Aiseā na Lē Auai ai Iesu i Faiga Faapolotiki?

SEʻI faaata le vaaiga na iai i le tausaga e 32 T.A. Ua leva le aso. Ua lauiloa Iesu le Mesia na valoia, i lona faamālōlōina o tagata mamaʻi ma le toe faatutūina o ē na feoti. Ae o le asō, ua matuā ofo lava le faitau afe o tagata i le mamana o vavega na ia faia ma le faailoa atu o aʻoaʻoga a le Atua. Ae o lea ua ia faatulaga tagata ua galala i le fia aai i vaega. Ua tatalo o ia iā Ieova ma fafaga faavavega i latou uma. Ona ia faatonu atu lea e ao meaʻai o totoe, aua le faamaʻimaua se mea. Faamata o ā ni lagona o na tagata?—Ioane 6:1-13.

Ina ua vāai tagata i vavega na faia e Iesu ma lona tomai i le faatulagaina o le motu o tagata ma le tausiga o i latou, na latou manatu ai e faapea, o Iesu o se tupu e sili ona lelei. (Ioane 6:14) E lē o se mea e faateʻia ai lo latou manatu faapea, ona ua leva ona latou moomoo mo se taʻitaʻi lelei, talu ai o loo mafatia i le pulega a se isi malo. O lea na latou taumafai ai e faamalosia Iesu ia auai i faiga faapolotiki. Ae seʻi vaai la i le auala na tali atu ai Iesu.

Ua faapea mai le Ioane 6:15, “Ua silafia e Iesu o le a ō mai i latou e puʻe iā te ia e fai ma tupu, ona maliu ese ai lea na o ia i le mauga.” Sa manino lelei le tulaga o Iesu. Na tausisi pea o ia i lona lē auai i faiga faapolotiki a lona nuu. Sa leʻi suia lava lona tulaga. Na ia fetalai e faapena foʻi le tulaga e ao ona tausisia e ona soo. (Ioane 17:16) Aiseā na ia filifilia ai lea tulaga?

Aiseā na Filifili ai Iesu e Lē Auai?

O le lē auai o Iesu i faiga faapolotiki a lenei lalolagi sa faavae lelei i taʻiala faale-Tusi Paia. Seʻi iloilo ni taʻiala se lua.

“Ua pule . . . le tagata i le isi tagata ma ua matuā afāina ai.” (Failauga 8:9) O le faamatalaga lenā a le Tusi Paia i le talafaasolopito o pulega a tagata. Manatua foʻi, na soifua muamua Iesu o se agaga i le lagi a o leʻi afio mai le lalolagi. (Ioane 17:5) Na silafia lelei e Iesu, e ui i taumafaiga a le tagata, ae e lē agavaa o ia e tausia manaʻoga o le faitau piliona o tagata, ma e leʻi faia o ia e le Atua e faia faapea. (Ieremia 10:23) Sa silafia e Iesu le auala moni e foʻia ai faafitauli o tagata, ma e lē ala mai i faigāmalo faaletagata.

“O le lalolagi atoa o loo nofo toʻilalo i le pule a lē o loo leaga.” (1 Ioane 5:19) Pe e faateʻia oe i lenā faamatalaga? Ua faapena foʻi le toʻatele, ona e latou te mafaufau i tagata faamaoni e auai i faigāmalo, talu ai le mananaʻo ia faaleleia le lalolagi ma ia saogalemu. Peitaʻi e ui lava i a latou taumafaiga fitā ae e latou te lē mafai ona foʻia aafiaga mai lē na taʻua e Iesu o “le pule o lenei lalolagi.” (Ioane 12:31; 14:30) O le māfuaaga lenā na fetalai ai Iesu i se alii maualuga i le malo: ‘⁠O loʻu malo e lē mai le lalolagi nei.’ (Ioane 18:36) O Iesu, o le Tupu filifilia o le malo faalelagi a le Atua. Ana auai Iesu i mea faapolotiki, ua lē faamaoni la o ia i le malo o lona Tamā.

Po o lona uiga na aʻoaʻoina e Iesu ona soo, e leai sa latou matafaioi e faia i malo o le lalolagi. E leai, ae na ia aʻoaʻo i latou ia iai se vaaiga paleni i o latou matafaioi i le Atua, faapea ma malo.

