Puipuia e Tagata Filemu Lo Latou Igoa Lelei

E FAAILOA ATU I TAGATA UMA O RUSIA E FAAPEA: E faitau miliona tagata i le silia ma le 230 atunuu i le lalolagi aoao o le a faitau i lenei lomiga ma iloa ai faiga lē tonu i Rusia, ma ua lē maua ai le saʻolotoga o nisi e tapuaʻi ai. O lenei mekasini, e numera tasi i le aofaʻi o kopi ua faaliliuina ma faasalalauina atu i le lalolagi aoao, ma ua faaliliuina lenei mataupu i gagana e 188. E silia ma le 40 miliona kopi o le a faasalalauina atu. O lea, atonu e lē o fia faailoaina atu e nisi o le malo o Rusia faiga lē tonu o loo latou faia i Molimau a Ieova. Peitaʻi, e moni fetalaiga a Iesu: “Auā e leai se mea e matuā natia e lē faaalia, e leai foʻi se mea lilo e lē faailoaina.”​—LUKA 12:2.

IĀ Tesema 2009 ma Ianuari 2010, na faalauiloa mai ai e ni faamasinoga sili e lua a Rusia e faapea, o Molimau a Ieova o se lotu e faatupu faalavelave. Peitaʻi, o le mea foʻi lea na tupu muamua a o pulea Rusia e le Soviet. E faitau afe Molimau na molia sesē e faapea e tetee i le malo. Na faaaunuua i latou, faafalepuipuiina ma ave i nofoaga o faasalaga. Na taʻumamāina Molimau a Ieova ina ua paʻū lenā faigāmalo, ma toe aloaʻia ai lo latou igoa lelei e le faigāmalo fou.  * Ae o lea foʻi ua toe taumafai nisi tagata e faaleagaina le igoa lelei o Molimau a Ieova.

I le amataga o le 2009, na aveesea ai e le malo le saʻolotoga e tapuaʻi ai Molimau a Ieova. Iā Fepuari, e silia ma le 500 Molimau a Ieova na suʻesuʻeina e leoleo i le atunuu atoa. Aiseā? O loo taumafai e saʻili ni solitulafono ua faia e Molimau. I masina mulimuli ane, na osofaʻia ai e leoleo faapotopotoga o Molimau a Ieova a o faia a latou sauniga, faapea ma o latou fale, ma ave lomiga ma meatotino. O lōia Molimau mai isi atunuu sa fesoasoani iā i latou, na tipoti ese mai le atunuu ma e leʻi toe maua ni o latou pemita e toe ulufale ai i Rusia.

Iā Oketopa 5, 2009, na taofia e le ofisa o le tiute se uta o lomiga a Molimau i le tuaoi o Rusia ma Siamani, i le  vaipanoa e lata i le aai o St. Petersburg. Na lomia nei lomiga i Siamani mo le tele o faapotopotoga i Rusia. Na iloiloina le uta e se vaega o tiute e faapitoa i le suʻesuʻeina o uta e faasā. Aiseā? Sa taʻua i se pepa e faapea, “ona atonu o loo iai ni faaupuga e faatupu ai le vevesi.”

Na faateteleina faiga lē tonu na faia e le malo i Molimau a Ieova. Na faalauiloa mai e Faamasinoga Sili a Rusia ma le Altay Republic (o se vaega o Rusia) e faapea, o nisi lomiga a Molimau, e aofia ai ma lenei lomiga, e faatupu faalavelave. Na fai le apili a Molimau a Ieova e teena ai lea faalauiloaga, ma na faailoa mai foʻi le popolega o i latou e tulimataʻia saʻolotoga o tagata i le lalolagi aoao, ae e leʻi amanaʻia e Rusia. O loo tumau pea faaiʻuga a faamasinoga ma ua faasā ona aumai i le atunuu lomiga faale-Tusi Paia pe tufatufaina atu foʻi.

O le ā se tali a Molimau i nei taumafaiga e faaleaga lo latou igoa ma taofi la latou talaʻiga? E faapefea ona aafia le saʻolotoga o tagata Rusia e tapuaʻi ai, ona o le faaiʻuga a Faamasinoga?

Vave Ona Tali Atu i le Lamatiaga

I le aso Faraile iā Fepuari 26, 2010, e tusa ma le 160,000 Molimau a Ieova na tufatufaina atu sāvali faapitoa e 12 miliona i Rusia atoa. O le ulutala o le sāvali, Could It Happen Again? A Question for the Citizens of Russia. (O se Fesili Tāua mo Tagata o Rusia: Pe Faamata e Toe Tupu?) I le ʻafa o le lima i le vaveao, na faapotopoto ai le faitau selau o Molimau mai Usol’ye-Sibirskoye, o se aai i Siberia, faatasi ma nisi sa faaaunuua mai i Rusia i Siberia i le 1951, ona o lo latou talitonuga. E ui ina mālūlū le tau, ae na mafai ona tufa uma a latou sāvali e 20,000.

