E Mafai e le Tusi Paia Ona Suia Olaga

O Ā NI gaoioiga patino na faia e se tasi na auai muamua i se kegi, ma puleaina e mariuana ina ia tuu na masaniga leaga? Aiseā na ʻoti ai le lauulu uumi o se tagata o se fāʻili malomaloā, ma sui lona manatu i musika na matuā fiafia i ai? O le ā na uunaʻia ai se tamāloa na tetee i lotu ma pulega a le malo ina ia avea ma se faifeʻau? Seʻi manatu i faamatalaga a nei tagata.

“Na tuu laʻu masaniga leaga.”—PETER KAUSANGA

TAUSAGA: 32

ATUNUU: NAMIBIA

TALAAGA: O SE TAGATA O SE KEGI NA PULEA E MARIUANA

O LOʻU OLAGA SA IAI: Na ou ola aʻe i Kehemu, o se tasi o nofoaga tetele e fā na nonofo ai tagata o le aai o Rundu. O le auala e maua ai tupe a tagata o lo latou faatauina atu lea o tokana, fafie, ma malala.

Na maliu loʻu tinā ina ua faatoʻā lua oʻu tausaga, ma na tausia aʻu e le tinā o loʻu tinā. E leʻi tele ni a matou tupe. O aʻu o se tamaitiiti lelei, ae ona o le leaga o aʻu uō, na ou oo ai i faafitauli. Na ou auai i se kegi a o oʻu aʻoga. O le iʻuga, na avea aʻu ma se tagata fia fusu, fia malosi, gaoi, aumai faananā taimane, ma na pulea aʻu e le ʻava malosi ma fualaau faasāina. E faalua ona maua aʻu ma faafalepuipui i le talepe fale ma le taufaasesē.

Na uma laʻu aʻoga i le vasega e 10, ma ou alu ese ai mai i loʻu nuu ma le kegi. Na ou manaʻo e sui loʻu olaga. Ae na faaauau pea ona pulea aʻu e mariuana. O nisi taimi, e mamao se mea ou te savali ai ina ia maua saʻu mariuana e ula.

LE AUALA NA SUIA AI E LE TUSI PAIA LOʻU OLAGA: I le amataga o le 1999, na ou feiloaʻi ai ma nisi o Molimau a Ieova o loo tufa a latou lomiga i tagata o loo savavali i le auala. Na matuā pāʻia loʻu loto ona o le faaaloalo o le auala na latou talanoa mai ai iā te aʻu. O le feʻau na iai i lomiga, na ou talitonu ai ua ou maua le lotu moni. Na amata loa ona ou toʻaga e suʻesuʻe le Tusi Paia, ma ou iloa ai e tatau ona sui loʻu olaga pe a ou manaʻo e faafiafia Ieova le Atua.

Na ou faatulaga le aso e tuu ai laʻu ulaula, ona ou faatamaʻia lea o so o se mea na iā te aʻu e fesootaʻi i le ulaula. Na ou faailoa atu  foʻi i aʻu uō e aua neʻi toe aumai se tapaa iā te aʻu, pe ulaula i oʻu tafatafa. Peitaʻi, na iai taimi na ou lē taulau ai. E faalua ona ou lolo atu i loʻu tuʻinanauga mo se sikareti ma mariuana. E ui i lea, ou te leʻi faavaivai ai. Na ou manatua pea le taʻiala o loo i le Faataoto 24:16: “E faafitu ona paʻū o lē e amiotonu ma o le a toe tulaʻi o ia.” Mulimuli ane, na mafai ona tuu laʻu masaniga leaga.

O le tele o mea na ou aʻoaʻoina e uiga iā Ieova, o le tele foʻi lenā o loʻu fia mafuta vavalalata iā te ia. O se tasi o mau na pāʻia ai loʻu loto, o le Salamo 27:10: “E tusa pe tuua aʻu e loʻu lava tamā ma loʻu lava tinā, ae e talia lava aʻu e Ieova.” Na ou iloa le moni o na upu a o faaauau aʻu saʻiliʻiliga loloto o le Tusi Paia. Na avea moni Ieova ma Tamā e alofa iā te aʻu.

Na lē aunoa foʻi ona ou faatasitasi ma Molimau a Ieova. Na ou vaai ai i le māfana o a latou aufaatasiga, atoa foʻi ma lo latou fealofani. Ou te leʻi tofo muamua i nei lagona.

LE AUALA NA AOGĀ AI IĀ TE AʻU: Ona o le fesoasoani a Ieova ma oʻu uso Molimau, na mafai ai ona faaleleia le auala e fai ai aʻu teuga, laʻei, amio ma le tautala. Pe a ou toe mafaufau i tua, ou te iloa ua sui loʻu olaga e pei ona suia o se katepila matagā e avea ma pepe matagofie. Ua faafetai loʻu aiga i lenā suiga, ma ua latou faatuatuaina ai aʻu. Ua ou faaipoipo nei, ma o loo oʻu taumafai e avea aʻu ma tane e alofa i laʻu avā ma le fanau.