Sa Faaaloalo Iesu i Pule o Malo

A o aʻoaʻo atu Iesu i le malumalu, sa taumafai le ʻau tetee e maileia Iesu i le faia o se fesili faatogafiti, pe e tatau ona totogi lafoga.  Pe ana faapea atu Iesu e leai, o le a atagia atu ai se agaga fouvale, ma faatupuina ai se agaga tetee i ē sa faileagaina ma fia saʻoloto mai pulega a Roma. Ae ana faapea atu foʻi Iesu ioe, e ono manatu nisi e faapea o loo ia lagolagoina faiga lē tonu o loo latou feagai. Sa atamai ma paleni lelei le tali a Iesu. Na fetalai atu o ia: “Ia totogi atu mea a Kaisara iā Kaisara, a o mea a le Atua ia avatu i le Atua.” (Luka 20:21-25) O lea la, e iai matafaioi a ona soo i le Atua, faapea foʻi ma Kaisara, lea e faasino atu i malo.

O faigāmalo ua mafai ai ona sologa lelei nuu i le tele o taimi. Ua talafeagai ai lo latou tāpā o ona tagatānuu ia latou faamaoni, totogi a latou lafoga, ma usitaʻi i le tulafono. O le ā le faaaʻoaʻoga na faataatia e Iesu i le totogiina o “mea a Kaisara ia Kaisara”? Sa ola aʻe Iesu i ni mātua na usitaʻia le tulafono e ui lava e leʻi faigofie. O se faataʻitaʻiga, e tusa ma le 90 maila (150 km) le mamao o le malaga a Iosefa ma si ana avā maʻitaga o Maria i Peteleema, ina ua poloaʻia i le tusigāigoa a Roma. (Luka 2:1-5) Sa faapena foʻi ona usitaʻi Iesu i le tulafono, e aofia ai le totogiina o lafoga e ui sa leʻi tatau ona ia faia. (Mataio 17:24-27) Sa ia matuā faaeteete foʻi ina neʻi sopotapulaa lana pule i isi mataupu. (Luka 12:13, 14) Ioe, sa faaaloalo Iesu i faatulagaga a le malo e ui e leai sana vaega na faia ai. Ae o le ā le uiga o le fetalaiga a Iesu o “mea a le Atua ia avatu i le Atua”?

Le Auala na Avatu ai e Iesu ‘⁠Mea a le Atua i le Atua’

Na fesiligia Iesu po o lē fea tulafono e sili i tulafono a le Atua. Na tali o ia: “ ‘⁠Ia e  alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.’ O le poloaʻiga silisili ma le muamua lenā. E faapena foʻi le poloaʻiga lona lua, ‘⁠Ia e alofa atu i lou tuaoi e pei o oe lava iā te oe.’ ” (Mataio 22:37-39) Na aʻoaʻo e Iesu e faapea, a oo loa i taimi e avatu ai ‘⁠mea a le Atua i le Atua,’ o le mea muamua e tatou te avatu iā te Ia o le alofa, ma o tatou lotoatoa ma ia faamaoni atoatoa.

Pe e tatau ona vaeluaina lenā alofa? Pe e tatau ona avatu se vaega mo Ieova ma lona malo faalelagi, a o le isi vaega e mo se malo faalelalolagi? Na taʻua e Iesu lava ia le taʻiala: “E lē mafai ona pologa se tasi i ni matai se toʻalua, auā e ʻinoʻino o ia i le tasi ae alofa atu i le isi, pe e pipii atu i le tasi ae manatu faatauvaa i le isi.” (Mataio 6:24) O loo faatatau le fetalaiga a Iesu i le vaeluaina o le faamaoni o se tasi i le Atua ma ʻoa, ae e manino mai, e tutusa lona manatu ma ona soo i le uluaʻi senituri, e faatatau foʻi lenā taʻiala i le aafia ai i mea faapolotiki.

Ua faaalia e faamaumauga mai anamua, e leʻi faia se vaega a soo o Iesu i mea faapolotiki. Sa latou avatu le tapuaʻiga uma i Lē na tapuaʻi i ai Keriso, ma sa lē mafai ai ona latou faia se taʻutinoga o le faamaoni atu iā Roma ma lana emeperoa, e auauna ai faafitafita pe taliaina foʻi se tulaga aloaʻia i le malo. O lea, e tele mafatiaga na oo ai iā i latou. O nisi taimi e tuuaʻia sesē i latou e o latou fili, e faapea o ē “e lē alolofa i tagata.” Pe e saʻo na tuuaʻiga?

E Manatu Mamafa Kerisiano Moni i Tagata

Seʻi manatu i le poloaʻiga sili lona lua na taʻua e Iesu i tulafono a le Atua—“Ia e alofa atu i lou tuaoi e pei o oe lava iā te oe.” E manino  mai, e lē tatau ona feita soo moni o Keriso i isi tagata. Na alofa Iesu i tagata, galue mamafa ma fesoasoani i ai, e oo lava i mea faigofie ma faafitauli o aso faisoo.—Mareko 5:25-34; Ioane 2:1-10.