Na faia se faatalanoaga a Molimau a Ieova ma faalapotopotoga eseese o faasalalauga i Moscow, le laumua o Rusia, e faalauiloa atu ai le tufatufaina o sāvali mo aso e tolu. O se tasi o tootoo na valaaulia e lauga ai, o Lev Levinson mai i le Faalapotopotoga e Aloaʻia Aiā Tatau. Na ia taʻua sauāga ma faasāsāga lē tonu na faia muamua i Molimau a Ieova e le pulega a Nasi i Siamani ma le Soviet Union, ae na toe aveesea tuuaʻiga uma na faia faasaga i Molimau. Na ia taʻua foʻi: “O lotu uma na sauāina i le taimi o le pulega a le Soviet, na toe taʻumamāina e le peresitene o Yeltsin mai i moliaga na tuuaʻia ai, ma na toe  faafoʻi uma a latou meatotino. O le mea e sili ona tāua i Molimau a Ieova, o le toe maua lea o lo latou igoa lelei.”

Ae o lea foʻi ua toe lamatia lenā igoa lelei. Na faapea mai Levinson, “Ua toe sauāina foʻi lenei faalapotopotoga e le malo lava e tasi na faatoese muamua, ona o le sauāina fua o i latou.”

E Toʻatele na Lagolagoina le Tauiviga

Pe na taunuu le sini o le tufatufaina atu o sāvali? Na taʻua e Levinson: “Sa ou vaaia tagata e faimalaga i nofoaafi, o faitauina sāvali na tufaina atu e Molimau a Ieova i Rusia atoa. . . . O loo saofafaʻi lelei ma faitau.” * Seʻi faitau i ni mea na tutupu.

Na talia e se loomatua mai i se vaipanoa e lotu Musalimi se sāvali ma fesili po o le ā le ʻauga o le sāvali. Ina ua taʻu i ai e faatatau i aiā tatau ma saʻolotoga o tagata i Rusia, na fai mai o ia: “Faafetai o lea ua faia i ai se taumafaiga. Ua toe foʻi lava Rusia i le taimi a o pulea e le Soviet Union. Faafetai mo la outou galuega lelei. Malo lava!”

E tuu atu se sāvali i se fafine i Chelyabinsk, ae fai mai o ia: “O lea ua iai laʻu kopi, ma ua uma ona ou faitauina. Ou te fiafia i la outou galuega, ma ou te lē iloa se isi lotu e maopoopo e pei o outou i le puipuia o o outou talitonuga. E manaia le auala e tou te lāʻei ai, ma e tou te faaalia foʻi le magafagafa i isi. E tou te tausisi i o outou talitonuga ma e foliga mai, o loo faatasi le Atua ma outou.”

Na fesiligia se tamāloa i St. Petersburg, pe na fiafia i mea na faitau ai i le sāvali. Na fai mai o ia: “Ioe. Na maniti oʻu tino a o faitauina, ma ou tagi, ona o le taimi lea  na lokaina ai le tinā o loʻu tinā e le pulega a le Soviet. O inā na ou malamalama ai i ē na loka faatasi ma ia. E tele tagata solitulafono na iai, ae na lokaina ai foʻi ma le toʻatele o tagata ona o o latou talitonuga. E tatau ona iloa e tagata uma le mea na tupu, ma ua talafeagai le mea o loo outou faia.”

O le a Faapeʻī le Lumanaʻi?

E tāua tele i Molimau a Ieova i Rusia le saʻolotoga sa latou maua mo le lua sefulu tausaga. Ae e latou te iloa, e vave ona toe mou atu. E tusa ai ma faiga taufaaleaga o loo faia e Rusia i Molimau, e faatoʻā iloa i le lumanaʻi, po o le a toe foʻi Rusia i le vaitaimi o sauaga mataʻutia o tagata ona o a latou tapuaʻiga.

Peitaʻi, e ui i sauāga ma teteega, o loo maumauaʻi pea Molimau a Ieova e talaʻia le feʻau o le filemu ma le faamoemoe. O loo manino mai i le sāvali faapitoa la latou filifiliga maumaututū: “E lē taulau taumafaiga e taofia i matou. E lē mafai ona taofia lo matou tautatala atu ma le faaaloalo e uiga iā Ieova le Atua ma lana Afioga, le Tusi Paia. (1 Peteru 3:15) E matou te leʻi faavaivai e ui i sauāga ogaoga a le pulega a Nasi i Siamani, po o sauāga ogaoga a lo tatou malo i le taimi ua tuanaʻi, ma e matou te lē faavaivai foʻi i le taimi nei.—Galuega 4:18-20.”

