Faauuga o le Vasega Lona 126 a Kiliata

Le Auala e Taulau ai o ni Misionare

NA FEILOAʻI fiafia se vaega e toʻatele i le Nofoaga mo Aʻoaʻoga a le Olomatamata i Patterson i Niu Ioka, mo se aso faapitoa i le Aso Toonaʻi, Mati 14, 2009. O le aso lea e faauu ai le vasega lona 126 o le Aʻoga Faale-Tusi Paia a le Olomatamata o Kiliata. E 22 atunuu o le a auina atu i ai le ʻaufaauu e talaʻi ai le tala lelei o le Malo o le Atua.—Mataio 24:14.

Ua māeʻa nei le latou aʻoga mo le lima masina e iloilo ai le Tusi Paia ina ia latou taulau o ni misionare. Ae ua avea lo latou faauuga ma avanoa mulimuli e faalogologo ai i fautuaga poto i le auala e taulau ai.

Na taʻua e Anthony Morris, o se sui o le Vaega Pule ma o le taʻitaʻifono o le polokalame e faapea, o le 1943 na amata ai ona aʻoaʻoina misionare i Kiliata. Talu mai lenā taimi, ua tele galuega lelei ua faia e le ʻaufaauu i le talaʻia o le tala lelei i le lalolagi aoao.

E ui ina vaai maulalo tusiupu ma Faresaio i aposetolo a Iesu e faapea e ‘leʻi lava so latou aʻoaʻoina,’ ae na taʻua e le failauga, e leʻi mafai e nei tagata ona latou faafitia le mea moni na māfua ona lototetele le ʻau aposetolo ona sa latou faatasi ma Iesu. (Galuega 4:13) Ua aogā aʻoaʻoga i le ʻauaʻoʻoga ina ia lototetele ai.

Na talanoaina e se uso e fesoasoani i le Komiti o Tusitusiga o le Vaega Pule, o Robert Ciranko, le matua, “Aua Le Faailoga Foliga.” Na ia faamanatu atu i le ʻaufaauu ua lē o toe umi ona latou feiloaʻi lea ma tagata e eseese tū ma aganuu. Ae o le a lē faigatā ona talaʻi i ai pe afai e iā i latou le silafaga a Ieova. E tusa ai ma le faaliliuga tuusaʻo o le Galuega 10:34: “E lē faailoga foliga le Atua,” pe e sili ona fiafia le Atua i isi foliga na i lo isi. “E lē faailoga tagata le Atua.” (Galuega 10:35) Na faapea mai le uso o Ciranko, “Afai e te manatu e pei o le Atua e faapea, e i tagata uma le avanoa e talia ai i latou e le Atua, o le a outou taulau e avea o ni ana misionare.”

“Ua Outou Lava Tapena”

Na faapea mai se sui o le Vaega Pule o Samuel Herd, “E manatu nisi e auleaga le kamela, peitaʻi, e aogā tele lea manu i le toafa.” E faapena foʻi misionare fou, ua lava tapena mo oganuu ua tofia i ai. E lima vala o le a aogā iā i latou.

1. Alofa iā Ieova. (Mataio 22:37, 38) Ua faaalia mai e le ʻaufaauu lo latou finafinau e auauna iā Ieova.

2. O lo latou poto ua iai i le Afioga a le Atua. E faaputu e le kamela ana meaʻai i le patu o lona tua. Ae e lē faapea ai e lē toe ʻai ona ua lava na mea e ola ai. O lea, e lē tatau i misionare ona faalagolago i le poto na maua a o aʻoʻoga i Kiliata ae ia faaauau pea ona taumamafa faaleagaga.

3. Alofa i tagata. (Mataio 22:39) E iai i le ʻaufaauu le agaalofa ma le tigā alofa mo tagata.

4. O le agaga tauofo. (Salamo 110:3) E iai taimi e vaivai ai le misionare, ae o Ieova e faamalosia o ia.—Isaia 40:29.

5. Le malosi e pei o le talavou. E pei ona tauave e se kamela se tagata i le toafa, atonu  e ono manaʻomia ona tauave e se misionare se uso Kerisiano ua vaivai faaleagaga. E manaʻomia ai le malosi, ae ua malolosi misionare e pei o talavou.

Isi Vala o le Polokalame

Na taʻua e se faiaʻoga Kiliata o Michael Burnett e faapea, na auina atu e Iakopo fua o le sekati i meaalofa aupito lelei na avatu i se pule Aikupito. (Kenese 43:11) E ui o ni fua e lāiti ae e tele aogā e maua ai. O mea na aʻoaʻoina e le ʻaufaauu i le aʻoga ua pei o ni sekati faaleagaga. O nisi o lesona e ao ona manatua pea e misionare i o latou tofiga, o le tāua o le lotomalie i sauniuniga a Ieova, ma ia fiafia i le latou oganuu fou.

