O Afea e oo Mai ai le Taua o Amaketo?

“Ona ou iloa lea, faauta foʻi! o se motu o tagata e toʻatele e lē mafai e se tasi ona faitaulia mai i atunuu uma, ma ituaiga, ma nuu, ma gagana . . . o ē ua sao mai i le puapuaga tele.”—FAAALIGA 7:9, 14.

UA TOEITIITI ona oo mai lea o le taua o Amaketo. E faapefea?

Ua iai se faalapotopotoga o tagata i le lalolagi aoao, o ē o loo auauna iā Ieova ma ola e tusa ma tapulaa tau i amioga mamā o loo i le Tusi Paia. E ala i le fesoasoani a le Atua, ua faapotopoto faatasi ai le faitau miliona mai i atunuu uma, ituaiga ma gagana, ina ia faia aʻe ai se ʻauuso autasi ma alolofa. E iai lenā alofa faaleuso i Molimau a Ieova.—Ioane 13:35.

Ua toe o se aga ona faapotopoto lea e Satani o lana ʻautau ma matuā tetee mai faasaga i nei tagata filemu, ma e foliga mai e leai so latou puipuiga. (Esekielu 38:8-12; Faaaliga 16:13, 14, 16) E faapefea ona e mautinoa e uiga i lenā mea moni? Ua faamatala mai i le Tusi Paia ni mea patino o le a tutupu, e tatou te iloa ai le taimi e oo mai ai le taua o Amaketo, ma ua faataunuuina le tele o na mea.

Mea ua E Vaai o Faataunuuina

Na fesili soo o Iesu pe faapefea ona iloa e tagata le taimi e oo mai ai “le taufaaiʻuiʻuga o le faiga o mea a le lalolagi.” (Mataio 24:3) Na tali Iesu i lona taʻua o se vaitaimi i le lumanaʻi, “o le a siitaua atu [ai] isi atunuu i isi atunuu, ma isi malo i isi malo, o le a iai foʻi oge ma mafuiʻe i lea mea ma lea mea.” Ona toe faapea atu lea o ia: “O nei mea uma, o le amataga ia o le tigā o puapuaga.” (Mataio 24:7, 8) Na faamatala e le aposetolo o Paulo lenei lava vaitaimi, “o aso e gata ai,” ma toe faapea mai o le a “sili ona faigatā” na aso. (2 Timoteo 3:1) Pe e te manatu ua talafeagai faamatalaga a na valoaga ma mea o loo tutupu i aso nei?

Aiseā o le a matuā faigatā ai lenei vaitaimi?  Ua taʻua e le aposetolo o Ioane le māfuaaga. Na ia valoia o le a ʻpuupuu le taimi’ e faatino ai gaoioiga a Satani ma ana temoni i le lalolagi. O loo faamatalaina e faapea, “ua lotoa tele” Satani i le taimi lenei. (Faaaliga 12:7-12) Pe e te manatu o loo iai se agaga lotoa ma le faasauā i tagata i aso nei i le lalolagi atoa, ae e lē i se nofoaga e tasi?

Na fetalai foʻi Iesu, o le a faataunuuina se galuega e matuā mataʻina i taimi nei e sili ona faigatā. Na fetalai o ia: “O le a talaʻiina atu lenei tala lelei o le malo [o le Atua] i le lalolagi atoa e fai ma molimau i atunuu uma; ona oo mai ai lea o le iʻuga.” (Mataio 24:14) I aso nei, o loo talaʻia e Molimau a Ieova le tala lelei o le Malo o le Atua i atunuu e silia ma le 235, ma i gagana e sili atu ma le 500. O lomiga faale-Tusi Paia e lua o loo latou lomia, o Le Olomatamata ma le Ala Mai!, o ni mekasini ua sili ona faasalalauina i le lalolagi. E tusa foʻi ma le 100 gagana ua faaliliuina ai e Molimau le Tusi Paia. O la latou galuega, o loo faia e tagata tauofo, ma e faatupeina e ala i foaʻi tauofo. Po ua faataunuuina e lenei galuega talaʻi mataʻina le valoaga a Iesu?

Ua faailoa mai foʻi i le Tusi Paia mea o le a tutupu, ia o le a iʻu tuusaʻo atu ai i le taua i le va o Ieova le Atua ma i latou e tetee iā te ia. Seʻi mātau valoaga e tolu o le a e vaai i le faataunuuga.

Mea e Toeitiiti Ona E Vaai Lea ua Faataunuuina

Valoaga 1. Ua taʻua i le Tusi Paia, e toeitiiti ona faalauiloa mai lea e atunuu uma se taʻutinoga tāua e faapea, “ua filemu ma saogalemu.” Atonu ua manatu i latou, e toeitiiti ona latou foʻia lea o faafitauli tetele. Peitaʻi, e matuā feteenaʻi lava lea manatu ma le mea o le a sosoo mai i lenei fuaiupu.—1 Tesalonia 5:1-3.

Valoaga lona 2. Ona sosoo ai lea ma le filifili o malo eseese, e faasagatau atu i faalapotopotoga a lotu i le lalolagi. Ua faaatagia i le Tusi Paia nei malo i se manufeʻai; ae ua faaataina lotu sesē a le lalolagi i se fafine o loo tiʻetiʻe i le manufeʻai. (Faaaliga 17:3, 15-18) O le a faataunuu ma le lē iloa e lenei manufeʻai faafaatusa le finagalo o le Atua, e ala i le faaumatia o lotu ua faapea mai o i latou o sui o le Atua.

Ua faamatala e le aposetolo o Ioane i se auala faafaatusa le mea o le a tupu: “O seu e sefulu sa e iloa ma le manufeʻai, latou te ʻinoʻino i le fafine talitane, ma faataugā ma faatelenoa iā te ia, latou te ʻaina foʻi lona tino ma susunu uma o ia i le afi. E tuuina foʻi e le Atua i o latou loto ina ia faataunuu lona finagalo.”—Faaaliga 17:16, 17.

Valoaga lona 3. Pe a uma ona osofaʻia lotu sesē, ona faapotopoto lea e Satani atunuu ina ia faaumatia tagata tapuaʻi o Ieova le Atua.—Faaaliga 7:14; Mataio 24:21.

E Faapefea Ona Aafia ai Oe?

Pe afai e te leʻi maua se avanoa e suʻesuʻe loloto ai i le Tusi Paia, e faigatā la ona e talitonu o le a taunuu mea e pei ona taʻua i luga. Ae e iai se māfuaaga lelei e tatou te talitonu ai o le a taunuu na mea, ma e lē o toe umi ona faataunuuina lea. E tatou te mautinoa i na mea, ona ua faataunuuina le tele o valoaga o le Tusi Paia. *

E lelei pe a sema se taimi e iloilo ai le pogai e talitonu ai Molimau a Ieova, ua latalata mai “le taua o le aso tele o le Atua o Lē e ona le malosi uma lava,” ma le māfuaaga e lē tatau ai ona e fefe fua. Ia valaaulia i latou e iloilo faatasi ma oe le manatu o le Tusi Paia i le mea e tatau ona fai, ina ia e iai i le vaega o le a puipuia e Ieova le Atua. (Faaaliga 16:14) O mea e te aʻoaʻoina e ono suia ai lou manatu e faatatau i le lumanaʻi.

[Faaopoopoga i lalo]

[Faamatalaga faaopoopo i le itulau 8]

Po ua faataunuuina e le galuega a Molimau a Ieova valoaga o le Tusi Paia?