Atamu ma Eva—Po o i La‘ua o ni Tagata Moni?
Atamu ma Eva—Po o i Laʻua o ni Tagata Moni?
I LE toʻatele o tagata, o le tala i le Kenese e uiga iā Atamu ma Eva, ua na o se tala manaia. Ua taʻua i se tusi i le faatonu o le mekasini o le Time e faapea, “Ua loa ona manatu tagata i lotu autū o loo faapea mai o Kerisiano e uiga i tala i le Kenese, e pei o le tala iā Atamu ma Eva, o ni tala faafagogo.” E ioe i ai le toʻatele o tagata atamamai o le lotu Katoliko, Porotesano, ma Iutaia. Ua latou faapea mai, o le tele o tala i le Kenese, e lē ōgatusa ma le talafaasolopito po o le faasaienisi.
O le ā sou manatu? Pe e te talitonu o Atamu ma Eva o ni tagata moni lava? Pe e iai se faamaoniga e iloa ai na ola moni lava i laʻua? I le isi itu, o ā ni māfuaaga o lo latou faapea mai, o tala i le Kenese ua na o ni tala faafagogo?
Pe e Talitonuina e le Faasaienisi le Tusi o Kenese?
Muamua, seʻi o tatou iloiloina ni manatu autū o le tala i le foafoaina o le uluaʻi tagata. Ua taʻua i le Tusi Paia e faatatau iā Atamu e faapea: ‘Na faia e Ieova le Atua o le tagata i le efuefu o le eleele, ma ua mānava i ona pogaʻiisu o le mānava ola; ona avea ai lea o le tagata ma tagata ola.’ (Kenese 2:7) Pe e ōgatusa lenei faamatalaga ma le faasaienisi?
Ua taʻua i le tusi, Nanomedicine e faapea, ua faia aʻe le tino o le tagata i elemeni e 41. O nei elemeni autū—o le kaponi, uʻamea, okesene, ma isi mea—o loo iai uma na mea i le “efuefu” o le eleele. O lea la, e pei ona taʻua i le Kenese, na faia le tagata mai i le “efuefu o le eleele.”
E faapefea ona tuufaatasia na elemeni e leai ni ola, ma faia aʻe ai se tagata ola? Ina ia malamalama i le faigatā tele o lenei tulaga, ia manatu i le vaa o le vateatea a Amerika, o se tasi o masini e sili ona lavelave ua faia. O lenei fausaga ofoofogia faaonapōnei, o loo iai le anoanoaʻi o vaega e 2.5 miliona. E tele tausaga na taumafai ai le toʻatele o le ʻau inisinia e fai. Seʻi manatu nei la i le tino o le tagata. O loo faia aʻe i le lē mafaitaulia o atoma, 100 tiliona o sela, le tele o totoga, ma totoga autū a itiiti mai e 9. Na faapefea ona iai lenei tino lavelave e lē mafai ona tāea e le mafaufau? Pe na teʻi lava ua iai, pe e iai Sē e atamai na ia faia?
E lē gata i lea, ua faapefea ona ola le tagata? O fea e puna mai ai le ola? Ua taʻutino mai e saienitisi e latou te lē iloa. O le mea moni, e latou te lē ioe foʻi i le faamatalaina o le pogai o le ola. Ae o i latou e talitonu e iai Sē na foafoaina mea, e manino lava le faaiʻuga. O le Atua o le Puna o le ola. *
Ae faapefea le faamatalaga a le Kenese e faapea, na faia Eva mai i le ivi asoaso o Atamu? (Kenese 2:21-23) A o leʻi manatu i le tala o se tala faafagogo po o se tala fatu, seʻi manatu mai i mea nei: Iā Ianuari 2008, na faia ai e saienitisi i Kalifonia, i Amerika, uluaʻi sela e faia aʻe ai se tagata mai i sela o paʻu o tagata matutua. O le auala foʻi lea e tasi na faaaogā e saienitisi e faia aʻe ai ni manu a itiiti mai e 20. O le faiga aupito sili ona taʻutaʻua o nei mea, o le mamoe o Dolly, lea na faia i le 1996 mai i le fatupuipui o le susu o se mamoe matua. *
E tatou te lē o iloa le iʻuga o nei suʻesuʻega. Ae o le manatu lenei: Pe afai e mafai e tagata ona faaaogā mea mai i le tino o le isi tagata e maua ai se isi ituaiga faapena, pe e lē mafai ea la e Lē e ona le malosi uma lava, ona faia le tagata mai i mea o loo iai i le tino o le isi tagata? E fiafia lava, ona e masani ona faaaogā e fomaʻi tipitipi le ivi asoaso e toe faia ai taotoga o ponaivi, ona e mafai ona toe tupu ma suia ia lava.
