O le Tusi Muamua i le Faapotopotoga i Tesalonia 4:1-18
4 O le toe upu lenei le ʻauuso e, e pei ona outou maua le faatonuga mai iā i matou i le auala e ao ona outou savavali ai e faafiafia le Atua,+ e pei ona outou savavali ai nei, e matou te talosaga ma apoapoaʻi atu iā te outou e ala i le Alii o Iesu, ina ia saga savavali ai pea i lenā auala.
2 Auā ua outou iloa faatonuga* na matou tuuina atu iā te outou mai i le Alii o Iesu.
3 Auā o le finagalo lenei o le Atua, e ao ona faapaiaina outou+ ma faamamao mai i amioga lē mamā taufeusuaʻiga.*+
4 Ia taʻitasi outou ona iloa pulea o lona lava tino*+ ina ia paia+ ma mamalu,
5 ae e lē o le tuʻinanau i le manaʻo tele i feusuaʻiga+ e pei ona masani ai nuu o ē e lē iloa le Atua.+
6 Aua neʻi agaleaga se tasi i lona uso pe solia ana aiā tatau e tusa ai ma lenei mea, auā e tuuina atu e Ieova* le faasalaga o nei mea uma, e pei ona matou muaʻi taʻu atu ma matuā lapataʻia ai outou.
7 Auā ua valaauina i tatou e le Atua, e lē ina ia faia amioga lē mamā, ae ina ia paia.+
8 O lea, o le tagata e manatu māmā i lenei mea, e lē o manatu māmā o ia i tagata a o le Atua,+ o lē e na te foaʻi mai lona agaga paia iā te outou.+
9 Peitaʻi, e lē manaʻomia ona matou tusi atu iā te outou e faatatau i le alofa faaleuso,+ auā ua aʻoaʻoina outou e le Atua ina ia alofa le tasi i le isi.+
10 O le mea moni, o loo outou faia lenei mea i uso uma i Maketonia atoa. Peitaʻi, e matou te ʻaiʻoi atu iā te outou le ʻauuso e, ina ia atoatoa ona outou faia o lea mea.
11 Ia fai ma o outou sini le ola i se olaga filemu,+ ma aua le isuisu fua i mea a isi,+ ae ia galulue i o outou lava lima,+ e pei ona matou faatonuina ai outou,
12 ina ia outou savavali ai ma le amiolelei i le vaaiga a tagata o i tua*+ ma ia lē matitiva i se mea e tasi.
13 E lē gata i lea, le ʻauuso e, e matou te mananaʻo foʻi ina ia outou malamalama e uiga i ē ua momoe i le oti,+ ina ia outou lē faavauvau e pei o isi o ē e leai so latou faamoemoe.+
14 Auā afai e tatou te talitonu na maliu Iesu ma toetū mai,+ e faapena foʻi i latou o ē ua momoe i le oti a o autasi ma Iesu, e toe faaolaina i latou faatasi ma ia e le Atua.+
15 O le mea lenei e matou te taʻu atu iā te outou mai i le afioga a Ieova,* o i tatou o loo ola ma sao atu i le faatasi mai o le Alii, e lē muamua i tatou iā i latou o ē ua momoe i le oti;
16 auā e afio ifo le Alii lava ia mai i le lagi ma le alaga ma le leo o le agelu sili,+ ma le pū a le Atua, e muamua foʻi ona toetutū mai i latou ua feoti o autasi ma Keriso.+
17 Mulimuli ane, ona aveina aʻe lea o i tatou o loo ola ma totoe, faatasi ma i latou i ao+ ina ia feiloaʻi ma le Alii+ i le ʻea; ma o le a tatou faatasi pea ma le Alii.+
18 O lea la, ia outou fefaamāfanafanaaʻi pea i nei upu.
Faamatalaga Pito i Lalo
^ Po o “poloaʻiga.”
^ O le upu Eleni, o le por·nei′a. Tagaʻi i le Uiga o Upu.
^ Ele., “lana lava ipu.”
^ Po o “e lē o i totonu o le faapotopotoga Kerisiano.”
