feʻau autū o loo iai, e tāua le faia o le mea e lagona e le tagata e fiafia i ai, nai lo le iloilo o faafitauli o le tagata lava ia, ma taumafai e fofō.

O nisi taimi, e iai fautuaga lelei i tusi e fesoasoani ai i tulaga manaʻomia o se tagata. Peitaʻi, e maua ai foʻi ma fautuaga lē lelei. O nisi taimi, e tuuina mai e se tagata atamai se fautuaga aogā i se mataupu, a o lana fautuaga i se isi mataupu, atonu e atili ai ona faalētonu. E lē mafai ona iloiloina manatu e tele, ma o nisi taimi e feteenaʻi ai taʻiala e latou te tuuina mai. O le fautuaga a ai e mafai ona e talitonuina? Ia fesili ifo iā te oe lava: ‘Po o ua uma ona iloilo lelei e le tusitala na faamatalaga, po o manatu taʻetaʻealuga na o le tusitala? O le ā le tele ua aafia ai le faamaoni o le tusitala ona o lona manaʻo i tupe ma ia lauiloa ai?’

O se tusi taʻiala ua autausagā o maufaatuatuaina pea, o le Tusi Paia. E tele fautuaga aogā i mataupu eseese e aafia i tusi e fesoasoani ai i tagata, ma isi mataupu e lē o maua i na tusi. Ua uunaʻia le toʻatele i lenei fautuaga: “Ia faafouina le malosi lea e pulea ai o outou mafaufau . . . Ia oofu i le tagata fou.” (Efeso 4:23, 24) E tatou te maua mai le Tusi Paia le utaga poto e tatou te iloa ai le pogai o o tatou faafitauli, ma ua aʻoaʻoina ai i tatou i le auala e fesagaʻia ai. Ae sili ona tāua, e matuā uunaʻia ai i tatou e faia le mea saʻo. O le a faamatala mai e le mataupu o loo sosoo mai lenā tulaga.