Taliina Fesili Faale-Tusi Paia
Po o le a toetutū mai ē ua maliliu?
E mautinoa e mafai e Lē na foafoaina le ola ona toe faafoʻisia mai le ola
O Ieova le Atua o le Puna o le ola. (Salamo 36:9) Pe e lē talafeagai la ona faapea atu e mafai foʻi e le Atua ona toe faafoʻisia le ola i ē ua maliliu? Ua faamautinoa mai i le Tusi Paia, o le mea tonu lenā o le a faia e le Atua i le lumanaʻi. (Faitau le Galuega 24:15) Ae aiseā o le a ia faia ai faapea?
I le amataga, na finagalo Lē na faia i tatou ia ola e faavavau tagata i le lalolagi. (Kenese 1:31; 2:15-17) E lē o suia lava lona finagalo lenā mo tagata. E matuā tigā lona finagalo pe a silasila mai i tulaga o loo tatou fesagaʻia i le taimi nei, e pei o le ola i se olaga e tumu i faafitauli ma vave ona maliliu.—Faitau le Iopu 14:1, 14, 15.
O fea o le a toetutū mai ai ē ua maliliu ma ola ai?
Pe na faia e le Atua le tagata e ola i le lagi? E leai. Na faia e le Atua agelu ia ola i le lagi, ae na ia faia le tagata ia ola i le lalolagi. (Kenese 1:28; Iopu 38:4, 7) E tusa ai ma lea manatu, seʻi mafaufau la i ē na toe faatutūina e Iesu. Na ia toe faatutūina i latou i inei i le lalolagi. E faapena foʻi le toʻatele o ē o le a toe faatutūina i le lumanaʻi, o le a toetutū mai ma ola i luga o le lalolagi.—Faitau le Ioane 5:28, 29; 11:44.
Peitaʻi, ua filifilia e le Atua se vaega toʻaitiiti o tagata ina ia toetutū ma ola i le lagi, i ni tino agaga. (Luka 12:32; 1 Korinito 15:49, 50) O i latou nei o le a avea ma tupu faatasi ma Keriso i le lagi, e pulea mai le lalolagi.—Faitau le Faaaliga 5:9, 10.
E te Ono Fiafia Foʻi
LE OLOMATAMATA
E Faapefea Ona E Mautinoa i le Faamoemoe mo Ē ua Maliliu?
E lua māfuaaga mautinoa o loo taʻua i le Tusi Paia e tatou te talitonu ai i le toetū.
TALIINA O FESILI FAALE-TUSI PAIA
O le ā le Toetū?
E te ono maofa iā i latou o le a toe faatutūina mai i le lumanaʻi.
TALIINA O FESILI FAALE-TUSI PAIA
O Ai e Ō i le Lagi?
Ua taatele faamatalaga sesē e faapea mai o tagata lelei uma e ō i le lagi. O ā aʻoaʻoga mai i le Tusi Paia?