“Ua iai se fuafuaga o le olaga.”—MARCOS PAULO DE SOUSA

TAUSAGA: 29

ATUNUU: PASILI

TALAAGA: NA AUAI I SE FĀʻILI MALOMALOĀ

O LOʻU OLAGA SA IAI: Na nonofo loʻu aiga i le aai o Jaguariuna i São Paulo. Na matuā malolosi oʻu mātua i le lotu Katoliko, ma na avea aʻu ma tama tali Misasā a o oʻu laʻitiiti. O le iʻuga, na ula mai tamaiti o laʻu vasega i le aʻoga tulaga lua, ma latou faaigoa aʻu o Tamā. Ae ina ua 15 oʻu tausaga, na ou iloa ai musika malomaloā. Na amata ona ou faifaimea ma tagata e usuina na ituaiga pese. Na faauumi foʻi loʻu lauulu. Na fesoasoani loʻu tamā e faatau laʻu seti tagipalau muamua i le 1996.

I le 1998, na ou auai ai i se fāʻili e tāina pese malomaloā soonafai. O musika na matou tāina e faatemoni ma matagā. Na viiviia ai faiga sauā. Na aafia ai oʻu mafaufauga, amioga ma oʻu uiga faaalia. Na faasolosolo ina avea aʻu ma se tagata faitio ma lotoa.

LE AUALA NA SUIA AI E LE TUSI PAIA LOʻU OLAGA: O le taimi muamua na ou feiloaʻi ai ma Molimau a Ieova, o le 1999. Na latou ofo mai le faia o ni lesona faale-Tusi Paia ma aʻu, ma na ou taliaina e ui lava ou te leʻi matuā naunau i ai. Peitaʻi, o mea na ou aʻoaʻoina mai i le Tusi Paia, na suia ai laʻu vaai i le olaga.

Na taʻu aʻu e tagata o se “alii ulu uumi,” “o  le tama pese,” po o le “tama tā tagipalau.” Ae na ou iloa ua avea ai aʻu o se tagata manatu faapito ma faatavā ona o le tātā i le fāʻili, ma ua mou atu loʻu fiafia i le olaga. Na ou iloa ai e matuā leai lava se fuafuaga o olaga o tagata pepese na ou matuā fiafia i ai. Na faasolosolo ina ou iloa afai ou te manaʻo e faafiafiaina Ieova le Atua, e tatau ona tuu aʻu musika malomaloā soonafai, atoa foʻi ma le olaga lē mamā ma le faatāuaina o tagata e fesootaʻi i na musika.

Na ou matuā fiafia i aʻu musika ma loʻu lauulu uumi. Na ou tau mafaufau pe e mafai ona ou tuua na mea. E ese foʻi loʻu ita leaga, ma na tatau ona pulea loʻu ita. Ae na tuputupu aʻe loʻu alofa iā Ieova, e ala i aʻu lesona faale-Tusi Paia. Na ou fiafia i le Atua ina ua ou aʻoaʻoina lona alofa, faapalepale ma le alofa mutimutivale. Na ou tatalo atu iā Ieova e fesoasoani mai e sui loʻu olaga, ma na tali mai o ia. Ua ou iloa le moni o upu o loo i le Eperu 4:12 e faapea: “O loo ola le afioga a le Atua ma e matuā malosi foʻi.”

Ina ua amata ona ou aufaatasi ma Molimau a Ieova, na ou iloa ai e ese i latou. O le taimi muamua lea i loʻu olaga ua ou vaai ai i tagata e alolofa moni. Na ou vaaia lenā alofa aemaise lava i tauaofiaga tetele a Molimau. Na ou maofa i le maelega o tagata tauofo e galulue ina ia sologa lelei na fonotaga.

LE AUALA NA AOGĀ AI IĀ TE AʻU: Ua mafai nei ona pulea loʻu ita e ala i le fesoasoani a Ieova. Ua ou lagona ua ou lē toe manatu faapito ma faamaualuga.

Ae ou te taʻutino atu, na iai le taimi na ou misia ai lava loʻu olaga tuai, a o lenei ua ou lē toe misia. Ua iai se fuafuaga moni o loʻu olaga. Ua ou fiafia ona ua ou naunau i isi tagata, atoa foʻi ma lo latou lelei.

