O le Tusi Lona Lua i le Faapotopotoga i Korinito 11:1-33
11 O loʻu manaʻo, ia outou faapalepale mai iā te aʻu i loʻu lē fetuutuunaʻi. Ae o le mea moni, ua outou faapalepale mai lava iā te aʻu!
2 Auā ua ou fuā iā te outou e pei o le fuā o le Atua,* auā na ou tautō e foaʻiina atu outou e faaipoipo i le tane e toʻatasi, ina ia ou tuuina atu outou iā te ia o se taupou mamā i le Keriso.+
3 Ae ou te popole ina neʻi pei ona faasesēina o Eva e le gata i ana togafiti,+ e faapena foʻi ona faaleagaina o outou mafaufau, ina ia liliuese mai i le faamaoni ma le amio mamā e tatau ona outou faaalia i le Keriso.+
4 Auā afai e alu atu se tasi ma talaʻi atu se Iesu e ese mai i lea na matou talaʻiina atu, pe e na te avatu iā te outou se agaga e ese mai i lea na outou talia, po o se tala lelei e ese mai i lea na outou maua,+ ona vave lea ona outou talia o ia.
5 Auā ua ou manatu e leai se mea e tasi ou te itiiti ai i o outou aposetolo silisili.+
6 Ae e tusa po ou te valea i le upu,+ ou te lē valea lava i le poto; o le mea moni ua matou faailoa atu ai iā te outou i ala uma ma i mea uma lava.
7 Pe na ou faia ea se agasala i loʻu faamaulaloina o aʻu lava ina ia faaeaina ai outou, auā na ou fiafia e folafola atu le tala lelei a le Atua e aunoa ma se totogi mai iā te outou?+
8 Na ou aveesea* mea mai i isi faapotopotoga, e ala i le taliaina o a latou fesoasoani ina ia ou auauna atu ai iā te outou.+
9 Peitaʻi, a o oʻu faatasi ma outou, na ou mativa ae e leʻi fai aʻu ma avega mamafa i se tasi, auā na saunia e uso na ō mai mai Maketonia le tele o mea na ou manaʻomia.+ Ioe, e leʻi fai aʻu ma avega mamafa iā te outou i mea uma lava ma o le a faaauau ona ou faia faapea.+
10 E pei lava ona iai le upu moni a Keriso iā te aʻu, e faapena foʻi ona lē taofia lenei mitamita iā te aʻu+ i vaipanoa o Akaia.
11 Aiseā? Po ona ua ou lē alofa ea iā te outou? Ua silafia e le Atua ou te alofa lava iā te outou.
12 Peitaʻi ou te faia pea le mea o loo oʻu faia,+ ina ia ou taofia ai i latou o loo mananaʻo e faia se mea e tutusa ai i latou ma i matou, i le galuega lea o loo latou mitamita mai ai.
13 Auā o na tane o aposetolo pepelo i latou, o le ʻaufaigaluega faaʻoleʻole, ua faafoliga atu o i latou o aposetolo a Keriso.+
14 E lē o se mea e faateʻia ai, auā e fai ma faafoliga e Satani o ia lava e avea ma agelu o le malamalama.+
15 E lē o se mea foʻi la e faateʻia ai, pe afai e fai ma faafoliga e ana auauna i latou lava o ni auauna o le amiotonu. Peitaʻi, o lo latou iʻuga e tusa lea ma a latou galuega.+
16 Ou te toe fai atu foʻi: Aua neʻi manatu se tasi ua ou lē fetuutuunaʻi. Ae e tusa po o lo outou manatu lenā, ia talia pea aʻu e pei o sē e lē fetuutuunaʻi, ina ia ou mitamita teisi ai foʻi.
17 O laʻu tala e fai atu nei, e lē pei o sē e mulimuli i le faaaʻoaʻoga a le Alii, ae e pei o sē e lē fetuutuunaʻi, o se tagata faasausili e mitamitavale.
18 Talu ai e toʻatele o ē e mitamita i la le tino,* o le a ou mitamita foʻi la.
19 Talu ai ua outou “fetuutuunaʻi” tele, ua outou fiafia ai e faapalepale i tagata e lē fetuutuunaʻi.
20 O le mea moni, ua outou faapalepale i so o se tasi e faapologaina outou, pe faoa ma faaumatia a outou mea, pe faasilisilia o ia lava iā te outou, pe tapō i o outou mata.
21 Ua matou māsiasi e fai atu i nei mea, talu ai e peiseaʻī ua vaivai i matou i manatu o isi.
Ae afai e lototele se tasi e faia se mea, ou te lototele foʻi e gaoioi faapea, e ui e manatu ai se isi iā te aʻu o sē e lē fetuutuunaʻi.
22 Po o i latou o ni tagata Eperu? O aʻu foʻi o le Eperu.+ Po o i latou o ni tagata Isaraelu? O aʻu foʻi o le Isaraelu. Po o i latou o ni fanau a Aperaamo? E faapena foʻi aʻu.+
23 Po o i latou o ni auauna a Keriso? Ua ou tali atu e pei o se tagata ua faalētonu le mafaufau, ua sili aʻu nai lo o i latou: ua tele atu aʻu galuega,+ ua tele taimi e faafalepuipui ai aʻu,+ ua tele foʻi taimi na sasaina ai aʻu, ma e tele taimi na toetoe a ou oti ai.+
24 E faalima ona sasaina aʻu e tagata Iutaia i tā e 39,+
25 e faatolu ona sasaina aʻu i laau,+ e faatasi ona fetogia i maa,+ e faatolu ona malaia o folauga na ou malaga ai,+ na ou i le sami i le ao atoa ma le pō;
26 e masani ona ou malaga, ma lamatia i vaitafe, e lamatia i tagata faomea, e lamatia i tagata o loʻu lava nuu,+ e lamatia i tagata o nuu ese,+ e lamatia i le aai,+ e lamatia i le toafa,* e lamatia i le vasa, e lamatia i uso pepelo,
27 e lamatia i galuega mamafa ma le tigā, i le lē maua o se moe i le tele o pō,+ i le fia ʻai ma le fia inu,+ i le tele o taimi e leai ai ni meaʻai,+ i le mālūlū ma le tau leai o ni lavalava.*
28 E ese mai i le tele o na mea tigā i le tino, ae o le isi mea lenei ua ou tigā ai i lea aso ma lea aso: o le popole i faapotopotoga uma.+
29 Po o ai ea o vaivai, ma po ou te lē vaivai ai foʻi? Po o ai ea ua tausuai, ma po ou te lē matuā ita ai foʻi?
30 Afai e tatau ona ou mitamita, ou te mitamita i mea ua ou vaivai ai.
31 Ua silafia e le Atua, o le Tamā lea o le Alii o Iesu, o Lē e viia e faavavau, ou te lē pepelo lava.
32 O le kovana o Tamaseko, o lē na pule ai Areta le tupu, na ia tuuina leoleo i le faitotoʻa o le aai o tagata Tamaseko ina ia puʻe iā te aʻu,
33 ae na tuutuu ifo aʻu i se ato i se faamalama i le pā o le aai,+ ma na ou sola ai mai iā te ia.
Faamatalaga Pito i Lalo
^ Ele., “maelega o le Atua.”
^ Ele., “faoa.”
^ E faasino atu i le mitamita ona o māfuaaga faaletagata.
^ Tagaʻi i le Uiga o Upu.
^ Ele., “ma le lē lavalavā.”
