E tusa pe e faalemafaufau pe e faaletino lau galuega, ia manatua “e iai le itu lelei e maua mai i ituaiga o galuega uma.” (Faataoto 14:23) O se tasi o itu lelei, o le galue mamafa e fesoasoani e tausia ai o tatou manaʻoga faaletino. E moni ua folafola mai e le Atua e na te saunia mea e manaʻomia e i latou e auauna atu ma le faamaoni iā te ia. (Mataio 6:31, 32) Peitaʻi, e na te faatalitalia foʻi e fai la tatou vaega, e ala i le taumafai malosi e saʻili mea e tatou te ola ai.​—2 Tesalonia 3:10.

E mafai la ona manatu i a tatou galuega o se auala e ausia ai se sini. O le galue o se auala tāua lea e faatino ai o tatou tiute tauave. Ua faapea mai Iosua e 25 tausaga: “O le mauaina o mea e tausia ai oe lava, e tusa lenā ua e taulau manuia i se mea. Pe afai ua mafai ona e totogiina mea o loo e manaʻomia, o lona uiga o lenā ua taunuu le fuafuaga o lau galuega.”

O le galue mamafa e saosaolaumea foʻi i le lelei o tatou faalogona e faatatau iā i tatou lava. E moni e lē faigofie le galue mamafa. Peitaʻi, afai e tausisi i a tatou galuega, e tusa pe e foliga mai e lē manaia pe e faigatā, e mafai lava ona lagona le faamalieina i le iloa o loo tatou galulue malolosi, ma teena le faanaunauga e lē fia galue mamafa. (Faataoto 26:14) Ua faapea mai Arona lea na taʻua i le mataupu ua mavae: “E ese loʻu fiafia  pe a uma se aso o oʻu galue. E ui ou te lēlavā ma atonu e lē o mātauina e isi aʻu galuega, ae o le mea tāua ua ou faataunuuina se mea.”

O loo taʻuleleia i le Tusi Paia se tane e “tomai i lana galuega,” ma se fafine e ʻfiafia i galuega a ona lima.’ (Faataoto 22:29; 31:13) E moni e lē otometi ona tomai se tagata i se mea, ma e toʻaitiiti nisi o i tatou e fiafia e fai mea e tatou te lē lelei ai. Atonu o le pogai lenā e lē fiafia ai le toʻatele i a latou galuega, ona e lē o matuā taumafai ia lelei i a latou galuega.

O le mea moni, e toetoe o so o se ituaiga galuega lava e mafai ona fiafia i ai se tagata, pe afai e tuu atoa i ai lona mafaufau, pe uaʻi atu ia aʻoaʻoina auala e fai faalelei ai lana galuega. Ua faapea mai Viliamu e 24 tausaga: “E matuā faamalieina oe pe afai e te faia le mea sili e te mafaia i se galuega, ma vaai atu i iʻuga lelei. E lē mafai ona e maua lenā faalogona pe afai e te faia ni auala faigofie.”

Ia ʻalofia le mailei o le tau ina mafaufau i le aofaʻi o tupe e te mauaina. Nai lo o lea, ia fesili ifo iā te oe lava: ʻAiseā e talafeagai ai lenei galuega? O le ā e tupu pe a lē faia lenei galuega, pe e lē saʻo foʻi le auala e fai ai? E faapefea ona aogā i isi laʻu galuega?’

E tāua tele ona mafaufau i le fesili mulimuli, auā e matuā faamalieina i tatou pe a vāai atu o loo aogā i isi a tatou galuega. Na fetalai Iesu i le Galuega 20:35: “E sili le fiafia e maua i le foaʻi atu i lo o le talia mai.” E lē gata e aogā a tatou auaunaga i ē o loo faaaogāina ma ē o loo tatou faigaluega ai, ae o a tatou galuega mamafa e aogā foʻi i o tatou aiga ma ē e matitiva.

O tatou aiga. E lua ni aogā o le galue malosi o se tamā ia tausia lona aiga. Muamua, ua ia faamautinoa ua maua e lona aiga mea e manaʻomia i le olaga, e aofia ai meaʻai, lavalava ma fale. Ua ia faataunuu foʻi lona tiute tauave mai i le Atua, ia ʻtausi i ē e tatau ona ia tausia.’ (1 Timoteo 5:8) Lua, o le toʻaga e faigaluega e tausia lona aiga, ua ia faataatia ai se faaaʻoaʻoga i le tāua o le galue mamafa. Ua faapea mai Shane lea na taʻua i le mataupu ua mavae: “O loʻu tamā o se faaaʻoaʻoga sili lea o sē e toʻaga e faigaluega. O se tamā faamaoni na galue malosi i lona olaga atoa, aemaise lava i le kamuta. Ua ou aʻoaʻoina mai ai i lana faaaʻoaʻoga, le tāua o le galue i ou lava lima e fai mea e aogā i isi tagata.”