Faamaoniga i le Tusi Paia Lava Ia
Ua faateʻia nisi tagata i le iloa, e taʻua pea lava Atamu ma Eva i le Tusi Paia atoa. Ua faapefea ona faamaonia i nei faamatalaga le saʻo o le tala faasolopito i le Kenese?
O se faataʻitaʻiga, seʻi manatu i lisi o augātamā Iutaia o loo faamauina i le Tusi Paia, i le Muamua Nofoaiga a Tupu mataupu 1 e oo i le 9, ma le Evagelia a Luka mataupu e 3. O loo taʻua i nei tusi faamaumauga o gafa, aemaise lava tupulaga e 48 ma le 75. O loo taʻua e Luka le gafa o Iesu Keriso, ae o loo faamauina i Nofoaiga a Tupu gafa o tupu ma ositaulaga o le nuu o Isaraelu. O loo aofia ai i nei lisi igoa o tagata lauiloa e pei o Solomona, Tavita, Iakopo, Isaako, Aperaamo, Noa, seʻia oo lava iā Atamu. O igoa uma o loo i nei lisi e lua, o tagata moni, ma o Atamu o le tagata moni muamua lea o loo i nei lisi taʻitasi.
E lē gata i lea, ua taʻua pea lava pea i le Tusi Paia Atamu ma Eva o ni tagata moni, ae e lē o ni tagata o tala faafagogo. O nisi nei o faaaʻoaʻoga:
• “Na . . . faia foʻi [e le Atua] nuu uma mai le tagata e toʻatasi.”—GALUEGA 17:26.
• ‘Ua oo mai le agasala i le lalolagi ona o le tagata e toʻatasi, o le oti foʻi ona o le agasala, ua pule foʻi le oti e pei o se tupu mai iā Atamu e oo iā Mose.’—ROMA 5:12, 14.
• “Na avea le tagata muamua o Atamu, ma tagata ola.”—1 KORINITO 15:45.
• “Na muamua ona faia o Atamu, ona faia ai lea o Eva.”—1 TIMOTEO 2:13.
• “Na valoia mai e Enoka, o lona fitu o augātamā mai iā Atamu, e uiga [i ē amioleaga].”—IUTA 14.
O le mea e sili ona tāua, na faailoa mai e Iesu Keriso, o le molimau sili i le Tusi Paia, le iai o Atamu ma Eva. Ina ua fesiligia e uiga i le tatalaina o faaipoipoga, na tali atu Iesu e faapea: “Talu mai le foafoaga, ‘Na ia [le Atua] faia i laʻua o le tane ma le fafine. O le māfuaaga lea e tuua ai e le tane lona tamā ma lona tinā, ona avea ai lea o i laʻua ma tino e tasi’ . . . O lea la, o ē ua faatasia e le Atua, aua neʻi tuueseeseina e se tagata.” (Mareko 10:6-9) Po o le a faaaogā e Iesu se tala e lē moni e faavae ai se faatulagaga faaletulafono i faaipoipoga? E leai! Na sii mai e Iesu le tusi o Kenese o se tala moni.
I le aoteleina o faamaoniga faale-Tusi Paia, na faaiʻu mai faapea le tusi, The New Bible Dictionary: “Ua faamaonia e le Feagaiga Fou le moni o faamatalaga o le talafaasolopito, o loo i uluaʻi mataupu o le Kenese.”
A Lē Moni Atamu ma Eva —E Lē Moni Foʻi Isi Aʻoaʻoga
E manatu le toʻatele o tagata e fiafia i lotu, e lē tāua ona talitonu iā Atamu ma Eva ina ia avea ai ma Kerisiano lelei. E ono foliga mai e moni lenei manatu. Ae seʻi o tatou tilofaʻia manatu o loo mulimuli mai po o fea e iʻu i ai.
O se faaaʻoaʻoga, seʻi manatu i se aʻoaʻoga a le Tusi Paia e pele i loto o le toʻatele o tagata lotu—le togiola. E tusa ai ma lenei aʻoaʻoga, na foaʻi mai e Iesu Keriso lona soifua lelei atoatoa, e fai ma togiola e laveaʻi ai tagata mai i a latou agasala. (Mataio 20:28; Ioane 3:16) E pei ona tatou iloa, o le togiola o se tau talafeagai e toe faatau mai ai se mea na leiloa pe na lafoaʻiina. O le pogai lenā ua faamatala ai e le Tusi Paia Iesu o se “togiola e fetaui lelei.” (1 Timoteo 2:6) E tatou te ono fesili, e fetaui lelei i le ā? Ua tali mai le Tusi Paia e faapea: “E pei ona oti uma lava iā Atamu, e faapena foʻi ona toe faaolaina uma lava e ala i le Keriso.” (1 Korinito 15:22) O le ola lelei atoatoa na faataulaga e Iesu e togiola ai tagata usiusitaʻi, e fetaui lelei ma le ola lelei atoatoa na leiloa iā Atamu ona o le uluaʻi agasala i Etena. (Roma 5:12) E manino mai, afai e leʻi iai se Atamu, e matuā lē aogā foʻi la le taulaga togiola a Keriso.