E ui i lea, o le ā sa lauiloa ai Iesu? E leʻi taʻua o ia o Lē e fai faamālōlōga, po o Lē e fafagaina le faitau afe, ma Lē e faaola i ē maliliu, e ui sa ia faatino na matafaioi mataʻina. Peitaʻi, na taʻu o ia e tagata o le Aʻoaʻo, ma ua talafeagai lenā taʻu. (Ioane 1:38; 13:13) Sa faamatala e Iesu le māfuaaga na afio mai ai o ia i le lalolagi, o le aʻoaʻoina lea o tagata e faatatau i le Malo o le Atua.—Luka 4:43.

O le māfuaaga lenā ua tuutoina atoatoa ai soo moni o Iesu i le galuega lava e tasi sa pisi ai lo latou Alii a o iai i le lalolagi, o le aʻoaʻoina lea o tagata i le tala lelei o le Malo o le Atua. Ua faatonuina e Iesu Keriso Kerisiano moni uma ina ia aʻoaʻo tagata uma i le lalolagi e uiga i lenā mataupu. (Mataio 24:14; 28:19, 20) O le a pule lenā malo lelei atoatoa faalelagi i foafoaga ola uma a le Atua, e faavae i le tulafono o le alofa. O le a faataunuuina ai le finagalo o le Atua, ma aveeseina ai mafatiaga ma le oti. (Mataio 6:9, 10; Faaaliga 21:3, 4) E lētioa lava taʻua e le Tusi Paia le feʻau a Keriso o le “tala lelei”!—Luka 8:1.

E faapefea ona e iloa po o ai soo moni o Keriso i aso nei? Pe faamata e latou te auai i faiga faapolotiki o lenei lalolagi? Po o avea ea le galuega na faia e Iesu ma a latou galuega autū, i le talaʻia ma le aʻoaʻoina o tagata e uiga i le Malo o le Atua?

Pe e te fia malamalama atili e uiga i le Malo o le Atua, ma le auala e aafia ai lou olaga i le taimi nei? E matou te faalaeiau oe e faafesootaʻi Molimau a Ieova i lou vaipanoa, pe tagaʻi i lo latou polokalame i le Initaneti, i le www.watchtower.org.

[Ata/Pusa i le itulau 24]

Pe Lagolagoina e Molimau a Ieova o Latou Vaipanoa?

E leai se vaega fai a Molimau a Ieova i faiga faapolotiki. Peitaʻi, e latou te matuā fesoasoani atu i tagata o ituaiga uma po o ā lava o latou tulaga, i o latou vaipanoa. O nisi nei o faamaoniga:

▪ O Molimau a Ieova o se vaega o tagata tauofo e silia ma le fitu miliona, o ē ua faaalu le silia i le 1.5 piliona o itula i le aʻoaʻoina o tagata i tausaga taʻitasi, i mea o loo taʻua i le Tusi Paia ma le auala e foʻia ai masaniga ma amioga e lamatia ai, i le atiina aʻe o aiga fiafia, ma le faaleleia o o latou olaga.

▪ Ua latou lomia ma tufatufaina atu lomiga e aunoa ma se totogi i le silia i le 500 gagana e aofia ai ma gagana e lē o lomia e le atunuu.

▪ E latou te faia aʻoga e aʻo ai le tautala atu i le lautele lea ua aogā i le faitau miliona e iloa ai ona tautala manino atu ma le faautauta.

▪ E latou te lagolagoina aʻoga i le aʻoina o le faitau ma le tusitusi, lea ua telē se aogā i le faitau sefulu afe o tagata i le lalolagi aoao.

▪ Ua latou faamaopoopoina le silia i le 400 Komiti o Faugāfale o le Vaipanoa i le lalolagi aoao, e toleni ai tagata tauofo i le tomai i faugāfale ma le fausiaina o Maota mo Sauniga. I le sefulu tausaga ua tuanaʻi, e silia i le 20,000 maota mo tapuaʻiga sa fausiaina.

▪ O loo faia so latou sao i le lalolagi aoao e ala i fesoasoani laveaʻi i Molimau a Ieova ma ē e lē o ni Molimau ua mafatia i mala faalenatura. I totonu o le lua tausaga ina ua mavae ni afā mataʻutia na taia ai le Iunaite Setete, na toe fausiaina e Molimau a Ieova na tauofo le silia ma le 90 Maota mo Sauniga, faapea ma fale o aiga e 5,500.

[Ata i le itulau 23]

Ina ua uunaʻia e tagata Iesu e auai i mea faapolotiki, ona maliu ese ai lea “na o ia i le mauga”