E faigofie ona faapea mai nisi, o Satani ua na o se faailoga o le amioleaga. Ae po o le aʻoaʻoga moni lenā a le Tusi Paia? Afai e saʻo lenā manatu, aiseā la ua faamatala ai i le Tusi Paia na talanoa Satani iā Iesu Keriso, ma i le Atua Silisili Ese? Seʻi o tatou iloiloina na talanoaga e lua.

Ina ua amata le talaʻiga a Iesu, na taumafai le Tiapolo e faaosoosoina faatolu o ia. Muamua, na ia taumafai e faaosooso Iesu e faaaogā lona mana mai i le Atua i se auala manatu faapito, e faamalie ai lona fia taumafa. Na ia toe faaosoosoina foʻi Iesu e tuu lona soifua i se tulaga lamatia ina ia uaʻi uma atu isi iā te ia. O le faaosoosoga mulimuli, na ofo atu ai e Satani iā Iesu le pule i malo uma o le lalolagi, pe afai e tau lava o sina tapuaʻiga e na te avatu iā te ia. Sa teena e Iesu na faaosoosoga uma, e ala i le sii mai o ni mau mai i Tusitusiga Paia.​—Mataio 4:1-11; Luka 4:1-13.

O ai lea na talanoa ma Iesu? Pe sa ia talanoa i se uiga leaga i totonu iā te ia lava? E tusa ai ma le Afioga a le Atua, sa “tofotofoina [Iesu] i mea uma lava e pei o i tatou, a ua leai se agasala ua iā te ia.” (Eperu 4:15) Ua taʻua foʻi i le 1 Peteru 2:22: “E leʻi faia e ia se agasala, e leʻi tautala foʻi lona fofoga i ni upu taufaasesē.” Na tumau ona lelei atoatoa ma faamaoni Iesu. E na te leʻi faatagaina se uiga leaga e atiaʻe i totonu o ia. E mautinoa e leʻi talanoa Iesu i se uiga leaga i totonu o ia, ae na ia talanoa atu i se tasi e iai moni lava.

Ua faaalia i lenei talanoaga isi faamaoniga e iloa atili ai e iai moni lava Satani.

• Ia manatua na ofo atu e le Tiapolo iā Iesu le pule i le lalolagi atoa, pe afai e tau lava o sina tapuaʻiga e avatu iā te ia. (Mataio 4:8, 9) E leai se uiga o le ofo a Satani pe ana faapea e leai moni lava o ia. E lē gata i lea, e leʻi fesiligia e Iesu le pule na iā Satani e foaʻi atu ai malo o le lalolagi iā te ia.

• Ina ua teena e Iesu faaosoosoga, ona ʻalu ese lea o le Tiapolo mai iā te ia seʻia oo i se isi taimi talafeagai.’ (Luka 4:13) Pe e te manatu o Satani o se uiga leaga, po o se fili e maumauaʻi ma finafinau?

• Mātau, na ō mai “agelu ma auauna atu” iā Iesu. (Mataio 4:11) Po o ni foafoaga agaga na agelu, lea na saunia faalaeiauga ma se fesoasoani aogā mo Iesu? Ioe. Pe e tatau foʻi la ona tatou faapea atu o Satani o se foafoaga agaga?

O le talanoaga lona lua e aofia ai le mea na tupu iā Iopu, o lē na faamaoni i le Atua. Ua taʻua i lenā tala ni talanoaga se lua a le Tiapolo ma le Atua, lea na viiviia ai e le Atua Iopu i lona faamaoni. Na finau atu Satani e māfua ona auauna Iopu i le Atua ona o ni māfuaaga manatu faapito, aemaise mea o loo foaʻi atu e le Atua iā te ia. I nisi faaupuga, na faapea atu le Tiapolo e sili atu lona iloa o Iopu nai lo le Atua. Na faataga e Ieova Satani e aveesea meatotino a Iopu, o lana fanau, e oo lava i lona soifua mālōlōina. * Mulimuli ane, na matuā manino mai le saʻo o Ieova e faatatau iā Iopu, ma faamaonia ai le pepelo o Satani. Na faamanuia Ieova iā Iopu ona o lona faamaoni.​—Iopu 1:6-12; 2:1-7.

