Toma: Manaia ua ta toe feiloaʻi. E ese loʻu fiafia i a ta talanoaga faale-Tusi Paia i vaiaso taʻitasi. * Ae, o ā mai oe?

Ioane: Manuia lava faafetai.

Toma: Mālō lava. I le vaiaso ua teʻa, na ta talanoa ai pe aiseā e talitonu ai Molimau a Ieova na amata pule le Malo o le Atua i le tausaga e 1914. * I le ta talanoaga, na ta iloa ai se faamaoniga mai i se valoaga o loo i le mataupu e 4 o le tusi a Tanielu. O e manatua foʻi le mea o loo taʻua ai?

Ioane: O loo taʻua ai le miti a le tupu o Nepukanesa i se laau telē.

Toma: Lenā tonu lava. I lana miti na ia vaaia ai se laau ua oo i le lagi, ona ia faalogo atu lea i le faatonuga mai i se agelu a le Atua o faapea mai e tuu i lalo le laau, ae tuu pea i le eleele le tagutugutu o le pogati. Pe a māeʻa “taimi e fitu” ona toe tupu ai lea o le laau. * Na ta talanoaina foʻi le māfuaaga e faapea atu ai e lua faataunuuga o lenei valoaga. O e manatua le faataunuuga muamua?

Ioane: Na faataunuu iā Nepukanesa lava ia ina ua leaga lona mafaufau i tausaga e fitu, e saʻo?

Toma: Saʻo lelei. Na taofia le pulega a Nepukanesa ina ua leaga lona mafaufau mo sina taimi. Ae o le faataunuuga sili o le valoaga, na taofia ai le pulega a le Atua i le lalolagi mo se vaitaimi po o taimi e fitu. Manatua foʻi, na amata taimi e fitu ina ua faatoʻilaloina Ierusalema i le 607 T.L.M. Na amata mai i le taimi lenā ona lē toe iai se tupu i le lalolagi e faaataina mai le pulega a Ieova i ona tagata. Peitaʻi, i le iʻuga o taimi e fitu, na tofia ai e le Atua se Pule po o se Tupu fou i le lagi e pule mai i ona tagata. A faafaigofie le manatu, o le iʻuga o taimi e fitu e amata ai le pulega a le Malo o le Atua i le lagi. O lea ua ta iloa le taimi na amata ai taimi e fitu. Afai e ta te iloa le umi o taimi e fitu, ona maua ai lea o le taimi tonu na amata pule ai le Malo o le Atua. Po o e tau maua mai?

Ioane: Ia, manaia tele lou toe taʻua ua ou manatua ai.

Toma: Mālō le onosaʻi. Seʻi faaauau la le ta talanoaga ma vaai po o le ā le umi o taimi e fitu. Na ou toe suʻesuʻe i lenei mataupu ina ia ou manatua ai manatu tāua. O le a ou taumafai e faamatala atu.

Ioane: Ia ua lelei.

Toma: I le faataunuuga muamua o le valoaga iā Nepukanesa, o taimi e fitu e uiga atu i le fitu tausaga. Peitaʻi, o le faataunuuga sili lea e aofia ai le Malo o le Atua, o taimi e fitu e umi atu nai lo o tausaga e fitu.

Ioane: O le ā le uiga o lau tala?

Toma: Manatua foʻi, na amata taimi e fitu ina ua faatoʻilalo Ierusalema i le 607 T.L.M. O lea, pe a tau mai i inā le fitu tausaga, e tatau la ona uma i le 600 T.L.M. Peitaʻi, e leai se mea mataʻina na tupu i le pulega a le Atua i lenā tausaga. E lē gata i lea, ua uma foʻi ona ta talanoaina a o iai Iesu i le lalolagi i senituri mulimuli ane, na ia faailoa mai ai e leʻi māeʻa taimi e fitu.

Ioane: O lea ua ou manatua atu.

Toma: O lea, o taimi e fitu e lē uiga atu i tausaga e fitu, ae e aofia ai se vaitaimi umi.

Ioane: O le ā le umi?

