Talitonuga 1: E Ola Pea le Tagata pe a Oti

O fea e tupuga mai ai lea aʻoaʻoga?

“Na talia e uluaʻi faifilosofia Kerisiano le talitonuga Eleni, e ola pea le tagata pe a oti, ma e faapea na faia e le Atua le agaga ma tuu i le tino o le tagata i le taimi na afuafua ai.”—The New Encyclopædia Britannica (1988), Tusi 11, itulau 25.

O le ā le tala a le Tusi Paia?

“O le tagata e agasala e oti ia.”—Esekielu 18:4.

Ua taʻua i le Tusi Paia ina ua faia le uluaʻi tagata: “Ona faia lea e Ieova le Atua o le tagata i le efuefu o le eleele, ma ua mānava i ona pogaʻiisu o le mānava ola; ona avea ai lea o le tagata ma tagata ola [Eperu, neʹphesh].”—Kenese 2:7.

O le upu Eperu neʹphesh, ua faaliliuina o le “tagata,” o lona uiga ‘o se meafaiola e mānava.’ Ina ua faia e le Atua le uluaʻi tagata o Atamu, e na te leʻi tuuina i ai se agaga e lē oti, ae o le malosi o le ola e tumau pea e ala i le mānava. O lea la, i le Tusi Paia, ua faasino lea upu i le “tagata ola”. Pe a lē toe iai le malosi o le ola lea na tuu i ai e le Atua i le amataga, ona oti ai lea o le tagata.—Kenese 3:19; Esekielu 18:20.

O le aʻoaʻoga o le ola pea o le tagata pe a oti, ua lāgā ai le fesili e faapea: O le ā e tupu i le agaga pe a oti? Ae ā le agaga o le tagata amioleaga? Ina ua talia e i latou e taʻua o Kerisiano le aʻoaʻoga i le ola pea o le tagata pe a oti, na iʻu ai foʻi ina latou talia se isi aʻoaʻoga—o le aʻoaʻoga o le afi i seoli.

Faatusatusa mau nei: Failauga 3:19; Mataio 10:28; Galuega 3:23

LE AʻOAʻOGA MONI:

Pe a oti le tagata, e lē o ola i se isi mea