I talanoaga a le Atua ma Satani, faamata na talanoa Ieova i se uiga leaga i totonu o ia? Ua faapea mai le Tusi Paia: “O le Atua moni e atoatoa ona lelei lona ala.” (2 Samuelu 22:31) Ua taʻua foʻi i le Faaaliga 4:8: “E paia, e paia, e paia Ieova le Atua o Lē e ona le malosi uma lava.” O le paia, o lona uiga o le mamā, ma ua vavaeese mai i le agasala. E lelei atoatoa Ieova, e lē ponā, ma e matuā lē maua iā te ia se uiga leaga.

E ono finau mai nisi o Iopu e lē o se tagata moni, ma o le talanoaga atoa ua na o se tala faafagogo. Ae pe e talafeagai lenā manatu? Ua faaalia e isi mau o le Tusi Paia sa iai moni lava Iopu. O se faataʻitaʻiga, i le Iakopo 5:7-11, o loo faaaogā ai Iopu o se faaaʻoaʻoga mo Kerisiano e onosaia taimi faigatā, ma faamāfanafana ai i latou i le iloa o le a tauia e Ieova lo latou tutumau. Faamata e aogā lenā faaaʻoaʻoga pe ana faapea e leai se Iopu ma e lē moni osofaʻiga a le Tiapolo? E lē gata i lea, i le Esekielu 14:14, 20, o loo taʻua ai Iopu faatasi ma Noa ma Tanielu o ni tagata amiotonu. I le pei o Noa ma Tanielu, o Iopu o se tagata moni lava ma o se tane e malosi lona faatuatua. Afai la na iai moni Iopu, pe e leʻi iai moni foʻi la lē na faapogaia ona mafatiaga?

Ioe, ua faaalia mai e le Tusi Paia e iai moni lava Satani. O lea, e te ono tomānatu, ʻPe e mafai ona lamatia ai aʻu ma loʻu aiga i aso nei?’

Seʻi faapea ua faafuaseʻi ona lolofi atu ni tagata solitulafono i lo outou aai. E mautinoa e lamatia ai le ola ma o le a faatuputeleina le amioleaga. Seʻi iloilo se isi vaaiga faapena: Ua faafuaseʻi ona lafo mai i le lalolagi Satani ma ana temoni, o ni foafoaga agaga e tetee i le Atua. O le ā le iʻuga? Seʻi mafaufau i mea e te matamata ai i tala fou ma tala mai i atunuu mamao.

• Po o e vaaia le faatupulaʻia o faiga sauā i le lalolagi, e ui i taumafaiga ina ia taofia?

• Po o e vaaia le faatupulaʻia o faafiafiaga e faaauiluma ai faiga faataulāitu, e ui o loo popole ai le toʻatele o mātua?

• Po o e vaaia le faaleagaina o le siʻosiʻomaga e ui i taumafaiga e faasaoina?

• Po o iai se mea e foliga mai o loo sesē i lo tatou lalolagi, atonu o se malosiaga o loo uunaʻia tagata e faia mea leaga?

Faamolemole mātau po o ai lea e taʻua i le Tusi Paia o loo i tua o nei faafitauli: “Ona lafo ifo lea o le tarako tele, o le uluaʻi gata lea, ua igoa foʻi i le Tiapolo ma Satani, o lē ua faasesēina le lalolagi atoa; ua lafo ifo o ia i le lalolagi, ua lafo ifo foʻi ana agelu faatasi ma ia. . . . Oi talofa i le laueleele ma le sami, auā ua alu ifo iā te outou le Tiapolo ua lotoa tele, auā ua na iloa ua puupuu lona taimi.” (Faaaliga 12:9, 12) E tusa ai ma faamaoniga ua iloiloina, e toʻatele o le a faapea mai o Satani o se foafoaga agaga mataʻutia tele, ma o ia le pogai o mea leaga o loo tutupu i le lalolagi.

O lea, e tāua lou iloa o le auala e puipuia ai oe. Ua saunia e le mataupu o sosoo mai ni fesoasoani aogā.