[Faaopoopoga i lalo]

[Ata i le itulau 20]

I le 14 o tausaga o Vladimir Litvin (81 ona tausaga), na faaaunuua ai o ia i Krasnoyarskiy Kray. Na ia taʻimuaina se vaega o Molimau a Ieova i le tufaina atu o le sāvali faapitoa i le taeao o le Aso Faraile

[Ata i le itulau 21]

Na fiafia foʻi Nikolai Yasinski (73 ona tausaga) e auai i le tufaina o sāvali. Na ia fesili e faapea: “Pe moni o le a toe sauāina foʻi i tatou ma aveesea lo tatou saʻolotoga e tapuaʻi ai iā Ieova?”

[Ata i le itulau 21]

O Stepan Levitsky (85 ona tausaga) ma lana avā, o Yelena. E 10 tausaga o loka ona e maua o iai sana kopi o le Olomatamata

[Pusa i le itulau 19]

Tusi Faamaonia o le Taʻumamāina

Na faasaʻoloto i le 1990 le vaega na totoe o Molimau na lokaina i le vaitaimi o le pulega a le Soviet i Rusia. E faitau afe Molimau a Ieova na olioli ina ua taʻumamāina i latou, e ala i tusi mai i le malo e faamaonia ai, e lē o i latou o “ni fili o le malo,” ae o tagata na faasala sesē. Ua taʻua nei pepa o Tusi Faamaonia o le Taʻumamāina.

[Pusa i le itulau 19]

Po o Faapogaia e Nei Lomiga le Faatupu Faalavelave?

O nisi nei o lomiga a Molimau a Ieova ua taʻua e le Faamasinoga e Sili Ona Maualuga a Rusia, o loo uunaʻia le faatupu faalavelave

▪ Laʻu Tusi o Tala o Le Tusi Paia * (i luga)

▪ Faalatalata Atu iā Ieova

▪ Life—How Did It Get Here? By Evolution or by Creation?

▪ Mankind’s Search for God *

▪ Fesili ua Fesili Mai ai Talavou—Tali e Aogā *

▪ O ā Aʻoaʻoga Moni a le Tusi Paia? *

Ua faatāua e nei lomiga le Atua, ma le Tusi Paia. Ua faalaeiauina ai tagata ia mafaufau lelei, ma iloilo aʻoaʻoga ma manatu ua aʻoaʻoina ai i latou. Faamata e tatau ona faasā nei lomiga?

[Faaopoopoga i lalo]

[Pusa i le itulau 20]

O se Feʻau Tāua

O le sāvali e taʻua o le Could It Happen Again? A Question for the Citizens of Russia (O se Fesili mo Tagata Rusia: Pe Faamata e Toe Tupu?), ua faaalia manino ai o Molimau a Ieova, e lē o ni tagata e faatupu faalavelave. Ua faaalia ai le tutusa o taumafaiga i le taimi nei e faaleagaina Molimau a Ieova, ma faiga lē tonu ma sauāga ogaoga na faia iā i latou a o pule le Soviet Union. Ua valaaulia i latou e faitau i le sāvali ina ia tagaʻi i le Initaneti, o loo iai se vaega faapitoa i le gagana Rusia i le www.jw-russia.org, ma faitau ai i le talaaga ma galuega a Molimau a Ieova i Rusia. O loo faaalia ai foʻi se vaega o le lauga a le peresitene Rusia o Dmitri Medvedev, i le Aso Faamanatu o Tagata na Sauāina e le Malo. * O loo aofia ai foʻi ma Molimau a Ieova, e ui o se tapuaʻiga e toʻaitiiti ona tagata i lenā vaitaimi o le pulega a le Soviet Union.

[Faaopoopoga i lalo]

[Pusa i le itulau 21]

Manatua i Latou na Sauāina

O faamatalaga o loo i lalo, na faia e le peresitene o Dmitri Medvedev talu ai nei, i le aso na faamanatu ai ē na sauāina a o pule le Soviet:

“O le asō, o le Aso Faamanatu o Ē na Sauāina e le Malo. . . . E lē matāea i o tatou mafaufau le ogaoga o faiga faamataʻu sa faia i le atunuu atoa . . . Na fasiotia ai vaega eseese o tagata o lo tatou atunuu. . . . Na sauāina ai tagata o tapuaʻiga eseese. . . . ma e faitau miliona soifua na afāina ai. Na fasiotia tagata e aunoa ma se faamasinoga po o ni faamaumauga po o ai i latou; na faaaunuua ma ave i nofoaga o faasalaga mamafa ma aveesea uma aiā tatau, ona e ʻsesē le galuega po o tagata e tupuga mai ai.’ . . . Pe a tatou mafaufau i ai: E faitau miliona i latou na maliliu ona o sauāga ma faiga lē tonu. Na aveesea uma a latou aiā tatau, e oo lava i le aiā e tanu faalelei ai. Sa galo atu i latou mo le tele o tausaga ma peiseaʻī e leʻi soifua mai.”

“E leai se faamolemolega mo sauāga.”