INA ia tali lenā fesili, seʻi o tatou tilofaʻia puupuu ni faaaʻoaʻoga se lua o faamasinoga a le Atua o loo taʻua i le Tusi Paia, le Lolo i aso o Noa, ma le faaumatiaga o tagata Kanana.

MANATU O TAGATA: “E sauā le Atua, auā na ia faaoo mai le lolo ma faaumatia ai tagata uma, vaganā ai Noa ma lona aiga.”

MANATU O LE TUSI PAIA: Na faapea mai le Atua: “Ou te fiafia, e lē i le oti o le tagata amioleaga, ae pe a liliuese le tagata amioleaga mai i lona ala, ma ola ai pea o ia.” (Esekielu 33:11) O lona uiga, na tigā le finagalo o le Atua ina ua faaumatia tagata amioleaga i aso o Noa. Ae aiseā na ia faia ai faapea?

O loo taʻua i le Tusi Paia, na faaoo mai e le Atua le faamasinoga i tagata faalēmataʻu i taimi ua mavae, ina ia “fai ma faaaʻoaʻoga i mea o le a oo mai i tagata faalēmataʻu.” (2 Peteru 2:5, 6) O le ā le faaaʻoaʻoga na faataatia e le Atua?

Muamua, e ui e tigā le finagalo o le Atua i le faaumatia o tagata amioleaga, ae o loo ia mātauina i latou o loo faia faiga sauā, ma e tatau ona latou tali atu e tusa ma a latou gaoioiga. O lea, e iai lava le taimi o le a faamuta ai e Ieova amiolētonu ma mafatiaga uma.

Lona lua, o gaoioiga a le Atua i taimi ua mavae, e faailoa mai ai lona alofa. Na ia lapataʻia muamua tagata a o leʻi faaoo mai lana sala faafaamasinoga. Na avea Noa ma sē e talaʻi le amiotonu, ae e toʻatele tagata na lē amanaʻiaina o ia. Ua faapea mai le Tusi Paia: “Latou te leʻi ano i ai seʻia oo mai le lolo ma tafiesea ai i latou uma.”​—Mataio 24:39.

Pe na faaauau pea ona lapataʻia e Ieova ona tagata? Ioe. O se faaaʻoaʻoga, na ia lapataʻia ona tagata Isaraelu, afai e latou te faia le amioleaga e pei o nuu o loo siʻomia i latou, o le a ia faataga fili e osofaʻia le aai, faaumatia Ierusalema, ma ave faaaunuua i latou. Na faia lava e tagata Isaraelu le amioleaga, e aofia ai le faaaogāina o tamaiti e fai ai taulaga. Pe na gaoioi Ieova? Ioe, ae na muamua auina atu perofeta i le tele o taimi e lapataʻia ona tagata, ina ia suia o latou ala manū o lava le taimi. Na taʻua i le Tusi Paia: “E lē faia lava e le Alii Pule Silisili Ese o Ieova se mea, seʻi vaganā ua ia faaali atu ana mataupu faalilolilo i ana auauna, o le ʻauperofeta.”​—Amosa 3:7.

 LE AUALA E TE AAFIA AI: O le faaaʻoaʻoga na tatou maua mai i faamasinoga a Ieova i aso ua mavae, ua aumaia ai iā i tatou se faamoemoe. E tatou te tulimataʻia le faamasinoga a le Atua i le lumanaʻi, e faasaga i ē sauā ia e faapogaia mafatiaga. Ua faapea mai le Tusi Paia: “Auā e faaumatia o ē e fai mea leaga . . . A o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.” (Salamo 37:9-11) O le ā sou manatu i le faamasinoga lea o le a maua ai e i latou o loo mafatia se mapusaga, e sauā pe e alofa mutimutivale?

MANATU O TAGATA: “E sili atu ona leaga le faaumatiaga o tagata Kanana, pe a faatusatusa mai i fasiotiga tagata i aso nei.”

MANATU O LE TUSI PAIA: ʻE tonu ala uma a le Atua. O ia o le Atua faamaoni, e lē o iā te ia se faiga lē tonu.’ (Teuteronome 32:4) E lē faatusatusa atu taua faaletagata i faamasinoga a le Atua. Aiseā? E silasila le Atua i le loto, po o le tulaga moni o le tagata i totonu.

O se faataʻitaʻiga, ina ua faamasinoina e le Atua le aai o Sotoma ma Komoro ma maumauaʻi e faaumatia, na fesiligia ai e le tagata faatuatua o Aperaamo le faamasinotonu a le Atua. Na ia tuufesili pe o le a ia “faaumatia ea o ē e amiotonu faatasi ma ē e amioleaga.” Na onosaʻi le Atua ma faamautinoa atu iā Aperaamo, o le a ia lē faaumatia le aai o Sotoma e tusa ma a latou amioga, pe afai o loo iai ni tagata amiotonu se toʻasefulu. (Kenese 18:20-33) E mautinoa na suʻesuʻe e le Atua loto o na tagata, ma iloa mai ai le tele o le amioleaga.​—1 Nofoaiga a Tupu 28:9.

I se tulaga tutusa, na faamasinoina e le Atua tagata Kanana, ma iloa ai ua tatau ona faaumatia i latou. Na logologoā tagata Kanana i faiga sauā, lea e aofia ai le susunuolaina o tamaiti e fai ai taulaga. * (2 Tupu 16:3) Na iloa e tagata Kanana, sa faatonuina e Ieova Isaraelu ina ia nofoia le laueleele atoa. O tagata Kanana o ē na filifili e nonofo pea i le aai, na latou tetee ma le loto i ai i tagata Isaraelu ae faapea foʻi iā Ieova, o lē na faailoa mai faamaoniga maumaututū o le faatasi mai i ona tagata.

Ae ui i lea, na faaalia e le Atua lona alofa mutimutivale i tagata Kanana na fulitua mai i o latou ala leaga, ae talia ana tapulaa maualuluga. O se faataʻitaʻiga, na faasaoina le fafine talitane o Raava ma lona aiga. E leʻi fasiotia foʻi tagata mai le aai Kanana o Kipeona ma o latou aiga, ina ua latou saʻili atu i le alofa mutimutivale o Ieova.​—Iosua 6:25; 9:3, 24-26.

LE AUALA E TE AAFIA AI: E tatou te aʻoaʻoina se lesona tāua mai le faamasinoga o tagata Kanana. Ua tatou lata atu i “le aso faamasino ma le faaumatiaga o tagata faalēmataʻu.” (2 Peteru 3:7) Afai e tatou te alolofa iā Ieova ma faia le mea e tonu i lana silafaga, e tatou te maua aogā pe a oo i le taimi e na te aveesea ai mafatiaga, i le faaumatia lea o i latou e teena lana pulega amiotonu.

Ua faamautinoa mai ma le alofa e Ieova, e aafia fanau i filifiliga e faia e mātua. Ua faapea mai le Afioga a le Atua: “Ia e filifili i le ola ina ia e ola ai pea, o oe ma lau fanau, e ala i le alofa iā Ieova lou Atua, e ala i le faalogo i lona siʻufofoga ma pipii atu iā te ia.” (Teuteronome 30:19, 20) Po o faamatalaga na a se Atua sauā, po o se Atua e alofa i tagata, ma manaʻo ina ia latou faia se filifiliga saʻo?