Na faapea mai se faiaʻoga o Kiliata, o Mark Noumair, ua pei le Afioga a le Atua o “se ato ua tumu i le atamai.” (Iopu 28:18 NW ) Ia tatala le ato ma faaaogā mea o iai. Afai e lē o taunuu mea na latou faatalitalia i le auaunaga faamisionare, ia manatua le aposetolo o Paulo. Na auina o ia e soo o Iesu i lona nuu mo tausaga e iva. E leʻi manatu Paulo o ia ‘o le ipu ua filifilia,’ ma e tatau ona auina atu e galue i se isi mea, ae na galue malosi i so o se tofiga na iai. (Galuega 9:15, 28-30) Atonu o se luʻitau lo tatou taliaina o o tatou tofiga mai iā Ieova. O sē na faia faapea o Ionatana. Na fiafia o ia e lagolagoina Tavita ona o ia o le tupu tofia a Ieova.

I le vaega ua faamatuaina, “E Tautatala Atu Auauna a le Atua ma le Lototetele,” na toe faataʻitaʻi ai e le ʻaufaauu mea na tutupu a o auai i le talaʻiga i le taimi o le aʻoga. E toʻatele i latou na amata ni suʻesuʻega faale-Tusi Paia. O le vaega na sosoo ai, “Ua Saunia e le Faalapotopotoga a Ieova,” sa faatalanoa ai misionare e toʻatolu ua leva i le galuega. Na latou faamatala le aʻoaʻoina o i latou ia galulue faatasi ma le faalapotopotoga a le Atua.

“Ia Avea ma Misionare Fiafia”

Ona sosoo lea ma le vaega autū o le aso, “Ia Avea ma Misionare Fiafia” na faia e Gerrit Lösch, o se sui o le Vaega Pule. Na ia taʻua e faapea, o le tele o mea e manatu tagata e “mālie,” e lē maua ai se fiafiaga moni. (Faataoto 14:13; Failauga 2:10, 11) Ae e maua pe a fai le finagalo o le Atua, ae e lē o taimi uma e faigofie ai ona fai. Sa leʻi faigofie le aʻoga i Kiliata, ae ua matuā faamalieina ai.

O nisi nei o mea e maua ai e Kerisiano moni le fiafia. Ua latou tapuaʻi i le Atua fiafia. (Salamo 33:12; 1 Timoteo 1:11) Ua latou iai i le parataiso faaleagaga, ma ua folafola mai i le Tusi Paia ua toeitiiti ona avea lea o le lalolagi ma parataiso. Ua iai se fuafuaga i o latou olaga, o le auauna lea ma vivii iā Ieova, ma e alolofa Ieova ma Iesu iā i latou.

Na faapea atu le failauga, “E avea oe ma misionare fiafia pe a e maua le lotomalie.” O se isi vala e maua ai le fiafia, o le alofa lea i isi ma ia alofagia oe e isi. O lea, aua le amanaʻia masei o isi. Ia fai mea lelei mo isi, fesoasoani i ē vaivai, ma aufaatasi ma isi e fai mea lelei. (Salamo 41:1, 2; Galuega 20:35) E maua le  fiafia i le galue malosi i le talaʻiga.—Luka 11:28.

O upu faaiʻu a le uso o Lösch, “Ia avea outou ma misionare fiafia, e fiafia i sina faafiafiaga, ae e uaʻi atu i le viia o lo tatou Atua fiafia o Ieova, ma faafiafiaina ai le tele o tagata.”

Na tufa atu e Anthony Morris tusi o le ʻaufaauu ina ua māeʻa ona faailoa atu alofaaga mai uso i isi atunuu. Ona faitau lea e se sui o le vasega lona 126 se tusi i le Vaega Pule o Molimau a Ieova, e faaalia ai lo latou talisapaia o le avanoa e aʻoʻoga ai i Kiliata.

Na faapea mai le taʻitaʻifono i ana upu faaiʻu, o fuafuaga ua faaaogā e le “pologa faamaoni ma le faautauta” e faamalosia ma taʻitaʻia ai tagata o Ieova, ua pei o “sooga ma uaua” e soo faatasi ai le tino. (Kolose 2:18, 19; Mataio 24:45) Pe afai e galulue faatasi ma sui ua tofia e le Atua, e lē taitai ona ‘aveesea mai iā i latou le taui’ ae o le a matuā taulau i o latou tofiga.—2 Timoteo 4:5.

[Pusa i le itulau 30]

FAAMAUMAUGA O LE VASEGA

Aofaʻi o atunuu o loo iai o latou sui: 6

Aofaʻi o atunuu ua tofia i ai: 22 Aofaʻi o le ʻauaʻoʻoga: 56

Aofaʻi o ulugalii: 28

Faatatauga o tausaga: 32.8 Faatatauga o tausaga i le upu moni: 17.9

Faatatauga o tausaga i le faiva faataimi atoa: 13.5

NUU UA TOFIA I AI

Ua tofia le ʻaufaauu i Aferika i Saute, Benin, Bulgaria, Burkina Faso, Cameroon, Costa Rica, Ghana, Guatemala, Honduras, Kenya, Liberia, Madagascar, Mozambique, Nicaragua, Panama, Paraguay, Peru, Polivia, Romania, Sierra Leone, Togo, ma Uganda.

[Ata i le itulau 31]

Vasega Faauu Lona 126 o le Aʻoga Faale-Tusi Paia a le Olomatamata o Kiliata

E faanumera laina mai i luma ma faasolo i tua, ma o suafa e lisi mai i le agavale e agaʻi i le taumatau.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.