O le teena o le tāua o le tala i le Kenese e faatatau iā Atamu ma Eva, ua aafia ai foʻi le moni o le toetoe lava o aʻoaʻoga autū uma i le Tusi Paia! * O na ituaiga o mafaufauga e iʻu ai i le tele o fesili ua lē mafai ona tali, ma se faatuatua e leai se faavae.—Eperu 11:1.
E Aogā pe e Iʻuvale le Olaga?
Ua tatou oo mai nei i le fesili tāua lenei: Po o le teena o le tala i le Kenese, e faamalieina ai le manaʻoga o le tagata mo se fuafuaga aogā i le olaga? I le manatu o Richard Dawkins, o se tagata e taulamua i le talitonuga o le evolusione, ma e lē talitonu e iai se Atua, e faapea o le vateatea e “leʻi faatulagaina lelei, e leai se fuafuaga, e leai se leaga po o se lelei, e leai lava se mea, e leai se naunau moni, ma e leai se alofa.” Pagā se vaaiga e matuā faalotovaivai ai, lea e matuā ese lava mai i le natura o le tagata!
I le matuā ese lava mai le manatu o Dawkins, ua aumaia i le Tusi Paia tali faamalieloto i fesili e sili ona tāua i le olaga: O fea e tatou te tupuga mai ai? O le ā le fuafuaga o le olaga? Aiseā ua matuā tele ai le leaga ma mafatiaga i le lalolagi? Po o le a faaiʻuina ea le amioleaga? Ma isi lava fesili. E lē gata i lea, o le faatuatua i le togiola a Keriso, ua maua ai le faamoemoe o le ola e faavavau i le Parataiso, e pei o tulaga na iai i Etena, lea na tuu ai e le Atua uluaʻi tagata o Atamu ma Eva. (Salamo 37:29; Faaaliga 21:3-5) Maʻeu se faamoemoe matagofie! *
E lē ioe le tala iā Atamu ma Eva i le aʻoaʻoga o le evolusione, ae e fetaui lelei ma mea ua iloa e le faasaienisi. E lē gata i lea, ua ōgatusa lelei ma le Afioga faagaeeina a le Atua, le Tusi Paia, lea o loo aumaia ai se fuafuaga e aogā ma faamalieina ai i le olaga.
Aiseā la e te lē suʻesuʻe atili ai i le Tusi Paia? Ua nofo sauni ma lotomalilie Molimau a Ieova e fesoasoani atu iā te oe.
[Faaopoopoga i lalo]
^ pala. 8 Mo nisi faamatalaga, tagaʻi i le tusi, Is There a Creator Who Cares About You? ma le Life—How Did It Get Here? By Evolution or by Creation? lomia e Molimau a Ieova.
^ pala. 9 O le mea moni, e lē o faia e nei saienitisi le ola. Nai lo o lea, ua latou faaaogā mea mai i sela o loo iai le ola.
^ pala. 25 E aofia ai aʻoaʻoga e faatatau i le pule silisili ese a le Atua, le faamaoni o tagata, le lelei ma le leaga, filifiliga saʻoloto, le tulaga o ē ua maliliu, o faaipoipoga, le Mesia folafolaina, se lalolagi parataiso, le Malo o le Atua, ma le tele o isi aʻoaʻoga.
^ pala. 28 Mo nisi faamatalaga, tagaʻi i le tusi O ā Aʻoaʻoga Moni a le Tusi Paia? mataupu e 3, “O le ā le Finagalo o le Atua mo le Lalolagi?,” ma le mataupu e 5, “O le Togiola o le Meaalofa Sili Lea a le Atua,” lomia e Molimau a Ieova.
[Faamatalaga faaopoopo i le itulau 14]
E manino mai, afai e leʻi iai se Atamu, e matuā lē aogā foʻi la le taulaga togiola a Keriso
[Ata i le itulau 13]
E pei ona faia ma le faaeteete le vaa o le vateatea, ua faapea foʻi le tino o le tagata
[Ata i le itulau 15]
Ua faailoa mai e Iesu le iai o Atamu ma Eva