Toma: Ua fesoasoani mai le tusi o Faaaliga lea e fesootaʻi lelei ma le tusi o Tanielu iā i taʻua, e iloa ai po o le ā tonu le umi o taimi e fitu. O loo faailoa mai ai o le umi o le tolu ma le ʻafa taimi e tutusa ma le 1,260 aso. * O lea, pe a faaluaina le tolu ma le ʻafa taimi ona maua lea o taimi e fitu, e tutusa lenā ma le 2,520 aso. Po o e maua mai?

Ioane: O lea ua ou maua atu, ae ou te lē iloa pe faapefea ona iloa ai na pule le Malo o le Atua i le 1914.

Toma: Ia seʻi o ta vaai la i le fesootaʻiga. I nisi taimi i valoaga o le Tusi Paia, o le aso e tasi e faaata mai ai le tausaga. * Afai e tutusa le aso ma le tausaga, o lona uiga o taimi e fitu e tutusa ma le 2,520 tausaga. Pe a tau mai le 2,520 tausaga mai i le 607 T.L.M., e uma tonu lava i le 1914. * O lea, o le 1914 e uma ai taimi e fitu, ae amata ai ona pule Iesu o se Tupu i le Malo o le Atua. O le isi itu e mataʻina ai, o le tele o mea iloga na tutupu i le lalolagi talu mai lenā tausaga, na faailoa mai i le Tusi Paia e iloa ai aso e gata ai.

Ioane: O ā mea na tutupu?

Toma: Seʻi mātau mea na taʻua e Iesu i le Mataio 24:7 o le a tutupu pe a amata ona pule o ia i le lagi: “O le a siitaua atu isi atunuu i isi atunuu, ma isi malo i isi malo, o le a iai foʻi oge ma mafuiʻe i lea mea ma lea mea.” Mātau, na valoia e Iesu o le a iai oge ma mafuiʻe a o faagasolo na taimi. Pe lē moni e tele tulaga faapena ua vaaia i lo tatou lalolagi, talu mai le senituri ua mavae?

Ioane: O le mea moni lenā.

Toma: I lenā lava fuaiupu, na taʻua ai e Iesu o le a iai taua i le taimi e faatasi mai ai o le Tupu o le Malo o le Atua. Ma na valoia i le tusi o Faaaliga e lē gata o le a iai taua i totonu lava o atunuu, ae o taua foʻi i le lalolagi atoa a o faagasolo taimi o le iʻuga. * E te silafia le tausaga o le taua muamua a le lalolagi?

Ioane: O le 1914, oi e tutusa ma le tausaga lea na e taʻua na amata pule ai Iesu. E leʻi tau muamua loʻu mafaufau i lenā manatu.

Toma: Pe a tuufaatasi nei faamaoniga eseese, ona tatou iloa ai lea o le valoaga i taimi e fitu  ma isi valoaga o le Tusi Paia e faatatau i le taimi o le iʻuga, e talafeagai lelei. O le māfuaaga lenā e talitonu ai Molimau a Ieova na amata pule Iesu i le lagi i le 1914, ma o le tausaga foʻi lenā na amata ai aso e gata ai. *

Ioane: O lea ou te taumafai e malamalama atu.

Toma: Mālō le onosaʻi. E pei ona ou fai atu, na umi foʻi se taimi o oʻu taumafai e malamalama i nei manatu. Ae ou te faamoemoe ua fesoasoani le ta talanoaga e te iloa ai, e ui lava e lē o taʻua patino mai le tausaga 1914 i le Tusi Paia, peitaʻi e tele faamaoniga faale-Tusi Paia e faavae mai ai talitonuga o Molimau a Ieova e faatatau i lenā tausaga.

Ioane: Ioe, o le māfuaaga lenā ou te fiafia ai iā te outou, ona e tou te faaaogā lava le Tusi Paia e faamaonia ai tou manatu. Ae o lea ou te mafaufau pe aiseā ua lavelave ai nei manatu. Aiseā na lē faailoa saʻo mai ai e le Atua i le Tusi Paia, o le 1914 e amata pule ai Iesu i le lagi?

Toma: Manaia tele lau fesili. O le mea moni, e tele mea e lē o faamatala auʻiliʻili mai i le Tusi Paia. Aiseā na finagalo ai le Atua e tusia le Tusi Paia, i se auala e manaʻomia ai ni taumafaiga a tagata e malamalama ai? O le ā sou manatu, e te fia talanoa i lenā fesili pe a ou toe sau?

Ioane: Manaia foʻi lenā tonu.