Ē matitiva. Sa fautuaina e le aposetolo o Paulo Kerisiano ʻia galulue mamafa ina ia mafai ona latou avatu ni mea i se tagata mativa.’ (Efeso 4:28) Pe a galulue mamafa ia tausia i tatou lava ma o tatou aiga, atonu la o le a mafai foʻi ona tatou fesoasoani atu i ē e lē tagolima. (Faataoto 3:27) O lea, o le galue mamafa e mafai ai ona tatou tofo i le matuā fiafia e maua mai i le foaʻi atu.

Na fetalai Iesu i lana Lauga taʻutaʻua i le Mauga: “Pe a tauanau oe e se pule lua te ō ma ia i le maila e tasi, inā ō ia ma ia i maila e lua.” (Mataio 5:41) E faapefea ona e faatatau lenei mataupu silisili i lau galuega? Nai lo o le tau ina fai o mea ua faatonu oe e fai, ia saʻili ni auala e fai ai nisi mea e sili atu. Ia faataatia ni sini, ma ia taumafai ia sili atu ona vave ma lelei le auala e fai ai lau galuega, nai lo o le mea na faatalitalia. Ia faatāua so o se mea e faatatau i lau galuega, e oo lava i ni mea lāiti.

O le a e matuā fiafia i lau galuega pe afai e sili atu nisi mea e te faia. Aiseā? Auā o loo e pulea au mea e fai. Ua sili atu mea ua e faia ona o loo e manaʻo i ai, ae e lē ona na faamalosia oe e se tasi e fai. (Filemoni 14) E tatou te manatua ai le mataupu silisili o loo i le Faataoto 12:24: “O lima o ē e tōʻaaga o le a pule, a o le lima o lē e paiē e iʻu ina avea ma pologa.” E moni e iai nisi o i tatou o le a faamalosia e galulue. Peitaʻi, o le tagata e na te faia na o mea lava ua faatonuina e fai, atonu e na te lagona o loo avea o ia ma pologa, ona o taimi uma lava e na te faia mea o loo mananaʻo ai isi. Ae o le tagata e na te faia nisi mea e sili atu ona e manaʻo i ai, e na te lagona o loo ia pulea pea lona olaga ma ana mea e fai.

E lelei le galue mamafa, ae ia manatua, e iai mea e sili atu ona tāua i le olaga nai lo o galuega. E moni o loo fautua mai le Tusi Paia ia galulue malolosi. (Faataoto 13:4) Ae e lē o fautua mai ia alu uma lo tatou taimi ma le malosi i galuega. Ua taʻua i le Failauga 4:6: “E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.” O lona uiga, e ono lē maua e se tasi le fiafia i iʻuga o ana galuega, pe afai e alu uma lona taimi ma le malosi i lana galuega. O le iʻuga, e lē aogā lana galuega ma e pei o le “ʻai a le matagi.”

E mafai ona fesoasoani le Tusi Paia iā i tatou ia atiaʻe se vaaiga paleni e tusa ai o galuega. E ui lava o loo faapea mai ia faia le mea sili i a tatou galuega, ae o loo fautuaina foʻi i tatou ia ʻfaamautinoa mea e sili ona tāua.’ (Filipi 1:10) O ā mea e sili ona tāua? E aofia ai le faaalu o lo tatou taimi ma aiga ma uō, ae e sili ai mea faaleagaga, e pei o le faitau ma manatunatu loloto i le Afioga a le Atua.

O i latou e faaauau ona paleni o latou olaga, o le a sili atu ona fiafia i a latou galuega. Ua faapea mai Viliamu lea na taʻua muamua: ʻE iai se tasi na avea muamua ma oʻu pule i le galuega, o se faaaʻoaʻoga lelei o sē e iai se vaaiga paleni i galuega. E galue mamafa, ma e lelei lana faiā ma tagata e faaaogāina lana auaunaga, ona o le auala e faatino ai ana galuega. Peitaʻi, e mānava loa, ona ia tuua lea o mea uma ae uaʻi atu i lona aiga ma lana tapuaʻiga. O ia o se tagata e pito i sili ona fiafia ua ou iloaina!’