Taliina Fesili Faale-Tusi Paia
Pe e iai se fuafuaga na foafoaina ai le lalolagi paneta?
E matuā fetaui lelei le lalolagi mo le faatumauina o le ola, ma e lava ma totoe le vai mo le ola. E fetaui lelei le auala o loo tū faasipa ai le lalolagi, o lona faataamilosaga i le lā, ma lona taaviliga, ina ia ʻalofia ai le aisā o le sami pe soona vevela tele foʻi. Ua puipuia e le vanimonimo ma le malosiaga faamaneta i le manava o le eleele, lo tatou lalolagi mai ave malolosi o le lā. E mataʻina le auala e faalagolago ai meaola i laau faapea foʻi laau i meaola mo le mauaina o le ola. O le mea lea ua manatu ai le toʻatele o tagata, e iai le fuafuaga na foafoaina ai le lalolagi.—Faitau le Isaia 45:18.
Ae e te ono fesili e faapea: ʻPo o lona uiga ea la e aofia ai mafatiaga ma faiga lē tonu i lenā fuafuaga?’—Faitau le Teuteronome 32:4, 5.
Po o le a faataunuuina le fuafuaga na foafoaina ai le lalolagi?
Na foafoaina le lalolagi o se nofoaga e ola fiafia ai tagata e faaaloalo le tasi i le isi, ma alolofa i Lē na foafoaina i latou. O lea, e tutasi le fuafuaga na faia ai le tagata pe a faatusa atu i laau ma meaola. E mafai ona tatou malamalama po o ai Lē na foafoaina mea, ma e tatou te naunau e faaaʻoaʻo i lona alofa ma lona faamasinotonu.—Faitau le Failauga 12:13; Mika 6:8.
E mafai ona faataunuu e Lē na foafoaina i tatou mea uma e finagalo i ai. O le mea lea e tatou te mautinoa ai o le a ia aveesea mafatiaga ma faiga lē tonu, ma toe faafoʻisia le lalolagi e avea o se nofoaga fiafia ma lelei mo tagata.—Faitau le Salamo 37:11, 29; Isaia 55:11.