E lē o taʻua i le tusi o Ruta le igoa o le tamāloa lea e leʻi manaʻo e faatino lona tiute e tusa ai o le Tulafono a Mose. (Ruta 4:1-12) Pe e tatau ai la ona tatou manatu, o tagata uma lava e lē o taʻua o latou igoa i le Tusi Paia, o ni tagata e leaga ma e lē tāua?

E leai. Seʻi iloilo se isi faaaʻoaʻoga. A o sauni Iesu e faamanatu lana Paseka mulimuli ma ona soo, na ia fetalai atu ai iā i latou ina “ia ō atu i le aai i le tasi tagata,” ma faia sauniuniga o le Paseka i lona fale. (Mataio 26:18) Po o lona uiga o “le tasi tagata” lea o loo taʻua i le mau, o se tagata e leaga po o se tagata e lē tāua? E leai, o lenei tagata o se soo o Iesu. E leʻi taʻua le igoa o lenei tagata, ona e leai se tāua i le tala.

O loo taʻua foʻi i le Tusi Paia igoa o le toʻatele o tagata amioleaga, faapea le tele o faaaʻoaʻoga o tagata faamaoni ae e lē o taʻua o latou igoa. O se faaaʻoaʻoga, ua iloa e le toʻatele le igoa o Eva, le uluaʻi fafine. Peitaʻi, o lona manatu faapito ma lona lē usiusitaʻi lea na lolo atu i ai Atamu, ua māfua ai ona tatou pagatia. (Roma 5:12) Ae i le isi itu, e lē o taʻua i le Tusi Paia le igoa o le avā a Noa, o lē na faaalia le gauaʻi, le lē manatu faapito, ma na ia lagolagoina lana tane i le galuega tāua sa ia faia. O lea, o le lē taʻua o lona igoa e lē faapea ai e lē tāua o ia, pe leʻi faamanuiaina foʻi o ia e Ieova.

E iai foʻi isi tagata e lē o taʻua o latou igoa i le Tusi Paia, ae na tāua ma mataʻina mea sa latou faia ina ia faataunuu ai le finagalo o Ieova. Seʻi mafaufau i le teine pologa Isaraelu lea sa auauna i le maota o Naamanu, o se taʻitaʻiʻau o le vaegaʻau a Suria. Sa ia lototele ma taʻu atu i le avā a Naamanu, e faatatau i le perofeta a Ieova i Isaraelu. O lenā mea na iʻu atu ai i se vavega mataʻina. (2 Tupu 5:1-14) Na faataatia foʻi e le afafine o le faamasino Isaraelu o Iefata, se faaaʻoaʻoga mataʻina o le faatuatua. Na ia lotomalie e lē faaipoipo ma lē faia se fanau, ina ia faataunuu ai le tautoga a lona tamā. (Faamasino 11:30-40) E lē o taʻua foʻi igoa o i latou na tusia le silia ma le 40 salamo, faapea perofeta na faatinoina ma le faamaoni o latou tofiga.​—1 Tupu 20:37-43.

Peitaʻi, e sili atu ona mataʻina le faaaʻoaʻoga a agelu faamaoni. E lē mafaitaulia agelu o loo iai, ae e na o le lua agelu o loo taʻua igoa i le Tusi Paia, o Kaperielu ma Mikaele. (Tanielu 7:10; Luka 1:19; Iuta 9) O le toʻatele o isi agelu e lē o taʻua igoa i le Tusi Paia. O se faataʻitaʻiga, na fesili Manoa le tamā o Samasoni i se tasi agelu e faapea: “O ai lou igoa, ina ia o ma vivii atu ai iā te oe pe a taunuu au upu?” Na tali atu le agelu: “Aiseā ua e fesili ai i loʻu igoa?” Na lotomaulalo le agelu, ma na ia teena le viiga lea e na o le Atua e tatau ona avatu i ai.​—Faamasino 13:17, 18.

E lē o faamatala auʻiliʻilia mai i le Tusi Paia le māfuaaga ua taʻua ai igoa o isi tagata ae lē o taʻua igoa o isi. Peitaʻi, e tele ni mea e mafai ona tatou aʻoaʻoina mai iā i latou na auauna ma le faamaoni i le Atua, e aunoa ma le fia taʻutaʻua pe avea o ni ē lauiloa.