“Ua ou olioli ona o le alofa i isi.”—GEOFFREY NOBLE

TAUSAGA: 59

ATUNUU: IUNAITE SETETE

TALAAGA: NA TETEE I PULEGA A LOTU MA MALO

O LOʻU OLAGA SA IAI: Na ou ola aʻe i Ipswich, Massachusetts, o se nuu i le talafatai. Ina ua ou matua, na ou filifili ai e nofo i se nuu maotua o Vermont. Na ma ola ma laʻu uō teine i se olaga e lē tele ni meafaitino, pe a fua i olaga o tagata Amerika i Mātū. Talu ai e leai se ma eletise, na faaaogā ai fafie mai i le vaomatua e faamāfanafana ai le fale ma fai ai meaʻai. Na tū i fafo le falelētaʻua, ma e lē maua se vai i le tele o taimi. Na ma teena le tele o meafaitino e pei ona masani ai tagata, ma na atagia atu i o ma foliga ma teuga. I se tasi taimi, e leʻi selua loʻu ulu mo le ono masina.

 O le taimi lenā na auai ai le Iunaite Setete i le taua a Vietiname. Na aafia ai laʻu vaai i pulega. Na ou vaai ai i le faagutugutulua o malo ma lotu. Na ou manatu e lē mafai ona fesoasoani mai na faalapotopotoga iā te aʻu, ma e tatau ona filifili le tagata lava ia i le mea e saʻo ma sesē. Na ou manatu e lē leaga le gaoi o mea ou te manaʻomia.

LE AUALA NA SUIA AI E LE TUSI PAIA LOʻU OLAGA: Na amata ona ma faitauina ma laʻu uō teine le Tusi Paia, ae e leai ma se uiga iā i maʻua. Na ou faaaogāina fuālaau faasāina e ui lava na ou taumafai e tuu. Na manaʻo laʻu uō e ma te faaipoipo ma fai se ma fanau. O le taimi lenā na asiasi mai ai se Molimau a Ieova i lo ma fale, ma amata ai loa sa ma lesona faale-Tusi Paia.

E leʻi umi ae mafai ona tuu aʻu masaniga leaga, ae peitaʻi na faafaigatā iā te aʻu ona sui laʻu vaai i ē o iai le pule. O laʻu masani le fesiligia o mea uma. Na ou ola aʻe i se olaga e pule lava aʻu i le mea e fai, o le mea lea na faigatā ai ona ou ola e tusa ai ma tulafono a se isi tagata.

Na ou talitonu e iai Lē na faia mea, ae e leʻi tele soʻu iloa iā te ia. A o oʻu suʻesuʻeina le Tusi Paia, na ou aʻoaʻoina ai uiga o Ieova le Atua. Na ou mātauina ai e na te taʻu saʻo mai le mea e finagalo o ia ou te faia. E matuā manino lava ana tulafono. Na ou aʻoaʻoina ai e finagalo o ia ina ia avea le lalolagi ma parataiso. (2 Peteru 3:13) Ona o na upu moni, na ou manaʻo ai e fai ni suiga i loʻu olaga, ina ia ou agavaa e auauna iā te ia.

O le mea na sili ona ou fiafia ai, o le lē auai o Molimau a Ieova i taua. E na o le pau lea o le lotu i le lalolagi aoao ou te iloaina, e tutusa uma lo latou talitonuga faale-Tusi Paia e faatatau i taua.

Na ou iloa afai ou te fia auauna iā Ieova, e tatau ona fai faalelei oʻu foliga. O le taimi muamua, na leʻi lelei oʻu faalogona e fai oʻu ofu i le auala e lāʻei ai Molimau. O i matou ma aʻu uō, e leai se isi o i matou e iai se ofutino lelei, se ofuvae lelei, po o ni seevae lelei. Ae e leai foʻi ma soʻu fusiua! E ui i lea, na ʻoti loʻu ulu ma fai faamanaia oʻu foliga. Ou te manatua lava le taimi muamua na ou auai ai i le talaʻiga mai i lea fale i lea fale. Na ou vaaia oʻu foliga fou i se tioata. Ona ou faapea ifo lea, ‘Auoi ta fēfē!’ Peitaʻi, na iʻu ina ou masani i oʻu foliga fou.

LE AUALA NA AOGĀ AI IĀ TE AʻU: Na ma faaipoipo ma laʻu uō, ma o loo fiafia pea le ma aiga. Na mafai ona ma aʻoaʻoina le ma fanau e toʻatolu ina ia alolofa ma auauna iā Ieova. Na ou fiafia foʻi e fesoasoani i isi ina ia latou iloa upu moni o le Tusi Paia ia na suia ai foʻi loʻu olaga.

Na masani ona ou mimita i loʻu lē popole i manatu o isi. A o lenei ua ou olioli ona o loʻu alofa i isi, ma e latou te alolofa mai foʻi iā te aʻu.

[Faamatalaga faaopoopo i le itulau 26]

“E mamao se mea ou te savali ai ina ia maua saʻu mariuana e ula”

[Faamatalaga faaopoopo i le itulau 28]

“O mea na ou aʻoaʻoina mai i le Tusi Paia, na suia ai laʻu vaai i le olaga”

[Faamatalaga faaopoopo i le itulau 29]

“Na leʻi lelei oʻu faalogona e fai oʻu ofu i le auala e lāʻei ai Molimau”